د ایران د خراسان رضوي ولایت د پوهنې ریاست خبر ورکړی، چې ښوونځیو کې یې د افغان کډوالو زدهکوونکو د نوملیکنې ستونزه اواره کړې ده. ویل شوي د نوې تګلارې له مخې؛ هغه زدهکوونکي چې د سرشمېرنې پاڼه ولري یا یې پخوا ایران کې زدهکړې کړې وي، ښوونځیو کې نوملیکنه کولای شي.
د اسراییل پوځ د خپل یوه وژل شوي افسر «هدار ګولډین» کورنۍ ته خبر ورکړی، چې له ۱۱ کلونو وروسته حماس د هغه مړی ورسپارلی دی. د راپورونو له مخې؛ د حماس ځواکونو په سوېلي غزه کې د سره صلیب نړۍوالې کمېټې ته دغه مړی سپارلی دی.
په پنجشېر ولایت کې د طالبانو د کرنې ریاست وایي، چې سږکال په دغه ولایت کې د بادامو حاصلات د تېرکال پرتله زیات شوي. د یاد ریاست د شمېرو له مخې؛ سږکال له دغه ولایت څخه شاوخوا ۱۳۱.۵ مټریک ټنه بادام راټول شوي، چې د تېر کال پرتله اووه سلنه زیاتوالی ښيي.
د طالبانو تر ادارې لاندې افغاني سرې میاشتې ټولنې خبر ورکړی، چې په بغلان ولایت کې یې له ګاونډیو هېوادونو نه د بېرته ستنو شویو ۱۵۰۰ کورنیو سره نغدي مرسته کړې. یکشنبه د (لړم ۱۸مه) خبرپاڼه کې راغلي، چې ټول ټال ۲۲نیم مېلیونه افغانۍ وېشل شوې چې هرې کورنۍ ته ۱۵زره افغانۍ رسېدلې دي.
د مقاومت جبهې مشر احمد مسعود په فرانسه کې «د راتلونکو کتنو» په کلنۍ غونډه کې خبرداری ورکړ، که د افغانستان مسلې ته حل لاره ونهموندل شي، نو تر راتلونکو لسو کلونو به نوی ناورین رامنځته شي او په وینا یې د لوېدیځ په ملاتړ کېدای شي له هغه ناورین څخه مخنیوی وشي.
د امریکا د کانګرس سناتورانو د حکومت د موقتي بندېدو د پای ته رسېدو لپاره هوکړې ته رسېدلي دي. د فاکس نیوز د راپور لهمخې، دا هوکړه د سناتورانو اېنګس کینګ، جین شاهین او مګي حسن او د څو جمهوري غوښتونکو سناتورانو ترمنځ تر خبرو وروسته شوې ده.
د چین حکومت د نادرو منرالونو د صادراتو د قوانینو د اسانه کولو پر نوي میکانیزم کار پیل کړی، خو د راپورونو له مخې، دغه بدلونونه به د امریکا د ولسمشر ډونالډ ټرمپ د هيلو په کچه پراخ نه وي.
د متحدې جبهې مشر جنرال سمیع سادات وایي، اوس په سیمه کې د افغان پخواني پوځ نشتوالی احساسېږي او دغه وضعیت به د ترهګرۍ د پراختیا او همداراز د بې ثباتۍ لامل شي. هغه طالبان یو ځل بیا د سیمې لپاره ګواښ وبلل او له ګاونډیو هېوادونو یې وغوښتل، له دغې ډلې خپل ملاتړ ته د پای ټکی کېږدي.
يوه لوړپوړي ترکي چارواکي د يکشنبې په ماښام وويل، چې ترکيه هڅه کوي د غزې په تونلونو کې بند پاتې نږدې ۲۰۰ملکي وګړي خوندي وباسي. دا اقدام په داسې حال کې ترسره کېږي، چې د یوه اسراییلي سرتېري جسد له یوې لسیزې وروسته اسراییل ته سپارل شوی دی.
اېکسپرېس ټربیون د افغان طالبانو او پاکستاني پلاویو ترمنځ له پایلې پرته د درېیم پړاو خبرو له پای ته رسېدو وروسته په خپل تحلیل کې د پاکستاني چارواکو له قوله ویلي، اسلاماباد د کابل په تړاو پر خپلې ټولې پالیسۍ بیا کتنه کوي. طالبان وايي، پاکستان د امنیتي پېښې د نه کېدو تضمین غواړي.
د سلواکیا په پلازمېنه براتیسلاوا ته نږدې د دوو رېلګاډو د ټکر له امله لسګونه کسان ټپیان شوي دي. دا پېښه د یکشنبې په ورځ (د لړم په ۱۸مه) د براتیسلاوا او پزینوک ښار ترمنځ د رېل په مسیر کې رامنځته شوې ده.
د خوست ولایت لپاره د طالبانو د والي ویاند وايي، په دغه ولایت کې د یوې ښځې په ګډون ۳ کسان د یوې نجلۍ د تښتونې او جبري ودولو په تور نیول شوي دي. نوموړی وايي، د دغې پېښې نور جزییات د کلتوري حساسیتونو د ساتنې لهمخې نه اعلانوي.
د جمهوري نظام پر مهال د خوست پخوانی والي حلیم فدايي واشنګټن ته د سوریې د ولسمشر سفر ته په اشارې وايي، احمد الشرع په کمه موده کې پر دې وتوانېد چې سوریه له نړۍوالو بندیزونو وژغوري او یو قانونمند حکومت جوړ کړي، خو په وینا یې افغان سیاستوال ځکه ناکام دي چې هر یو یې ځان عقل کُل ګڼي.
د بيبيسي لوی مشر او د خبرونو مسوولې د یکشنبې په ورځ له دندې استعفا وکړه. دغه پرېکړه له هغې وروسته وشوه، چې پر دې برېتانوي رسنۍ د دریځ نیولو او د ټرمپ د مستند فلم د اېډیټ کولو په تړاو نیوکې زیاتې شوې.
د هرات–خواف رېل پټلۍ د طالبانو مسوولین وایي، له دې لارې هره میاشت نږدې ۵۰ زره ټنه واردات کېږي، چې له دې سره واردات پنځه برابره زیات شوي دي. تر دې مخکې، له دې لارې هره میاشت شاوخوا ۱۰ زره ټنه واردات کېدل.
د افغان ښځو د اتحاد او پیوستون غورځنګ غړې وايي، په هرات کې طالبانو د نجونو ښوونځیو ښځینه ښوونکو او روغتیايي کارکوونکو ته خبرداری ورکړی، چې سر له سبا به له چادري پرته کار ته اجازه ورنه کړل شي، خو د طالبانو د امربالمعروف وزارت دغه ادعاوې ردوي او پر حجاب د مراعاتولو ټینګار کوي.
د افغانستان د کرېکټ ملي لوبډلې د ټاکنې مشر اسدالله خان وايي، د اسټرالیا هغه پرېکړه چې د افغان ښځو د حقونو د وضعیت له امله له افغانستان سره لوبې نه کوي، د کرېکټ د پرمختګ لپاره ښه نښه نه ده.
په افغانستان کې د ملګرو ملتونو سرمنشي د ځانګړي استازي مرستيال او د ياد سازمان د بشري چارو همغږي کوونکي ايندريکا راتوته د یکشنبې په ورځ د طالبانو د رييس الوزراء له اداري مرستیال سره په کتنه کې ویلي، چې له ۲۰۲۳ تر ۲۰۲۵ کال پورې ۴.۵ ميليونه کډوال بېرته هېواد ته ستانه شوي دي.
په جرمني کې مېشتو شاوخوا زرو افغانانو د انلاین غوښتنلیک په لاسلیکولو سره د دغه هېواد له حکومت، د بهرنیو چارو له وزارت او پارلمان څخه غوښتي، چې له طالبانو سره هر ډول رسمي تعامل او همکاري ودروي او د دې ډلې استازي له خپلې خاورې وباسي.
طالبانو په تېرو درېیو (اګسټ، سپټمبر او اکټوبر) میاشتو کې د هېواد په ۲۱ ولایتونو کې ۳۳۱ کسان د بېلابېلو تورونو له امله په عام محضر کې په دُرو وهلي دي. ډېری دغه کسان په کابل اوسرپل ولایتونو کې په دُرو وهل شوي دي. په دغو کسانو کې ښځې هم شاملې دي، خو کره شمېر یې معلوم نهدی.
د هرات ولايت د بدني روزنې او ورزش رياست وايي چې د وزلوبې فدراسيون له خوا په دغه ولایت کې د ۴۰ چاپندازانو ترمنځ د وزلوبې سيالي شوې. دغه سیالي، وزلوبې ته د چاپ اندازانو د چمتووالي په موخه ترسره شوې.