د طالبانو تر کنټرول لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ له ایران او پاکستان نه ۱۹۷۸ کورنۍ چې ټولټال ۱۰زره او ۶۳۷ کسان کېږي؛ افغانستان ته ستنې شوې دي.
ایراني رسنیو خبر ورکړی، چې د سیستان او بلوچستان په خاش سیمه کې د یوې ټرافیکي پېښې له امله لږ تر لږه ۱۳ افغان کډوال مړه او ۷ نور ټپیان شوي دي. دغه کډوالو هڅه کوله، چې په ناقانونه توګه ایران ته ننوځي.
د ملګرو ملتونو د سرمنشي ویاند سټیفان دوجاریک خبرداری ورکړی، چې افغانستان له پرلهپسې زلزلو، اقلیمي بدلونونو او ناسم اقتصادي وضعیت سره هممهاله د مېلیونونه بېرته ستنېدونکو له سختو څپو سره مخ دی.
د بشري حقونو د څار نړۍوال سازمان خبر ورکړی، چې د اسټرالیا حکومت پر طالبانو د خپلو بندیزونو په اړه د مقرراتو د بدلونونو څېړنه کوي. دغه سازمان وایي، دا د طالبانو هغو کسانو پر وړاندې یو مهم ګام دی چې په افغانستان کې یې له بشري حقونو جدي سرغړونې کړې دي.
د طالبانو د کډوالو او بېرته راستنېدونکو چارو وزارت خبر ورکړی، په روانه اونۍ کې ۷۵۴ افغان کډوال چې د عراق او پاکستان په زندانونو کې بندیان وو؛ له زندانه تر خوشې کېدو وروسته افغانستان ته ستانه شوي دي.
په کندهار کې د طالبانو د کرنې، اوبو لګونې او مالدارۍ ریاست خبر ورکړی، چي د ملګرو ملتونو د پراختیایي پروګرام په مالي ملاتړ یې په کندهار ښار او ۱۲ ولسوالیو کې د ۱۲ مېلیونه او ۱۶۶زره افغانیو په لګښت ۱۰۰ شنې خونې جوړې کړې دي.
د افغانستان د مخکېني جمهوري نظام مرستیال ولسمشر امرالله صالح وایي، پاکستان يا د قطر هغه رول نهدی درک کړی چې د طالبانو د جوړونې په بهير کې يې لاره او يا يې قصداً له پامه غورځولی دی. هغه وایي، د افغانستان د څوکیدارۍ رول اوس د پاکستان له لاسه وتلی دی.
په فاریاب او پنجشېر ولایتونو کې د دوو جلا ټرافیکي پېښو له امله ۴کسان مړه او ۸ نور ټپیان شوي دي. په فاریاب ولایت کې د طالبانو د امنیې قوماندانۍ ویاند عبدالله مرادي ویلي، دغه پېښه د دولتاباد ولسوالۍ د جنګل سیمې ته څېرمه شوې چې پهکې ۴ کسان مړه شوي دي.
ایران له تېرې یوې لسیزې راهیسې د اوبو له سخت ناورین سره مخ دی. ایراني چارواکو خبرداری ورکړی، که وچکالي دوام وکړي نو پلازمېنه تهران چې تر ۱۰ مېلیونه ډېر خلک پهکې مېشت دي؛ ښایي په نږدې راتلونکې کې د استوګنې نه وړ په ښار بدل شي.
د بښنې نړۍوال سازمان پنجشنبه د (لړم ۲۲مه) ویلي، طالبانو په سیسټماټیک ډول افغان نجونې او ښځې د ژوند له ټولو برخو حذف کړې او له حقونو یې محرومې کړې دي. دغه سازمان وایي، نړۍواله ټولنه باید د افغان نجونو او ښځو د حقونو لپاره مبارزه وکړي.
د پاکستان د جماعت اسلامي ګوند پخواني مشر سراج الحق په پښتونخوا کې د امن جرګې پر مهال وینا کې ویلي، چې د طالبانو او پاکستان ترمنځ جګړه د هند په ګټه ده. هغه زیاته کړې، چې دواړه لوري باید د خبرو اترو له لارې سره مسایل حل کړي.
د امریکا ولسمشر ډونالډ ټرمپ د فدرالي حکومت د بیا پرانیستلو طرحه د دغه هېواد د سنا او استازو جرګې لهخوا تر تصویبېدو وروسته لاسلیک کړه. هغه زیاته کړه، د حکومت د بندېدو له امله د اوښتو زیانونو او اغېز کچه به په بشپړه توګه وارزول شي.
د پاکستان پوځ یو متقاعد جنرال انعامالحق په یوه تازه تحلیلي لیکنه کې چې «د افغانستان پوځي جغرافیه، د واک مرکزونه او زموږ سیاست» نومېږي، لیکلي چې افغان طالبانو د اسلاماباد د پخوانۍ دوستۍ او ملاتړ سره، سره اوس له پاکستان سره د دښمنۍ لاره نیولې ده.
د طالبانو د عامې روغتیا وزیر مولوي نور جلال جلالي د جاپان له نوي سفیر کنیچي ماساموتو سره په لیدنه کې د روغتیايي همکاریو پر پراختیا خبرې کړې دي. ښاغلي جلالي په دغه ناسته کې د غیرساري ناروغیو په مخنیوي، تشخیص، درملنه او ځینو نورو تخصصي برخو کې د ظرفیت لوړونې او همکارۍ غوښتنه کړې.
د کډوالۍ نړۍوال سازمان د چهارشنبې په ورځ خبر ورکړی، چې د لیبیا په سمندر کې د یوې کښتۍ د ډوبېدو له امله ۴۲ کډوال تري تم دي او ښایي دغه کسان مړه شوي وي. د لیبیا ځایي چارواکي وایي، په دغه کښتۍ کې ۴۹ کډوال سپاره وو چې ۷تنه یې ژغورل شوي دي.
په بغلان کې د طالبانو د کانونو او پټرولیم رییس مولوي عبادالله معاذ وایي، چې د دغه ولایت له کانونو هره میاشت شاوخوا ۲۰۵۰ ټنه د ګچو ډبرې استخراجېږي او د یادو ډبرو د استخراج چارې په منظم ډول روانې دي.
د ايران د خراسان رضوي ولايت سياسي او ټولنيز مرستيال محمدعلي نبيپور ويلي، له تېرو شپږو میاشتو راهیسې په افغانستان کې د ایران د تېلو ۷۳۶ټانکرونه ایسار کړای شوي او دوی په جدي توګه دغه مسله څېړي.
د ملګرو ملتونو په یو تازه خپور شوي راپور کې راغلي، چې د روان کال په لومړیو لسو میاشتو کې پر اوکراین د روسیې د بریدونو په پایله کې ۱۲۱۰۰ ملکي وګړو ته مرګ ژوبله اوښتې ده. دغه شمېره د تېر کال د ورته مودې پرتله ۲۷ سلنه زیاتوالی ښیي.
د ايران د بهرنيو چارو وزير سيد عباس عراقچي د روسیې له بهرنيو چارو وزير سرګي لاوروف سره په یوه ټلېفوني اړیکه کې د طالبانو او پاکستان ترمنځ د وروستي کړکېچ په اړه اندېښنه څرګنده کړې او د سيمې د هېوادونو ترمنځ د سولې او ثبات لپاره یې د ګډو هڅو پر اړتیا ټینګار کړی.
د افغان لوبغاړو د ویزو ستونزو پر دوام د افغانستان د بدن جوړونې اتل یاسین قادري د «مېسټر المپیا» په نړۍوالو سیالیو کې له ګډونه پاتې شو. ټاکل شوې ده، چې دغه سیالۍ په جاپان، چین او تایوان کې ترسره شي؛ خو د ویزې د نهورکړې له امله یاسین قادري په دغه سیالیو کې له ګډونه بېبرخې شو.
د عراق د ټاکنو خپلواک کمېسیون د چهارشنبې په ورځ اعلان وکړ، چې د عراق د لومړي وزیر محمد شیاع السوداني په مشرۍ سیاسي اېتلاف د دغه هېواد په پارلماني ټاکنو کې ترټولو مخکښ دی. د کمېسیون په وینا؛ دغه اېتلاف له یو مېلیون او ۳۰۰زرو ډېرې رایې ترلاسه کړې دي.