د افغانستان په شمال کې د طالبانو ۲۰۹ الفتح قول اردو وايي، چې د سمنګان ولایت په رود اب ولسوالۍ کې یې یو لړ ناقانونه وسلې او مهمات نیولي. په نیول شويو وسلو کې ۴ کلاشنکوفونه، ۱۲ صندوقه د راکټ سرګلولې،د هاوان، راکټ او پیکا مرمۍ شاملې دي .
ملګرو ملتونو په خپل تازه راپور کې ویلي، چې په افغانستان کې یې ۴،۶ میلیونه ماشومانو ته د زده کړو زمینه برابره کړې، چې له دې ډلې یې یوازې ۱،۹ میلیونه نجونې دي. سازمان اندېښنه ښودلې، چې له شپږم ټولګي پورته نجونو پر زده کړو بندیز د افغانستان د بشري ځواک د ودې په لاره کې ستر خنډ دی.
د ۲۰۲۶ کال په لومړۍ ربع کې اروپا ته تر ټولو ډېر پناه غوښتونکي له وینزویلا تللي چې شمېر یې ۲۱ زره او ۵۴۲ تنه دی. بنګله دېشي پناه غوښتونکي څه کم لس زره تنه یاد شوي دي. د اروپايي ټولنې د احصایې له مخې، د پناه غوښتنې ۳۸ سلنه غوښتنلیکونه د افغانانو له خوا ثبت شوي دي.
د روغتیا نړیوال سازمان وايي، چې د خپل روزنیز پروګرام له لارې یې په بلخ کې ۵۵ ټولنیز روغتیايي کارکوونکي وروزل، چې ۴۳ یې مېرمنې دي. ګډونوالو ته د لوړ فشار، شکرې، تنفسي مزمنو ناروغیو او سرطانونو په اړه عملي زده کړې ورکړل شوې دي.
د طالبانو د کورنیو چارو وزارت ویلي چې د لغمان ولایت په قرغیو ولسوالۍ او د مهترلام ښار په بېلابېلو سیمو کې یې د عملیاتو پر مهال څلور تنه د نشهيي توکو او ټابلیټونو د پلور په تور نیولي دي.
د د طالبانو د ټولګټو وزارت وایي، په ۱۴۰۴ لمریز کال کې د افغانستان د څلورو مهمو رېلي بندرونو له لارې د سوداګریزو توکو لېږد د تېر کال په پرتله ۳۹،۱ سلنه زیات شوی او څه باندې ۶ میلیونه ټنه توکي انتقال شوي دي.
دارالعلوم حقانیه مدرسه، چې له کلونو راهیسې د افغانستان د طالبانو د فکري او دیني روزنې مشهور ځای و، پر کابل د طالبانو له واکمنېدو وروسته له افغان توکمه طالبانو تشه شوې او یوازې ۵۵ تنه افغان زده کوونکي ور پاتې دي.
د طالبانو د عامې روغتیا وزیر نور جلال جلالي د عامې روغتیا وزارت له ولایتي مسوولینو سره د همغږۍ په غونډه کې ویلي چې اوس مهال دولتي روغتونونه د ماشومانو د زړه د عملیاتو وړتیا لري.
د طالبانو ویاند ذبیحالله مجاهد ویلي چې د افغانستان د رسنیو لپاره یې یو معلوماتي بانک جوړ کړی دی. د هغه په وینا، رسنۍ به له دې وروسته د همدې بانک له لارې معلومات ترلاسه کوي او خپروي، څو د ده په خبره د د دوی د د مخالفینو د «ناسمو اطلاعاتو» مخه ونیول شي.
د اوکراین ولسمشر ولادیمیر زیلنسکي وایي، د روسیې پر وړاندې د بندیزونو نرمول د جګړې واقعیت نه منعکس کوي او د دې هېواد مشرتابه ته دا تصور ورکوي چې جګړې ته دوام ورکولی شي، په داسې حال کې چې د تېلو عواید د اوکراین پر ضد د بریدونو لپاره کارېږي.
د طالبانو کورنیو چارو وزارت وایي، د لوګر ولایت پولیسو د یو نیم کیلوګرامه سرو زرو د غلا په تړاو څلور کسان نیولي، او په جلا عملیاتو کې د هرات په ولایت کې سلګونه وسلې هم کشف او ترلاسه شوې دي.
د ملګرو ملتونو د بشري چارو د همغږۍ دفتر (اوچا) وایي، د افغانستان د بشري مرستو صندوق په ۲۰۲۵ کال کې ۷۳،۴ میلیونه ډالر ۱۱۹ پروژو ته ځانګړي کړي، چې له لارې یې تر ټولو اړمنو کسانو ته مرسته رسېدلې ده.
د پاکستان په پلازمېنه اسلاماباد او نږدې ښار راولپنډۍ کې د احتمالي امنیتي اندېښنو له امله سخت امنیتي تدابیر نیول شوي، چې په ترڅ کې یې له ۱۰ زرو زیات پولیس، په ګډون د ځانګړو کومانډو او نښهویشتونکي ځواکونه، پر دندو ګمارل شوي دي.
د امریکا د ولسمشر پخوانۍ مرستیالې کملا هاریس ویلي چې د اسراییلو لومړي وزیر،بنیامین نتنیاهو ډونالډ ټرمپ له ایران سره جګړې ته کش کړی دی.
د افغانستان د جګړې پر مهال پخوانی اسټرالیایی سرتیری رابرټس سمیټ چې د بې وسلې پنځو افغانانو د وژنې په تور تورن دی، ویلي چې دی به هڅه وکړي خپله بې ګناهي ثابته او ځان سپین کړي.
د ملګرو ملتونو د روغتیا نړیوال سازمان وایي چې په بلخ ولایت کې یې ۵۵ د ټولنې روغتیایي کارکوونکي روزلي دي چې ۴۳یې ښځې دي، څو د غیر ساري ناروغیو د ژر تشخیص او رېفر کولو بهیر پیاوړی شي.
د پاکستان راولپنډۍ په باراني پوهنتون کې د امنیتي وضعیت له امله د اپریل تر ۲۴مې نېټې پورې ټولې حضوري چارې ځنډول شوي او تدریسي بهیر انلاین شوی، په داسې حال کې چې په اسلاماباد کې هم یو شمېر تعلیمي ادارو ورته پرېکړې کړې دي.
د طالبانو امر بالمعروف وزارت وایي، په تېرو دوو اونیو کې یې د فاریاب ولایت په مرکز او ولسوالیو کې ۱۷ هغه مېرمنې له کورني تاوتریخوالي او ناوړه دودونو ژغورلې چې له خپلو شرعي حقونو بېبرخې شوې وې.
د اوکراین په پلازمېنه کیېف کې یو وسلهوال سړي پر خلکو ډزې کړي، چې له امله یې لږ تر لږه شپږ کسان وژل شوي او یو شمېر نور ټپیان دي. یاد کس تر ډزو وروسته عام خلک یرغمل کړي وو چې د پولیسو له لوري ووژل شو.
د طالبانو د کرنې، اوبو لګولو او مالدارۍ وزیر صدراعظم عثماني، په روسیه کې له مېشتو افغان سوداګرو سره د کرنې او مالدارۍ د سکتور د پراختیا په موخه لیدلي دي.
د افغانستان د مارشل ارټس ۱۸ کلنو کمعمره دوه لوبغاړو د ازبکستان په کوربهتوب د «اسیا د ۱۸ کلنو د اتلتیک/ځوانانو سیالیو» کې د برونزو مډالونه ترلاسه کړي دي.