ملګري ملتونه وايي، چې له ایران او پاکستانه د افغان کډوالو جبري شړل چټک شوي، چې پکې ماشومان، پناهغوښتونکي او له ګواښ څخه تښتېدلي کسان هم شامل دي؛ خو افغانستان د بېرته ستنېدو لپاره خوندي نه دی.
سرچینې افغانستان انټرنشنل - پښتو ته وایي، چې د طالبانو د کورنیو چارو وزارت اړوند د پاسپورټ عمومي ریاست کې له ښځینه مراجعینو سره ناوړه او غېرانساني چلند روان دی. د سرچینې په خبره، طالبان له محرم پرته ښځو ته د پاسپورټ ریاست ته د ننوتلو اجازه نه ورکوي.
د حال وش په نامه د بشري حقونو سازمان خبر ورکړی، چې د ایران په سراوان کې د سپاه پاسداران پر یوه عملیاتي ډلې وسلهوال برید شوی، چې له امله یې لږ تر لږه ۱۰ تنه وژل شوي او ۲ نور ټپیان دي. دغه ډله چې افغان، ایراني او پاکستاني غړي یې لرل، د بلوڅانو پر ضد په عملیاتو تورن و.
رویټرز خبري اژانس د غزې د روغتیا وزارت له قوله راپور ورکړی، چې د اسرایيلي ځواکونو په ډزو کې لږ تر لږه ۶۷ فلسطینیان هغه مهال ووژل شول، کله چې د ملګرو ملتونو د خوراکي مرستو د ترلاسه کولو په تمه په شمالي غزه کې ولاړ وو.
د طالبانو د بهرنیو چارو وزیر امیرخان متقي د بګرام هوایي اډه کې د چین د حضور په اړه د ډونالډ ټرمپ څرګندونې «لویې خو بېاساسه ادعاوې» وبللې. یاد طالب چارواکي حیرانتیا وښوده چې ولې ټرمپ «د نړۍ د پرمختللو معلوماتي وسایلو سره سره داسې لویې خبرې کوي، خو ډېر لږ معلومات لري.»
په قطر کې د طالبانو سفارت ویلي، چې محمد سهیل شاهین په دوحه کې له مېشتو افغان سوداګرو سره لیدلي او په دې لیدنه کې د سوداګریزو اړیکو د پیاوړتیا، افغاني صادراتو ته د بازار موندنې او پانګوالو ته د اسانتیاوو د رامنځته کولو په اړه خبرې شوې دي.
تحریک طالبان پاکستان ادعا کوي، چې د خېبرپښتونخوا په اورکزۍ ایجنسۍ کې یې د پاکستاني پوځیانو پر موټریز کاروان وسلهوال برید کړی، چې په پایله کې یې ۱۹ پوځیانو ته مرګژوبله اوښتې ده. ټي ټي پي په یوې خبرپاڼه کې ویلي، په دې برید کې د پاکستان نهه پوځيان وژل شوي او لس نور ټپیان دي.
طالبانو د پکتیا ولایت په زرمت ولسوالۍ کې دوه کسان د «نامشروع اړیکو» په تور په عام محضر کې په دورو ووهل.
د افغان اېواک په نوم امریکا ته د افغانانو د لېږد د یوه بنسټ مشر شان ون ډایور د امریکا له ولسمشر ډونالډ ټرمپ سره د افغان کډوالو د ژغورنې په برخه کې همغږۍ ته په اشارې سره ویلي، دا شېبه یوازې احساساتي څرګندونو ته نه، بلکې عملي اقداماتو ته اړتیا لري.
د شپږیزه کرېکت لیګ لسم پړاو سیالیو کې نن یکشنبې دوه سیالۍ وشوې، چې په لومړۍ سیالۍ کې د بند امیر ښامارانو لوبډلې د مس عینک اتلانو ته د شپږو وېکټو په توپیر ماتې ورکړه.
طالبانو د یوې اعلامیې په خپرولو سره پر غزه د اسراییل بریدونه او د خلکو کلابندي غندلې او له اسلامي هېوادونو یې غوښتي، چې د غزې د ناورین پای ته رسولو په برخه کې لاس په کار شي.
د طالبانو د کورنيو چارو وزارت وايي، سراجالدين حقاني د پاکستان د کورنيو چارو له وزير سره پر دوه اړخیزو اړیکو او امنیتي همکاریو خبرې کړې دي، خو د پاکستان د کورنیو چارو وزارت اعلان وکړ، چې محسن نقوي له سراج الدین حقاني سره پر ټـي ټي پـي او د ډیورنډ کرښې پر مدیریت غږېدلی.
په پکتیکا کې ځايي سرچینو افغانستان انټرنشنل ته وویل چې د طالبانو له خوا په اعدام محکوم شوي ښوونکي «عبدالعلیم خاموش» ته د ځان د دفاع لپاره د مدافع وکیل نیولو حق نه ورکول کیږي. ځايي سرچینې زیاتوي چې هغه اسلامي مقدساتو ته سپکاوی نه دی کړی، بلکې د عصري علومو ملاتړ یې کاوه.
د امریکا ولسمشر ډنالډ ټرمپ د یکشنبې په ورځ پر خپله ټولنیزه شبکه ولیکل، چې د هغو افغانانو د ژغورنې سملاسي چارې پیلوي، چې د طالبانو له واکمنېدو وروسته له افغانستان نه وتلي او په متحده عربي اماراتو کې بند پاتې دي. ټرمپ وايي، « زه به هڅه وکړم چې ویې وژغورم، همدا اوس یې پیلوم».
د افغانستان د خبریالانو مرکز ویلي، چې د طالبانو د امر بالمعروف ریاست په سرپل ولایت کې د ژوندیو موجوداتو د انځورونو پر خپرولو بندیز لګولی او په دغه ولایت کې د ملي ټلویزیون بڼه راډیو ته اوښتې ده.
د طالبانو د هرات والي وايي، چې د خواف-هرات رېلپټلۍ یوه حیاتي پروژه ده، خو افغان سوداګر لا هم له رېلي ترانسپورت سره نااشنا دي. هغه د ایران له خراسان رضوي ولایت نه وغوښتل چې افغانستان ته د روزنې او همکاریو زمینه برابره کړي.
د پاکستان د پوځ د عامه اړیکو د فتر له خوا په خپرو شویو خبرپاڼو کې ادعا شوې، چې پوځ په بېلابېلو عملیاتو کې د خیبرپښتونخوا په هنګو او ملاکنډ کې ۱۴ او په بلوچستان ایالت کې څلور وسله وال وژلي دي. پاکستانی پوځ وايي، دغه عملیات د استخباراتي معلوماتو پر بنسټ شوي دي.
د اسراییل لومړی وزیر بنیامین نتنیاهو د فاسدو خوړو له امله د کولمو د پړسوب په ناروغۍ اخته شوی او دفتر یې وايي، چې درې ورځې به له کوره خپلې چارې پرمخ وړي. د نوموړي معالج ډاکټر وايي، چې نتنیاهو ته د بدن د اوبو د کمښت له امله د رګ له لارې اوبه ورکول کېږي.
د طالبانو د کورنیو چارو وزارت اعلان وکړ، چې د یاد وزارت له جنایي جرمونو سره د مبارزې پولیسو د وژنې، غلا، مغلوبه جنګ او د ځنګلونو د غیر قانوني پرې کولو په تور ۱۸ تنه نیولي دي. دا کسان په په بغلان، فاریاب، کونړ، هرات، فراه او غور ولایتونو کې نیول شوي دي.
د ایران د اورګاډي ادارې رییس ویلي، چې پلان لري په راتلونکي میاشت کې د تهران ـ هرات ترمنځ د مسافر وړونکي اورګاډي خدمات پیل کړي. نوموړي دغه پروژه د سیمې د ترانزیټ او د افغانستان ـ ایران اړیکو لپاره مهم پرمختګ بللی.
په بدخشان کې د طالبانو د امنیه قوماندانۍ سرچینې وايي چې تېره شپه د یاد ولایت د راغستان ولسوالۍ په «بند زولزما» سیمه کې ناڅرګندو وسله والو ۴ کسان په ډزو وژلي دي. طالب چارواکي وايي، په بدخشان کې د طالبانو والي د پېښې د څرنګوالي معلومولو لپاره یو پلاوی هم سیمې ته لېږلی.