د خوړو نړۍوال پروګرام وایي، چې په سږني دوبي کې له درې مېلیونه اړمنو افغانانو څخه یوازې له یو مېلیون کسانو سره یې مرسته کولای شي. دغه پروګرام وایي، چې په سږني دوبي کې په افغانستان کې نږدې درې مېلیونه خلک مرستو ته اړتیا لري.
په طرابلس کې د امریکا سفارت هغه راپورونه رد کړي، چې ګواکې هېواد یې لیبیا ته د فلسطینیانو د لېږدولو په پلان کار کوي. دغه سفارت په یوه خبرپاڼه کې ویلي، چې د غزې اوسېدونکو د لېږد راپورونه بې بنسټه دي او هېواد یې په هېڅ کوم داسې پلان کار نه کوي.
د پاکستان دفاع وزیر خواجه محمد اصف په تونده لهجه ویلي، چې پاکستان د طالبانو د ملاتړ لپاره کلونه د امریکا او لوېدیځو هېوادونو تورونه وزغمل؛ خو نن یاده ډله د پاکستان پر ضد له هند او اسراییل سره څنګ په څنګ ولاړه ده.
د امریکا د کلفورنیا ایالت په پالم اسپرینګز سیمه کې د یوه کلینیک مخې ته چاودنه شوې، چې په کې یو کس وژل شوی او څلور نور ټپیان دي.
د طالبانو د کډوالو او بېرته راستنېدونکو چارو وزارت ویلي، چې د پاکستان په بېلابېلو ښارونو کې شاوخوا ۱۹۳ افغان کډوال تر زنداني کېدو وروسته د سپین بولدک له لارې هېواد ته ستانه شوي دي.
د ایران د سوداګرۍ چارواکي وایي، چې افغانستان د ایران د اصلي سوداګریزو شریکانو په منځ کې پنځم ځای لري او د دغه هېواد د ټولو وارداتو ۲۱ سلنه له ایران څخه برابرېږي.
د تاجکستان د بهرنیو چارو وزیر سراج الدین مهرالدین او د ایران د بهرنیو چارو وزیر عباس عراقچي په تهران کې د ګډې ناستې پر مهال له افغانستان سره د همکاریو پر دوام ټینګار کړی دی.
د طالبانو تر واک لاندې د افغانستان ملي موزیم مسوولین وايي، په تېرو لسیزو کې د جګړو تر څنګ د سیاسي بې ثباتۍ له امله ۷۰سلنه تاریخي اثار لوټ شوي، ویجاړ شوي او یا هم بهرنیو هېوادونو ته په بېلابېلو وختونو کې قاچاق شوي دي.
د جرمني لومړي وزیر فریدریښ مېرڅ او د اېټالیا لومړۍ وزیرې جورجیا مېلوني ویلي، چې اروپا لاهم اوکراین ته د سرتېرو د لېږلو له پرېکړې لرې ده. جورجیا مېلوني ویلي: «موږ خپلې ټولې هڅې په اوکراین کې د روسیې لهخوا د بې قیدو شرطه اوربند پر ټینګېدو متمرکزې کړې دي.»
د تاجکستان د ملي امنیت دولتي کمیټې مشر سیمومین یتیموف د ګډو ګټو خپلواک هېوادونو د امنیت او ځانګړو خدمتونو د مشرانو شورا (CIS) په ۵۶مه غونډه کې له افغانستانه د ترهګریزو ګواښونو د خپرېدو په اړه خبرداری ورکړ.
د هند او طالبانو ترمنځ د پټو اړیکو او سفرونو سره هممهاله پاکستاني شنونکي وېره لري، چې د دغو دواړو لوریو اړیکې د اسلام اباد لپاره لوی امنیتي ګواښ جوړولای شي.
د کاناډا لومړي وزیر مارک کارني د ټاکنو له ګټلو وروسته د اوکراین له ولسمشر ولادیمیر زېلېنسکي سره په خپله لومړۍ مخامخ لیدنه کې یو ځل بیا د دغه هېواد پر ملاتړ ټینګار وکړ.
د طالبانو د پوهنې وزارت ادعا کوي، چې څه باندې ۲۰ زره کډوالو او بېرته راستنېدونکو ته یې د زده کړو زمینې برابرې کړي دي.
د غزې د رسنیو دفتر د شنبې په ورځ وویل، چې د اسراییل پوځ په تېرو دوو ورځو کې له ۲۰۰څخه ډېر فلسطینیان وژلي او درې لکه کسان یې په زوره د غزې له شمالي تړانګې غزې ښار ته بې ځایه کړي دي.
د بې پولې خبریالانو سازمان د امریکا د ولسمشر ډونالډ ټرمپ د حکومت پرېکړه چې د امریکا غږ له رسنۍ څخه تر ۵۰۰ ډېر خبریالان او کارکوونکي لرې کړي، په کلکه غندلې ده.
تر هغه وروسته چې د پښتونخوا په چارسده کې د باچاخان پوهنتون چارواکو په یوې غونډه کې د یوې افغانې محصلې له اوږو د افغانستان ملي بیرغ لرې کړ، دا کړنه له پراخو غبرګونونو سره مخ شوې ده. افغان سیاستوالو، لیکوالانو او فعالانو دا کړه «شرموونکې بللې ده.
د طالبانو د ازموینو د ملي ادارې رییس عبدالباقي حقاني په بدخشان کې په یوې ماښامنۍ ناسته کې ویلي: «تعليمي نصاب باید د ملت د اړتیا، واقعیتونو او د شریعت په پام کې نیولو سره د مجاهدینو او علماو په مشوره جوړ شي.» نوموړي هغه نصاب ناکام ګڼلی، چې د خلکو ويښتیا په کې نه وي.
د پنجشېر سیمه ییز چارواکي وایي، چې د دې ولایت ۳۰ سلنه اوسېدونکي د زمردو په استخراج کې بوخت دي.
د امریکا په کینټاکي او میزوري ایالتونو کې د طوفانونو له امله لږ تر لږه ۳۴کسان مړه شوي دي. د معلوماتو له مخې، په کینټاکي ایالت کې لږ تر لږه ۲۷کسان وژل شوي، چې ۲۳تنه یوازې په لورل کاونټي کې مړه شوي دي. دغه راز په میزوري کې ۷تنه وژل شوي، چې ۵تنه د سینټ لوییس په سیمه کې دي.
د کاناډا مېشتو افغانانو د اوتاوا بهیر په نامه د افغان نخبه ګانو په مشورتي ناسته کې د ملي سرود په اړه ناندرۍ راولاړې شوې. د افغانستان انټرنشنل – پښتو خبریاله وایي، د ناستې پیل کې د ملي سرود د نه خپرېدو له امله یو شمېر ګډونوالو اعتراض وکړ، خو وروسته بیا خپور شو.
په افغانستان کې د امریکا پخواني استازي زلمي خلیلزاد ویلي، چې پاکستان دې په کور دننه او بهر کې د عمران خان له خوشې کېدو څخه ګټه واخلي. نوموړي په خپل اېکس کې لیکلي، چې د خان خوشې کېدل «انصاف او سم کار دی.