د روسیې دولتي خبري اژانس «ټاس» راپور ورکړی، چې په ۲۰۲۵کال کې په دغه هېواد کې د لنډمهاله پناهغوښتنې د غوښتونکو شمېر د پام وړ زیات شوی. د راپور له مخې؛ له اوکراین او سوریې وروسته افغانان په دغه هېواد کې د پناهغوښتنې درېیم لوی شمېر جوړوي.
د طالبانو د کډوالو او بېرته راستنېدونکو چارو وزارت خبر ورکړی، چې په تېرو درېیو میاشتو کې نږدې ۹۴زره کډوالې کورنۍ له ایران، پاکستان او ترکیې نه افغانستان ته ستنې شوې دي. د دغه وزارت په وینا؛ په دغه موده کې ۲۵۴زره او ۲۱۸ کسان له کورنیو پرته په جبري توګه ستانه کړای شوي دي.
په نیمروز کې د طالبانو د فرعي ګمرکاتو ریاست وایي، چې د دغه ولایت په زرنج ښار کې د انساني درملو د قاچاق مخه نیول شوې ده. د یاد ریاست په وینا؛ د زرنج ښار په درېیمې امنیتي حوزه کې په ۸ موټرو کې ځای پرځای شوي ۷ټنه او ۳۲ کیلوګرامه درمل او د ۸۵۶ کیلوګرامه توکو د قاچاق مخه نیول شوې.
په بغلان کې د طالبانو د کرنې، اوبو لګولو او مالدارۍ ریاست وایي، چې دامهال په دغه ولایت کې د چرګانو ۳۶۰ فارمونه له دوی سره ثبت دي. د یاد ریاست په وینا؛ بغلان ولایت د چرګانو د غوښې په تولید کې ځان بسیاینې ته رسېدلی دی.
ټایمز اف اسراییل رسنۍ د منځني ختیځ د ډیپلوماتانو په حواله راپور ورکړی، شپږ اسلامي هېوادونه هڅه کوي چې امریکا او ایران د جمعې په ورځ په عمان کې په روانو خبرو اترو کې له پوځي اقدام څخه تېر او یوې هوکړې ته سره ورسېږي.
د یونان خیوس ټاپو ته نږدې د پناهغوښتونکو د لېږد یوه چټکه کښتۍ د یونان د ساحلي ګارډ له بېړۍ سره ټکر شوې، چې له امله یې شاوخوا ۱۵ کسان مړه شوي دي. د راپورونو له مخې؛ په دغه کښتۍ کې ډېری سپاره کسان افغان کډوال وو.
د افغانستان اتلتیک فدراسیون اعلان کړی، چې د یاد فدراسیون په استازیتوب یو لوبغاړي او یو روزونکي د اسیا اتلتیک اتلولۍ په سیالیو کې ګډون کړی دی. دغه سیالۍ به د سلواغې له ۱۵مې تر ۱۹مې پورې د چین په تیانجېن ښار کې ترسره شي.
د طالبانو د ټولګټو چارو وزارت ویاند وايي، چې د سالنګ لاره د پنجشنبې په ورځ شاوخوا پنځه بجې د درنې واورې، توپان او د لید کچې کمېدو له امله د تګراتګ لپاره تړل شوې ده. هممهاله په بامیان او دایکنډي کې د طالبانو ځایي چارواکو په دغه ولایتونو کې د یوشمېر لارو د تړلو خبر ورکړی.
د ایرانیانو لپاره د امریکا مجازي سفارت په خپلې تازه خبرتیا کې چې د جمعې په سهار خپره شوې، له امریکايي وګړو غوښتي چې له ایران نه ووځي او د وتلو لپاره داسې پلان ولري چې د امریکا د حکومت په مرسته تکیه ونه کړي.
د المپیک نړۍوالې کمېټې غړې سمیرا اصغري اعلان کړی، چې د رایو په اکثریت سره د اتو کلونو بلې دورې لپاره د یادې کمېټې (IOC) د خپلواکه غړې په توګه ټاکل شوې ده. دغه ټاکنه د اېټالیا په میلان ښار کې د المپیک نړۍوالې کمېټې د ۱۴۵مې کلنۍ غونډې د دویمې ورځې په لړ کې شوې ده.
په مسکو کې د معاصر ایران د مطالعاتو مرکز مشر رجب صفروف وايي، د طالبانو سیاستونه ښيي چې د یادې ډلې واک به دوامداره نهوي. هغه له افغانستان انټرنشنل سره په مرکه کې ویلي، دغه سیاستونه به نارضایتي او ولسي پاڅونونه راوپاروي.
سرچینو افغانستان انټرنشنل ته ویلي، د طالبانو او اسلاماباد ترمنځ تر کړکېچ وروسته د پاکستان جماعت اسلامي ګوند پخوانی مشر سراج الحق کابل ته تللی و؛ څو د دواړه خواوو ترمنځ ترینګلې اړیکې بېرته ورغوي. د سرچینو په وینا؛ هغه د طالب مشرانو سره تر لیدنې وروسته پاکستان ته ستون شوی.
د ملګرو ملتونو د ماشومانو ملاتړ صندوق (یونېسف) ویلي، چې په ۲۰۲۵کال کې په افغانستان کې د شپږو میاشتو څخه تر لسو کلونو پورې عمر لرونکو ۹۲.۵ سلنه ماشومانو د شري واکسین ترلاسه کړی.
د اسراییل ۱۲ ټلوېزیوني شبکې راپور ورکړی، چې د دغه هېواد لومړي وزیر بنیامین نتنیاهو د «کنست» د بهرنیو اړیکو او دفاعي کمېټې په یوه محرمه ناسته کې ویلي، چې وضعیت د داسې یو کړکېچ پر لور روان دی چې کېدای شي د ایران د نظام د نسکورېدو لامل شي.
د امریکا د بهرنیو چارو وزارت په فارسي ژبه د خپلې رسمي اېکسپاڼې له لارې د مارکو روبیو وروستۍ څرګندونې بیا ځلې خپرې کړې دي؛ هغه په دغو څرګندونو کې د ایران له اسلامي جمهوریت سره د هر ډول احتمالي هوکړې پر امکان شک څرګند کړی دی.
د اندونیزیا د فوټسال ملي لوبډلې د ۲۰۲۶کال د اسیا جام د نیمه پایلوبې دویمه لوبه کې په یوې په زړه پورې سیالۍ کې جاپان ته ۵-۳ ماتې ورکړه او ددې سیالیو پایلوبې ته یې لار پیدا کړه. اندونیزیا چې ددې سیالیو کوربه هم ده، د شنبې په ورځ به پایلوبه کې د ایران د فوټسال ملي لوبډلې سره مخ شي.
ټایمز اف اسراییل د منځني ختیځ د ډیپلوماټانو په حواله راپور ورکړی، چې شپږ مسلمان هېوادونه هڅه کوي چې په عمان کې د امریکا او ایران ترمنځ د خبرو اترو په ترڅ کې د «یرغل نه کولو» یو تړون لاسلیک شي.
د سپینې ماڼۍ ویاندې کارولین لېویټ ویلي، چې د ایران له اسلامي جمهوریت سره خبرې اترې لا هم روانې دي، خو د امریکا ولسمشر ډونالډ ټرمپ داسې انتخابونه هم لري چې یوازې په ډیپلوماسۍ پورې نه محدودېږي.
د متحده ايالاتو ولسمشر ډونالد ټرمپ د پنجشنبې په ورځ د روسيې د ولسمشر ولاديمير پوتين هغه وړانديز رد کړ، چې لهمخې يې غوښتل د ستراتيژيکو اټومي وسلو د ځای پر ځای کولو محدوديتونه د «نيو سټارټ» د تړون تر پای ته رسېدو وروسته د يو بل کال لپاره په داوطلبانه ډول وغځول شي.
د امریکا جمهوريپال سناتور لینډسي ګراهام وایي، تر هغو چې د لبنان پوځ حزبالله یوه «ترهګره ډله» ونه بولي، دغه هېواد د یوه ډاډمن شریک په توګه نهشي منل کېدای.
د طالبانو تر واک لاندې د افغانستان برېښنا شرکت ویلي، چې افغانستان ته د ازبکستان د وارداتي برېښنا مزي په «تاشقرغان تنګي» سیمه کې پرې شوې دي، چې له امله یې د کابل په ګډون ۱۳ ولایتونه له برېښنا بې برخې شوې دي.