آرشیف

د پاکستان لومړي وزیر شهباز شریف ویلي، هېواد یې د سیمې د سولې لپاره خپلو هڅو ته دوام ورکوي او هیله لري چې د سولې د خبرو راتلونکی پړاو به ډېر ژر په پاکستان کې ترسره شي.

د لوګر ولایت لپاره د طالبانو امنیه قومندانۍ د نشه‌يي توکو پر وړاندې د مبارزې مدیریت له لوري له ۵۰ سوالګرو سره نغدي مرسته وشوه. دغې قومندانۍ ویلي، دغه مرستې د هبت‌الله د فرمان له‌مخې ترسره شوې دي. د دوی په وینا، هر سوالګر ته ۳۰ زره افغانۍ ورکړل شوي دي.

د «حال‌وش» په نوم د ایران د بشري حقونو سازمان راپور ورکړی، چې ایران یوه بې‌تذکرې بلوڅه او د هغې ۲ ماشومان په هیرمند سیمه کې له پنځو ورځو توقیف وروسته، پرته له کوم قضايي حکم څخه افغانستان ته شړلي دي. حال‌وش زیاتوي، د دې ښځې کورنۍ د هغې د برخلیک په تړاو هېڅ معلومات نلري.

د لوګر ولایت لپاره طالب مسوولین وايي، په ازره ولسوالۍ کې د سترګو د ناروغانو د درملنې او عملیاتو د درې ورځني وړیا کمپاین په ترڅ کې د څه باندې ۱۹۰۰ ناروغانو درملنه وشوه.د مسوولینو په وینا، په دې ناروغانو کې د څه باندې سلو ناروغانو جراحي عملیات هم شوي دي.

د طالبانو له پېښو سره د مبارزې اداره وايي، په تېرو ۴۸ ساعتونو کې په ۱۷ ولایتونو کې د سېلابونو او تالندې برېښنا په ګډون په بېلابېلو طبیعي پېښو کې ۲۸ کسان مړه او ۱۰ نور ټپیان شوي دي. دغه اداره زیاتوي، دې پېښو کې لسګونه کورونه ویجاړ او د زرګونه جریبه ځمکو حاصلات هم له‌منځه تللي دي.

امریکایي رسنیو راپور ورکړی، چې د سپینې ماڼۍ تر څنګ د ډزو غږونه اورېدل شوي او پولیسو یې په تړاو یو شکمن کس تر نیولو وروسته روغتون ته لېږدولی دی. راپورونه وایي، شکمن کس سپینې ماڼۍ ته نږدې د تلاشۍ پوستې ته له نږدې کېدو وروسته د امنیتي کسانو پر لوري یې ډزې کړي.

د امریکا ولسمشر ډونالډ ټرمپ د شنبې په ورځ اعلان وکړ، چې د ایران له اسلامي جمهوریت او د سولې له یوې هوکړې سره د تړلو موضوعاتو په اړه یې د سیمې له یو شمېر مشرانو سره «ډېرې ښې خبرې» کړې دي. ټرمپ ویلي، اوس د هوکړې متن وروستی کېدونکی دی او د هُرمز تنګی به هم بېرته پرانېستل شي.

د ملګرو ملتونو د بشري حقونو په شورا کې د افغانستان دایمي استازي نصیر احمد اندېشه ویلي، چې طالبانو په اروپا کې د افغانستان کونسلګریو د نیولو لپاره منظم فشارونه راوړي او دا بهیر یې په جرمني کې «د تروجن هارس» ویروس عملیات بللی دی.

د بشري حقونو څار بنسټ د طالبانو له لوري د «زوجین د تفریق اصولنامې» توشېح د «جنسیتي اپارتاید منشور» بللی او دا یې په افغانستان کې د ماشومو نجونو د ودونو د قانوني کولو لپاره یو رسمي ګام یاد کړی دی.

اکسیوس د یوې باخبره سرچینې له قوله راپور ورکړی، چې د امریکا ولسمشر ډونالډ ټرمپ د شنبې په ورځ د سعودي عربستان، متحده عرب امارات، قطر، مصر، ترکیې او پاکستان له مشرانو سره ټلیفوني اړیکې نیولي دي ترڅو د ايران سره د احتمالي هوکړې په اړه خبرې وکړي.

رویټرز خبري اژانس راپور ورکړی، چې د ترکیې استخباراتي ادارې د سوریې له استخباراتي بنسټونو سره په ګډه په سوریې کې د داعش ډلې لس شکمن غړي نیولي او وروسته یې ترکیې ته لېږدولي دي. د چارواکو په وینا، ټول نیول شوي کسان د ترکیې وګړي دي.

د اروپايي پارلمان مرستیالې پینا پېچېرنو د مقاومت جبهې مشر احمد مسعود ته په یوه پیغام کې ویلي، د طالبانو پر ضد له ډیموکراتو مخالفینو سره له همکارۍ پرته بله هېڅ لاره نه‌شته. نوموړې ټینګار کړی، چې د طالبانو د مخالفینو غږ پیاوړي کول او نړۍ ته رسول یوه «اخلاقي اړتیا» ده.

د خيبرپښتونخوا پخواني اعلی وزير امير حیدر خان هوتي پر مرکزي او د پښتونخوا پر صوبايي یا ایالتي حکومتونو نيوکې کړي، چې دغه صوبه یې له پامه غورځولې او داسې ښکاري چې «مرکزي او ايالتي حکومتونه پر پښتنو لوبې کوي».

فراه کې د طالبانو د عامې روغتیا ریاست وایي، په تېره میاشت کې یې له ۲۹۸ خصوصي روغتیايي مرکزنو او د خوراکي توکو له پلورنځیو څارنه کړې ده. خبرپاڼه وايي، د څارنو پایله کې ۱۱ درملتونونه تړل شوي او شاوخوا یو نیم ټن بې‌کیفیته او له وخت‌تېر درمل او خوراکي توکي راټول او له منځه وړل شوي.

د خيبرپښتونخوا والي فيصل کريم کنډي د پاکستان له لومړي وزير شهباز شريف څخه غوښتنه کړې، چې «د مرکزي حکومت د پیاوړتیا لپاره دې د غنمو ازاد لېږد سمدستي یقیني کړي او خیبرپښتونخوا ته دې بیړنۍ مرستې ورسوي».

د بې‌ ځایه شویو نړیوال سازمان مشر اشرف حیدري وایي، د ګاونډیو هېوادونو په ګډون د اروپا له ځینو برخو د افغانانو د ایستلو بهیر مخ په زیاتېدو دی. نوموړي په دې تړاو د افغانستان لپاره د ملګرو ملتونو راپور ورکوونکي هغه دریځ ستایلی چې په جبري‌ توګه یې د افغانانو له ستنولو سره مخالفت کړی.

د مشرقي جهادي شورا مشر حاجي حضرت علي ویلي، د پاکستان له خوا د داعـ. ـش او ورانکارو ډلو عملي روزنه او تمویل روان دی. هغه زیاته کړې، دا روزنیز مرکزونه د خېبر پښتونخوا اورکزیو ایجنسۍ، باجوړ، تیرا او چترال سربېره په بلوچستان او مستونګ کې فعال دي چې د پوځ افسران یې اداره کوي.

د پاکستاني طالبانو تحریک (ټي ټي پي) د لوی اختر د درېو ورځو لپاره د اوربند اعلان وکړ. د ياد ډلې مشر نور ولي محسود په اختريز پیغام کې ویلي، «زموږ له لوري دا يو اړخيز اوربند دی، که پوځ کوم اقدام وکړ، ځواب به ورته ورکول کېږي».

د طالبانو د اقتصاد وزارت خبر ورکړی، چې د دغه وزارت وزیر دین محمد حنیف د افغانستان لپاره د برېټانیا له ځانګړي استازي ریچارډ لیندسي سره لیدلي دي. د خبرپاڼې له مخې، په دې لیدنه کې برېټانوي پلاوي د افغانستان له خلکو سره د یو نیم میلیون یورو بشري مرستو د دوام ډاډ ورکړی دی.

د پاکستان د سند پوليس وايي، له پېښور څخه شکارپور ته تښتول شوې نجلۍ یې د یوې لړ عملياتو په ترڅ کې د تښتوونکو له منګلو وژغورله. د دوی په وینا، په دې عملیاتو کې یو انسان تښتونکی وژل شوی او یو شمېر نور یې ټپیان شوي دي. دغه ۱۱ کلنه نجلۍ شاوخوا دوه میاشتې مخکې تښتول شوې وه.

په ایران کې د طالبانو د سفارت سرپرست فضل محمد حقاني د ایران د اوسپنې پټلۍ شرکت له اجراییه رييس سره په کتنه کې د افغان سوداګرو د ستونزو، د ټرانزیتي چارو او د هرات- مزارشریف د اوسپنې پټلۍ په تړاو خبرې کړې دي. په دې کتنه کې په کابل کې د ایران سفارت سرپرست هم حضور درلود.