د ډاکه ملي هوايي شرکت د پنجشنبې په ورځ (د مرغومي ۱۸مه) خبر ورکړی، چې له ۱۴کلونو وروسته به د بنګلهدېش او پاکستان ترمنځ مستقیمې الوتنې پیل شي. یاد شرکت ویلي، چې کراچۍ ته به د بنګلهدېش هوايي شرکت بیمان لومړۍ الوتنه د روانې جنورۍ میاشتې په ۲۹مه نېټه ترسره شي.
د طالبانو سترې محکمې د یوې خبرپاڼې په خپرولو سره ویلي، چې په میدان وردګ ولایت کې یې د یوې مېرمنې په ګډون درې کسان په دُرو وهلي دي. د یادې محکمې په خبره؛ دغه کسان یې «د نامشروع اړیکو» په تور په دُرو وهلي دي.
هندي رسنۍ وایي، ترکيې د طالبانو او پاکستان ترمنځ د ډېپلوماټيکو هڅو تر ناکامۍ او د بنسټيزو اختلافاتو د لا ژورېدو وروسته په رسمي ډول د اسلاماباد او کابل ترمنځ له خپل منځګړيتوب څخه لاس واخيست.
په کابل کې د ایران سفارت د چهارشنبې په ورځ (د مرغومي په ۱۷مه) د افغانستان سره په مېلک پوله کې د یوې نوې ځمکنۍ لارې له پرانیستلو خبر ورکړی. یاد سفارت پر اېکس پاڼه لیکلي، چې د یادې نوې لارې په پرانیستلو سره به د ایران او افغانستان ترمنځ د بار وړونکو موټرو تګ راتګ دوه برابره شي.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د مرغومي ۱۶مه) ۵۹۵ کډوالې کورنۍ چې ټولټال ۳۲۹۴ کسان کېږي؛ له بېلابېلو لارو افغانستان ته ستنې شوې دي. د دغه کمېسیون د معلوماتو پر بنسټ؛ راستنو شویو کورنیو سره اړینې مرستې هم شوې دي.
هرات ولایت کې طالب چارواکي وایي، د ۱۴۰۴ لمریز کال په لومړیو ۹ میاشتو کې له دغه ولایته د ۲۴ مېلیونه او ۲۶۸زره امریکایي ډالرو په ارزښت څه باندې ۲۲زره مټریک ټنه طبي نباتات د نړۍ بېلابېلو هېوادونو ته صادر شوي دي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۱۳ کوډګر نیولي دي. د یاد وزارت په خبرپاڼه کې راغلي، چې نیول شوي کوډګر عدلي او قضایي ارګانونو ته ور پېژندل شوي دي.
د طالبانو د کډوالو او بېرته راستنېدونکو چارو وزارت خبر ورکړی، په روانه اونۍ کې ۹۲ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته بېرته افغانستان ته ستانه شوي دي.
د طالبانو د امربالمعروف وزارت خبر ورکړی، چې په هلمند ولایت کې یې د څلورو ماشومانو مور د خپل خاوند له ظلم څخه ژغورلې ده. دغه وزارت وايي، خاوند یې روږدی و او د مېرمنې تر څنګ یې خپل څلور اولادونه هم ځورول.
د ونزویلا د کورنیو چارو وزیر دیوسدادو کابیو د چهارشنبې په ورځ ویلي، چې پر دغه هېواد د امریکا په برید کې ۱۰۰ کسان وژل شوي دي. د ونزویلا حکومت تر دې وړاندې د امریکا د برید د تلفاتو رسمي شمېر نه و خپور کړی؛ خو پوځ د خپلو ۲۳ وژل شویو کسانو نوملړ خپور کړی و.
هرات کې د طالبانو والي شیخ مولانا اسلامجار له یوشمېر سوداګرو سره په لیدنه کې د خوراکي توکو، په ځانګړي ډول د وريجو، د وارداتو پر زیاتوالي ټینګار وکړ او ویې ویل، چې دا چاره کولای شي په ډېر لنډ وخت کې د بازارونو دننه د بیو د راکمېدو لامل شي.
د صلاحالدین رباني په مشرۍ جمعیت اسلامي ګوند په تخار او بدخشان ولایتونو کې د کانونو د خپلسري او نامسلکي استخراج پر وړاندې د راپورته شویو متعرضینو وژنه غندلې ده. یاد ګوند وایي، طالبان د دغه ولایتونو طبیعي زېرمو ته د «جنګي غنیمت» په سترګه ګوري.
د افغانستان کېکبوکسېنګ فدراسیون د دغه فدراسیون مسوولینو لهخوا د وړاندې شویو اسنادو او معلوماتو پر بنسټ وتوانېد، چې د کېکبوکسېنګ نړۍوال فدراسیون رسمي غړیتوب ترلاسه کړي.
د بشري حقونو نړۍوال بنسټ په یوې تازه اعلامیه کې د پاکستان د ترهګرۍ ضد محکمې له لوري د یو شمېر پاکستاني خبریالانو او سیاسي شنونکو پر ضد د زنداني کېدو اړوند سختو سزاوو په اړه اندېښنه څرګنده کړې. دغه بنسټ وایي، پاکستان په دغه پرېکړې سره د عادلانه محاکمې له اصولو سرغړونه کړې ده.
دوو پاکستاني سرچینو رویټرز خبري اژانس ته ویلي، چې سعودي عربستان له اسلاماباد سره د «جياېف–۱۷» جنګي الوتکو د پېرلو په اړه خبرې کوي. دغه الوتکې د چین او پاکستان ګډ تولید دی او پاکستان به یې سعودي عربستان ته د خپلو پورونو د ورکړې په بدل کې ورکوي.
د ترکیې اناتولي خبري اژانس راپور ورکړی، چې په تېر ۲۰۲۵کال کې تر درې مېلیونه ډېرو سېلانیانو په قونیې ښار کې د مولانا جلالالدین محمد بلخي له زیارت او موزیم څخه لیدنه کړې ده.
په جینیوا کې د افغانستان استازی نصیراحمد اندېشه وايي، د طالبانو د ادعاوو خلاف یادې ډلې په ۲۰۲۵کال کې نه ډېر مشروعیت ترلاسه کړ او نه یې خپل متحدین راضي وساتل. د هغه په وینا؛ تېر کال د انزوا، ستراتیژیکو تېروتنو او د طالبانو د نفوذ د لهمنځه تلو کال و.
نوې علمي څېړنې چې د PubMed (د امریکا د ملي طب کتابتون) له لوري خپرې شوې دي، څرګندوي چې پر ماشومانو پرلهپسې چیغې وهل او لفظي تاوتریخوالی د هغوی پر ذهني او رواني روغتیا ژور او دوامداره منفي اغېز لري. دا اغېز ان تر هغه کچې رسېږي، چې د بدني سزا له زیانونو سره پرتله کېدای شي.
د امریکا ولسمشر ډونالډ ټرمپ وايي، د هغه په مشرۍ د امریکا پوځ بیا جوړ شوی دی. د هغه په وینا، که د امریکا پوځ نه وي، نو روسیه او چین له ناټو څخه هېڅ وېره نهلري.
په المان او فرانسه کې د پښتو ژبې بهرني ښوونکي وايي، چې له لسیزو راهیسي د اروپا په یو شمېر پوهنتونونو کې پښتو د یوې ژوندۍ ژبې په توګه تدریس کېږي. دغه استادان زیاتوي، چې د پښتو ژبې د پرمختګ لپاره هڅې روانې دي او د محصلینو شمېر یې هم ورځ تر بلې زیاتېږي.
سپینې ماڼۍ ویلي، چې د امریکا ولسمشر ډونالډ ټرمپ د یوه فرمان په لاسلیکولو سره پرېکړه کړې چې له ۳۵ هغو نړۍوالو سازمانونو ووځي، چې د ملګرو ملتونو غړي نه دي او همداراز له ۳۱ نورو ادارو چې د دغه سازمان اړوند دي، هم خپل حضور پای ته ورسوي.