د برېټانیا ښيلاسي افراطي ګوند مشر نایجل فراج وايي، که یې ګوند په ټولټاکنو کې بریالی شي، په ډلهییز ډول به د کډوالو شړلو پلان وړاندې کړي. هغه زیاته کړې چې په دې لړ کې به د افغانستان، اریتریا او نورو هېوادونو له مشرانو سره د کډوالو شړلو تړونونه لاسلیک کړي.
طالبان ادعا کوي چې په تېره یوه میاشت کې یې د قیمتي ډبرو او تاریخي اثارو د قاچاق په تور ۷۷ کسان نیولي دي. د یادې ډلې د سرحدي پولیسو ریاست په وینا، دا کسان یې د تورخم ځمکني بندر، هرات او کندهار هوایي ډګرونو کې نیولي دي.
د بشري حقونو د څار وېبپاڼې «هرانا» راپور ورکړی چې د روان کال د زمري په میاشت کې په ایران کې په هرو پنځو ساعتونو کې یو کس اعدام شوی دی. په تېره یوه میاشت کې د ایران په زندانونو کې ۱۶۰ کسان اعدام شوي دي. تر دې وړاندې هم ۶ افغانان اعدام شوي دي.
د افغانستان- پاکستان او متحده عربي اماراتو تر منځ د کرېکېټ درېاړخیزه سیالیو پیل ته د ګوتو په شمار ورځې پاتې دي. ټاکل شوې چې دا سیالۍ د روانې اګسټ میاشتې پر ۲۹مه په شارجه کې پیل شي او د راتلونکې سپټمبر میاشتې تر ۷مې نېټې دوام وکړي.
د نایجریا هوایي ځواک پرون (شنبه، وږي لومړۍ) خبر ورکړی چې د کامرون پولې ته نږدې یې د یوې اسلامپاله وسلهوالې ډلې ۳۵ غړي وژلي. وایی، دې جنګیالیو د دغه هېواد پر ځمکنیو ځواکونو د برید پلان درلود او دوی یې دغه هڅه وار له مخه شنډه کړه.
په اېکس کې د ابوعلي سینا بلخي په اړه د ایران د ولسمشر لیکنه تر هغه وروسته جنجالي شوه، چې نوموړي د ابوعلي سینا له نوم څخه د «بلخي» تخلص لرې کړ. مسعود پزشکیان په دې لیکنه کې د ابوعلي سینا بلخي د زوکړې مبارکي ویلې ده، خو د بشپړ نوم پر ځای یې یوازې «ابوعلي سینا» لیکلی دی.
د لندن پوهنتون کالج او د سټاکهولم د چاپېریال انسټیټیوټ نوې څېړنه ښيي، چې د ګاز او نفتو له امله رامنځته کېدونکې د هوا ککړتیا هر کال په ټوله امریکا کې د ۹۰ زرو څخه د ډېرو کسانو د وخت نه مخکې د مړینې او د سلګونو زرو نورو د ناروغیو د رامنځته کېدو لامل ګرځي.
د پاکستان اېکسپرېس ټربیون وايي، په داسې حال کې چې پاکستان او ایران په خپل کور دننه او بهر کې ګڼې ستونزې او ننګونې لري، خو بیا هم دغه دواړه هېوادونه د افغانستان په سیاست کې پراخ نفوذ لري او همداراز په وچه کې د راګیر افغانستان لاره پر همدې هېوادونو ده.
د ایران د سمنان انتظامي مسوول عباس عرب وايي، په تېرو ۷۲ ساعتونو کې ۲۷۳ افغان کډوال تر پېژندولو وروسته نیول شوي دي. هغه زياته کړې، چې د بې اسنادو کډوالو د پېژندلو، نیولو او اېستلو لړۍ لا هم دوام لري.
د اسراییل لومړي وزیر بنیامین نتنیاهو د اسټرالیا له اسکای نیوز سره په مرکه کې ویلي، چې د اسراییل موخه د حماس له استبداده د غزې د خلکو ازادول او د غزې او اسراییل لپاره د یوه متفاوت راتلونکي رامنځته کول دي.
امنیتي سرچینو افغانستان انټرنشنل ته ویلي، چې طالبانو د شنبې په ورځ د پاکستاني طالبانو تحریک اړوند د ۵۰ افغان جنګیالیو مړي د پکتیکا مرکزي روغتون ته انتقال کړي دي. دغه جنګيالي ډیورنډ کرښې ته نږدې د بلوچستان د «سمبازه» په سیمه کې د پاکستان له پوځ سره په نښتو کې وژل شوي وو.
په روسیه کې د طالبانو سفارت ویلي، چې د بلاروس په زندانونو کې یې د افغان بندیانو د وضعیت د ارزونې په موخه یو پلاوی یاد هېواد ته استولی دی.
د ایران د بهرنیو چارو وزارت ویلي، چې عباس عراقچي له خپل روسي سیال سرګي لاوروف سره په ټلیفونې خبرو کې د اټومي مذاکراتو د راتلونکي مسیر ارزونه کړې. دواړه سیالانو د ایران او د نړۍوال اټومي انرژۍ ادارې ترمنځ د همکارۍ په اړه هم خبرې کړي.
د ملګرو ملتونو امنیت شورا د بندیزونو کمېټې د جمعې په ورځ (د زمري په ۳۱مه) له داعش او القاعده سره د تړاو له امله د پنځو نورو کسانو نومونه د بندیزونو په نوملړ کې ورزیات کړل. د دغې شورا د اعلامیې له مخې، له دغو کسانو دوو یې په افغانستان کې هم فعالیت کړی دی.
د اسراییل ۱۲ کانال راپور ورکړی، چې د دغه هېواد لومړي وزیر بنیامین نتنیاهو په یوه غونډه کې ویلي، چې د ټرمپ بشپړ ملاتړ ورسره دی. په راپور کې د نتنیاهو له قواله ویل شوي، چې دوی د غزې د پلان شوي پوځي برید د پلي کولو لپاره محدود وخت لري.
د طالبانو د امربالمعروف وزارت کارکوونکو په کندهار کې د دولتي کلینیکونو او روغتیايي مرکزونو پر دروازو نوي محدودیتونه لګولي. د دغو محدودیتونو له مخې، هغو ښځو ته د تګ اجازه نه ورکول کېږي چې یوازې تور حجاب اغوندي، ښځې اړ دي چې بورقه واغوندي څو یې مخ او سترګې بشپړه پټې پاتې شي.
په برېتانیا کې د پناه غوښتونکو لپاره د هوټلونو د ځانګړي کېدو په غبرګون کې سراسري اعتراضونه پیل شوي دي. د دغو اعتراضونو په غبرګون کې د توکم پالنې ضد فعالینو هم پر ضد یې لاریونونه پیل کړي او په ځینو ځایونو کې سره نښتي هم دي.
بېجینګ په روانه اوونۍ کې د تبت، هند او پاکستان په کچه یوه لویه ډیپلوماتیکه هڅه پیل کړې، څو د دغو سیمو ارزښت وښيي او د امریکا د ډیپلوماسۍ له تېروتنو ګټه واخلي. د چین ولسمشر دوه ورځې تبت ته او د بهرنیو چارو وزیر یې هند او پاکستان ته سفرونه کړي.
د ننګرهار ولایت لپاره د طالبانو د امنیه قومندانۍ مسوولین وايي، په تېره یوه اوونۍ کې یې د دغه ولایت له بېلابېلو سیمو د ۱۴۱۰ منه غرنیو لرګیو له قاچاق کېدو مخنیوی کړی دی.
د ترکیې ساحلي ساتونکو په چاناک قلعه ښار کې هغه ۲۵ افغان کډوال نیولي دي، چې په یوې بادي بېړۍ کې سپاره وو. پولیسو د همدې قضيې په تړاو یو اذربایجاني قاچاق وړونکی هم نیولی دی.
طالبانو تېره اوونۍ د بلخ ولایت د مرکز مزارشریف ښار په مخابراتو څلور لارې کې د تیموریانو دورې د شاعر او سیاستوال امیر علي شېر نوايي څلی ونړاوه؛ خو له ګڼو تُندو غبرګونو وروسته یې دوه ورځې مخکې د یاد څلي د بیارغونې او ښکلا چارې پیل کړې.