آرشیف

د بحرین یوې محکمې د ایران له سپاه پاسداران ځواک سره د همکارۍ په تور نهو کسانو ته د عمري بند سزا اورولې ده. محکمې دوه نور کسان په دری درې کلونو بند محکوم کړي دي.

د امریکا او اسراییل د ولسمشرانو په تازه خبرو کې د ایران د اټومي پروګرام، هرمز تنګي او سیمه ییزو ګواښونو په تړاو خبرې شوې او دواړو لوریو ویلي چې تهران ته به د اټومي وسلو د لرلو اجازه ورنه کړل شي.

د طالبانو تر کنټرول لاندې د کابل سیلو مسوولان وايي، چې له ۳۵ کاله ځنډ وروسته د کابل د سیلو ژرنده بیا فعاله شوې ده. د کابل مرکزي سېلو اجرایوي رییس نصرت الله منصور خبریالانو ته ویلي، چې دا ژرنده په ۲۱ میلیونه افغانۍ رغول شوې ده او په ۲۴ ساعتونو کې به ۱۲۰ ټنه اوړه تولید کړي.

د ایران د سپاه پاسداران سمندري ځواکونو اعلان کړی چې په تېرو ۲۴ ساعتونو کې د تېل لېږدوونکو، کانټینر وړونکو او نورو سوداګریزو بېړیو په ګډون ۳۳ بېلابېلې کښتۍ د دوی په اجازه په خوندي توګه له هرمز تنګي څخه تیرې شوې دي.

د طالبانو د بهرنیو چارو وزارت د یوې اعلامیې په خپرولو سره د پاکستان د بلوچستان ایالت په کوټه ښار کې پر یوه اورګاډي وروستی برید غندلی او وايي، د ملکي وګړو هرډول مرګ‌ژوبله غندي.

د اوکراین پر پلازمېنې د روسیې په تازه بریدونو کې لږ تر لږه ۴ کسان وژل شوي او تر ۸۰ ډېر نور ټپیان دي.په دغه برید کې د اورشنیک تر غږ چټک توغندي په ګډون ۹۰ توغندي او ۶۰۰ ډرونونه توغول شوي دي. او هایپرسونیک توغندی “اورشنیک” هم د کیف ترڅنګ کارول شوی دی.

په کابل کې ځايي سرچینو افغانستان انټرنشنل ته وویل، چې سرای شهزاده ته څېرمه د زرګرانو په مارکیټ کې په وسله وال برید کې د ولسي جرګې پخواني غړي الله ګل مجاهد د زوی احسان الله او د هغه د ساتونکي په ګډون ۴ کسان وژل شوي دي. طالبانو تر اوسه د پيښې په اړه رسمي څه نه دي ویلي.

د طالبانو د بهرنیو چارو وزیر امیرخان متقي د جاپان له سفیر کینیچي ماساموتو سره په کابل کې کتلي او دواړو لوریو د کابل او توکیو د دوه‌اړخیزو اړیکو د پراختیا او د بشري مرستو د دوام په اړه خبرې کړې دي.

د طالبانو تر واک لاندې اریانا افغان هوايي شرکت وايي، چې د مساپرو غوښتنو ته په کتو یې د کابل او ډیلي ترمنځ ورځنۍ دوه طرفه الوتنې پیل کړې دي. له دې وړاندې هره اونۍ د کابل او ډیلي ترمنځ څلور الوتنې کېدې.

په کندهار کې سیمه‌ییزو سرچینو افغانستان انټرنشنل ته ویلي، چې د طالبانو د اطلاعاتو او کلتور ریاست او استخباراتو په کندهار کې درې سیمه‌ییزې راډیوګانې وتړلې. دغه راډیوګانې تحسین القران، څانګه او زما زېور یادې شوې دي.

د طالبانو له پېښو سره د مبارزې ادارې ویلي، چې په بغلان کې د وروستیو سېلابونو له امله د څلورو ولسوالیو لارې لا هم د خلکو د تګ راتګ پرمخ تړلې دي. طالبان وايي، هڅه کوي چې یادې لارې ډېر ژر د تګ راتګ پرمخ پرانیزي.

د طالبانو مخالفې مقاومت جبهې ویلي چې د بلخ ولایت په مرکز مزار شریف کې یې د راکټي بریدونو په پایله کې ۵ طالبان وژلي او ۳ نور یې ټپیان کړي دي. طالبانو تر اوسه ددې ادعا په اړخه څه نه دي ویلي.

په داسې حال کې، چې د طالبانو مشر پر ملي کلمه بندیز لګولی، د دې ډلې د اطلاعاتو او کلتور وزارت وایي، د لوحو او اعلاناتي تابلوګانو د اصلاح کمېسیون په ۱۴۰۴ لمریز کال کې د ژبې د پیاوړتیا او د اعلاناتو د تنظیم په موخه ۲۷۵ بهرنیو کلمو ته ملي بدیلونه ټاکلي.

سیمه ییزو سرچینو د کابل په شهزاده سرای کې د ډزو خبر ور کړی. درې عیني شاهدانو افغانستان انټرنشنل ته وویل چې یوه وسله وال کس په سرای شهزاده کې پر څو کسانو د کلاشنکوف ډزې وکړې او بیا له سیمې وتښتېد. سرچینو په برید کې د مرګ ژوبلې خبر هم ور کړی.

د طالبانو د کور او ښار جوړولو وزیر د کونړ ولایت زلزله ځپلو لپاره د یوه ځانګړي ښارګوټي د جوړولو پلان تایید کړی دی. یاد ښار ګوټی د ننګرهار په ګمبیري دښته کې جوړیږي.

د طالبانو د کورنیو چارو وزارت وایي، تر اوسه یې له ۳۶ زرو ډېرو کسانو ته د وسلې ګرځولو جوازونه ورکړي او په بېلابېلو ولایتونو کې یې نږدې پنځه زره میله غیرقانوني وسلې راټولې کړې دي. د وسلې جوازونه طالب چارواکو او سوداګرو ته ورکړل شوي دي.

د ایران د کرمان ولایت په جیرفت ښار کې د یوې ترافیکي پېښې له امله درې افغانان ځای پر ځای مړه شوي او ۱۰ نور ټپیان شوي دي. ددغو افغانانو موټر له سړک نه کوږ شوی او نسکور شوی دی.

د افغانستان د ازادۍ جبهه ادعا کوي، چې تېره شپه یې د کابل په سروبي ولسوالۍ کې د طالبانو پر اکمالاتي کاروان برید کړی دی. د جبهې د خبرپاڼې له مخې، په برید کې یو طالب وژل شوی او درې نور ټپیان دي.

د ایران د خراسان رضوي ولایت د تایباد ولسوالۍ چارواکو ادعا کړې، چې ایراني سرحدي ځواکونو د غویي میاشتې په لړ کې افغانستان ته د ۴۴۶ میلیارد او ۸۵ میلیون ریالو نغدو پیسو د قاچاق مخه نیولې ده.

د پاکستان په بلوچستان ایالت کې د یکشنبې په ورځ د امنیتي سرتېرو او د هغوی د کورنیو پر یوه لېږدوونکي اورګاډي د بمي چاودنې د وژل شویو کسانو شمېر ۲۴ تنو ته لوړ شوی او ۷۰ نور ټپیان دي. پاکستاني چارواکي وايي برید بلوڅ بېلتونپالو وسله‌والو کړی دی.

په کندهار کې د ښاروالۍ د تنظیف برخې کارګر وايي، چې ښاروالۍ له تیرو دوو میاشتو راهیسې معاشونه نه دي ورکړي. ددغو کارګرو، چې شمېر یې سلګونو تنو ته رسیږي، ورځنی معاش درې سوه افغانۍ دی او وړاندې به هره میاشت ورکول کېده.