د ایران د وسلهوالو ځواکونو د لوی درستیز مرستیال احمد واحدي وایي: «اسراییل په لبنان کې د حزبالله د بېوسلې کولو جرئت نهلري او پوهېږي چې که ځمکنۍ جګړه پیل کړي، نو بې له شکه به د حزبالله په ګټه تمامه شي.»
امریکا پر وېنزوېلا د فشارونو د واردولو په لړ کې نن د دغه هېواد ساحل ته نږدې د تېلو لېږدونکې بېړۍ نیولې ده. د امریکا ولسمشر تر دې مخکې د وېنزوېلا حکومت د «بهرنۍ ترهګرې ډلې» په نوملړ کې شامل کړی و او ګواښ یې کړی و، چې د وېنزوېلا بېړۍ به نیسي.
د ملي ډېموکراټیک غورځنګ مشر مُحسن داوړ د خېبرپښتونخوا په بنو ولسوالۍ کې د پاکستاني پوځ له لوري د ولسي وګړو په نښه کول دولتي ترهګري وبلله. د نوموړي په وینا، د پاکستان د پوځ په دغه برید کې ۶ ولسي وګړي ټپيان شوي دي.
د طالبانو د عدلیې وزارت وايي، په تېره یوه اوونۍ کې یې د ارزګان په مرکز ترینکوټ ښار کې له ۲۱ موټر پلورنځیو څارنه کړې او په ترڅ کې یې ۸ موټر پلورنځي د یو شمېر ناقانونه فعالیتونو له امله وتړل. دغه وزارت د یادو «ناقانونه فعالیتونو» په تړاو نور وضاحت نهدی ورکړی.
د کاپیسا د حصه اول کوهستان ولسوالۍ لپاره د طالبانو د ابتداییه محکمې د پرېکړې لهمخې د دوو ښځو په ګډون ۵ کسان په عام محضر کې په دُرو ووهل شول. دغه کسان د «نامشروع» اړیکو له امله په دُرو وهل شوي دي.
اسراییلي چارواکي باور لري، چې ایران د خپل بالستیک توغندیو پروګرام پراخوي چې له همدې امله بنیامین نتنیاهو غواړي په راتلونکې لیدنه کې له ډونالډ ټرمپ سره هغه انتخابونه شریک کړي، چې واشنګټن پرې له اسراییل سره د ایران په احتمالي برید کې مرسته کولی شي.
د طالبانو د کورنیو چارو وزارت ستر امنیتي مرستیال محمد ابراهیم صدر د شنبې په ورځ په پروان کې له طالب مسوولینو او متنفذینو سره په کتنه کې یو ځل بیا د مشرتابه له اوامرو پر اطاعت کولو، د امنیتي ځواکونو تر منځ د همغږۍ پر پیاوړتیا او له وظیفوي تداخل څخه پر مخنیوي ټينګار وکړ.
د ولسمشر ډونالډ ټرمپ ځانګړي استازي سټیو ویټکاف د غزې د اوربند د لومړي پړاو د ارزونې او د راتلونکي پړاو لپاره د چمتووالي په موخه د امریکا، مصر، قطر او ترکیې د استازو د یوې غونډې اعلان وکړ.
د افغان کرېکټ د غورهلیګ د دویم پړاو د پیل ځانګړي مراسم په متحدهعربي اماراتو کې ترسره شول. په مراسمو کې د افغانستان کرېکټ بورډ له خپلو ستراتیژیکو پانګهوالو او شریکانو سره یو ځای د لیګ د دویم پړاو د پیل نېټه، کوربه هېواد، د لوبډلو شمېر او د لیګ نوې لوګو په رسمي ډول معرفي کړل.
د طالبانو د دفاع وزارت چارواکو د ستر درستیز له توپچي ریاست څخه د یو شمېر منسوبینو په فراغت غونډه کې له ګډونوالو وغوښتل، چې د هېواد له سرحدونو په کلکه دفاع وکړي او هېچا ته دې اجازه ورنهکړي، چې د هېواد سرحدونو او ځمکنۍ بشپړتیا ته په بد نظر وګوري.
د پاکستان پخواني لومړي وزیر عمران خان په زندان کې پر ځان او خپلې مېرمنې یې فشارونو، ګواښونو او بندیزونو ته په اشارې ویلي، چې د رښتینې ازادۍ لپاره په مبارزه کې «شهادت» ته هم چمتو دی. نوموړي ویلي، پاکستان دا مهال یوازې د «عاصم لار» پر اصولو روان دی، چې ده ته د منلو نه ده.
د افغانستان د رسنیو ملاتړ سازمان په پاکستان او ایران کې د افغان خبریالانو او د رسنیو د کارکوونکو د سخت، ناعادلانه او ژوند ګواښونکي وضعیت په تړاو نن په پاریس کې اعتراضي لاریون وکړ. دغه سازمان وايي، په پاکستان کې د سخت کړاو له امله ځينو افغان خبریالانو ان د ځان وژنې هڅه هم کړې ده.
د امریکا متحده ایالتونو په نیویارک ښار کې د جمعې په شپه يو افغان کډوال عبید نورزی او د هغه ماشومه لور «بي بي حیا»د کور د سوځېدو په پېښه کې مړه شوي دي.
په کندهار کې د امربالمعروف او نهی عنالمنکر ریاست لهخوا پر ځوانانو فشارونه ورځ تر بلې زیاتېږي. تازه راپورونه ښيي، چې په تېرو دوو ورځو کې شاوخوا ۱۵ تنه ځوانان یوازې د دې لپاره له رسټورانټونو او خوړنځایونو څخه وړل شوي، چې ږیرې یې لنډې یا خرېیلې وې.
نړیوال بانک وایي چې د پاکستان د اقتصادي ثبات په موخه یې ۷۰۰ میلیونو ډالر منظور کړي دي. دغه بانک زیاته کړې چې دا پیسې د پاکستان د حکومتي سرچینو او اقتصادي پراختیا پروګرام تر چتر لاندې د اقتصادي ثبات او خدماتو وړاندې کولو ملاتړ په موخه منظور شوي دي.
د ټولنیزو رسنیو يو مخکښ فعال خطاب الله بنګش، چې طالبانو د دې ډلې پر ضد د تبليغاتو په تور بندي کړی و، له خوشې کېدو وروسته یې د بند پر مهال د خپلې ماشومې لور د مړينې خبر ورکړی. هغه وایي: «زه زنداني وم چې لور مې سرطاني ناروغۍ مړه کړه».
سراج الدین حقاني له کندهار وروسته زابل ته د سفر پرمهال د یادې ډلې د مشر ملا هبت الله د فرمانو پر عملي کېدو ټینکار کړی او وايي:«د مشر امیرالمومنین او زموږ و ستاسو د رهبرۍ په فرامینو او هدایاتو کې به انشالله په داسې ځای کې بند نه راځو چې موږ په دې کې د چا څخه د هدایت غوښتنه وکړو.»
د طالبانو د وژل شوي پخواني مشر مولوي اختر محمد منصور زوی مولوي فتح الله منصور پر ایکس خواله رسنۍ کې د طالبانو د واکمنۍ پر ځينو کړنو او چین ته د افغانستان د کاني زیرمو پر ورکړې سختې نيوکې کړې دي.
د طالبانو ۲۰۷ قول اردو وایي، چې په تېرو دوو ورځو کې له ایران سره په سرحدي سیمو کې یو شمېر کسان چې غوښتل یې په ناقانونه توګه ایران ته ولاړ شي نیولي دي. طالبانو د نیول شویو کسان شمېر نه دی په ډاګه کړی، خو د ایران “ایرنا” رسنی د نیول شویو کسانو شمېر ۵۳۰ تنه ښودل دی.
د ملګرو ملتونو د مخدره توکو او جرمونو دفتر وروستی راپور ښیي، چې میانمار کې په ۲۰۲۵ کې د اټکل له مخې۱,۰۱۰ ټنه مواد تولید شوي دي. راپور زیاتوي، چې د افغانستان په پرتله په میانمار کې د تاریکو تولید دوه چنده زیات شوې دی.
د ژان مارک لالو په نوم فرانسوی معمار چې په ۲۰۰۴ کال کې یې د کابل د اریانا سینما په بیارغولو کې برخه اخیستي وه، د طالبانو له خوا د اریانا سینما نړولو ته غبرګون ښودلی دی. یاد فرانسوي انجینر اریانا سینما د هیلو نښه بللي ده او وايي:«داسې انګیرم چې بیلډوزر زما زړه ویجاړ کړی وي.»