طالبانو د ۱۴۰۵ کال لپاره په تخصص پروګرام کې د شمولیت لپاره له نوماندانو ازموینه واخیسته. په دې ازموینه کې څه باندې ۶ زره کسانو ګډون درلود، خو یوه نجلۍ هم پهکې نهوه. په داسې حال کې چې له طب پوهنځیو فارغې نجونې دغه پروګرام ته په تمه دي، خو د طالبانو له لوري د ګډون اجازه نهلري.
د کابل لپاره د طالبانو د والي مرستیال د کابل ولایت د کانونو ساتنې کمېټې په غونډه کې وویل، په تېرو ادارو کې «اداري فساد خپل اوج» ته رسېدلی و او د کانونو د اکتشاف او استخراج چارې په شفاف ډول نهترسره کېدې. شنونکي وايي، د طالبانو واکمنۍ کې هم د کانونو د عوایدو ګټه ولس ته نهرسېږي.
د اسراییل پوځ خبر ورکړی، چې د یونان، قبرس او اسراییل ترمنځ د پوځي همکاریو درېاړخیز کاري پروګرام هوکړه شوې ده. د دغه پوځ په وینا، د سېشنبې په ورځ د اسراییل، یونان او قبرس د پوځونو ترمنځ د ۲۰۲۶ کال لپاره دوهاړخیز کاري پروګرامونه په قبرس کې لاسلیک شوي دي.
د طالبانو د کور او ښار جوړولو وزارت وايي، په کندهار او لغمان ولایتونو کې راستنېدونکو کورنیو ته څه باندې ۴۰۰ د استوګنې نمرې وېشل شوي او دغه بهیر همداراز دوام لري. له دې سره سم، یو شمېر راستنې شوې کورنۍ شکایت لري چې تر اوسه ورته د استوګنې لپاره ځمکه نهده ورکړل شوې.
طالبانو د تخار په درقد ولسوالۍ کې د «نامشروع اړیکو او له کور څخه د تېښتې» په تور د یوې ښځې په ګډون دوه کسان په عام محضر کې په دُرو ووهل.
د افغانستان د ملي امنیت پخوانی رییس رحمت الله نبیل ادعا کړې، چې د ډاکټر مظفر احمد په نوم د ډیلي د سرې کلا د برید طراح د غزني ولایت د ګېرو ولسوالۍ د خاقد کلي په مدرسه کې پناه اخیستې ده. نوموړي خبرداری ورکړی، چې افغانستان یوځل بیا د نړیوالو ترهګرو په پټنځای د بدلېدو پر لور روان دی.
د طالبانو د کورنیو چارو وزیر سراجالدین حقاني ویلي چې طالبان په سیمه کې د ثبات او امنیت ټینګښت ته ژمن دي او غواړي افغانستان د نورو هېوادونو لپاره د ورورۍ او سولې پیغام ولري. هغه د پاکستان د بهرنیو چارو وزیر اسحاق ډار، مولانا فضل رحمان او تقي عثماني د څرګندونو هرکلی کړی.
د عوامي نشنل ګوند مشر اېمل ولي خان وايي، چې افغان کډوال په پاکستان کې لومړی مجاهدین بلل کېدل، بیا طالبان او اوس دوی په سپکاوي سره ایستل کېږي. هغه نیوکه کړې، چې دا طریقه په بشپړه توګه غلطه ده.
د طالبانو د اوبو او نرژۍ وزارت ویلي، چې د یو شمېر ایراني شرکتونو مسوولینو د یادې ډلې د اوبو او انرژۍ وزیر سره لیدنه کې له پنجشیر څخه کابل ته د اوبو د لېږد په پروژه کې د پانګونې لپاره چمتووالی ښودلی دی.
د ملي جنبش ګوند مشر عبدالرشید دوستم وایي، چې د طالبانو حکومت د سقوط په حال کې دی. هغه زیاته کړې، چې له طالبانو سره کوم هېوادونه تعامل لري ددې ډلې د ترهګرۍ له ماهیت څخه خبر دي.
د مقاومت جبهې مشر احمد مسعود په تهران کې د تخار د پخواني امنیه قوماندان جنرال اکرام الدین سریع د ترور په غبرګون کې پر ایران غږ کړی، چې له تهران نه د «ترهګرو» لاسونه لنډ کړي. هغه ویلي، چې د طالبانو خلاف مبارزه به د هیلو د سپېدو تر را ختلو جاري وي.
شننه: ارشاد رغاند، لیکوال او ژورنالیست پاکستان، د خپل سیاسي جوړښت له پیله، په سیمه کې د استعماري امنیتي منطق پر بنسټ لوبیدلی دی. د افغانستان په تړاو، دا سیاست تر ډېره د نیابتي ډلو، غیرمستقیم نفوذ او د «ستراتېژیکې ژورتیا» د مفکورې له لارې عملي شوی دی.
د پاکستان د جمعیت علمای اسلام مشر مولانا فضل الرحمان ویلي چې په کراچی کې د پاکستاني علماوو د کنفرانس اعلامیه د طالبانو د بهرنیو چارو وزیر ملا امیر خان متقي او د کورنیو چارو وزیر مولانا سراجالدین حقاني له خوا مثبته ارزول شوې او دا ښه پرمختګ دی.
د طالبانو ویاند مرستیال حمدالله فطرت د سولې او اقتصاد انسټیټیوټ رپوټ ته په غبرګون کې ویلي، چې افغانستان له ۴۵ کلونو وروسته، دمګړۍ ښه امنیت تجربه کوي. د سولې او اقتصاد انسټیټیوټ د طالبانو تر واک لاندې افغانستان د نړۍ له شپږو ناامنه هېوادونو څخه یو بللی دی.
د طالبانو اقتصاد وزارت د ملګرو ملتونو د خوړو نړیوال پروګرام هغه راپور له حقیقت نه لرې بللی، چې وايي، د افغانستان ۱۷ میلیونه وګړي د لوږې له ګواښ سره مخ دي. د طالبانو د اقتصاد وزارت مسلکي معین ویلي، چې د افغانستان اقتصاد د پرمختګ په حال کې دی.
د اوکراین ولسمشر ولادیمیر زیلېنسکي او د امریکا ولسمشر ډونالډ ټرمپ به نن په فلوریډا کې سره وویني چې د اوکراین د جګړې پای ته رسولو لپاره یوه طرحه جوړه کړي، خو لاهم پر مهمو موضوعاتو اختلافونه شته دي.
د طالبانو د کډوالو د ستونزو اواري کمیسیون ویلي، چې د دې ډلې مشر پر راستنو شویو کډوالو د خوراکي توکو، غنمو او نغدي پیسو د وېش سپارښتنه کړې ده.
د نورستان په برګمټال ولسوالۍ کې ځايي سرچینو افغانستان انټرنشنل ته وویل، چې طالبانو له تېرو څلورو کلونو راهیسې په دې ولسوالۍ کې انټرنېټي خدمات قطع کړي دي. یو شمېر سرچینې وايي، چې ددغه ولایت په یو شمېر سیمو کې بهرني جنګیالي میشت دي، نو له همدې امله انټرنېټي خدمات قطع دي.
د طالبانو د صنعت او سوداګرۍ وزارت وايي، د یاد وزارت وزیر نورالدین عزیزي په زابل او غزني ولایتونو کې د صنعتي پارکونو د جوړولو لپاره تثبیت شوې سیمې له نږدې کتلې دي او ټاکل شوې په نږدې راتلونکي کې پرې د صنعتي پارکونو د جوړېدو چارې پیل شي.
په بلخ کې د طالبانو مستوفیت وايي، د تېر نظام د ولسي جرګي غړي عباس ابراهیم زاده ۶۴ بېلابېل جایدادونه، چې هوټلونه، روغتونونه، د استګونې کورونه او نور پکې شامل دي، په کرایه ورکوي. سرچینو ویلي، چې عباس ابراهیم زاده یاد جایدادونه له خلکو رانیولي وو او یوازې لس سلنه پیسې یې ورکړې وې.
د طالبانو د عامې روغتیا وزارت وايي، چې د هند حکومت دغه وزارت ته په عصري طبي وسایلو سمبال شپږ مجهز امبولانسونه سپارلي دي. د یاد وزارت په وینا، دغه امبولانسونه به د بېړنیو ناروغانو د لېږد او د بېړنیو روغتیايي خدمتونو په برخه کې مهم رول ولوبوي.