د طالبانو د اطلاعاتو او کلتور وزارت خبر ورکړی، چې د تېر ۱۴۰۴کال په لړ کې یې په نهو ولایتونو کې ۲۳ تاریخي ابدې رغولې دي. د یاد وزارت په وینا؛ دغه تاریخي ابدې په کندهار، بامیان، غزني، کونر، لغمان، پکتیا، پکتیکا، هلمند او کابل ولایتونو کې رغول شوې دي.
د طالبانو د کور او ښار جوړولو وزارت خبر ورکړی، د دغه وزارت لهخوا د کونړ هغو زلزلهځپلو کورنیو ته چې د وروستۍ زلزلې له امله یې کورونه ویجاړ شوي وو؛ د ننګرهار ولایت د ښېوې ولسوالۍ اړوند په ګمبیري سیمه کې پر زر جریبه ځمکه په نوي جوړ شوي ښارګوټي کې استوګنیزې نمرې وېشل شوې دي.
د بلوچستان په کوټه کې د جمعیت علمای اسلام ګوند د کاربندیز دوام لري، د یاد ښار مارکېټونه په بشپړ ډول تړل شوي دي. تر دې وړاندې د یاد ګوند د کوټې څانګې مشر مولانا عبدالرحمان رفیق د حکومت لهخوا د مدرسو پرضد روان عمليات غندلي و او ويلي یې و، چې د مدرسو د تړلو عملیات د منلو وړ نهدي.
د امریکا د بهرنیو چارو وزارت اعلان کړی، چې په پېښور کې به د امریکا کونسلګري په تدریجي ډول وتړل شي. د یاد وزارت لهخوا په خپرې شوې خبرپاڼه کې راغلي، چې د خیبر پښتونخوا اړوند ډیپلوماتیکې چارې به په اسلاماباد کې د امریکا سفارت ته وسپارل شي.
په مشهد کې د طالبانو کونسلګرۍ خبر ورکړی، چې د یادې ډلې کونسل نورمحمد متوکل د ایران د بهرنیو چارو وزرات د شمال او ختیځ لپاره د نوي ټاکل شوي استازي غلام عباس ارباب خالص سره په لیدنه کې د کابل او تهران ترمنځ د بېلابیلو اړیکو پر پراختیا خبرې کړې.
د طالبانو تر واک د کډوالو ستونزو ته د رسېدنې عالي کمېسیون خبر ورکړی، تېره ورځ ۹۰۰ کډوالې کورنۍ چې ټول ۴زره او ۷۱۱ کسان کېږي؛ له ایران او پاکستان نه افغانستان ته ستنې شوې دي. یاد کمېسیون زیاته کړې، چې په همدې ورځ یې ۹۳۱ کورنۍ خپلو مېنو ته لېږدولې دي.
بدخشان کې د طالبانو د امنیې قوماندانۍ ویاند احسانالله کامګار وایي، چې د دغه ولایت په ارګو ولسوالۍ کې یې د یوه کس د «قتل» په تور څلور کسان نیولي دي. د هغه په وینا؛ دغه څلور کسان د ارګو ولسوالۍ د «بختشاه» کلي اوسېدونکي دي او د مصطفی په نوم یې د یادې ولسوالۍ یو اوسېدونکی وژلی دی.
د ایران د بهرنیو چارو وزیر سید عباس عراقچي د یوه ډیپلوماټيک پلاوي په مشرۍ بیجېنګ ته رسېدلی او هلته یې له خپل چنیايي سیال وانګ يي سره لیدلي دي. په دغه لیدنه کې دواړو د سیمې د وروستیو بدلونونو په اړه خبرې کړې دي.
د بلوچستان ایالت په چمن ښار کې د پښتون قومي جرګې مشرانو د سیمې پر خرابېدونکي امنیتي، اقتصادي او ټولنیز وضعیت ژوره اندېښنه څرګنده کړې ده. د یادې جرګې غړو د چمن د رسنیو دفتر کې یوې غونډې ته ویلي، چې د لارې تړل کېدو له امله انساني قاچاق زیات شوی دی.
د طالبانو د کور او ښار جوړولو وزیر نجیبالله حیات حقاني وايي، چې په ننګرهار کې د کډوالو لپاره پر ۱۸زره جریبه ځمکه استوګنیز ښارګوټی جوړوي. حقاني له ګاونډیو هېوادونو غوښتي، چې له افغان کډوالو سره د «انساني او اسلامي» اصولو پر بنسټ چلند وکړي.
د تخار ولایت د رستاق ولسوالۍ اوسېدونکو افغانستان انټرنشنل ته خبر ورکړی، د توتاش پل چې په سیمه کې یو له مهمو پلونو څخه دی؛ د سرو زرو کان کېندونکو شرکتونو لهخوا د نامسلکي کېندنو او وروستیو سېلابونو له امله ویجاړ شوی، چې له امله یې بنسټیزو خدمتونو ته د ځایي خلکو لاسرسی ستونزمن شوی.
ناپېژاندو وسلهوالو د بلوچستان ایالت هرنايي ولسوالۍ د سکرو له یوه کان نه درې کارګر تښتولي دي. د پاکستان د کارګرو فدراسیون د بلوچستان څانګې سرمنشي پیر محمد کاکړ افغانستان انټرنشنل پښتو ته ويلي، چې (د اپرېل په ۲۵مه) نېټه هم څلور کارګر د هرنايي د سکرو له کان نه تښتول شوي وو.
د سېشنبې په ورځ د پاکستان د پنجاب ایالت په شکرګړ کې د یوه کور چت پرېوتو له امله لږترلږه څلور کسان مړه او دوه ماشومان ټپیان شوي دي. د ژغورنې ډلې وايي، د یادې پېښې ټپیان د درملنې لپاره روغتونه ته وړل شوي دي.
د ازاده مبارزو افغان لوبغاوی واحدالله نژند راتلونکې شنبه (د غویي ۱۹مه) به د ارجنټاین له لوریانو سټاروپولي سره مخ شي. دغه لوبه به د FNC سازمان په ۳۰م پړاو کې د ۷۷ کیلوګرامه وزن په کټګورۍ کې د کرواسیا په زادار ښار کې ترسره شي.
د کاناډا لومړی وزیر، مارک کارني ویلي چې د ایران د سپاه پاسداران ډلې هېڅ غړی ته به دې هېواد ته د ننوتلو اجازه ور نه کړل شي.
د افغانستان د ښځو د فوټبال ملي لوبډلې پخوانۍ لوبغاړې خالده پوپل د کاناډا په ټورنټو ښار کې د «د کاناډا د هزارهګانو د بشردوستانه خدمتونو مرکز» د ښځو د فوټبال له لوبډلې او د افغانستان د ملي المپيک کمېټې له مسؤلانو سره ليدنه او خبرې کړې دي.
د پنجشیر لپاره د طالبانو د والي رسنیز دفتر وایي، چې د دې ولایت له کانونو څخه استخراج شوي ۳۱۸۵قیراطه زمرد د ۱۱میلیونه او ۶۶۹زره او ۸۷۶افغانیو په ارزښت پلورل شوي دي.
د بشري حقونو فعالې فريما نوابي افغانستان انټرنشنل ته وويل، چې په اروپايي پارلمان کې د دې عريضې ثبتول چې «په افغانستان کې د جنسيت پر بنسټ اپارتايد په رسميت وپېژندل شي او طالبان د ترهګرې ډلې په توګه ونومول شي» يو پېچلی او وختخوړونکی بهير دی.
په خوست ولایت کې د طالبانو سیمهییزو چارواکو اعلان کړی، چې د مرکز اړوند په صحرا باغ سیمه کې یې د راستنېدونکو کډوالو لپاره د یو نوي ښارګوټي د خط اندازۍ چارې په رسمي ډول پیل کړې دي.
د افغان نجونو د زدهکړو د حقونو فعال او د طالبانو پخوانی زنداني مٓطیع الله ویسا د فرانسې د «ازادۍ ۲۰۲۶» جايزه ګټلې ده. دا جايزه د فرانسې د نورماندي سيمې له خوا او د نړۍ له بېلابېلو هېوادونو د زرګونو کسانو په رايو سره ښاغلي ویسا ته ورکړل شوې ده.
د امریکا د بهرنیو چارو وزیر مارکو روبیو وایي، چې واشنګټن له تهران سره د ستونزو د حل لپاره پر ډیپلوماتیک مسیر په جدي توګه کار کوي.