طالبانو اعلان وکړ، چې د هبتالله په لارښوونه یې د بیړنیو حالاتو کمېټه جوړه کړې او دغه کمېټه به د واورې ورېدو، بارانونو او نورو طبیعي پېښو پرمهال د خلکو د ژغورنې په برخه کې بېړنی اقدام کوي. نوې کمېټه داسې مهال جوړیږي، چې د ج د اضطرار کمېټې فعالیت درلود.
د طالبانو مخالفې وسله والې ډلې د افغانستان ازادۍ جبهې ویلي، چې د چارشنبې پر ماښام یې د کابل ښار د ۱۱ مې حوزې په سرای شمالي سیمه کې د طالبانو د تلاشۍ پر یوه پوسته برید کړی او درې طالبان یې وژلي او دوه نور یې ټپیان کړي دي.
د افغانستان د بشري حقونو په برخه کې د ملګرو ملتونو ځانګړي راپور ورکوونکي ریچارډ بېنېټ د ماینونو له امله د ملکي وګړو په ځانګړې توګه د ماشومانو د زیاتي مرګژوبلې په اړه اندېښه ښودلې او په دې برخه کې یې د افغانستان لپاره د بېړنۍ بودجي غوښتنه کړې ده.
د فرانسې ولسمشر ایمانویل مکرون د پنجشنبې په ورځ وویل چې د زور له لارې د هرمز تنګي پرانېستل واقعي نه دي. مکرون رسنیو ته ویلي، چې دوی د پوځي انتخاب ملاتړ نه دی کړی او څوک چې له تنګي تېریږي د ایران د سپاه پاسداران د بالستیک توغندیو له ګواښ سره مخامخ وي.
د پاکستان لومړي وزیر شهباز شریف ویلي، چې هېواد یې په سیمه کې د جګړې د پای ته رسولو لپاره خپلې هڅې روانې ساتلې دي، خو په سیمه کې روانو شخړو د اسلام اباد پر اقتصادي وضعیت منفي اغېز کړی دی.
طالبانو داسې مهال ډنیس کوییل خوشې کړ، چې د امریکا متحده ایالاتو سیاسي، رسنیز او ډیپلوماټیک فشارونه په څرګند ډول زیات شوي وو. واشنګټن دا اقدام «د سمې لار پر لور یو ګام» وباله، خو په ورته وخت کې یې ټینګار وکړ چې دا بدلون هېڅکله هم د کړکېچ د پای معنا نه لري.
د طالبانو د بهرنیو چارو وزارت ویلي، چې د چین په غوښتنه له پاکستان سره د متقابل درناوي او رغنده تعامل پر بنسټ خبرې کوي. یاد وزارت ویلي، چې د ارومچي په ناستو کې د متوازن او اصولي دریځ لهمخې ګډون کوي او له پاکستان سره به هر اړخیزې مسوولانه خبرې اترې وکړي.
د دوبۍ په زاړه ښاردوبۍ کریک کې ځینې افغان سوداګر وایي چې د ایران د توغندیو او ډرون بریدونو له امله د دوی سوداګري او ژوند له خطر سره مخ شوي دي. ۳۴ کلن افغان سوداګر محمد انور وویل: «جګړه باید ودریږي چې موږ خپله سوداګري وکړو».
د طالبانو د پېښو پر وړاندې د مبارزې ادارې ویلي، چې په تېرو ۲۴ ساعتونو کې په ۱۹ ولایتونو کې د سختو بارانونو او سیلابونو په پایله کې ۳ کسان مړه شوي او ۱۶ نور ټپیان دي.
د چین د بهرنیو چارو وزارت وايي، چې بیجنګ د تاوتریخوالي کمولو او د کابل او اسلام اباد ترمنځ د ستونزو د سوله ییز حل په موخه په فعاله توګه د افغانستان او پاکستان ترمنځ د منځګړيتوب هڅې کوي. د چین ارومچي ښار دمګړۍ د دواړو اړخونو د خبرو کوربه توب کوي.
د طالبانو د اقتصاد وزیر ویلي، چې د پاکستان د وروستیو بریدونو له امله په نهو ولایتونو کې څه باندې ۲۷ زره کورنۍ بېځایه شوې او دمګړۍ بېړنیو مرستو ته اړتیا لري. دین محمد حنیف پر ملګرو ملتونو او کورنیو او بهرنیو موسسو غږ کړی چې له بېځایه شویو کورنیو سره بېړنۍ مرستې وکړي.
د خیبر پښتونخوا د ناورينونو مدیریت ادارې په دغه ایالت کې د ورښتونو له امله د رامنځته شوي ځاني او مالي زیانونو راپور خپور کړی. په راپور کې راغلي، چې د دغه ایالت په بېلابېلو ولسوالیو کې د سختو ورښتونو له امله ۲۵ کسان مړه او ۷۷ نور ټپیان شوي دي.
روسیه وایي چې د ایران د شخړې د حل لپاره چمتو ده. د کریملین ویاند دمیتري پېسکوف د پنجشنبې په ورځ وویل چې د روسیې ولسمشر ولادیمیر پوتین لا هم د سیمې له مشرانو سره خبرې روانې ساتي.
د بلوچستان ایالت د چاغۍ ولسوالۍ مرستيال کمېشنر دفتر لهخوا په خپور شوي مکتوب کې راغلي، چې د پاکستان او ایران اوسېدونکي د اپرېل له لومړۍ نېټې له ایران سره پر پولې یوازې په پاسپورټ او ویزې تګراتګ کولای شي.
د پاکستان د بهرنیو چارو وزارت ومنله، چې ارومچې ته یې له طالبانو سره د خبرو لپاره پلاوی لېږلی او طالبان یې د وسلهوالو ډلو په وړاندې د اقداماتو په ترسره کولو مسوول ګڼلي. یوې سرچینې ویلي، طالبان هم د سوداګریزو لارو د دایمي پرانیستلو او پاکستان کې د داعش د ګواښونو مخنیوي غوښتنې لري.
د طالبانو د ټولګټو چارو وزارت خبر ورکړی، چې د تېرې کب میاشتې په لړ کې د اوسپنې پټلۍ له لارې ۷۲۹زره او ۲۶۱ مټریک ټنه انتقالات شوي دي. د دغه وزارت په وینا؛ یاد انتقالات د حیرتان، اقينې، تورغونډۍ او خواف-هرات بندرنونو له لارې شوي دي.
د تېر جمهوري نظام پرمهال د چارو ادارې مشر فضل محمود فضلي وايي، پر ایران د امریکا له بریدونو دا زدهکړه کولای شي چې پر نړۍ حاکم نظم او تش په نوم نړۍوال اخلاقي قواعد نهشته. هغه زیاته کړې، چې د پردیو په زور خپل هېواد ته د جګړې راوړلو پایله «بدبختي او بېعزتي» ده.
د طالبانو سترې محکمې د درېیو جلا خبرپاڼو په خپرولو سره ویلي، چې په بلخ، غور او نیمروز کې یې د یوې ښځې په ګډون ۱۹ کسان په دُرو وهلي دي. د یادې محکمې په خبره؛ دغه کسان یې «د خپل پلار د وهلو، د اخلاقي فساد، نامشروع اړیکو، غلا او لواطت» په تور په دُرو وهلي دي.
په اندونیزیا کې د طالبانو سفارت ویلي، چې د دغه ډلې سفیر سعدالله بلوچ د ازبکستان د سفیر اویبیک اشونوف سره په لیدنه کې د دوه اړخیزو اړیکو پر پیاوړتیا، اقتصادي او سوداګریزو همکاریو او سیمهییز اتصال او ټرانزيټ خبرې کړې دي.
د روسیې ټرانسپورت وزیر انډري نیکېټین ازبکستان د طالبانو سره د اړیکو پراختیا لپاره یو مهم شریک وباله. هغه زیاته کړې، چې «ازبکستان د خپلواکو هېوادونو د ګډو ګټو په ټولنه کې زموږ شریک دی او د افغانستان سره د اړیکو په پراختیا کې هم یو مهم شریک دی».
په کندهار کې د طالبانو تر واک لاندې له پېښو سره د مبارزې او چمتووالي ریاست ویلي، چې د سختو بارانونو او سېلابونو له امله د یاد ولایت په مرکز او یوشمېر ولسوالیو کې سلګونه کورنیو ته ګڼ مالي زیانونه اوښتي دي.