د طالبانو د عامې روغتیا وزیر مولوي نور جلال جلالي د جاپان له نوي سفیر کنیچي ماساموتو سره په لیدنه کې د روغتیايي همکاریو پر پراختیا خبرې کړې دي. ښاغلي جلالي په دغه ناسته کې د غیرساري ناروغیو په مخنیوي، تشخیص، درملنه او ځینو نورو تخصصي برخو کې د ظرفیت لوړونې او همکارۍ غوښتنه کړې.
د کډوالۍ نړۍوال سازمان د چهارشنبې په ورځ خبر ورکړی، چې د لیبیا په سمندر کې د یوې کښتۍ د ډوبېدو له امله ۴۲ کډوال تري تم دي او ښایي دغه کسان مړه شوي وي. د لیبیا ځایي چارواکي وایي، په دغه کښتۍ کې ۴۹ کډوال سپاره وو چې ۷تنه یې ژغورل شوي دي.
په بغلان کې د طالبانو د کانونو او پټرولیم رییس مولوي عبادالله معاذ وایي، چې د دغه ولایت له کانونو هره میاشت شاوخوا ۲۰۵۰ ټنه د ګچو ډبرې استخراجېږي او د یادو ډبرو د استخراج چارې په منظم ډول روانې دي.
د ايران د خراسان رضوي ولايت سياسي او ټولنيز مرستيال محمدعلي نبيپور ويلي، له تېرو شپږو میاشتو راهیسې په افغانستان کې د ایران د تېلو ۷۳۶ټانکرونه ایسار کړای شوي او دوی په جدي توګه دغه مسله څېړي.
د ملګرو ملتونو په یو تازه خپور شوي راپور کې راغلي، چې د روان کال په لومړیو لسو میاشتو کې پر اوکراین د روسیې د بریدونو په پایله کې ۱۲۱۰۰ ملکي وګړو ته مرګ ژوبله اوښتې ده. دغه شمېره د تېر کال د ورته مودې پرتله ۲۷ سلنه زیاتوالی ښیي.
د ايران د بهرنيو چارو وزير سيد عباس عراقچي د روسیې له بهرنيو چارو وزير سرګي لاوروف سره په یوه ټلېفوني اړیکه کې د طالبانو او پاکستان ترمنځ د وروستي کړکېچ په اړه اندېښنه څرګنده کړې او د سيمې د هېوادونو ترمنځ د سولې او ثبات لپاره یې د ګډو هڅو پر اړتیا ټینګار کړی.
د افغان لوبغاړو د ویزو ستونزو پر دوام د افغانستان د بدن جوړونې اتل یاسین قادري د «مېسټر المپیا» په نړۍوالو سیالیو کې له ګډونه پاتې شو. ټاکل شوې ده، چې دغه سیالۍ په جاپان، چین او تایوان کې ترسره شي؛ خو د ویزې د نهورکړې له امله یاسین قادري په دغه سیالیو کې له ګډونه بېبرخې شو.
د عراق د ټاکنو خپلواک کمېسیون د چهارشنبې په ورځ اعلان وکړ، چې د عراق د لومړي وزیر محمد شیاع السوداني په مشرۍ سیاسي اېتلاف د دغه هېواد په پارلماني ټاکنو کې ترټولو مخکښ دی. د کمېسیون په وینا؛ دغه اېتلاف له یو مېلیون او ۳۰۰زرو ډېرې رایې ترلاسه کړې دي.
د امریکا د بهرنیو چارو وزارت مرستیال ویاند وايي، د ایران د توغندیو او بېپیلوټه الوتکو د تدارکاتي شبکو پر ضد د امریکا نوي بندیزونه د ملګرو ملتونو د بندیزونو د پلي کولو په ملاتړ لګول شوي دي.
د ایران د بهرنیو چارو وزارت مرستیال کاظم غریب ابادي په تهران کې د طالبانو له سفیر سره د لیدنې پر مهال له سلما بند څخه مشهد ته د اوبو د خوشې کولو غوښتنه کړې ده. هغه همدارنګه د هلمند د سیند د اوبو د حق په اړه هم خبرې کړي.
ملګرو ملتونو د چهارشنبې په ورځ ویلي، چې په غزه کې د دوو کلنو جګړو له امله په هرو پنځو ماشومانو کې یو یې له واکسین څخه بېبرخې شوی. دوی زیاتوي، له واکسین څخه د ماشومانو پاتې کېدل هغوی له وژونکو ناروغیو سره مخ کړي.
د طالبانو د امربالمعروف وزیر خالد حنفي د اسلامي همکاریو سازمان له ځانګړو استازو سره د اسلامي ارزښتونو پر ترویج خبرې وکړې. د طالبانو یاد وزیر د تخنیکي ملاتړ، ظرفیت لوړونې او روزنیزو سیمینارونو غوښتنه کړې.
د پښتونخوا د ملي عوامي پارټۍ مشر وايي، هغه د ټولو هېوادونو سفیرانو ته لیکونه لېږي او له نږدې ورته څرګندوي: «تاسو چې د دې بېاستازي حکومت سره تړونونه کړي، دا د پاکستان خلکو ته د منلو نه دي.» هغه زیاته کړې، د نړۍ خطرناک هېوادونه غواړي دغه سیمې د معدني زېرمو لپاره د جګړې ډګر وګرځوي.
په اسلاماباد کې د تېرې ورځې له ځانمرګي برید یوه ورځ وروسته، د پاکستان لومړي وزیر شهباز شریف د دې هېواد په پارلمان کې هند او افغان طالبان د پاکستان په ترهګریز برید کې پر لاس لرلو تورن کړل.
د امریکا د خزانې وزارت په ایران کې د ۳۲ کسانو او ادارو په ګډون پر متحده عربي اماراتو، ترکیې، چین، هانګ کانګ، هند، جرمني او اوکراین بندیزونه ولګول.
د سريلانکا د کرېکټ ملي لوبډلې لږ تر لږه اته لوبغاړي، پرته له دې چې د «پاکستان او زمبابوې» سره درې اړخیزې سیالۍ ترسره کړي، له پاکستان څخه وتلي دي. دا پرېکړه د سې شنبې په ورځ په اسلاماباد کې له هغه ځانمرګي برید وروسته وشوه، چې په کې ۱۲ کسان ووژل شول.
د طالبانو د افغانستان بانک د نظارت او مالي خدمتونو عمومي امر لطفالله خیرخواه اېمل ولي خان ته په خطاب کې ویلي: «زه تاسو ته مشوره درکوم چې په پوره غور سره فکر او تحلیل وکړئ.» اېمل ولي خان تر دې وړاندې ویلي و، چې افغان طالبان د افغانانو اصلي څېره نه دي.
د بښنې نړۍوال سازمان د چهارشنبې په ورځ (د لړم ۲۱مه) په خپل تازه راپور کې خبرداری ورکړی، چې د نړۍ د فوسیلي سون توکو زیات استعمال د بشري حقونو او د خلکو د ژوند لپاره لوی ګواښ دی.
د پاکستان د خلکو ګوند مشر بلاول بوټو زرداري د دغه هېواد پارلمان ته په خبرو کې ویلي، چې له «ترهګرو سره د مبارزې» لپاره باید د خلکو استازي، حکومت، اپوزیسیون او سیاستوال سره یو موټي شي. نوموړي ویلي، چې پاکستان لا له وړاندې ترهګرو ته ماتې ورکړې.
د پاکستان د دفاع وزیر د طالبانو د اقتصادي مرستیال ملا عبدالغني برادر د څرګندونو په غبرګون کې ویلي، چې د پاکستان او افغانستان ترمنځ د سوداګریزو اړیکو کمول به اسلاماباد ته ګټه ورسوي. هغه وویل، چې له افغانستان سره د اقتصادي اړیکو پرې کېدل به پاکستان ته هېڅ ډول زیان ونه رسوي.
طالبانو د ننګرهار په لعلپورې ولسوالۍ کې «له کور څخه د تېښتې، شراب خرڅولو، لواطت او غلا» په تور د يوې ښځې په ګډون ۱۴ کسان په دُرو وهلي دي. د طالبانو سترې محکمې د چهاشنبې په ورځ (د لړم ۲۱مه) د یوې خبرپاڼې په خپرولو سره ویلي، چې یاد کسان له ۳۰ تر ۳۹ دُرو وهل شوي دي.