اذربایجان کې د طالبانو د سفارت سرپرست محمد فیصل، د دغه هېواد د کډوالۍ ادارې د نړیوالو همکاریو له مشر الوي علییف سره کتلي دي. دواړو لورو په اذربایجان کې د مېشتو افغانانو پر ستونزو خبرې کړي.
د پاکستان د شخړو او امنیتي مطالعاتو انسټیټیوټ وایي، چې په دغه هېواد کې د ترهګریزو پېښو شمېر د مارچ په میاشت کې ۳۵ سلنه کم شوی دی. د دغه بنسټ په وینا، طالبانو سره د افغانستان په خاوره کې د عملیاتو سره هممهاله په پاکستان کې د ملکي وګړو تلفات هم ۷۰ سلنه راکم شوي دي.
د ملګرو ملتونو دخوړو نړیوال پروګرام ویلي چې په افغانستان کې وروستیو ناڅاپي سېلابونو د خلکو ورځنی ژوند سخت اغېزمن کړی او ګڼې کورنۍ یې له ستونزو سره مخ کړې دي.
د طالبانو د بلخ ولایت رسنیز دفتر ویلي، چې په دغه ولایت کې د افغان او ازبکستاني پانګوالو له لوري د ۶۰ میلیونه ډالرو په ارزښت د چرګانو د غوښې او هګیو د تولید د یوې لویې فاریکې د جوړولو چارې پیل شوې.
د طالبانو د کورنیو چارو وزیر سراجالدین حقاني ددې ډلې ټولو واليانو، امنیه قوماندانانو او ولسوالانو ته سپارښتنه کړې ده چې د ورښتونو او سیلابونو وضعیت ته په پام د خلکو امنیت ته جدي پاملرنه وکړي.
د طالبانو تر واک لاندې د افغاني سرې میاشتې مشر شهابالدین دلاور د افغانستان لپاره د بریټانیا له ځانګړي استازي سره په انلاین ناسته کې د وروستیو طبیعي پېښو په پایله کې د اوښتو مالي او ځاني زیانونو په اړه خبرې کړې دي.
د طالبانو ستره محکمه وايي، چې په ننګرهار، نیمروز او پکتیکا ولایتونو کې یې «د مور او پلار د وهلو، نامشروع اړیکو او لواطت» په تور ۲۵ کسان په عام محضر کې په دُرو وهلي دي.
د لیتوانیا سرحدي ساتونکو له بېلاروس نه د اوښتلو پرمهال د افغانانو او پاکستاني وګړو په ګډون د ۳۴ ناقانونه کډوالو یوه ډله نیولې ده. د لیتوانیا د کورنیو چارو وزارت اړوند د سرحد ساتنې ادارې ویلي، چې ددې ډلې ټول غړي بېرته بېلاروس ته استول شوي دي.
د افغانستان په چارو کې د برېتانیا ځانګړي استازي ریچارډ لینډسي د طالبانو لهخوا د ملګرو ملتونو دفترونو ته د ښځو پر لاسرسي لګول شوي بندیزونه غندلي او وايي، د طالبانو دا کړنه د منلو وړ نه ده.
د طالبانو د بهرنیو چارو وزارت په یوه اعلامیه کې ویلي، چې د اسراییل په پارلمان کې د هغه قانون تصويبېدل په کلکه غندي چې له مخې يې ددوی په وینا، پر فلسطيني بنديانو د اعدام سزا پلي کېدو ته لار اوارېږي.
د روسیې دفاع وزارت د چارشنبې په ورځ وویل چې ځواکونو یې د اوکراين په ختیځ کې د لوهانسک سیمې بشپړ کنترول تر لاسه کړی. اوکراين لا تر اوسه په دې اړه رسمي غبرګون نه دی ښوولی.
د امریکا ولسمشر ډونالډ ټرمپ ویلي چې د ایران جګړه ښایي ډېر ژر پای ته ورسېږي، خو پر ناټو یې نیوکه کړې، چې له ډېر وخته پوهېده چې «تش کاغذي پړانګ» دی او پوتین هم په دې پوهیږي. هغه دغه راز له ناټو نه د وتلو خبرداری هم ور کړی.
د طالبانو د ریاستالوزرا اقتصادي مرستیال عبدالغني برادر په مشرۍ د تدارکاتو کمېسیون نوبتي غونډه کې له بحث وروسته د یو میلیارد افغانیو په ارزښت ۱۷پروژې منظورې شوې دي.
د طالبانو د پېښو پر وړاندې د مبارزې ادارې ویلي، چې په تېرو ۲۴ ساعتونو کې د هېواد په بېلابېلو ولایتونو کې د سختو بارانونو، سېلابونو، تالندې او برېښنا په پایله کې ۶ کسان مړه شوي او ۱۷ نور ټپیان دي.
د سولې نوبل جایزې ګټونکې او د زده کړو او نجونو د حقونو فعالې ملالې یوسفزۍ د هاروارډ پوهنتون د خبرو اترو په وروستي پروګرام کې له هېوادونو وغوښتل، چې د افغان ښځو او نجونو د حقوقو ملاتړ وکړي او له طالبانو سره په هر ډول خبرو کې د ښځو پر حقونو جوړجاړی ونه شي.
په داسې حال کې، چې د نورستان د برګمټال او کامدېش لارې بندې دي، ددغه ولایت لپاره د طالبانو امنیه قوماندان کامدېش ولسوالۍ ته سفر کړی او وايي، چې په نورستان کې هېڅ ستونزه نشته.
د ایران د ارمان بیمې شرکت یو پلاوي د اریانا افغان هوايي شرکت د یوې زیانمنې شوې الوتکې وضعیت له نږدې څیړلی دی. دغه الوتکه د وري پر پنځمه له ځغل لیکې ووتله او یو وزر ته یې زیان رسېدلی دی. اریانا افغان شرکت په ۲۰۲۳ کال کې خپلې الوتکې د ایران له ارمان بیمې شرکت سره بیمه کړې.
په اندونیزیا کې د طالبانو د سفارت سرپرست سعدالله بلوچ د دغه هېواد د محمدیه ګوند له یو شمېر لوړپوړو مسوولینو سره کتلي او د دوه اړخیزو همکاریو په تړاو یې خبرې کړې دي.
د ترکیې د موغلا ولایت په بودروم سیمه کې د پناهغوښتونکو یوې بېړۍ ډوبېدو له امله د یوه ماشوم په ګډون ۱۹ کسان مړه او ۲۰ نور ژغورل شوي دي. ترکي چارواکو ویلي، چې په دغه بېړۍ کې ټول سپاره مساپر افغانان وو.
د طالبانو یو پنځه کسیز منځپوړی پلاوی له پاکستان سره د خبرو په موخه چین ته پر لاره دی. په پلاوي کې د طالبانو د بهرنیو چارو وزارت استازي محبالله وثیق او عبدالحی قانت، د کورنیو چارو وزارت استازی عارفالله، د دفاع وزارت استازی روحالله عمر او د استخباراتو ریاست استازی یحی تکل دي.
د بلوچستان د ګوادر ولسوالۍ په پلیري سیمه کې ناڅرګنده وسلهوالو درې کسان په ډزو وژلي دي. د پولیسو په وینا؛ وژل شویو کسانو کې یو کس د ایران د چابهار، يو د بلوچستان د کیچ او بل د ګوادر ولسوالۍ اوسېدونکی دی.