د اریانا افغان هوایي شرکت عمومي رییس بختالرحمن شرافت وايي، پاکستان ته یې وړاندیز کړی و چې د افغانستان د خلکو د اسانتیا لپاره د لا زیاتو الوتنو اجازه ورکړي، خو دا غوښتنه یې پاکستان نه ده منلې.
په اسلاماباد کې د طالبانو سفارت ویلي چې ددغه سفارت سفیر سردار احمد شکیب د اسلاماباد نړیوال اسلامي پوهنتون له رییس ډاکټر احمد سعد الاحمد سره د افغان محصلینو پر ستونزو خبرې کړي.
په بلخ کې د طالبانو د والي ویاند ویلي، محمد یوسف وفا د یو پلاي په مشرۍ د تاجکستان په رسمي بلنه د یاد هېواد پلازمېنې دوشنبې ته سفر کړی. نوموړي زیاته کړې، چې یوسف وفا د تاجکستاني مسولینو سره د لېدنې پرمهال د ترهګرۍ پر وړاندې پر ګډې مبارزې ټینګار کړی.
د پاکستان د پوځ د عامه اړیکو مشر جنرال احمد شریف چودري ویلي، اسلاماباد د هغو وسلهوالو ډلو پر ضد اغېزمن اقدامات کړي چې په افغانستان کې حضور لري. د طالبانو حکومت بیا د پاکستان دا ادعا چې په افغانستان کې وسله والې ډلې شته ردوي.
د طالبانو د مالیې وزارت ویلي، چې په تېرو دوو اونیو کې یې د کندهار، نیمروز او هلمند ولایتونو په بېلابېلو سیمو کې ۳۷،۵۲۶ ټنه قاچاقي توکي نیولي دي. دغه وزارت زیاتوي، قاچاق کوونکو غوښتل یاد توکي له ګمرکي محصول پرته په قاچاقي ډول افغانستان ته داخل کړي.
د طالبانو د عدلیې وزارت ویلي، د لوګر ولایت په مرکز کې د "دشت ابچکان" په نوم ۵۴۷۰ جریبه ځمکه د محکمې له پرېکړې وروسته د دولت ملکیت ګرځول شوې ده.
په اندونیزیا کې د طالبانو سفیر مولوي سعدالله بلوچ د منځنۍ او ختیځې اسیا هېوادونو په چارو کې د دغه هېواد د بهرنیو چارو وزارت له لوړ پوړي چارواکي ریکي احسان سره په جاکارتا کې کتلي دي.
د طالبانو د کډوالو او بېرته راستنېدونکو چارو وزارت خبر ورکړی، چې د پاکستان له زندانونو ۵۸ افغان بندیان خوشې شوي دي. د یاد وزارت له لوري په خپور شوي پیغام کې راغلي، چې دغه کسان د روانې اوونۍ په لړ کې افغانستان ته ستانه کړای شوي دي.
د طالبانو د طبیعي پېښو سره د مبارزې او چمتوالي ادارې مشر نورالدین ترابي د افغانستان لپاره د بریتانیا له ځانګړي استازي ریچارډ لینډزي سره لېدنه کې په افغانستان کې د پېښو د مدیریت د ظرفیت لوړولو په برخه کې یې د همکارۍ غوښتنه کړې ده.
د اوکراین ولسمشر ولادیمیر زېلېنسکي وایي، د روسیې د تېلو پر سترو شرکتونو د امریکا تازه بندیزونه د جګړې د اوږدولو او د ترهګرۍ د خپرولو پرضد یو عادلانه او ضروري ګام دی. زېلېنسکي زیاته کړې، چې د سولې او عدالت لپاره باید پر روسیې دغه ډول فشارونه دوام ومومي.
د طالبانو او پاکستان ترمنځ د کړکېچ پر مهال اسلاماباد د افغانستان ټرانزیټي سوداګري هم بنده کړې وه؛ خو نن یې تر لس ورځني ځنډ وروسته بېرته پیل کړه. د پاکستاني رسنیو د راپورونو له مخې؛ د ټرانزیټي بار وړونکو موټرو د ترخیص بهیر پیل شوی دی.
د ځڼغوزیو د سوداګرو ټولنه وايي، سږکال په خوست ولایت کې د ځڼغوزیو حاصلات تر ۲۰زرو ټنو پورې رسېدلي چې د تېر کال پرتله درې برابره زیاتوالی ښیي. د یادې ټولنې مشر شهزاد ځدراڼ ویلي، که څه هم حاصلات ډېر شوي؛ خو د صادراتو محدودو لارو دوی له بېلابېلو ستونزو سره مخ کړي دي.
د اکټوبر په ۱۱مه نېټه د طالبانو او پاکستاني ځواکونو ترمنځ د نښتو له کبله پر ډیورنډ کرښه ټولې لارې بندې شوې او نن ۱۲مه ورځ ده، چې د مساپرو په ګډون پرې د هر ډول بار وړونکو موټرو تګ راتګ بند دی. دغه بندښت د دواړه غاړو سوداګرو ته درانه مالي زیانونه اړولي.
د طالبانو د صنعت او سوداګرۍ وزیر نورالدین عزیزي د ترکمنستان له مرستیال ولسمشر بایمرداد انامامدف سره د ترکمنستان د تېلو او ګازو د نړۍوال نندارتون په څنډه کې کتلي دي. په یاده لیدنه کې دواړه خواوو پر سیمهییزې اقتصادي همکارۍ، د انرژۍ سکټور پراختیا او د ټاپي پروژې پر اهمیت خبرې کړې.
د طالبانو د بهرنیو چارو مرستیال وزیر محمد نعیم د افغانستان لپاره د چین له ځانګړي استازي یوشیاو یونګ سره په کتنه کې ویلي، دوی له ټولو هېوادونو سره ښې اړیکې غواړي؛ خو پاکستان د دوی حوصله ازمايي.
د بشري حقونو د څار نړۍوال سازمان په خپل تازه راپور کې ویلي، چې طالبانو په تېرو څلورو کلونو کې د افغانستان د رسنیو او عامو وګړو د بیان ازادي په بشپړه توګه لهمنځه وړې ده. دغه بنسټ وایي، د دې ډلې په واک ته رسېدو سره خبریالان له سانسور، شکنجو، زنداني کېدو او بدو حالاتو سره مخ شوي.
د افغانستان لپاره د برېټانیا ځانګړي استازي ریچارډ لېندسي په کابل کې د طالبانو د کډوالو وزیر مولوي عبدالکبیر سره په کتنه کې ویلي، چې دوی د طالبانو او پاکستان ترمنځ له وروستي اوربنده هرکلی او ملاتړ کوي.
د طالبانو تر واک لاندې باختر خبري اژانس خبر ورکړی، چې په هرات کې د «بسمالله صدیقي» خیریه بنسټ په همکارۍ د ۶۰ ځوانو جوړو ډلهییز واده ترسره شو. د واده ټول لګښت چې له یو لک ډالرو زیات اټکل شوی، د یاد خیریه بنسټ لهخوا ورکړل شوی دی.
د خوست د مرکزي زندان لپاره د طالبانو مشر مولوي ذبیح الله طلحه وايي، چې د طالبانو د مشر ملاهبت الله اخوندزاده د فرمان له مخې یې په دغه ولایت کې ۱۸۵ بندیان خوشې کړي او د ۲۹۱ نورو د بند موده یې کمه کړې ده.
د طالبانو تر کنټرول لاندې د کډوالو ستونزو ته د رسېدنې عالي کمېسیون ویلي، پرون له ایران او پاکستان نه ۷۳۲ کورنۍ چې د غړو شمېر یې ۴۲۹۸ کسانو ته رسېږي؛ بېرته افغانستان ته ستنې شوې دي.
له پولیو څخه د پاک افغانستان بنسټ د ګوزڼ ضد مبارزې نړۍوالې ورځې په مناسب له ټولو افغانانو غوښتي، چې په افغانستان کې د ګوزڼ ناروغۍ پر وړاندې مبارزه کې فعاله ونډه واخلي.