د ایران بهرنیو چارو وزارت وايي، چې په نږدې ورځو کې به تهران د افغانستان د وضعیت او سیمهییزو تحولاتو په اړه د یوې مهمې ناستې کوربه وي. د یاد وزارت ویاند ویلي، چې دا ناسته د سیمې د هېوادونو ترمنځ د همغږۍ د پیاوړتیا او د ګډو ننګونو د کمولو په موخه پلان شوې ده.
په هلمند کې د طالبانو د والي دفتر وایي، چې د هبتالله په امر یې د خپلو ملکي او نظامي چارواکو ترمنځ د همغږۍ غونډه جوړه کړه. د طالبانو د هلمند والي امانالدین منصور په دې غونډه کې له نشه یي توکو سره پر مبارزې، له هبتالله پر اطاعت او د هغه د فرمانونو پر تطبیق ټينګار وکړ.
د هرات ولایت په ګذره ولسوالۍ کې د طالبانو د امر بالمعروف، نهی عن المنکر او د شکایتونو د اوریدلو ریاست منسوبینو د یوې معتادې مور لهخوا د درې میاشتني ماشوم د پلورلو هڅه شنډه کړې ده.
د ايران د بهرنيو چارو وزارت د ملګرو ملتونو د ایران استازولۍ پر وړاندې د امریکا حکومت د محدودیتونو زیاتوالی غندلی او د ملګرو ملتونو له سرمنشي څخه یې غوښتي، چې د ایران د قانوني حقونو د ضایع کېدو د مخنیوي لپاره جدي مداخله وکړي.
د روسیې د بهرنیو چارو وزیر ویلي، چې د ولادیمیر پوتین او د امریکا ځانګړي استازي اسټیو ویټکوف تر لیدنې وروسته له امریکا سره د اوکراین په تړاو ټول «سوء تفاهمونه» لرې شوي دي. سرګې لاوروف زیاته کړې، چې په دغو خبرو کې د ډونالډ ټرمپ او ولادیمیر پوتین ترمنځ ګډ تفاهمونه هم تایید شوي دي.
طالبان وایي، ستانه شويو کډوالو ته د ځمکو د وېش لړۍ روانه ده او تر اوسه په بلخ، کندوز او لغمان کې ۷۴۸ کډوالو کورنیو ته د کورونو د جوړولو لپاره ځمکې ورکړل شوي دي.طالبانو ویلي، په بلخ کې یې پر ۳۰۳، په کندوز کې یې پر ۴۰۰ او لغمان کې یې پر ۴۵ کورنیو ځمکې وېشلې دي.
طالبانو ته نږدې رسنۍ «المرصاد» خبر ورکړی، چې د طالبانو د کډوالو او راستنېدونکو چارو پر مخکیني وزیر خلیلالرحمان حقاني ځانمرګي بریدګر ته له بلوچستان څخه سپارښتنه شوې وه. دغې رسنۍ د هغه کس ویډیو هم خپره کړې، چې د دې برید له طرحه کوونکو څخه و.
د طالبانو د هرات د والي مطبوعاتي دفتر د پنجشنبې په ورځ (د لیندۍ ۲۰مه) وویل، چې ترکیې ۱۲۷۱ ټُنه بشرپاله مرستې د یو لړ رسمي مراسمو په ترڅ کې د هرات ولایت د روزنک د اورګاډي په تمځای کې افغاني سرې میاشتې ته وسپارلې. ترکیې هم د دغه ډول مرستو د دوام ژمنه وکړه.
د افغانستان لپاره د پاکستان ځانګړي استازي محمد صادق ویلي، چې د افغانستان لپاره د چین له ځانګړي استازي یوی شیاویونګ سره یې په اسلاماباد کې د سیمې پر امنیتي وضعیت او د افغانستان له خاورې د راولاړېدونکو ګواښونو په اړه خبرې کړې دي.
د طالبانو د روغتیا وزیر نورجلال جلالي د نړۍوالو مرستندویه ادارو له استازو سره په ناسته کې خوارځواکي د روغتيايي سکټور په برخه کې جدي ستونزه بللې ده. نوموړي پر ښو خدماتو، مخلصانه همکاریو، د مرستو پر سالم مدیریت او د خوراکي توکو د کیفیت پر ښهوالي هم ټینګار کړی دی.
د طالبانو د کانونو او پټرولیم وزیر هدایتالله بدري د مس عینک پروژې له چینايي قراردادیانو سره په کتنه کې د یادې پروژې د چارو پر چټکتیا ټینګار کړی دی. د طالبانو د کانونو وزارت ویلي، چې د مس عینک پروژې قراردادي شرکت د تړون لهمخې د ژمنو د عملي کولو ډاډ ورکړی دی.
د طالبانو د کورنیو چارو وزارت اداري مرستیال محمد نظر شینواري د ختيځ زون د ۳۸۰ پولیسو په فراغتغونډه کې له خپلو پولیسو غوښتي، چې د خلکو خدمت په «تقوا، قانون، اخلاص او نرمۍ» سره وکړي.» دغه طالب چارواکو ویلي، چې د امنیت ټينګښت د وسلې په زور نه، له خلکو سره په ښه چلند کېږي.
د نورستان ولایت لپاره د طالبانو د امنیه قومندانۍ ویاند احمد بشیر وايي، دغه پېښه نن ماښام (پنجشنبه د لیندۍ ۲۰مه) د واما ولسوالۍ د لارې په اوږدو کې د یوه موټر د چپه کېدو له امله رامنځته شوې ده. په دغې پېښه کې د یوې ماشومې په ګډون ۲ کسان مړه او ۶ نور ټپيان شوي دي.
د پاکستان د بهرنیو چارو وزارت وايي چې د ناروې سفیر یې د اسلاماباد په یوه قضایي اورېدنه کې د هغه د «نامناسب حضور» له امله وزارت ته احضار کړی دی. وزارت وايي، سفیر له ډيپلوماتیکو پروتوکولو سرغړونه کړې ده. د ناروې سفیر د حقونو فعالې ایمان مزاري په تړاو قضايي ناسته کې ګډون کړی و.
د طالبانو د کانونو او پټرولیم وزارت وایي چې تاجکستاني پانګوالو ددغه وزارت له وزیر ملا هدایت الله بدري سره په لیدنه کې د سمنټو د زېرمو د استخراج په برخه کې پانګونې ته چمتووالی ښودلی دی.
د طالبانو د عامې روغتیا وزیر په کابل کې د عربي متحده اماراتو له سفیر سیف محمد الکتبي سره په لېدنه کې د مور او ماشوم د لسو روغتیايي مرکزونو جوړولو، هرات ولایت ته د طبي وسایلو ورکولو او په ځینو ولایتونو کې د نویو روغتونونو جوړولو او تجهیزاتو په برخه کې مرسته غوښتې ده.
د طالبانو د صنعت او سوداګرۍ وزیر نورالدین عزیزي وايي، چې د اېکو سازمان د راتلونکې غونډې کوربه توب کابل کوي. نوموړی وايي، چې د ایکو سازمان په وروستۍ ناسته کې دا کوربه توب طالبانو پرغاړه اخېستی دی. نورالدین عزیزي له پاکستان سره په سوداګرۍ کې د باور رامنځته کېدو غوښتنه وکړه.
د عوامي نېشنل ګوند مشر ایمل ولي خان وایي چې د پاکستان د استخبارانو پخواني مشر فیض حمید ته د هغه د کړنو د جدي پایلو په کچه سزا نه ده ورکړل شوې. هغه زیاته کړې چې فیض حمید په کابل کې د چای پیالې په پورته کولو سره «۴۰زره وسلهوال بیا منظم کړل» او په سیمه یې وروتپل.
د طالبانو د عامې روغتیا وزارت ویلي، چې د تیرې یوې اونۍ په ترڅ کې یې په ننګرهار کې ۱۴۴ روغتیایي مرکزونه د روغتیايي اصولو د نه رعایتولو په جرم تړلي دي.
د تايلنډ صدراعظم انوتین چانویراتکول وايي، «واک بېرته ولس ته سپاري»، چې ښايي هدف یې د پارلمان انحلال او د ټاکنو لپاره د زمینې برابرولو پلان ته اشاره وي. چان ویراتکول په سپټمبر کې ویلي وو چې پلان لري پارلمان د جنورۍ تر پایه منحل کړي او ټولټاکنې د مارچ یا اپرېل په لومړیو کې وشي.
د روسیې ولسمشر ولادیمیر پوتین د پنجشنبې په ورځ د وینزویلا له ولسمشر نیکولاس مادورو سره ټلیفوني خبرې وکړې او د کرملېن په وینا، هغه ته یې ډاډ ورکړ چې مسکو یې د بهرني فشار د زیاتېدو په شرایطو کې ملاتړ کوي. مادورو د امریکا د ولسمشر ډونالډ ټرمپ تر فشار لاندې دی چې واک پرېږدي.