د جون پر ۱۸مه د پاکستان د پوځ لوی درستیز عاصم منیر په سپینه ماڼۍ کې د امریکا له ولسمشر ټرمپ سره ولیدل او د غرمې ډوډۍ یې له هغه سره وخوړه. په دې لیدنه کې، چې دوه ساعته یې دوام درلود، د پاکستاني اردو د استخباراتي سازمان ایاېسای رییس جنرال عاصم ملک هم له عاصم منیر سره ملګری و.
طالبانو د روسیې د فوټبال ملي لوبډلې ته بلنه ور کړې، چې د یوې دوستانه لوبې لپاره کابل ته ورشي. ریا نووستي سپورټ رپوټ ورکړی، چې د طالبانو د صنعت او سوداګرۍ وزارت مرستیال احمدالله زاهد ویلي چې دوی ددې دوستانه سیالۍ معلومات د روسیې د فوټبال فدراسیون او د ورزش وزارت ته سپاري.
د روسیې د بهرنیو چارو وزارت ویاندې ماریا زاخارووا ویلي، چې د طالبانو حکومت د رسمیت پېژندنې پرېکړه به د روسیې مشرتابه «په خپل وخت» وکړي. نوموړې وايي، « تر اوسه پورې د افغانستان اوسنی حکومت په رسمیت نه دی پېژندل شوی».
د قرغیزستان ولسمشر صدر جباروف ویلي، چې د سیمې د ثبات او ګډو همغږو اقداماتو لپاره اړینه ده، چې په دوامداره توګه په افغانستان کې د روان وضعیت څارنه وشي.
ټرمپ د چارشنبې په ورځ، د غبرګولي پر ۲۸مه یو ځل بیا په سپینې ماڼۍ کې د وضعیت خونې په غونډه کې د خپل ملي امنیت له لوړپوړي ټیم سره د اسراییل او ایران د جګړې په اړه ولیدل، څو خپل دا شکونه له منځه یوسي چې پر ایران د امریکا برید به بریالي وي که نه.
د طالبانو د بهرنيو چارو وزير امیرخان متقي وایي، د ناروې هېواد لهخوا د دغې ډلې د ډیپلوماټ منل د اړيکو او باور جوړونې په برخه کې یو ښه پرمختګ دی.
د افغان کډوالو د ستنولو د دویم پړاو په لړ کې، د پاکستان حکومت تېره ورځ ۸۳۷ افغان کډوال په جبري ډول افغانستان ته راستانه کړي دي.
د امریکا ولسمشر ډونالډ ټرمپ د چهارشنبې په ورځ په سپینه ماڼۍ کې د پاکستان د پوځ د مشر فیلډ مارشل عاصم منیر کوربه توب وکړ. دا لومړی ځل دی چې د امریکا یو ولسمشر په سپینه ماڼۍ کې د پاکستان د پوځ د مشر کوربهتوب په داسې حال کې کوي، چې له نوموړي سره لوړپوړي ملکي چارواکي مل نه دي.
د طالبانو د اقتصاد وزیر وایي، د افغانستان د مرکزي بانک د شتمنیو کنګل پاتې کېدل په هېواد کې د بېوزلۍ او وزګاري د زیاتوالي لامل شوي دي. هغه په افغانستان کې د ناروې له شارژدافیر پیر البرټ الساس سره په لیدنه کې د بندیزونو د لرې کولو او د هېواد د اسعارو د زېرمو د خلاصولو غوښتنه کړې.
د طالبانو د کډوالو چارو وزارت اعلان کړی، چې پر افغانستان د دې ډلې له بیا واکمنېدو راهیسې له ۵ میلیونو ډېر کډوال بېرته هېواد ته راستانه شوي دي. د دغه وزارت ویاند عبدالمطلب حقاني ویلي، دغه کډوال له ایران، پاکستان او ترکیې اېستل شوي او یا هم په خپله خوښه افغانستان ته ستانه شوي دي.
د غزې روغتیايي چارواکي وایي، چې په تېرو ۲۴ ساعتونو کې د اسراییل په ډزو او بریدونو کې لږ تر لږه ۱۴۰ کسان وژل شوي دي. د غزې د روغتیا وزارت په خبره،یوازې د چهارشنبې په ورځ شاوخوا ۴۰ فلسطینیان د اسراییل په هوايي بریدونو او ډزو کې وژل شوي دي.
په تورخم کې د طالبانو د استخباراتو مرستیال نعیم ګل د ټنګ ټکور په یوه محفل کې برخه اخیستې او چرس څکوي. دا ویډیو چې په ټولنیزو شبکو کې لاس په لاس کېږي، ښيي چې نوموړی د شپې مهال د ټنګ ټکور په یوه محفل کې له موسیقۍ څخه خوند اخلي.
د افغانستان د خبریالانو د ملاتړ سازمان (نی) د ایران او اسرايیل ترمنځ پراخو نښتو ته په اشارې په ایران کې د مېشتو افغان خبریالانو د وضعیت په اړه اندېښنه ښودلې. دوی د بشري حقونو او د بیان د ازادۍ له ملاتړو بنسټونو غوښتي، چې له ایران څخه د افغان خبریالانو په وتلو کې مرسته وکړي.
د افغانستان د سولې په پروسه کې د امریکا پخواني ځانګړي استازي زلمي خلیلزاد ویلي، چې ولسمشر ډونالډ ټرمپ د پاکستان د پوځ له مشر جنرال عاصم منیر سره رسمي غرمنۍ خوړلې ده، او دا غرمنۍ پاکستان ته یوه ځانګړې ډالۍ او ویاړ ګڼل کېږي، خو نوموړي ټینګار کړی چې منیر د باور وړ شخص نه دی.
طالبانو په تخار او میدان وردګو ولایتونو کې د یوې ښځې په ګډون درې کسان د «زنا او لواطت» په تور په عام محضر کې په دُرو وهلي دي.
په المان کې د کډوالۍ د سختدریځو سیاستونو او د پناهغوښتونکو د شړلو له زیاتوالي سره د هغو کسانو شمېر زیات شوی، چې کلیساوو ته پناه وړي. د المان د فډرالي کډوالۍ او پناه غوښتنې اداره وايي، چې ۲۳۸۶ پناهغوښتونکو د شړلو له وېرې کلیساوو ته پناه وړې ده.
د قطر د بهرنیو چارو وزارت د نړیوالې همکارۍ د ریاست مشر په بروکسل کې د افغانستان په اړه د لوړ پوړو چارواکو په ناسته کې اغیزمنو شویو افغانانو ته د بشري مرستو پر رسولو ټینګار کړی دی.
هر کال د جون ۱۸مه په یو غیر رسمي او طنزي نوم د نړۍوالې وېرې ورځ "International Panic Day" نمانځل کیږي، چې موخه یې د وېرې هېرول او خلک دې هڅول دي چې له اضطراب سره مقابله وکړي، هېر یې کړي او خپل ټول دردونه عادي وګڼي. دا ورځ د سکون د ورځ په نوم هم یادیږي؛ ایا نړۍ د سکون ساه اخلي؟
د روسیې دفاع وزارت د چارشنبې په ورځ اعلان وکړ چې د دغه هېواد ځواکونو د اوکراین په شمال ختیزه سومي سیمه کې د اسکندر بالستیک توغندي په وسیله د اوکرایني ځواکونو یو مورچل ویشتلی دی. د روسیې دفاع وزارت وضاحت ورکړی، چې د کونوتوپ ښار شاوخوا سیمه هدف ګرځېدلې ده.
د طالبانو د اقتصاد وزارت سرپرست د ناروې د سفارت له شارژدافیر پیر البرت الساس سره د اقتصادي همکاریو او بشري مرستو د دوام په اړه کتلي دي. په دې لیدنه کې د ناروې د سفارت استازي ډاډ ورکړی چې هېواد به یې په روان ۲۰۲۵ میلادي کال کې له افغانانو سره ۸۰ میلیون ډالره بشري مرسته وکړي.
د چین، تاجکستان، ازبکستان، قرغزستان، قزاقستان او ترکمنستان مشران د قزاقستان په پلازمېنه استانه ښار کې راټول شوي او د افغانستان د وضعیت په ګډون د مهمو مسایلو په تړاو غږېدلي دي.