د تېر جمهوري نظام پرمهال د عدليې وزیر او د مقاومت جبهې غړي فضل احمد معنوي د طالبانو لهخوا د «دین او شریعت» په نوم د خلکو په شخصي ژوند کې پر پراخې لاسوهنې اندېښنه څرګنده کړې.
د ګډ امنیتي تړون سازمان غړي هېوادونه دا مهال تاجکستان ته د وسلو او دفاعي تجهیزاتو د لېږد پر موضوع غور کوي. یاد سازمان ویلي، دغه اقدام د دې لپاره کوي چې د تاجکستان او افغانستان ترمنځ د پولو امنیت پیاوړی او د احتمالي ګواښونو مخه ونیسي.
د امریکا د مرکزي استخباراتو ادارې (سيایاې) پخوانۍ مامورې سارا اډمز د امریکا حکومت ته خبرداری ورکړی، که چېرې دوی یو وار بیا طالبانو ته پیسې واستوي؛ نو په دې اړه اړوند ټول معلومات به یې افشاء کړي.
د ازاده مبارزو افغان لوبغاړی فردوس نعیمي به د «یونیفایډ» سازمان په ۶۶مې سیالۍ کې د مکسیکو د رامون کاردوزو په وړاندې د لوبو ډګر ته ښکته شي. دغه لوبه به د ۱۴۰۴کال د کب په لومړۍ نېټه د کاناډا په ټورنټو ښار کې ترسره شي.
د ازبکستان د احصایې ملي کمیټې خبر ورکړی، چې په ۲۰۲۵کال کې یې له افغانستان سره اقتصادي اړیکې د پام وړ پراخې شوې. د یادې ادارې په وینا؛ په همدې کال کې د دواړو هېوادونو ترمنځ دوه اړخیزه سوداګري شاوخوا ۱.۶ مېلیارډ ډالرو ته رسېدلې، چې د تېر کال پرتله ۴۵.۵ سلنه زیاتوالی ښيي.
د ملګرو ملتونو سرمنشي انتونیو ګوترېش د سوېلي سوډان په بېلابېلو سیمو او په ځانګړي ډول په جونګلې ایالت کې د تاوتریخوالي د زیاتېدو له امله اندېښنه څرګنده کړه. د نوموړي په وینا؛ وروستۍ نښتې د ګڼو کسانو د وژل کېدو، ټپي کېدو او بېځایه کېدو لامل شوې دي.
د روغتیا نړۍوال سازمان عمومي رییس د ایران د لاریونونو پر مهال پر روغتونونو او طبي پرسونل بریدونو په اړه اندېښنه څرګنده کړې. دغه سازمان خبرداری ورکړی، چې د یادو پېښو له امله دغه کسانو او روغتیايي مرکزونو د ناروغانو د حیاتي خدماتو د وړاندې کولو توان له لاسه ورکړی دی.
ګارډین ورځپاڼې د برتانوي سرچینو په حواله راپور ورکړی، چې د برېتانیا د هوایي ځواک تایفون جنګي الوتکې په قطر کې د دغه هېواد د چارواکو په غوښتنه ځای پرځای شوې دي. دغه اقدام د دې لپاره شوی، چې قطر سره د ایران د هر ډول ځوابي برید په وړاندې مرسته وکړي.
په هرات کې د طالبانو امنیې قوماندانۍ خبر ورکړی، چې په دغه ولایت کې یې په تېرو دوو میاشتو کې د بېلابېلو جنایي جرمونو په تړاو ۳۹۷ کسان نیولي دي. د یادې قوماندانۍ په خبره؛ دغه کسان د قتل، وسلهوالو غلاوو او نورو ناقانونه کړنو په تور د هرات په بېلابېلو سیمو کې نیول شوي دي.
د طالبانو تر واک لاندې د کډوالو ستونزو ته د رسېدنې کمېسیون خبر ورکړی، چې د پنجشنبې په ورځ له پاکستان او ایران نه ۴۲۱ کډوالۍ کورنۍ افغانستان ته ستنې شوې دي. دغه کمېسیون زیاته کړې، چې یادې کورنۍ د نیمروز، هرات، کندهار او ننګرهار له لارو افغانستان ته ستنې شوې دي.
د عمرانخان د روغتیا په اړه له اندېښنو سره هممهاله د تحریک انصاف ګوند مشرانو د زندان مخې ته ټوله شپه سبا کړې. د خیبر پښتونخوا سر وزیر سهیل اپریدي تر دې وړاندې ویلي و، چې نوموړی د اډیاله زندان مخې ته رسېدلی؛ څو د عمران خان د روغتیایي وضعیت په اړه معلومات ترلاسه کړي.
پاکستاني رسنیو د خیبر پښتونخوا ځایي چارواکو په حواله راپور ورکړی، چې د نږدې څلورو میاشتو راهیسې پر ډیورنډ کرښه د پاکستان او افغانستان ترمنځ د تړلو لارو له امله د خیبر پښتونخوا ایالت عواید ۵۳ سلنه کم شوي دي.
د امریکا د بهرنیو چارو وزارت د راپور له مخې؛ په ایران کې د لاریونونو د دوام او د خپلو اساسي حقونو د ترلاسه کولو لپاره د خلکو هڅو سره هممهاله واشنګټن به د ایران د لوړپوړو چارواکو او د هغوی د کورنیو د غړو د استوګنې جوازونه په امریکا کې لغوه کړي.
روسیې او اوکراین په جګړه کې د وژل شویو سرتېرو جسدونه سره تبادله کړل، چې په دې لړ کې روسیې اوکراین ته د اوکرایني سرتېرو ۱۰۰۰ جسدونه سپارلي دي. ورته مهال د کرملېن مرستیال ولادیمیر مېډینسکي ویلي، چې کیف مسکو ته د ۳۸ روسي سرتېرو جسدونه سپارلي دي.
د امریکا د سنا د بهرنیو اړیکو کمېټې هغه لایحه تصویب کړې، چې له مخې به یې د طالبانو تر واک لاندې افغانستان ته د امریکا مالي مرستې ودرول شي. جمهوريپال سناتور رنډ پال د یادې لایحې له تصویب وروسته وویل، چې د امریکا مالي سرچینې باید د دغه هېواد د دفاع لپاره ولګول شي.
د افغانستان د فوټسال ملي لوبډله د سعودي عربستان پر وړاندې تر بریا وروسته نن جمعه (د سلواغې ۱۰مه) د ۲۰۲۶کال اسیا جام سیالیو په دویمه لوبه کې د مالیزیا پر وړاندې د لوبو ډګر ته ښکته کېږي. دغه لوبه د اندونیزیا د جاکارتا ښار په ولودروم لوبغالي کې د ماسپښین په ۲:۳۰ بجو پیلېږي.
په پروان کې د طالبانو امنیې قوماندانۍ خبر ورکړی، ځواکونو یې د هغه ځوان مړی موندلی چې ۱۲ ورځې وړاندې نادرکه شوی و. د یادې قوماندانۍ په وینا؛ د یادې پېښې په تړاو یې پنځه کسان هم نیولي دي.
د امریکا ولسمشر ډونالډ ټرمپ د ایران له حکومت سره د خبرو په اړه د یوې پوښتنې په ځواب کې وویل:« ما خبرې اترې کړې دي او زه پلان لرم، چې دا کار وکړم». هغه زیاته کړه: « ایران ته مې وویل چې خپل اټومي پروګرام او د لاریون کوونکو وژنه ودروي. دوی زرګونه لاریون کوونکي وژني».
د سند سترې محکمې د یوه پاکستانۍ کورنۍ د غړو په نوملړ کې د افغان وګړي د شاملولو له امله نادرا ادارې ته امر کړی، چې په لسو ورځو کې د دغه کورنۍ قانوني اسناد وڅېړي. محکمې دغه پرېکړه د یوې عریضې تر ترلاسه کولو وروسته کړې ده.
د طالبانو تر کنټرول لاندې د هواپوهنې ادارې خبر ورکړی، چې د سلواغې له ۱۰مې تر ۱۲مې نېټې پورې په ۱۷ ولایتونو کې د سېلابونو راوتو اټکل شوی. د یادې ادارې په خبره؛ د سختو ورښتونو او د واورو ویلي کېدو له امله به په یوشمېر سیندیزو حوزو کې د اوبو کچه لوړه شي.
د سریلانکا له لوري د سویلي افریقا پر وړاندې تر بریا وروسته د ۲۰۲۶کال نړۍوال جام نیمهپایلوبې ته د رسېدو لپاره د افغانستان له ۱۹ کلنو کم عمره د کرېکټ ملي لوبډلې یوازینۍ لاره د اېرلنډ پر وړاندې بریا ده.