خلیج ته د امریکا د بهرنیو چارو وزیر مارکو روبیو له سفرسره هممهاله، په کویت کې د امریکا سفارت خپل فعالیتونه بېرته پیل کړل. دغه سفارت څو میاشتې مخکې د ایران د بریدونو له امله تړل شوی و.
په مسکو کې یوې محکمې د دغه هېواد د لېبرال ګوند مرستیال مکسیم کرګلوف پر ټولنیزو رسنیو د روسیې پوځ په اړه د ناسمو معلوماتو خپرولو په تور په ۷ کاله بند محکوم کړی دی.
یو شمېر افغانان چې د ترکیې د تحصیلي ویزو غوښتنه لري، شکایت کوي چې د ویزې د ترلاسه کولو لپاره د ټولو اړینو اسنادو او مالي شرایطو له برابرولو سره سره یې غوښتنلیکونه له څرګند دلیل پرته رد کېږي او د ردېدو لاملونه هم نه ورته ویل کېږي.
د بریتانیا پاچا چارلز درېیم د چارشنبې په ورځ د لندن په کلارنس هاوس کې د افغان کډوالو د ښځینه کرېکټ ټیم له غړو سره وکتل. په دې لیدنه کې پاچا د افغان نجونو هرکلی وکړ او له هغوی سره یې ډلهییز انځورونه واخیستل.
د طالبانو د ریاست الوزرا اقتصادي مرستیال ملا عبدالغني برادر په مشرۍ د تدارکاتو کمېسیون په نوبتي غوڼده کې د شاوخوا ۳،۵ میلیارده افغانو په لګښت ۱۹ پروژې منظورې شوې دي.
د طالبانو د صنعت او سوداګرۍ وزارت وايي، د دغه وزارت مرستیال شهاب الدین ثاقب د یوه پلاوي په مشرۍ چین ته تللی دی، څو د «چین ـ اوراسیا ۲۰۲۶» نندارتون کې ګډون وکړي. په دې سفر کې د طالبانو د بهرنیو چارو وزارت د اړوندو ادارو استازي هم شامل دي.
د طالبانو د زندانونو د چارو د تنظیم ادارې ویلي، ۱۶۴ افغان بندیان چې درې ښځې هم پکې شاملې دي، د سې شنبې په ورځ له ایران څخه افغانستان ته انتقال شوي دي. د یادې ادارې په وینا، دغه بندیان په خپله خوښه د نیمروز ولایت د ورېښمو پله له لارې هېواد ته راستانه شوي دي.
د ایران ولسمشر مسعود پزشکیان ویلي: «ایران او پاکستان په ارمانونو او هیلو کې ژورې ګډې موخې لري». هغه د سیمې د سولې په برخه کې د پاکستان هڅې ستایلې او دا یې د دغه هېواد د فرهنګ محصول ګڼلې دي.
د پکتیا ولایت د احمدخېلو ولسوالۍ یو شمېر اوسېدونکو افغانستان انټرنشنل پښتو ته په رالیږلي پیغام کې ویلي، چې طالبانو پر ښوونکو نوي محدودیتونه لګولي. ددوی په وینا، د ښوونځیو له استادانو څخه ځیرک موبایلونه راټول شوي او د ځینو استادانو موبایلونه مات شوي هم دي.
د سرو زرو د بیو له بېساري لوړوالي سره د پېرودونکو چلند بدل شوی دی. زرګران وایي، پخوا به خلکو د زینت او ګاڼو لپاره سره زر اخیستل، خو اوس د پانګونې او شتمنۍ د خوندي ساتلو لپاره د خامو سرو زرو، سکو او خښتو غوښتنه ډېره شوې ده.
تمدن تلویزیون د یوې اعلامیې په خپرولو سره ویلي چې ناپېژانده کسان یې په باروړونکو موټرو کې تجهیزات او وسایل باروي. یاد تلویزیون د طالبانو له امنیتي بنسټونو غوښتي چې د ددوی د ودانیو او وسایلو امنیت خوندي کړي.
د بدخشان د وروستیو کړکېچونو د مدیریت لپاره د طالبانو نوی جوړ شوی کمېسیون ارګو ولسوالۍ ته تللی او له ځايي اوسېدونکو سره یې خبرې کړې دي. د سرچینو په وینا، د دې لیدنې اصلي موضوع د کوکنارو د کر او راټولولو پر سر د رامنځته شویو اختلافونو څیړل دي.
اتصالات افغانستان ټکنالوژۍ ګروپ د سې شنبې په ورځ په رسمي ډول اعلان وکړ چې د شرکت نوم یې «اي انډ» ته بدل شوی او دا بدلون یې د ډیجیټلي او ټکنالوژیکي خدمتونو د پراختیا په لاره کې مهم ګام بللی دی.
د طالبانو د اطلاعاتو او کلتور وزارت وايي، د اګست ۱۵مې یا د کابل د سقوط د ورځې د نمانځنې د مراسمو د تنظیم په موخه یې مشورتي غونډه کړې ده.
د طالبانو امینتي او تصفیوي کمېسیون د یادې ډلې د دفاع وزیر مولوي یعقوب په مشرۍ ناسته کړې او د محرم الحرام په میاشت کې یې د شیعهوو د امنیت پر ټینګښت او خوندیتوب ټنګار کړی دی.
د جنوبي وزیرستان ولسوالۍ په سراروغه علاقدارۍ کې نامعلومو وسلهوالو د پولیسو د یوه افسر (ایس ایچ او) احمد شاه په ګډون شپږ پولیس سرتېري تښتولي دي.
د افغانستان د عدلیې پخوانی وزیر او د اسلامي حزب غړی عبدالبصیر انور د ترکیې په انقره کې د ورپیښې ناروغۍ له امله ومړ. یو شمېر جلاوطنه سیاستوالو د نوموړي پر مړینه خواشینې ښودلې ده.
د طالبانو د کور او ښار جوړولو وزارت وايي، د کډوالو د دایمي مېشتېدنې او ځمکو وېش کمېټې د سې شنبې په ورځ په ۵ ولایتونو کې ۱۳۵۱ راستنو شویو کډوالو ته د استوګنې نومرې وېشلې دي. د وزارت په وینا، په ټول هېواد کې تر اوسه ۵۱ زره او ۴۲۵ راستنو شویو کورنیو ته د استوګنې نومرې ورکړل شوې.
د طالبانو د عدلیې وزیر له «شخصي زندان» څخه د محرم د یو شمېر ماتم کوونکو د خوشې کېدو امر کړی. سرچینو افغانستان انټرنشنل ته ویلي چې د طالبانو د رییس الوزرا او د کورنیو چارو وزیر له غوښتنې وروسته عبدالحکیم شرعي یو شمېر شیعه مذهبه کسان له خپل شخصي زندان څخه خوشې کړي دي.
د پاکستان د بهرنیو چارو وزارت ویاند طاهر اندرابي ویلي چې هبت الله اخوندزاده له خوا پر ډیورنډ کرښه د ۸زره کسیزې قطعې ځای پر ځای کول د طالبانو خپله خوښه ده، خو دده په وینا، باید «ټاکل شوې پولې» ته درناوی وکړي.
د ایران د بهرنیو چارو وزارت ویاند اسماعیل بقايي ویلي، تمه کېږي چې ګڼ شمېر افغانان د علي خامنه يي د جنازې او خښولو په مراسمو کې ګډون وکړي او په دې تړاو اړین تدابیر نیول شوي دي.