د طالبانو د عامې روغتیا وزارت وایي، چې د دغه وزارت لپاره د دوی وزیر نور جلال جلالي سره په لیدنه کې د روغتیا نړۍوال سازمان پلاوي په افغانستان کې د ګوزڼ په برخه کې د بشپړې پاملرنې او همکارۍ ډاډ ورکړی دی.
د خېبر پښتونخوا حکومت د رسمي شمېرو له مخې؛ پاکستان تېره ورځ ۴۷۲۷ کسان له خپل هېواده اېستلي، چې له ډلې یې ۳۹۱۱کسان د ملګرو ملتونو سره ثبت «پي او ار» کارت لرونکي دي. پاتې نور کسان بېاسناده او د «اېسيسي» کارت لرونکي افغان کډوال وو.
په ملګرو ملتونو کې د افغانستان دایمي استازي نصیر احمد فایق اندېښنه څرګنده کړې، چې له ګاونډیو هېوادونو څخه یو شمېر اېستل شوي پخواني افغان پوځیان د طالبانو له لوري وژل کېږي او دا چاره یو لوی «بشري جنایت» دی.
د پاکستان د کورنیو چارو وزیر محسن نقوي ویلي، د دغه هېواد د مخابراتي اړیکو ادارې سره یې خبرې کړې؛ څو د هغو کسانو پر وړاندې جدي اقدامات وشي، چې د کابینې د غړو او لوړ پوړو حکومتي چارواکو ټلېفوني اړیکې یې رسوا کړې دي.
د سویلي کوریا دفاع وزارت خبر ورکړی، چې د دوی او جاپان دفاع وزیر به د دوشنبې په ورځ په دغه هېواد کې رسمي خبرې اترې وکړي. دا تر یوې لسیزې وروسته لومړی ځل دی، چې د جاپان دفاع وزیر په رسمي توګه سویلي کوریا ته سفر کوي.
د ملګرو ملتونو د ښځو اداره وایي، چې د طالبانو تر واکمنېدو وروسته په افغانستان کې د ماشومانو او د کم عمره نجونو د ودونو کچه په بېساري ډول لوړه شوې ده. دغه اداره وايي، دغه لړۍ د وړو نجونو د مېندوارۍ کچه لوړوي چې په پایله کې د مېندو د مړینې لامل کېږي.
د طالبانو د امربالمعروف او شکایتونو اورېدو وزیر خالد حنفي وایي، «د الله په قانون کې د انسانانو ژبه، قوم او رنګ هېڅ ډول ارزښت نهلري او یوازې بهترین هغه څوک دی، چې د ښه تقوا لرونکی وي.» نوموړي دغه څرګندونې کابل کې د سیرت النبي په یوې غونډه کې کړې دي.
د پاکستان د پنجاب ایالت د ملتان ښار چارواکو خبر ورکړی، چې د چناب سیند د اوبو کچې لوړوالي له امله په جلال پور پیرواله کې ځايي بند درزونه کړي او له امله یې لسګونه کلي تر اوبو لاندې شوي دي.
سرچینو افغانستان انټرنشنل ته ویلي، چې د بنو په برید کې د پنځو ځانمرګو بریدګرو څخه درې هغه یې افغانان دي. دغه بریدګرو په بنو کې د پاکستان د امنیتي ځواکونو پر یوې اډې برید کړی و.
د امریکا ولسمشر ډونالډ ټرمپ د یکشنبې په ورځ ویلي، د اروپايي ټولنې ځینې مشران به په جلا، جلا ډول د راتلونکې دوشنبې او سېشنبې په ورځو کې واشنګټن ته سفرونه وکړي. هغه وایي، د دغه سفرونو موخه د روسیې-اوکراین پر کړکېچ او د جګړې پر پای ته رسولو خبرې اترې دي.
ننګرهار کې د طالبانو رسنیز دفتر ویلي، د دغه ولایت سوداګرو د دوی له والي سره په ناسته کې شکایت کړی چې د تازه مېوو، سبزیو، خالي لاریو او نورو مالونو د تېرېدو پر مهال له خنډ او ځنډ سره مخ کېږي. دغو سوداګرو غوښتي، چې باید ژر تر ژره د دغه ستونزې لپاره بېړنۍ حل لارې پیدا شي.
د «ههنګاو» په نوم د بشري حقونو سازمان د موندنو له مخې، د ۲۰۲۵ کال له پیله د سپټمبر تر ۶مې د ۵۹ افغانانو په ګډون ۹۰۶ کسان چې د ایران په زندانونو کې بندیان و، اعدام شوي دي. طالبانو تر دې مخکې د ایران دغه ډول اقدام ته غبرګون نه دی ښودلی او اوس یې هم چوپتیا غوره کړې ده.
د خلق جمهوريپال ګوند چې د ترکیې د دولت اصلي مخالف ګوند دی، د یکشنبې په ورځ د استانبول له اوسېدونکو وغوښتل، چې د دې ګوند د ولایتي دفتر مخې ته راټول شي. دغه بلنه وروسته له هغې ورکړل شوې ده، چې پولیسو د ودانۍ شاوخوا خنډونه جوړ کړل او د عامو خلکو لاسرسی یې دې دفتر ته محدود کړ.
د ټایمز اف انډیا د راپور له مخې، د نرېندرا موډي حکومت لېواله دی چې یو ځل بیا د ملګرو ملتونو امنیت شورا ته مراجعه وکړي، څو نوي ډیلي ته د طالبانو د بهرنیو چارو وزارت د سرپرست امیرخان متقي د سفر اجازه واخلي.
د طالبانو له پېښو سره د مبارزې د چمتووالي ادارې سرپرست نورالدین ترابي په کابل کې د جاپان له سفیر سره په کتنه کې ویلي، د افغانستان ډېری خلک له غربت او بېوزلۍ کړېږي او مرستې باید سیاسي نه شي.
تر هغه وروسته چې د امریکا ولسمشر ډونالډ ټرمپ حماس ته د اوربند د نوي وړاندیز او د یرغمل شویو د خوشې کولو لپاره «وروستی خبرداری» ورکړ، دغه ډلې په یوه اعلامیه کې اعلان وکړ: «چمتو دي چې سمدستي د خبرو مېز ته حاضر شي، څو د ټولو بندیانو د ازادېدو په اړه خبرې وکړي.»
د امریکا ولسمشر ډونالډ ټرمپ وایي، چې د جګړې د ختمولو لپاره اسراییلیانو د ده شرطونه منلي او اوس باید حماس هم دغه شرطونه ومني.
د طالبانو له پېښو سره د مبارزې د چمتووالي ملي ادارې او کاتولیک خیریه نړۍوالې موسسې ترمنځ د څه باندې یو میلیون او ۴۰ زره ډالرو په ارزښت د ګډو همکاريو یوه هوکړه لاسلیک شوه. دغه هوکړه د یکشنبې په ورځ (د وږي ۱۶مه) په کابل کې لاسلیک شوې ده.
د ایران ولسمشر مسعود پزشکیان له علي خامنهيي سره په خبرو کې ویلي، چې ټاکل شوې ده روسیه او چین په ايران کې اقتصادي پانګونه وکړي او ترکيې هم ژمنه کړې، چې له ايران سره به اقتصادي راکړې ورکړې زياتې کړي.
په داسې حال کې چې یو شمېر افغانان د طالبانو له لوري د محدودیتونو د لګولو، فقر او بېکارۍ له امله نورو هېوادونو ته مخه کړې، خو د نیمروز والي محمد قاسم خالد بیا وايي، طالبان په زور نه، بلکې د خلکو په زړونو حکومت کوي.
په جینوا کې په ملګرو ملتونو کې د افغانستان استازی نصیر احمد اندېشه سره له دې چې په افغانستان کې د ملګرو ملتونو د استازې او د یوناما د مشرې روزا اوتنبایوا ماموریت ناهیلی کوونکی ګڼي وايي، نړۍوال سیاسي وضعیت ته په کتو ښايي د روزا اوتنبایوا پر ځای ناستي ډېرې ناندرۍ رامنځته شي.