د هندي رسنیو د راپور له مخې، د دغه هېواد د تامیل ناډو ایالت په کارور سیمه کې د فلمي ستوري او سیاستوال تلاپتي وېجي د کمپاین غونډې پرمهال د ګڼې ګوڼې له امله لږ ترلږه ۲۹ کسان مړه شوي او شاوخوا ۵۰ نور ژوبل شوي دي.
د طالبانو سرحدي پولیسو ویاند وايي چې د کابل په هوايي ډکر کې یې د درېیو کسانو د ناقانونه سفر مخه نیولې ده. عبدالله فاروقي زیاتوي چې نیول شویو کسانو ته پاکستاني اجنټانو په پاکستان کې جعلي اسناد جوړ کړي وو او هڅه یې کوله چې د افغانستان نړیوالو پروازونو له لارې بهر ته سفر وکړي.
د افغانستان د پوهنې پخواني وزیر میرویس بلخي خبرداری ورکړی، چې طالبان د عصري زده کړو د له منځه وړولو او طالبي تعلیمي سیسټم په جوړولو سره نوی نسل افراطیت ته اړباسي.
د طالبانو تر واک لاندې د احصايې او معلوماتو ملي ادارې د ۱۴۰۴ کال په لومړیو شپږو میاشتو کې د ټول هېواد په کچه ۷۰ زره او ۱۹۲ کسانو ته زېږونکارتونه وېشلي دي. دغه اداره زیاتوي چې په دې کارتونو کې ۴۶ زره او ۴۹۳ یې د لویانو او ۲۳ زره او ۶۹۹ یې ماشومانو ته جوړ کړي دی.
د ایران د دفاع وزارت ویاند سردار رضا طلايي نیک د ایران د توغندیزو وړتیاوو د محدودولو په تړاو د امریکا او لودیځ هېوادونو فشارونه رد او وې ویل، چې د هېواد امنیت او ملي ګټې د ایران سره کرښه ده او هېڅ ډول بهرنۍ لاسوهنه ورته د منلو وړ نه ده.
د راپورونو پر بنسټ پاکستان پرېکړه کړې، چې په خېبر پښتونخوا، بلوچستان او پنجاب ایالتونو کې د افغان کډوالو ۱۶ پنډغالي وتړی. د پاکستان مرکزي حکومت په امر ټولو ایالتونو کې د سپټمبر له لومړۍ نېټې راهیسې د ملګرو ملتونو سره د ثبت شویو افغان کډوالو د اېستل کیدو لړۍ هم پیل شوې ده.
په پنجشیر کې د طالبانو د والي ویاند سیف الدین لټون وايي، د دې ډلې د دفاع وزارت د امر پر بنسټ یې د پنجشیر ۴۰۰ ځوانان د اردو په لیکو کې جذب کړي دي.
نن شنبه (د تلې ۵مه) ګوګل ۲۷ کلن شو او خپله کلیزه یې ونمانځله. دا کلیزه د طالبانو د هغو هڅو سره همهاله نمانځل کېږي، چې غواړي په افغانستان کې انټرنېټ ته لاسرسی نور هم محدود کړي، خو په تېرو ۱۲ میاشتو کې په ګوګل کې افغانانو د پنځو نومونو په ډله کې "فلم" او "سندرې" زیاتې لټولي دي.
د طالبانو د ریاست الوزرا د دفتر ریاست مرستیال سید احمد مستقیم ویلي، چې د طالبانو له خوا د بې کیفیته تېلو د مخنیوي پلاوي هرات ته سفر کړی او په اسلام کلا کې یې د تېلو بار ۲۰۰۰ ټانکره راګرځولي دي.
جرمني ورځپاڼې بیلډ راپور ورکړی، چې د دغه هېواد د کورنیو چارو وزارت لوړ پوړي چارواکي به د اکتوبر په میاشت کې کابل ته سفر وکړي. د یاد سفر موخه دا ده چې «مجرمان» نه یوازې د چارټر الوتکو، بلکې د سوداګریزو الوتکو په کارولو سره انتقال کړي.
د طالبانو د ټولګلټو وزارت وایي، چې د ۱۴۰۴ کال په لومړیو شپږو میاشتو کې د تېر کال د لومړیو شپږو میاشتو په پرتله د اوسپنې پټلۍ له لارې په انتقالاتو کې ۱۱،۱۵ سلنه زیاتوالی راغلی دی.
د طالبانو د سترې محکمې د دویمې ګڼې د فرمان له مخې د کاپیسا ولایت له زندان څخه ۵۵ زندانیان ازاد شول. د طالبانو د کاپیسا ولایت د زندانونو د تنظیم امر محبت الله حافظ وايي چې ددې ډلې د سترې محکمې د فرمان له مخې ۲۳ نورو بندیانو د بند موده کې کمې راغلی.
د چین د بهرنیو چارو وزارت د اسیايي څانګې مشر په چین کې د طالبانو له سفیر بلال کریمي سره په لېدنه کې د افغانستان خپلواکۍ او ځمکنۍ بشپړتیا ته پر درناوي ټینګار کړی. لیو جینسونگ ویلي چې چین او افغانستان نږدې او اوږدې اړیکې سره لري.
په خوست کې ځايي سرچینو افغانستان انټرنشنل پښتو ته وویل، چې تېره ورځ په تېر جمهوري نظام کې د ملي امنیت پخوانی افسر صمد تڼی په یوه وسلوال برید کې ووژل شو. د سرچینو په وینا، دغه پخواني افسر شخصي دښمني درلوده او د هغوي له خوا په نښه شوی دی.
طالبان وايي د افغانستان په اړه د چین، ایران، روسیې او پاکستان د څلور اړخیزې ناستې او په ملګرو ملتونو کې د ازبکستان، تاجکستان او ځینو نورو هېوادونو د مثبتو څرګندونو ستاینه کوي، خو په یادو ناستو کې د افغانستان له خوا د ګواښونو او اندېښنو په اړه ادعاوې ناسمې دي.
د هغو اسنادو له مخې چې افغانستان انټرنشنل پښتو ته رسېدلي، ښیي چې ننګرهار کې د طالبانو د پوهنې ریاست په دغه ولایت کې «د سواد زدهکړې» ۹۰ ښځینه استادانې تنقیص کړي دي. د معلوماتو له مخې، طالبان غواړي د ننګرهار په ګډون په ټول هېواد کې د «سواد زدهکړې» ښوونځي وتړي.
سرچینو افغانستان انټرنشنل ته ویلي، چې نن شنبه (د تلې ۵مه) تر غرمې مخکې په هرات ولایت کې یوه ښځه د استیناف محکمې د علنې غونډې پر مهال د نامعلوم وسلهوال له خوا په ډزو ووژل شوه. پر هغې دا تور و، چې د خپل مېړه عبدالرحمان مرادي په وژلو کې یې لاس درلود.
الجزیره شبکې نن شنبه (د تلې ۵مه نېټه) لیکلي، چې په زلزله ځپلو سیمو کې د ښځینه طبي پرسونل او مرستندویانو کمښت ستونزې جوړې کړي او د ښځينه ټپيانو درملنه یې ټکنۍ کړې ده. ډاکټران وايي ځينې ښځې اوس هم له دې امله تر خاورو لاندې دي، چې باید نارینه یې لمس نه کړي.
د ایران مهر دولتي خبري اژانس ویلي چې د ملګرو ملتونو د بندیزونو د بیا پیل له امله تهران خپل جرمني، فرانسې او برېټانیا نه خپل سفیران بېرته راغوښتي.
د بغلان ولایت لپاره د طالبانو امنیه قوماندانۍ ویلي چې د دغه ولایت په خنجان او دوشي ولسوالیو کې د ټرافیکي پیښو له کبله ۱۲ کسان ټپیان شوي دي.
د ننګرهار لپاره د طالبانو والي محمد نعیم اخوند د ایران له نوي سرقونسل مجید رضا پناه سره پر بېلابېلو مسایلو خبرې کړي دي. په خبرپاڼه کې راغلي چې دواړو لوریو د سیاسي، سوداګریزو، کرنیزو او فرهنګي اړیکو د لا پراختیا په تړاو خبرې کړي.