د پاکستان لومړي وزیر شهباز شریف ویلي، هېواد یې د څلور مېلیونه افغانانو کوربهتوب کړی او اوس باید افغانستان پرېکړه وکړي چې سولهییز ژوند غواړي که نه. نوموړي ویلي، چې د طالبانو حکومت باید ځوانان د افراطیت پر ځای مثبت لوري ته وهڅوي.
د بالیووډ نوموتی اداکار اکشی کمار او د هغه مېرمن ټوېنکل کنه له یوې ټرافیکي پېښې روغ وتلي دي. د هندي رسنیو د راپورونو له مخې؛ یاده پېښه تېر ماښام شوې، خو چاته پهکې د سر زیان نهدی اوښتی.
په حیرتان بندر کې طالب چارواکي وايي، د روان کال له پیل راهیسې د دغه بندر له لارې تر ۲.۱۵ مېلیون ټنه ډېر واردات او شاوخوا ۱۳۸زره ټنه صادرات شوي چې یوازې په تېرو درېیو میاشتو کې له پاکستان سره د سوداګرۍ تر بندېدو وروسته په وارداتو کې ۶۲ او په صادراتو کې ۴۰سلنه زیاتوالی راغلی.
د طالبانو د ملي دفاع وزارت خبر ورکړی، چې ځواکونو یې د یو لړ عملیاتو په ترڅ کې د لغمان ولایت علیشنګ ولسوالۍ په میل دره سیمه کې ګڼ شمېر وسلې او مهمات نیولي دي.
له پاکستان نه د افغان کډوالو د اېستلو له بهیر سره هممهاله هره ورځ د سپین بولدک او تورخم له لارې سلګونه افغان کورنۍ بېرته افغانستان ته ستنېږي. له دې ډلې ګڼې کورنۍ شکایت کوي، چې د کورنۍ ځینې غړي یې د پاکستاني پولیسو له لوري نیول شوي او لاتراوسه لادرکه دي.
په کندوز کې د طالبانو د کډوالو او بېرته راستنېدونکو چارو ریاست وایي، د روان لمریز کال له پیل راهیسې شاوخوا ۳۳زره کورنۍ دغه ولایت ته ستنې شوې چې د موسسو او ځايي پانګهوالو له لوري ورسره مالي مرستې شوې؛ خو ستنېدونکي کډوال بیا وايي، دغه مرستې د یوه نوي ژوند د پیل لپاره کافي نهدي.
د نایجریا د کادونا ایالت د یوې کلیسا مشر وایي، چې وسلهوالو له دوو کلیساوو څخه لسګونه عبادت کوونکي تښتولي دي. د یادې کلیسا مشر د تښتول شویو کسانو شمېر تر ۱۶۰ ډېر یاد کړی دی.
د طالبانو د صنعت او سوداګرۍ وزارت خبر ورکړی، چې په تېر ۲۰۲۵کال کې د څه باندې ۸۶ مېلیونه ډالرو په ارزښت تر ۱۰۰زره ټنه ډېره پنبه نړۍوالو بازارونو ته صادره شوې ده. دغه وزارت وایي، د پنبې د دغه صاداراتو وزن ۱۰۴زره ټنه ښودل شوی دی.
د نړۍوالو سازمانونو د راپورونو له مخې؛ د نړۍوالو مرستو کمښت، له ګاونډیو هېوادونو د مېلیونونه افغانانو جبري اېستنې او د ژمي سختو شرایطو له امله په افغانستان کې د لوږې ناورین لا پراخ شوی دی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، د دوشنبې په ورځ (د مرغومي ۲۹مه) ۳۴۳ کورنۍ چې ټولیز شمېر یې ۱۷۶۱ کسانو ته رسېږي؛ افغانستان ته ستانه شوي دي. یاد کمېسیون وایي، دغه کډوالو سره لومړنۍ مرستې شوې او خپلو ولایتونو ته هم لېږدول شوي دي.
د تېر جمهوري نظام پرمهال د اطلاعاتو او کلتور وزیر عبدالکریم خرم ویلي، د نړۍ د لویو قدرتونو سیالۍ د بېګناه خلکو ژوند اغېزمن کړی او د کابل د شهرنو چاودنه هم د همدې لوبې یوه برخه ده. نوموړي د دغه پېښې قربانیانو سره خواخوږي څرګنده کړې.
د افغانستان د بشري حقونو خپلواک کمېسیون پخوانۍ مشره شهرزاد اکبر وايي، طالبان په خپلسرو نیونو، شکنجو او ځورولو خپل جرمونه نهشي پټولی. هغې زیاته کړې، چې طالبان به د دغه کړنو حساب ورکوي.
د طالبانو د امربالمعروف، نهې عنالمنکر او شکایتونو اورېدو وزارت خبر ورکړی، چې په بلخ ولایت کې د دوی محتسبینو دوه «مسلکي کوډګر» نیولي دي. د یاد وزارت په وینا؛ دغه کوډګرو خلک دوکه کول او پیسې یې ترې اخیستې.
د پاکستان حکومت د اپوزېسیون مشر محمود خان اڅکزي ویلي، افغانستان د پاکستان لپاره یو لوی سوداګریز بازار و؛ خو د اسلاماباد ناسمو پالیسیو له امله نه یوازې صادرات اغېزمن شوي، بلکې د لسګونه زره کسانو روزګار هم له جدي ګواښ سره مخ شوی دی.
د سوریې د کورنیو چارو وزارت اعلان کړی، چې د داعش ۱۲۰ جنګیالي د شدادي ښار له زندانه تښتېدلي دي. دغه اعلان وروسته له هغه وشو، چې یوې کُردۍ وېبپاڼې د سوریې د دیموکراتیکو ځواکونو د ویاند فرهاد شامي له حوالې لیکلي چې شاوخوا ۱۵۰۰ د داعش غړي له زندانه تښتېدلي دي.
د افغانستان پخواني ولسمشر حامد کرزي د کابل ښار په شهرنو سیمه کې پر یوه چینایي رسټورانټ د شوې چاودنې له امله د اوښتې مرګژوبلې په تړاو اندېښنه څرګنده کړې او دغه برید یې غندلی دی.
د افغانستان د ملي امنیت پخواني مشر رحمت الله نبیل ادعا کړې، چې په کابل کې د چینايي مسلمانانو او افغانانو پر ګډ رسټورانټ برید داعش ډلې د پاکستان په همغږۍ ترسره کړی. نوموړي ویلي، چې د «خالد المنات» په نوم د داعش ډلې مشر د پاکستان په نوشهره سیمه کې د یادې ډلې مشري کوي.
په دایکنډي کې د طالبانو تر واک لاندې له پېښو سره د مبارزې ادارې خبر ورکړی، چې د تېرې ورځې زلزلې له امله په دغه ولایت کې د استوګنې ۶۷کورونه زیانمن شوي دي. یادې ادارې زیاته کړې، چې د کره ارزونې او څېړنې لپاره یې یو پلاوی هم سیمې ته استولی دی.
د طالبانو د معیار او کیفیت ادارې (د مرغومي ۲۹مه) خبر ورکړی، چې په تېره یوه میاشت کې د افغانستان له بندرونو وارد شوي ۴۷۱ تُنه بېکیفیته ودانیز توکي یې بېرته ګرځولي دي. د یادې ادارې ویاند قاري محمد یوسف وایي، دغه توکي له تخنیکي ارزونو او لابراتواري ازموینو وروسته ګرځول شوي.
د پاکستان د کراچۍ ښار په یوه سوداګریز مارکېټ کې اورلګېدنې ۲۶کسان مړه او ۸۱ نور تري تم کړي دي. په دغه سوداګریز مارکېټ کې لګېدلی اور تر ۳۶ ساعتونو وروسته مړ شو. ژغورونکې ډلې وایي، د ودانۍ ۶۰ سلنه برخه نړېدلې ده چې د پلټنې عملیات یې خورا ستونزمن کړي دي.
د طالبانو د سوداګرۍ وزارت یو پلاوی بنګلهدېش ته د سفر پر مهال غوښتنه کړې، چې د افغانستان تولیداتو ته خپلو بازارونو کې زیاته ونډه ورکړي. د یاد وزارت مرستیال احمدالله زاهد د بنګلهدېش د سوداګرۍ وزارت مرستیال سره کتنه کې د افغانستان پر توکو د ګمرکي تعرفو د لېرې کولو وړاندیز وکړ.