د ایران د خراسان رضوي والي وايي، چې د سرحدي سیمو د سوداګرۍ او پانګونې اسانتیا د ایران د دولت له مهمو لومړیتوبونو څخه ده او د دوغارون بندر کولای شي له افغانستان او ګاونډیو هېوادونو سره د دغه هېواد د نویو اقتصادي همکاریو مهمه دروازه شي.
د ډيلي بېسټ وېبپاڼې د راپور له مخې، که څه هم د طالبانو د بهرنيو چارو وزير اميرخان متقي د امريکا د ملي ګارډ پر عسکرو برید سره د خپلې ډلې هر ډول تړاو رد کړی؛ خو د قضیې پلټونکي امریکايي چارواکي په دې تړاو لا هم اندېښنې لري.
د پاکستان د پارلمان پخوانی رییس او د تحریک انصاف ګوند جګپوړی غړی اسد قیصر وايي، د طالبانو او پاکستان ترمنځ د روان کړکېچ له امله د خیبر پښتونخوا اقتصاد زیانمن شوی. هغه ویلي، د دغه کړکېچ له امله په پښتونخوا کې د پانګونې کچه خورا ټېټه شوې او د صنعت برخه یې هم زیانمنه کړې ده.
د امریکا ولسمشر ډونالډ ټرمپ ویلي، چې ولادیمیر پوتین غواړي د اوکراین جګړه پای ته ورسوي او بېرته عادي وضعیت ته ستون شي. ټرمپ زیاته کړې، د جګړې په پیل کې داسې یو مناسب فرصت و چې اوکراین کولای شوای له روسیې سره جوړجاړی وکړي؛ خو دغه فرصت له لاسه ووت.
د امریکا ولسمشر ډونالډ ټرمپ په سپینه ماڼۍ کې د کابینې د یوې ناستې پر مهال پر سومالیايي کډوالو او د امریکا د کانګرس پر سومالیایيالاصله غړې ایلهان عمر توندې نیوکې وکړې.
د طالبانو د امربالمعروف وزارت ویاند سېفاسلام خېبر وايي، دغې ډلې په کندهار کې د طب پوهنځي یو محصل هغه مهال نیولی، چې پر خپله فېسبوک پاڼه یې په خوست کې د اعدام شوي کس د حکم پر تطبیق مخالفت څرګند کړی و. طالبانو د دغه محصل د بښنې غږ هم خپور کړی دی.
نیویارکپوسټ راپور ورکړی، چې امریکايي چارواکي په داسې یوه پلان غور کوي چې له مخې یې د وینزویلا مشر نیکولاس مادورو د قطر په منځګړیتوب له خپل هېواد څخه ووځي او په جلاوطنۍ کې ژوند وکړي.
سپینې ماڼۍ اعلان وکړ، چې د ایران د فوټبال ملي لوبډلې ته به اجازه ورکړل شي څو امریکا ته په ننوتلو سره د نړۍوال جام په سیالیو کې ګډون وکړي؛ خو د سفر د بندیزونو له امله یې ویلي، چې ایراني مینهوال به د ننوتلو اجازه ونه لري.
د «افغان اېواک» مشر شاون وانډایور وايي، د امریکا له خوا د افغانانو د پاسپورټونو او ویزو ردېدل د دې لامل کېږي، چې د دوی متحد همکاران د طالبانو تر واکمنۍ لاندې افغانستان کې پاتې شي.
سپینې ماڼۍ ویلي، چې ټرمپ د بایډن هغه مقررات لغوه کړل، چې د موټرو تولیدوونکي یې د لوړ لګښت لرونکو محدودیتونو تابع کړي وو.
د امریکا د کورني امنیت وزارت ویلي، چې د یاد هېواد د کډوالۍ او ګمرکونو د پلي کولو ادارې د جانشاه ساپي په نوم یو افغان وګړی د داعش خراسان ډلې د ملاتړ په تور نیولی دی. د امریکا د کورني امنیت وزارت ویلي، چې یاد کس د جو بایډن د «متحدینو هرکلي» پروګرام له لارې امریکا ته انتقال شوی.
د روسیې په بند کې د امریکا د سمندري ځواکونو پخوانی غړی رابرټ ګیلمن په روسیه کې د زندان پر کارکوونکو د برید په تور یو ځل بیا تورن شو او دوه کاله نور بند پرې ولګول شو. له دې سره د هغه د بند موده ۱۰ کلونو ته وغځېده.
د امریکا د کورني امنیت وزیره کریسټي نوم وايي، چې په نږدې یوه کال کې شاوخوا دوه میلیونه غېرقانوني کډوال له امریکا اېستل شوي یا یې دغه هېواد پرېښی دی. هغې وویل، چې د ټرمپ حکومت به «ډېر خلک خپلو کورونو ته واستوي.»
د پاکستان د سوداګرۍ وزارت ویلي، چې د بشردوستانه موخو لپاره د تورخم او چمن سوداګریزې لارې پرانېزي. یادې لارې به یوازې د ملګرو ملتونو د بشري مرستو د لېږد لپاره پرانېستل شي.
د امریکا د مرکزي قوماندانۍ «سنټکام» اعلان کړی، چې د امریکا پوځ منځني ختیځ ته د یو اړخیز برید کوونکو بېپېلوټه الوتکو لومړۍ جوپه استولې ده. دغه ځواکونه د «لړم ځانګړي ځواکونو» په نوم یادېږي او په سیمه کې د ټیټ لګښت لرونکو بېپېلوټه الوتکو د وړتیاوو د لوړولو په موخه جوړ شوي.
ملګرو ملتونو په خپل یوه راپور کې ویلي، چې افغانستان کې هره میاشت ۵۴ کسان د ماینونو او د جګړې د پاتې شونو له امله وژل کېږي، چې له دې دلې ۷۷ سلنه یې ماشومان دي.
د پاکستان پوځ د چهارشنبې په ورځ ویلي، چې د خېبرپښتونخوا په شمالي وزیرستان کې په دوو جلا عملیاتو کې د تحریک طالبان پاکستان اووه غړي وژل شوي دي. د پوځ په وینا، دغه وسلهوال د پاکستان د امنیتي ځواکونو پر وړاندې په بریدونو او د ملکي خلکو په وژلو کې لاس درلود.
د افغانستان لپاره د ملګرو ملتونو ځانګړي راپور ورکوونکي رېچارډ بېنېت د معلولینو د نړۍوالې ورځې په مناسبت د افغان معلولیت لرونکو پر وضعیت اندېښنه ښودلې ده. نوموړي د افغان معلولو ښځو او ماشومانو لپاره د روغتیا، زده کړو او خدماتو پر برابرولو ټینګار کړی دی.
د طالبانو تر واک لاندې د کډوالو د ستونزو د حل عالي کمېسیون ویلي، چې نن د چهارشنبې په ورځ له ایران او پاکستان څخه ۷۰۲ کورنۍ چې شمېر یې ۳۶۳۰ کسانو ته رسېږي، په جبري توګه افغانستان ته ستانه شوي دي.
طالبانو په بلخ ولایت کې د الکولي مشروباتو د قاچاق په تور یو کس په عام محضر کې په دُرو وهلی دی.
د طالبانو د کرنې وزارت وایي، چې د ازبکستان د کرنې وزارت د مرستیال جمشید عبدوذوکروف په مشرۍ د دغه هېواد د خصوصي سکتور استازو د افغانستان له کرنیزو متشبثینو سره سوداګریز قراردادونه لاسلیک کړي دي.