آرشیف

د امریکا د بهرنیو چارو وزیر مارکو روبیو وایي، چې واشنګټن له تهران سره د ستونزو د حل لپاره پر ډیپلوماتیک مسیر په جدي توګه کار کوي.

د نسکور شوي جمهوري نظام د چارو ادارې رییس فضل محمود فضلي، د افغانستان پر اوسني سیاسي وضعیت سختې نیوکې کړي او ویلي یې دي چې د حقارت او سپکاوي د عادي کېدو پر وړاندې چوپتیا د خپلواک افغاني سیاست لپاره یوه لویه فاجعه ده.

د ملګرو ملتونو د ماشومانو څخه د ملاتړ صندوق (یونیسف) وایي، چې په تېر میلادي کال کې یې په افغانستان کې ۶۱۰زره هغه ماشومانو ته چې په خوارځواکۍ اخته وو، د ژغورنې درملنیزې خوراکي کڅوړې وېشلې دي.

د افغانستان لپاره د برېټانیا سفارت د قابلو د نړۍوالې ورځې په مناسبت له افغان قابلو خپل ملاتړ اعلان کړی او غوښتنه یې کړې، چې طالبان باید ښځو ته د طب او قابله‌ګۍ تر څنګ په بېلابېلو برخو کې د زده‌کړو اجازه ورکړي.

د افغانستان د رسنیو ملاتړ سازمان (امسو) په لوګر کې د طالبانو له لوري د یوې سیمه‌ییزې راډیو د مشر فرهاد غفوري په نیول کېدو اندېښنه څرګنده کړې. د یاد بنسټ د اعلامیې له مخې، د غفوري د نیول کېدو لپاره هېڅ ډول قانوني او روښانه دلیل نه دی وړاندې شوی.

پاکستان کې د بشري حقونو کمېسيون (اېچ ار سي پي) په خپل کلني راپور کې، له پاکستان څخه د افغان کډوالو د جبري ستنولو بهیر غيرانساني او لانجمن بللی دی.

په لوګر کې د اتحاد راډیو د مشر فرهاد غفوري نږدې ملګرو افغانستان انټرنشنل – پښتو ته ویلي، چې نوموړی پنځلس ورځې وړاندې د طالبانو له لوري زنداني شوی دی. سرچینې وایي، طالبان له نوموړي سره په زندان کې خورا بند چلند کوي او تر سختو شکنجو لاندې یې نیولی دی.

د پاکستان د سند ايالتي حکومت د ښځو د لاريون بنسټ (عورت مارچ) فعاله شيما کرماني او ورسره نور فعالان وروسته له هغه خوشې کړل چې د یاد ایالت پر حکومت سختې نیوکې وشوې.

جمهوري نظام پر مهال د میدان وردګ ولایت ښاروالې ظریفه غفاري د طالبانو له لوري د پخوانۍ ولسي جرګې غړې فوزیه کوفي د خپلوانو پر خلاصون خوښي ښودلې او زیاته کړې یې ده، چې د بدخشان قومي مخور او د ملګرو ملتونو چارواکي باید د طالبانو له زندان څخه د افغان نجونو د خلاصون لپاره هم هڅې وکړي.

اروپايي پارلمان اعلان کړی، چې د بکتاش سیاوش له لوري وړاندې شوی غوښتنلیک یې ثبت کړی، چې په کې په افغانستان کې د «جنسیتي اپارتاید» د رسمیت پېژندنې او د طالبانو د ترهګرو ډلو په نوملړ کې د شاملولو غوښتنه شوې ده.

د مزارشریف یوه اوسېدونکي د نوم نه ښودلو په شرط افغانستان انټرنشنل - پښتو ته په رالېږلي پیغام کې ویلي، چې د طالبانو له‌خوا د ده په ګډون د لسګونو کسانو ریکشاوې ضبط شوي او تر اوسه بېرته دوی ته نه دي سپارل شوي.

د ایران ولسمشر مسعود پزشکیان ویلي، چې ایران به د امریکا د یو اړخیزو غوښتنو پر وړاندې تسلیم نه شي. نوموړي دا څرګندونې د عراق له ټاکل شوي صدراعظم محمد شیاع السودانی سره په ټلیفوني خبرو کې کړې دي.

د ننګرهار یو شمېر اوسېدونکو د نوم نه ښوودلو په شرط افغانستان انټرنشنل- پښتو په یوه رالېږلي پيغام کې ویلي، چې د طالبانو د «ننګرهار وادي کرنیز شرکت» مشر، سېد محمد نعیم محمدي، د جلال اباد په «ګنده چشمه» سیمه کې د ځینو خلکو شخصي ځمکې دولتي اعلان کړې دي.

د طالبانو دفاع وزارت ویلي، د پکتیکا د برمل ولسوالۍ په بازار کې د کشفي عملیاتو پر مهال یې ځواکونو یو شمېر وسلې او مهمات موندلې دي. خبرپاڼه وایي، په ترلاسه شوو توکو کې دوې تفنګچې، یو میل کلاشینکوف، ۲۴ ریموټونه او څلور کیلو بارود شامل دي.

د طالبانو د کورنیو چارو وزارت ویلي، چې د جنايي جرمونو پر ضد د مبارزې پولیسو په څو جلا عملیاتو کې په پنځو ولایتونو کې ۱۴ کسان د غلا په تور نیول دي. خبرپاڼه کې دا نیونې د اروزګان، فراه، نیمروز، هرات او میدان وردګ ولایتونو اړوند یادې شوې دي.

د ۲۰۲۵ کال د مې میاشتې د څلورمې نېټې نه تر نهمې پورې د هند او پاکستان ترمنځ د الوتکو او توغندیو څلور ورځنۍ جګړې یو کال پوره شو. د جګړې د پیل علت دا و چې د اپرېل په پنځه ویشتمه نېټه د هند تر ادارې لاندې کشمیر په پهلګام نومي ځای کې په یوه تروریستي برید کې ۲۶ تنه تورستان مړه شوي وو.

د عوامي نشنل ګوند مشر ايمل ولي خان ويلي، «د پاکستاني رياست فکر د امن نه دی، چې مينه وي، پرمختګ وي، سړک وي، ښوونځې وي او روغتون وي». هغه زیاته کړې، پاکستانی ریاست فکر لري چې «ویره دې وي، چاودنې او تښتونې دې وي».

د پاکستان د پوځ لوی درستیز مارشال عاصم منیر او یو شمېر نورو لوړپوړو پوځي قومندانانو په یوې غونډه کې ویلي، پر کابل د واکمنو طالبانو ادارې له لوري د پاکستاني وسله‌والو ملاتړ «نامعقوله او منحرفه تګلاره» ده، چې د افغانستان د خلکو ملي ګټې له پامه غورځوي.

د روغتیا نړیوال سازمان ویلي، چې په افغانستان کې هر ساعت یوه مور د امیندوارۍ او زېږون پر مهال د هغو ستونزو له امله خپل ژوند له لاسه ورکوي چې د مخنیوي وړ دي.

د رومانیا پارلمان د سې‌شنبې په ورځ د عدم اعتماد رایې په ورکولو د صدراعظم ایلیه بولوجان اروپایي اتحادیې پلوه حکومت نسکور کړ. حکومت د تایید لپاره ۲۳۳ رایو ته اړتیا لرله، په داسې حال کې چې ۲۸۱ د عدم اعتماد رایې یې ترلاسه کړې دي.

پر اوکراین د روسیې د سې شنبې ورځې بریدونو لږ تر لږه ۲۲ کسان وژلي او ګڼ نور یې ټپیان کړي دي. د اوکراین د بېړنیو خدماتو ادارې ویلي، چې په زاپورېژیا ښار کې لږ تر لږه ۱۲ کسان وژل شوي دي. د سیمې د والي ایوان فېدوروف په وینا، لږ تر لږه ۱۶ نور کسان ټپیان شوي دي.