په ننګرهار کې د طالبانو رسنیز دفتر وایي، د دوی یوه پلاوي په جلالاباد ښار کې د اوړو له یوشمېر پلورنځيو څخه څارنه ترسره کړې او پرمهال یې ۴۵ هټۍ کتلې دي. یاد رسنیز دفتر زیاته کړې، چې له دې ډلې ۸ هټۍ د وزن د کمښت او ټيټ کیفیت له امله تړل شوې دي.
په اسلاماباد کې د امریکا او ایران د سولې خبرو اترو دویم پړاو لپاره د پاکستان حکومت په اسلاماباد او راولپنډۍ په ځانګړي ډول د نورخان هوايي اډې شاوخوا سخت امنیتي تدابیر نیولي دي.
د اوکراین ولسمشر ولادیمیر زېلېنسکي وايي، له روسیې سره په جګړه کې د بالستیک توغندیو په وړاندې دفاع یې د هېواد ترټولو لویه ننګونه ده. زېلېنسکي ویلي: «زما په اند موږ باید د اروپا د بالستیک توغندیو ضد دفاعي سیسټم ولرو».
په ننګرهار کې د طالبانو د کرنې، اوبو لګولو او مالدارۍ ریاست وایي، سږکال د دغه ولایت په بېلابېلو ولسوالیو کې پر ۴۰۶ جریبه ځمکه ځمکني توتان کرل شوي چې د اټکل له مخې به شاوخوا ۶۷۰ مټریک ټنه حاصل ورکړي.
د افغانستان د ښځو د ازادۍ په نوم یو غورځنګ په پاکستان کې د افغان کډوالو پر روان وضعیت اندېښنه ښودلې او د دغه هېواد له لوري یې د افغان کډوالو د وتلو لپاره د ضربالاجل ټاکل او د جبري اېستلو لړۍ چټکول د بشري او انساني اصولو خلاف اقدام بللی دی.
د بلوچستان ایالت په خضدار او مستونګ ولسوالیو کې په دوو جلا پېښو کې درې پاکستاني پولیس وژل شوي او ۷ نور ټپیان دي. په لومړۍ پېښه کې د خضدار ولسوالۍ په باغبانه باجوي سیمه کې وسلهوالو پر پولیسو ډزې کړې، چې له امله یې د یوې ښځینه پولیسې په ګډون ۲ پاکستاني پولیس وژل شوي او یو ټپي دی.
ډان ورځپاڼې د پاکستاني چارواکو په حواله راپور ورکړی، چې په لنډي کوتل کې د افغان کډوالو د لېږد په لنډمهاله پنډغالو کې د ستنېدو لړۍ چټکه شوې ده. د دوی د معلوماتو له مخې؛ هره ورځ ۴زره او ۵۰۰ افغان کډوال د ستنېدو په موخه ثبتېږي.
د بدن جوړونې افغان لوبغاړي ابوذر فیضي د اسټرالیا د «PCA» په ازاده سیالیو کې دوه د سرو زرو مډالونه وګټل. هغه دارنګه وتوانېده، چې د دغه سیالیو د «اتلانو اتل» لقب خپل کړي او خپل مسلکي کارت هم ترلاسه کړي.
په اسلاماباد او راولپنډۍ کې یو شمېر پوهنتونونو خپل تدرس په انلاین بڼه کولو او د ازموینو د ځنډولو اعلان کړی دی. دا پرېکړه د ایران او متحده ایالاتو ترمنځ د احتمالي مذاکراتو د دوهم پړاو د ترسره کېدو په تړاو شوې ده.
د خوړو نړۍوال پروګرام په بغلان او پکتیا کې له ۱۲۳۱ داخلي بېځایه شویو او بېوزلو کورنیو سره نغدي مرستې کړي. دغه پروګرام په پکتیا کې د وروستیو جګړو له امله له هرې بېځایه شوې کورنۍ سره ۵۸۰۰ او په بغلان کې له هرې بېوزلې کورنۍ سره ۲۹۰۰ افغانۍ مرسته کړې ده.
د جمعيت علما اسلام ګوند مشر، مولانا فضل الرحمن ویلي، سره له دې چې پاکستان د ایران او متحده ایالاتو ترمنځ د منځګړیتوب هڅې کوي، خو په خپله په کور دننه له جدي سیاسي او اقتصادي ستونزو سره مخ دی.
د وحدت ګوند مشر محمد محقق د ایران او امریکا ترمنځ د اوربند برخه کې د هڅو له امله د پاکستان د لوی درستیز عاصم منیر له ستاینې وروسته اوس ویلي، ډیورند کرښه د افغانستان او پاکستان تر منځ د رسمي پولې په توګه په رسمیت پېژني. دا هغه غوښتنه ده، چې پاکستان یې له خپل پیدایښت سره هیله لري.
د ملک سلمان د مرستندویه او بشري چارو مرکز له لوري د سعودي عربستان په مالي ملاتړ، په پنجشېر ولایت کې ۷۰۶خوراکي کڅوړې اړمنو کورنیو ته وېشل شوې دي. د راپورونو له مخې، دغه مرستې په پنجشېر ولایت کې ۴۲۳۶ اړمنو کسانو ته رسېدلې دي.
د خېبرپښتونخوا اعلی وزیر، سهیل اپریدي ویلي، چې په خیبر پښتونخوا کې روانه ناامني د پاکستان دولت د «ناکامو پالیسیو» پایله ده.
د طالبانو ویاند، ذبیح الله مجاهد د منځني ختیځ انسټیټیوټ هغه راپور رد کړی چې په کې د طالبانو د ځینو غړو او د القاعده شبکې ترمنځ د اړیکو ادعا شوې ده. یاد انسټیټیوټ په خپل راپور کې ویلي و، چې د طالبانو شاوخوا ۵۵ غړي او چارواکي له القاعده شبکې سره مستقیم یا غیرمستقیم اړیکې لري.
په تېر جمهوري نظام د عامې روغتیا پخوانۍ وزیرې ثریا دلیل د طالبانو د عامې روغتیا وزیر نورجلال جلالي د هغو څرګندونو په غبرګون کې، چې ویلي یې وو په هره ولسوالۍ کې به یو روغتون جوړ شي، ویلي چې د افغانستان اوسنی روغتیايي وضعیت «اندېښمنونکی» دی.
د ملګرو ملتونو د پراختیایې پروګرام (یواېنډيپي) استازو د طالبانو د چاپېریال ساتنې ادارې له رييس سره په کتنه کې ویلي، هڅې کوي چې له افغانستان سره خپلې مرستې پراخې کړي.
د افغانستان د رزمي ورزش (ګراپلینګ) لوبغاړې صوفیه سروري، د جرمني په فرانکفورټ ښار کې د جوجیټسو نړیوال لیګ په سیالیو کې د اتلولۍ مقام ګټلی دی.
د ملګرو ملتونو د ماشومانو د ملاتړ صندوق (یونیسف) استازي، تاجالدین اویوواله، د طالبانو د اوبو او انرژۍ له وزیر محمد یونس اخندزاده سره کتلي او د اوبو د سرچینو د مدیریت او دوامدارې استفادې په اړه یې خبرې اترې کړې دي.
د طالبانو له پېښو سره د مبارزې چمتووالي ادارې مشر، نورالدین ترابي د «نو انلوس» موسسې له مرستیال فیضان احمد کاکړ سره په کتنه کې وویل، چې د هېواد په ډېری ولایتونو کې داسې زیانمنې کورنۍ شته چې مرستو ته زیاته اړتیا لري.
د امریکا په لویزیانا ایالت کې په یوه خونړۍ پېښه کې لږ تر لږه اته ماشومان چې عمرونه یې له یو تر ۱۴کلونو پورې وو، د ډزو له امله وژل شوي دي.