یوه کابل مېشتي افغانستان انټرنشنل ته په استولي پیغام کې ادعا کړې، چې له درېیو کلونو راهیسې بېکاره دی او د دندې موندلو لپاره یې کړې هڅې بېپایلې پاتې شوې، ځکه چې په وینا یې «واسطه» نهلري. هغه زیاتوي، د طالبانو په حاکمیت کې له «واسطې» پرته دنده نهورکول کیږي.
د اروپا په پارلمان کې له افغانستان سره د اړیکو د پلاوي مشرې راکل ګارسیا هرمیدا وندروال بروکسل ته د طالب استازو د احتمالي بلنې په اړه سختې نیوکې کړي او د ښځو پر وړاندې یې د دې ډلې تګلاره یې «جنسیتي اپارتاید» او د بشریت ضد جنایت بللی دی.
د پاکستاني چارواکو په وینا، د افغانستان سره پر ډیورند کرښه د لارو د تړل کېدو او د سیمې د سوداګریزو مسیرونو د ګډوډۍ له امله د دغه هېواد بهرنۍ سوداګرۍ ته تر ۱،۴ میلیارد ډالرو زیات زیان اوښتی دی.
د طالبانو د بهرنیو چارو وزارت په ایټالیا کې د درې افغان کډوالو د سوځولو د پېښې په اړه له ایټالیايي چارواکو غوښتي چې د دې پېښې هر اړخیزه، شفافه او عادلانه څېړنه وکړي او عاملان یې د قانون منګولو ته وسپاري.
په شمال کې د طالبانو تر واک لاندې د دولتي شرکت مسوولینو ویلي، چې په ۱۴۰۴ کال کې یې په شمالي ولایتونو کې د ډبرو سکرو له کانونو څخه شاوخوا څلور میلیارده افغانۍ عواید راټول کړي دي.
د طالبانو د ټولګټو چارو وزارت ویلي، چې په بغلان کې د سېلابونو له امله د بغلان ـ کندوز لار د پُل چارشنبې تپې په سیمه کې د موټرو د تګ راتګ پر مخ تړل شوې ده.
د اسراییل لومړي وزیر بنیامین نتنیاهو ویلي چې د ایران د حکومت د سقوط د کره نېټې وړاندوینه شونې نه ده، خو د هغه په وینا، د دغه رژیم دننه شته درزونه ورځ تر بلې پراخېږي او په پایله کې د حکومت د سقوط لامل کېدای شي.
د بېلاروس د دفاع وزیر ویکتور خرینین په مسکو کې د ډلهییز امنیت تړون سازمان د دفاع وزیرانو په غونډه کې اندېښنه ښودلې، چې د طالبانو او پاکستان ترمنځ د سرحدي شخړو او او جګړو له امله ښايي ترهګري ډلې د منځنۍ اسیا هېواددونو ته ننوځي.
د اروپايي پارلمان یوه سیاسي ایتلاف «رینیو یورپ» له اروپايي کمیسیون نه غوښتي، چې بروکسل ته د طالبانو د بللو پرېکړه سملاسي لغوه کړي. دغه ایتلاف ویلي، چې طالبانو په افغانستان کې د ښځو او نجونو ټول بنسټیز حقونه په منظم ډول له منځه وړي دي.
د طالبانو تر واک لاندې د افغانستان برېښنا شرکت ویلي، چې د قرغیزستان او افغانستان د سوداګرۍ ګډې خونې رییس د یادې ډلې د برېښنا اجرايوي رییس سره په لیدنه کې د برېښنا د تولید شبکو په پراختیا او برېښنا د لېږد لویو پروژو کې پانګونې ته لېوالتیا ښودلې ده.
په چین کې د هند سفیر ویکرام دورایسوامي د طالبانو له سفیر اسدالله بلال کریمي سره لیدلي. په بیجنګ کې د هند سفارت پر خپل اېکس لیکلي، چې په دې لیدنه کې دواړو خواوو د ګډو ګټو په برخو کې د همکارۍ د لا پراختیا او پیاوړتیا پر لارو چارو خبرې وکړې.
د برېتانیا د دفاع وزارت د چارشنبې په ورځ په یوه خبرپاڼه کې ویلي چې د شاهي سمندري ځواکونو درې غړي د دغه هېواد په سوېل لوېدیځ کې د یوې چورلکې د لوېدو په پېښه کې وژل شوي دي.
د امریکا ولسمشر ډونالډ ټرمپ منلې ده چې هغه د لبنان د جګړو په تړاو د یوې ټیلیفوني اړیکې پر مهال، په داسې حال کې چې واشنګټن هڅه کوله له ایران سره د روان کړکېچ په اړه خبرې وکړي، د اسراییل لومړي وزیر بنیامین نتنیاهو ته یې ویلي، چې هغه «لیونی» دی.
د امریکا د سمندري ځواکونو یو پخوانی افسر وایي، په افغانستان کې د یوه مرګوني شنه پر ابي ( پر بهرنیو سرتېرو د افغان سرتېرو) برید تجربه د دې لامل شوه چې د مصنوعي ځیرکتیا په مرسته د خطر او باور ارزونې یو نوی سیستم جوړ کړي.
د قزاقستان او قرغیزستان د کورنیو چارو وزارتونو په ګډو عملیاتو کې د قزاقستان په شیمکېنټ ښار کې دوه قزاقستاني وګړي له افغانستان نه د تریاکو د قاچاق په نړۍواله شبکه کې د ښکېلتیا په تور نیولي دي.
د طالبانو تر واک لاندې د افغانستان د سوداګرۍ او پانګونې خونې رییس سید کریم هاشمي اوزبکستان ته د خپل سفر پر مهال د دغه هېواد د سوداګرۍ او صنایعو خونې له رییس سره کتلي او د دواړو هېوادونو ترمنځ یې د سوداګریزو او اقتصادي همکاریو د پراختیا په اړه خبرې کړې دي.
د ډنمارک په نوي حکومتي جوړښت کې افغان الاصله سیاستواله سمیرا نوا امیني د اقلیم، انرژۍ او عامه خدماتو د وزیرې په توګه ټاکل شوې ده. د اقلیمي بدلون او انرژۍ امنیت مسایل د دغه هېواد د نوي حکومت مهم لومړیتوبونه ګڼل کېږي.
د طالبانو د صنعت او سوداګرۍ وزارت وایي، له پاکستان سره د لارو تر بندېدو وروسته د حیرتان بندر له لارې له منځنۍ اسیا سره سوداګري پراخه شوې او په ۲۰۲۵ کال کې صادرات ۷۷ سلنه او واردات ۴۳ سلنه زیات شوي دي.
د امریکا ولسمشر ډونالډ ټرمپ ویلي چې له ایران سره د اوربند غځولو په اړه په روانو خبرو کې مجتبی خامنهیي مهم رول لري او وروستۍ پرېکړه هغه تاییدوي. د امریکا ولسمشر زیاته کړه: «احتمال شته چې په یوه مناسب وخت کې له مجتبی خامنهیي سره هم ووینم».
د طالبانو د احصايې او معلوماتو اداره وايي، چې د ۱۴۰۵ کال په وري او غويي میاشتو کې ۵۷۵۶ بهرنیو وګړو د هوايي ډګرونو او ځمکنیو بندرونو له لارې افغانستان ته تګ راتګ کړی دی. په دې کې یوازې ۳۷ تنه د هوايي ډګرونو له لارې افغانستان ته تللي او یا وتلي دي.
ایراني چارواکي وايي، چې د روان کال له پیله د غویي میاشتې تر پایه پورې یې د دوغارون-اسلام کلا له لارې ۵۸۵ زره ټنه توکي افغانستان ته صادر کړي چې ارزښت یې ۲۹۹ میلیونه ډالره دی. په همدې موده کې له افغانستان نه د درې میلیونه او ۶۲۳ زره ډالرو توکي ایران ته صادر شوي.