نیویارک ټایمز راپور ورکړی، چې د امریکا حکومت د ۱۹ هېوادونو د وګړو لپاره د کډوالۍ ټولې غوښتنې له ګرینکارټ نیولې تر تابعیته پورې په بشپړه توګه درولې دي. دغه پرېکړه په واشنګټن کې د ملي ګارډ پر دوو عسکرو تر برید وروسته شوې ده.
د ایران د پارلمان د صنعت او کانونو کمېسیون یوه غړي امیر توکليرودي ویلي، د افغانستان کانونه د ایران د صنعت لپاره ځانګړی اهمیت لري او تهران هڅه کوي چې په دغه سکتور کې پراخې پانګونې وکړي. د هغه په وینا؛ دواړه هېوادونه په دې برخه کې د ګډې اقتصادي سیمې د جوړولو په اړه کار کوي.
د پنټاګون ویاند د ایران پر اټومي تاسیساتو د امریکا برید «بریالی» وباله او ویې ویل، چې دغه برید د تهران اټومي وړتیاوې په بشپړ ډول لهمنځه وړې دي او د ایران اټومي پروګرام یې شاوخوا دوه کاله شاته کړ.
ټاکل شوې، چې د ازاده سیالیو افغان لوبغاړی احمد حلیمسون د «اوکټاګون» سازمان د سیالۍ په ۸۳م پړاو کې د چک جمهوریت جان ملک پر وړاندې د لوبو ډګر ته ښکته شي. دغه سیالي به د ۱۴۰۴کال (د سلواغې په ۱۱مه نېټه) د جرمني په شټګارټ کې د ۷۰ کیلوګرامه وزن په کټګورۍ کې ترسره شي.
د نړۍ د کاتولیکانو مشر پاپ لیو له ډونالډ ټرمپ څخه غوښتي، چې د وینزویلا د ولسمشر نیکولاس مادورو د ګوښه کولو لپاره له پوځي اقدام څخه کار وانخلي. همدارنګه ویل کېږي، چې امریکا د نشهيي توکو په قاچاق شکمنو کښتیو د بریدونو پر ترسره کولو غور کوي.
د «ډیفنس اسکوپ» خپرونې راپور ورکړی، چې پنټاګون به د خپل «د بېپيلوټه الوتکو د برترۍ پروګرام» په چوکاټ کې د ارزانه او وړو بېپيلوټه الوتکو د اخیستو لپاره اقدام وکړي. راپور زیاتوي، چې پنټاګون پلان لري څو تر ۲۰۲۷ پورې له ۲۰۰ زره زیاتې بېپيلوټه الوتکې واخلي.
څلورو امریکایي ډېموکراتو سناتورانو د ټرمپ له حکومت او د دې هېواد له خلکو غوښتي، چې د رحمانالله لکڼوال د کړنې له امله ټول افغان کډوال ملامت ونه ګڼي. هغوی لیکلي، چې په امریکا کې مېشتو افغانو ټولنو دغه برید غندلی دی.
په ټولنیزو رسنیو کې د هویت پر سر د بحثونو له زیاتېدو وروسته د افغانستان د پخواني حکومت د کورنیو چارو وزیر محمد عمر داوودزي پر ملي یووالي ټینګار کړی او وايي، دغه ډول بحثونه دې د افغانستان د جغرافيې له ترلاسه کولو وروسته وشي او هر هغه څه چې د ملي یووالي خلاف وي، باید ترې ډډه وشي.
په کابل کې د ایران سفارت ویلي، چې دغه هېواد د څلویښتو درمل تولیدونکو شرکتونو په ګډون په د درملو نندارتون پرانیستی دی.
په کابل کې د ترکیې سفیر د طالبانو د اقتصاد له وزیر سره د خپلې مخه ښې لیدنې پر مهال د افغان زلزلهځپلو لپاره د زرو ټنو بشري مرستو ژمنه وکړه. په دې لیدنه کې دواړو لوریو د اقتصادي همکاریو د پراخېدو او د بشري مرستو د دوام په اړه هم بحث کړی دی.
د کرملین مرستیال یوري اوشاکوف د روسي او امریکایي چارواکو ترمنځ له خبرو اترو وروسته اعلان وکړ چې خبرې اترې رغنده وې، خو د اوکراین د سولې په اړه کومې هوکړې ته ونه رسېد. نوموړي ویلي، چې د اوکراین په اړه اختلافات لا هم پاتې دي.
سي بياېس نیوز راپور ورکوي، چې په واشنګټن ډيسي کې د ملي ګارډ پر دوو سرتېرو له خونړي برید وروسته د ټرمپ اداره ارزونه کوي، چې د سفر بندیزونه له اوسنیو ۱۹ هېوادونو څخه نږدې ۳۰ هېوادونو ته وغځوي. دا ګام د کډوالۍ پر وړاندې د وروستیو کلونو تر ټولو سخت او پراخ محدودیتونه بلل کېږي.
پخوانی افغان سرتېری رحمانالله لکڼوال د سې شنبې په ورځ د روغتون له بستر څخه د ویډیو له لارې د محکمې لومړۍ غونډې ته حاضر شو او په رسمي ډول د سارا بکسټروم په وژنه او څو نورو تورونو تورن شو. لکڼوال د خپل دولتي وکیل له لارې په محکمه کې پر هغه لګېدلي تورونه ونه منل.
ملګري ملتونه وایي، تاوتریخوالی یوازې د وهل ټکولو او فزیکي زیان رسولو په معنا نه دی؛ بلکې هر ډول لفظي سپکاوی، ګواښ، جبري کنټرول، مالي محدودیت او د ازادۍ اخیستل هم د تاوتریخوالي بڼې دي، چې د ښځو او نجونو رواني، عاطفي او ټولنیز ژوند ته جدي زیان رسوي.
په خوست کې د طالبانو د والي ویاند مستغفر ګربز ویلي، چې د «قصاص» شوي کس د دوو زامنو د اعدام حکم هم صادر شوی دی. نوموړي زیاته کړې، چې د مقتول د کورنۍ د وارثانو د نشتون له امله د اعدام تطبیق ځنډول شوی دی.
د جرمني د بهرنیو چارو وزارت ویلي، چې د ایران حکومت په دغه هېواد کې د المان سفارت کارکوونکو او ډیپلوماټانو ته ویزې نه صادروي.
جمهوري غوښتونکی امریکایي سناتور سټیو ډینز چې د ټرمپ له متحدینو دی، وايي د افغان کډوالو د سوابقو یا مخکېنیو معلوماتو بیاکتنه د امریکا د امنیت لپاره ډېره مهمه ده. ډینز د ټرمپ له خوا د افغان پناه غوښتونکو د منلو په اړه ویلي، چې ځینې افغان کډوال د امریکا لپاره ښه نیت نه لري.
د امریکا ولسمشر ډونالډ ټرمپ د سې شنبې په ورځ ویلي، هر هغه هېواد چې غېرقانوني نشهیي توکي امریکا ته لېږدوي، ښایي د برید هدف وګرځي.
د پاکستان د فدرالي تحقیقاتي ادارې چارواکو ویلي، چې په بلوچستان کې یې د افغانانو لپاره د جعلي پاسپورټونو او پېژندپاڼو د جوړولو په تور د یاد هېواد د ملي ثبت ادارې (نادرا) درې تنه چارواکي نیولي دي.
د افغانستان لپاره د ملګرو ملتونو ځانګړي راپور ورکوونکي رېچارډ بېنېت ویلي، چې په خوست کې د ماشومانو په ګډون د زرګونو کسانو د سترګو په وړاندې «قصاص» د یو ۱۳ کلن ماشوم له لوري ترسره شوی دی.
سناتور جوش هاولي د یوه افغان لهخوا پر ملي ګارډ له ډزو وروسته یو ځل بیا خپل پخوانی وړاندیز شوی پلان د امریکا کانګرس ته وړاندې کړ او غوښتنه یې وکړه، چې د امریکا د کورنیو چارو وزارت دې په جدي او بشپړ ډول د هغو افغان کډوالو تفتیش وکړي، چې له ۲۰۲۱ کال وروسته امریکا ته لېږدول شوي دي.