د طالبانو د کورنیو چارو وزارت خبر ورکړی، چې په بېلابېلو ولایتونو کې یې د یو لړ عملیاتو پرمهال لسګونه کسان د «غلا، قاچاق او قتل» په تور نیولي دي او زرګونه نشهيي ټابلیټونه یې هم کشف او ضبط کړي دي.
په بلخ کې د طالبانو روغتیا ریاست خبر ورکړی، چې د کوچني اختر د رخصتیو پرمهال یوازې په ابوعلي سینا حوزوي روغتون کې ۱۸۶ ټرافیکي پېښې ثبت شوې دي. یاد ریاست ویلي، چې دغه پېښې تر ډېره د موټر چلوونکو د بېاحتیاطۍ له کبله شوې چې له امله یې ۱۰ کسه مړه شوي دي.
د بلوچستان په کویټې ښار کې افغان کډوال وايي، چې د پولیسو له ځورولو او ناوړه چلند نه نور په تنګ دي، ژوند یې تریخ شوی او اوس یوازې افغانستان ته د تګ لپاره د موټرو د کرایې پيدا کولو په تمه دي.
د ملګرو ملتونو د استوګنې ادارې (UN-Habitat) تازه راپور ښيي، چې د بېځایه شویو کسانو، اقتصادي کړکېچ او د طالبانو د محدودیتونو له امله د افغانستان په ښاري او نورو استوګنیزو سیمو کې د ښځو او نجونو پر وړاندې جنسیتي نابرابري د تېرو څو کلونو پرتله لاپراخه شوې ده.
په کونړ کې د طالبانو د اطلاعاتو او کلتور ریاست وایي، چې پاکستان په تېرو ۲۴ ساعتونو کې د دغه ولایت پر څلورو ولسوالیو مرورې، سرکاڼو، شیلتن او ناړۍ د درنو وسلو او بېپیلوټه الوتکو بریدونه کړي. د یاد ریاست په وینا؛ د دغه بریدونه له امله دوه ولسي وګړي وژل شوي او اته نور ټپيان دي.
په جېنوا کې د ملګرو ملتونو دفتر له پاکستان او طالبانو د دایمي اوربند غوښتنه کړې. د دوی لهخوا په خپرې شوې خبرپاڼه کې راغلي، چې دواړه خواوې دې شخړې حل او د نړۍوالو قوانینو د سرغړونو مخه ونیسي.
د طالبانو د ټرانسپورټ او هوايي چلند وزارت ویلي، چې په افغانستان کې ۵ نړۍوال او ۲۲ سیمهییز هوايي ډګرونه فعال دي او هره ورځ ترې منظمې الوتنې کېږي. یاد وزارت زیاته کړې، چې دامهال ۱۰ نړۍوال او ۲ کورني هوایي شرکتونه له همدې هوایي ډګرونو فعالیت کوي.
د هلمند ولایت د سنګین ولسوالۍ په کارېز امانالله سیمه کې د سختو ورښتونو له امله د یوه کور چت پرېوتی، چې له امله یې د دوو ماشومانو په ګډون درې کسه مړه او شپږ نور ټپیان شوي دي. دغه پېښه نن سهار شاوخوا څلور بجې تر سختو ورښتونو وروسته شوې ده.
د اختر په لومړیو درېیو ورځو کې د بلوچستان پر لویو لارو د ټرافيکي پېښو له امله دوه کسان مړه او ۷۴۹ نور ټپیان شوي دي. په بلوچستان کې د روغتیا بېړنیو خدمتونو مرکز وایي، چې د اختر په ورځو کې د دغه ایالت په بېلابېلو ولسوالیو کې ټولې ۵۱۴ ټرافیکي پېښې شوې دي.
د پاکستان د ملي اسمبلۍ د اپوزیسیون مشر محمودخان اڅکزي له ملګرو ملتونو غوښتي، چې د پاکستان، افغانستان او ګاونډیو هېوادونو یوه سیمهییزه غونډه راوبولي؛ څو د یو بل په کورنیو او سیاسي چارو کې د لاسوهنې مخنیوی تضمین شي او سیمهییز امنیت او ثبات خوندي پاتې شي.
د سېشنبې په ورځ (د وري ۴مه) د بلوچستان د کویټې ښار په عبدالله کلا ولسوالۍ کې د دوو قومونو ترمنځ په وسلهواله نښته کې درې کسان وژل شوي او پنځه نور ټپيان دي. پوليسو ویلي، شخړه د اوبو په سر رامنځته شوې.
په کونړ کې د طالبانو د امنیې قوماندانۍ ویاند فریدالله دهقان وایي، د کونړ د ناړۍ ولسوالۍ په پاشنګر سیمه کې پر یوه ملکي کور د پاکستان پوځ هاوان مرمۍ لګېدلې چې له امله یې یو ملکي وګړی وژل شوی او درې نور ټپيان دي. نوموړي ویلي، چې په ټپیانو کې ښځې او ماشومان هم شامل دي.
د طالبانو د پوهنې وزارت ویاند منصور احمد حمزه ویلي، چې د ۱۴۰۴ ښوونیز کال له پیله تر دې مهاله له بېلابېلو هېوادونو څخه ستانه شوي ۳۲زره او ۸۰۰ ماشومان یې په ښوونځي کې شامل کړي. نوموړي زیاته کړې، چې له دغه ماشومانو د سویې ازموینې اخیستل شوې او اړونده ټولګیو ته ورپېژندل شوي دي.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ له طالبانو او پاکستان نه د دایمي اوربند غوښتنه کړې او ټینګار یې کړی، چې په کابل کې «د روږدو کسانو د درملنې پر مرکز» برید په اړه دې بېړنۍ او خپلواکې څېړنې وشي.
په فراه کې د کرنیزو او مالدارۍ تولیداتو خونې مشر زلمی محمدي وايي، چې د کرنیزو محصولاتو د راټولولو، وېش او د صادراتو اسانتیا په موخه د خصوصي سکټور لهخوا د ۱۵۰ مېلیونه افغانیو په ارزښت د دغه مارکېټ د جوړولو چارې پيل شوې دي.
په کندوز کې د طالبانو روغتیا ریاست او په لوګر کې د یادې ډلې امنیې قوماندانۍ ویلي، د کوچني اختر په ورځو کې په دواړو ولایتونو کې د ټرافیکي پېښو له امله لږترلږه ۱۳ کسان مړه او ۵۷۷ نور ټپیان شوي چې ډېری پېښې د موټر چلوونکو د بېاحتیاطۍ او چټک مزل له امله رامنځته شوې دي.
د اوکراین ولسمشر ولادیمیر زېلېنسکي وایي، د روسیې له لوري کارېدونکي ایراني «شاهد» ډرونونو په لوېف ښار کې کلیسا او په ایوانو فرانکیفسک کې یو زېږنتون په نښه کړی دی. هغه ټینګار کړی، دغه بریدونه ښيي چې مسکو د جګړې د پای ته رسولو هوډ نهلري.
د افغانستان د بدن ښکلا فدراسیون چارواکي وايي، ټاکل شوې ده چې د یادې څانګې یوه ۲۰ کسیزه لوبډله د سویلي اسیا د بدن ښکلا په ۱۶مه سیالۍ کې په خپل شخصي لګښت ګډون وکړي. دغه سیالۍ به د ۱۴۰۵کال (د چنګاښ په ۹مه) د بوتان په پلازمېنه تیمپو ښار کې پیل شي.
اکسیوس د دوو اسراییلي سرچینو له قوله لیکلي، نتنیاهو اندېښنه لري چې ټرمپ به له تهران سره په احتمالي مذاکراتو کې داسې یوې هوکړې ته غاړه کېږدي چې د اسراییل له اهدافو سره واټن ولري، تهران ته به د پام وړ امتیازات ورکړي او د ایران پر وړاندې بریدونو کې به د اسراییل وړتیا محدوده کړي.
د قطر د ګرځندوی ادارې د سېشنبې په ورځ اعلان وکړ، چې د نړۍ د مشهورې سندرغاړې شکیرا کنسرټ چې ټاکل شوې وه د اپرېل په لومړۍ نېټه په دوحه کې ترسره شي، د «سیمې د اوسني حالت» له امله وځنډول شو.
د متحده ایالاتو د مرکزي قوماندانۍ (سنټکام) ویاند ټیم هاوکینز ویلي، چې د ایران له حکومت سره د جګړې له پیل راهیسې ۲۹۰ امریکایي سرتېري ټپیان شوي، چې له دې شمېر څخه ۲۵۵ تنه بېرته خپلو دندو ته ګرځېدلي دي.