د طالبانو د عامې روغتیا وزارت وايي، چې د هند حکومت دغه وزارت ته په عصري طبي وسایلو سمبال شپږ مجهز امبولانسونه سپارلي دي. د یاد وزارت په وینا، دغه امبولانسونه به د بېړنیو ناروغانو د لېږد او د بېړنیو روغتیايي خدمتونو په برخه کې مهم رول ولوبوي.
د طالبانو د بهرنیو چارو وزیر امیرخان متقي د افغانستان لپاره د امریکا پخواني ځانګړي استازي او طالب پلوي ډیپلوماټ زلمي خلیلزاد سره کتلي او د افغانستان او امریکا د دوو اړخیزو اړیکو د پراختیا پر لارو چارو، فرصتونو او ستونزو یې خبرې ورسره کړې دي.
د ملګرو ملتونو د بشري مېشتونې پروګرام ویلي چې د افغانستان له ښاري نفوس څخه تر ۴۰ سلنې ډېر خلک په کابل کې اوسي او د ښار له هرو پنځو اوسېدونکو څلور هغه په بې نقشې سیمو کې مېشت دي. دغه بنسټ په کابل کې د اقلیمي بدلون د اغېزو د مخنیوي لپاره د بېړنیو ګامونو غوښتنه کړې ده.
د طالبانو د مالیې وزارت ویلي، چې د دولتي ادارو د معاشونو د ځنډ او خنډ په اړه «ټولې اوازې ناسمې دي» او یاد وزارت چمتو دی، چې له دولتي ادارو څخه د معاشونو د راپور ترلاسه کولو وروسته، مامورانو ته معاشونه ورکړي.
د طالبانو تر واک لاندې افغانستان بانک اعلان وکړ چې د مالیه ورکوونکو د انتفاعي مالیې او د بانکي حسابونو د بندېدو ستونزو د حل په موخه د طالبانو د ریاستالوزرا اقتصادي معاونیت په مشرۍ د مالیې وزارت او افغانستان بانک استازو د بانکي محرمیت او مالیاتي ستونزو د حل نوې پرېکړې کړې دي.
په پکتیکا کې ځايي سرچینو افغانستان انټرنشنل ته وویل، چې په دغه ولایت کې د طالبانو محکمې په اعدام محکوم ښوونکي عبدالعلیم خاموش ته برائت ورکړی. له دې وړاندې د پکتیکا ابتدایي محکمې تر څېړنو وروسته پرېکړه کړې و، چې عبدالعلیم باید «اسلام او پیغمبر» ته د سپکاوي په تور اعدام شي.
د افغانستان لپاره د ملګرو ملتونو ځانګړي باور صندوق (UN_STFA) وايي، د ګډو مداخلو له لارې یې هغو ټولنو ته بنسټیز خدمتونه رسولی، چې تر ټولو ډېره اړتیا ورته لري.
د طالبانو سرحدونو، قومونو او قبایلو چارو وزارت مرستیال په هلمند کې د یوې ولسي غونډې پر مهال د «اسلامي نظام» پر ملاتړ ټینګار کړی؛ خو دا څرګندونې په داسې شرایطو کې کېږي چې د هېواد دننه د سیاسي ګډون، اساسي حقونو او ټولنیزو ازادیو په تړاو پراخې نیوکې لا هم پر ځای دي.
د طالبانو کورنیو چارو وزارت وایي چې له بلخ، ارزګان، کندز، فراه، سرپل او پکتیا ولایتونو ۲۳۷ روږدي کسان وروسته له درملنې، خپلو کورنیو ته سپارل شوي دي.
د ملګرو ملتونو د خوړو او کرنې سازمان (FAO) راپور ورکړی چې سږ کال ژمي کې یې د افغانستان په ټولو ولایتونو کې۸۷زره او ۴۰۰ د غنمو کڅوړې کروندګرو ته په وخت د کر لپاره ورکړي دي.
د طالبانو کورنیو چارو وزارت وایي، د نشهيي توکو پر ضد ځواکونو یې په فراه ولایت کې د نشهيي توکو د پروسس او تولید دوه فابریکې کشف او ویجاړې کړې دي. وزارت زیاتوي هم مهاله، په پنځو ولایتونو کې ۳۵ روږدي کسان راټول او د درملنې مرکزونو ته ور پېژندل شوي.
په کابل کې د ایران سفير عليرضا بیکدلي، د طالبانو د معادن او پټرولیم وزیر هدایتالله بدري سره په لیدنه کې، د افغانستان د اوسپنې او تیلو کانونو کې د ایران د پانګونې وړاندیز وکړ. په لیدنه کې، د ایران سفیر د افغانستان کانونه د دواړو هیوادنو د همکارۍ پراختیا لپاره مناسبه زمینه وبلله.
د طالبانو بهرنیو چارو وزارت، د اسراییل له خوا د فدرالي جمهوریت سومالیا د «سوماله لیند» د سیمې د خپلواک دولت په توګه پېژندل په کلکه غندلي او دا یې د نړیوال قانون او د سومالیا د ملي حاکمیت او ځمکنۍ بشپړتیا سرغړونه بللې ده.
د طالبانو تر واک لاندې د کډوالو ستونزو ته د رسېدنې عالي کمېسیون نن یک شنبه ویلي، چې تېره ورځ له ایران او پاکستان نه ۶۶۸ کورنۍ چې ټول ۲۵۵۳ کسان کېږي، افغانستان ته جبري ستانه کړای شوي.
د طالبانو امر بالمعروف وزارت وایي چې په بغلان ولایت کې یې محتسبینو دوه کسان د شرابو د څښلو او پلور په جرم نیولي او عدلي او قضایي ارګانونو ته یې سپارلي.
د طالبانو کورنیو چارو وزات وایي چې د کابل امنیه قوماندانۍ دوهمې امنیتي حوزې اړوند امنیتي ځواکونو هغه قاتل او دوه ملګري یې نیولي، چې څه موده وړاندې یې په جاده اسمايي سیمه کې یو تن وژلی و.
په پنجشیر کې د طالبانو ځایي چارواکي وایي چې په دغه ولایتکې یې، د لومړي ځل لپاره د بیروج کانونه پیژندلي او د دې ولایت د معدني سرچینو په نوملړ کې شامل شوي دي.
په پنجشیر ولایت کې د طالبانو کار او ټولنیزو چارو ریاست د ۶۰ښځو لپاره د مسلکي خیاطۍ کورسونه پیل کړي، چې له مخې یې ګډونوالو ته د اړتیا وړ وسایل برابر شوي دي، خو د نجونو پر زدهکړو محدودیتونه لا هم په ځای پاتې دي.
د ایران د تهران والي، محمدصادق معتمدیان، ویلي چې دغه هېواد د اوبو له سخت بحراني وضعیت سره مخ دی او د اوبو ناسم مدیریت د ځمکې لاندې اوبو د کچې ټیټېدو لامل شوی دی. هغه خبرداری ورکړی چې که دا وضعیت دوام وکړي، ښايي ایران د پلازمېنې د بدلولو په اړه غور ته اړ شي.
د ایران د رېل پټلۍ، یوه لوړپوړي چارواکي جبارعلي ذاکري ویلي، چې تهران د افغانستان له لارې چین ته د نوي ټرانزیټي رېل پټلۍ د جوړولو امکانات ارزوي.
په ملګرو ملتونو کې د افغانستان دایمي استازي نصیر احمد فایق په نورستان کې د طالبانو د ډلهییزې استعفا له راپورونو وروسته ویلي، چې د طالبانو په نظام کې اداري فساد، تبعیض او قومي تعصب زیات شوی او دا ډله د وېرې او زور له لارې واک چلوي.