د ایران د بهرنیو چارو وزارت ویاند اسماعیل بقايي ویلي، تمه کېږي چې ګڼ شمېر افغانان د علي خامنه يي د جنازې او خښولو په مراسمو کې ګډون وکړي او په دې تړاو اړین تدابیر نیول شوي دي.
د افغانستان د فوټبال فدراسیون د فوټسال کمیټې خبر ورکړی، چې د صربستان روزونکي دژان ددوویچ د افغانستان له فوټسال ملي لوبډلې سره دوه کلن قرارداد په رسمي ډول په کابل کې لاسلیک کړ.
د تودوخې درجې له لوړېدو سره په کندهار کې د موسمي ناروغیو د پراخېدو په اړه اندېښنې زیاتې شوې. روغتیايي کارکوونکي وايي، د سختې ګرمۍ، د څښاک اوبو کمښت، دوړو، بېوزلۍ او د روغتیايي امکاناتو محدودېدو له امله د نس ناستي، کولمو ناروغیو، تنفسي ستونزو او خوارځواکۍ پېښې زیاتې شوې دي.
د پېښور سترې محکمې ته د پاکستان د ملي معلوماتو او ثبت ادارې نادرا لهخوا وړاندې شوي اسناد ښيي، چې له یادې ادارې سره د افغان کډوالۍ او تابعیت کارتونو د لغوه کولو لپاره تر ۲۶زره زیاتې غوښتنې ثبت شوې دي.
د پاکستان د کورنیو چارو وزارت مرستیال طلال چوهدري ویلي، چې په ۲۰۲۵کال کې د وسلهوالو بریدونو له امله تر زرو ډېر پاکستاني سرتېري وژل شوي او دغه کال د وسلهوالو بریدونو له پلوه د دغه هېواد لپاره تر ټولو خونړی کال و.
د پاکستان د بهرنیو چارو وزارت ویاند طاهر اندرابي وایي، اسلاماباد له طالبانو سره د اړیکو د ښه کېدو لپاره ټولې ډیپلوماټیکې لارې ازمویلې؛ خو د ۲۰۲۵کال په اکتوبر کې داسې پړاو ته ورسېدل چې نور د ډیپلوماسۍ دوام شونی نه و.
د کندهار د سوداګرۍ او پانګونې خونې مرستیال انجینر عبدالباقي بینا وایي، چې په تېر ۱۴۰۴کال کې له کندهار نه ۱۸۲زره ټنه وچه او تازه مېوه بهرنیو هېوادونو ته صادره شوې ده. نوموړي ویلي، چې د دغه صادراتو ټول ارزښت له ۴۲۸ مېلیونه او ۸۶۳زره امریکايي ډالر زیات وو.
د افغانستان د سوداګرۍ او پانګونې خونې مشر د هند د صنعت او سوداګرۍ خونې له مشرانو او غړو سره د اقتصادي همکاریو او سوداګرۍ پر پراختیا خبرې کړې. هندي چارواکو ویلي، په نږدې راتلونکي کې به افغانستان ته د سوداګرو یو ۲۰کسیزه پلاوی واستوي؛ څو د سوداګرۍ او پانګونې فرصتونه له نږدې و ارزوي.
د قطر لومړي وزیر محمد بن عبدالرحمان الثاني فایننشل ټایمز ته ویلي، چې د هرمز تنګي د پرانیستلو لړۍ پر وړاندې له هر ډول خنډ څخه د مخنیوي لپاره د امریکا او ایران ترمنځ د مستقیمې اړیکې ټینګښت اړین اقدام دی.
د طالبانو مرستیال ویاند حمدالله فطرت په افغانستان کې د نشهيي توکو د کمښت اړوند د روسیې د امنیت شورا سرمنشي سرګي شویګو د وروستیو څرګندونو هرکلی کړی. شویګو په خپلو وروستیو څرګندونو کې ویلي و، چې په افغانستان کې د نشهیي توکو تولید ۹۰ سلنه کم شوی دی.
د ملګرو ملتونو مرستندویه ماموریت (یوناما) ویلي، د افغانستان د سولې، پراختیا او راتلونکې لپاره د ښځو اغېزمن حضور او د هغوی غږونه حیاتي ارزښت لري او باید افغان ښځو او نجونو ته د زدهکړو، رهبرۍ او ټولنیز ګډون فرصتونه برابر شي.
د افغانستان لپاره د روسیې د ولسمشر ځانګړي استازي ضمیر کابلوف له اېزویسټیا ورځپاڼې سره په خبرو کې ویلي، د شانګهای همکارۍ سازمان د یوه غړي هېواد ښکاره مخالفت په یاد سازمان کې د طالبانو د ګډون پر وړاندې اصلي خنډ دی.
د قزاقستان رسنیو راپور ورکړی، یو قزاق شرکت پلان لري چې ډېر ژر په افغانستان کې د کروم کانونو د سپړلو او پراختیا لپاره ساحوي عملیات پیل کړي او ښایي چې په دغه هېواد کې یو کان هم وپېري.
د ملګرو ملتونو د بشري چارو د همغږۍ دفتر (اوچا) د افغانستان استازې اولګا چیریفکو وايي، د ملګرو ملتونو ادارې په لرو پرتو سیمو کې د سختې خوارځواکۍ له ناروغۍ سره مخ ماشومان موندلي. هغې زیاته کړې، چې وچکالۍ او بشري ګواښونو افغانستان سخت ځپلی دی.
د پاکستان د ملي اسمبلۍ په غونډه کې د اپوزېسیون او د پښتونخوا ملي عوامي ګوند مشر محمودخان اڅکزي سختې نیوکې وکړې او حکومت یې ناقانونه وباله او د اپوزېسیون پر سیاسي فعالیتونو د بندیزونو او د ولسي حقونو د محدودولو په اړه یې جدي پوښتنې راپورته کړې.
د ملګرو ملتونو د بشري چارو د همغږۍ دفتر (اوچا) د افغانستان استازې اولګا چیریفکو د افغانستان په ختیځو ولایتونو کې له زلزله ځپلو کورنیو سره د لیدنې پر مهال ویلي، چې له څلورو کلونو تېرېدو وروسته هم ګڼې کورنۍ له کړاوه ډک ژوند تېروي.
په نړۍوالو بازارونو کې د تېلو د بیو راټیټېدو لړۍ دوام لري. د سېشنبې په ورځ په هر بیرل کې د برنېټ خامو تېلو بیه ۷۶.۸۸ ډالرو ته او د لوېدیځ ټېکساس انټرمیډیټ خامو تېلو بیه ۷۳.۰۲ ډالرو ته ورسېده. د اوپیک د تېلو بیه هم ۱.۸۹ سلنه راټیټه شوه او ۸۱.۵۹ ډالرو ته ورسېده.
د بلوچستان په بېلابېلو بلوڅ مېشتو سیمو کې د بلوڅانو د یووالي کمېټې له لوري د اعلان شوي کاربندیز له امله بازارونه او کاروباري مرکزونه تړلي دي. دغه کاربندیز د یادې کمېټې مشرې ماهرنګ بلوڅ او یو بل غړي صبغت الله ته د ترهګرۍ ضد محکمې لهخوا د اورول شوې عمري بند سزا پرضد ترسره کېږي.
په دایکنډي کې د یوه پخواني پوځي تر وژل کېدو وروسته په دغه ولایت کې د طالبانو د والي دفتر په یاده پېښه کې د خپلو ځواکونو د لاس لرلو تورونه رد کړي. د طالبانو د والي دفتر ویلي، چې دغه پېښه تر څېړنې لاندې ده او د عاملینو د پېژندلو لپاره پلټنې روانې دي.
د فېمینیسټ اکثریت بنسټ وایي، د طالبانو تر واکمنۍ لاندې افغانستان کې ښځې روغتیايي خدمتونو ته د لاسرسي په برخه کې له جدي ستونزو سره مخ دي چې له امله یې هره ورځ ۲۴ مېندې او ۱۶۷ ماشومان مري. د دوی په وینا؛ د ښځو پر تګراتګ، زدهکړو او کار لګېدلو محدودیتونو روغتیايي سیستم اغېزمن کړی.
د لوګر د محمداغې ولسوالۍ په صنعتيښارګوټي کې د یوه خصوصي شرکت لهخوا د یو مېلیون امریکايي ډالرو په ارزښت د کرومایټ ډبرو د پروسس فابریکه پرانیستل شوه. د یادې فابریکې مسوولین وایي، دغه فابریکه هره ورځ د شاوخوا ۵۰۰ ټنه کرومایټ ډبرو د پروسس وړتیا لري.