په خیبر پښتونخوا کې په تېرو ۱۸ میاشتو کې وسله والو ډلو پر پاکستاني ځواکونو ۱۸۲ ډرون بریدونه کړي، چې یوازې ۱۰۰ بریدونه پکې په تېرو پنځو میاشتو کې شوي دي. ترلاسه شوي معلومات ښيي چې تر ټولو ډېر بریدونه په شمالي وزیرستان او بنو ولسوالیو کې شوي دي.
د افغانستان د وینې بانک د غیر رسمي ډیجیټل شبکې وروستي ارقام ښيي چې خوست د ۲۹ ثبت شویو وینه ورکونکو په درلودلو سره لومړی ځای لري، وروسته کابل په۲۷، پکتیا په ۱۹، ننګرهار په۱۶ او پکتیکا په ۱۲ چمتو ډونرانو سره په درېیم، څلورم، پنځم او شپږم ځای کې دي.
د طالبانو د کډالو او راستنېدونکو چارو وزارت ویلي چې په تېرو څه باندې دوو میاشتو کې له پاکستان، ایران او ترکیې څخه ۴۹۵ زره او ۳۹۸ افغان کډوال هېواد ته راستانه شوي. طالبانو ویلي، په دې موده کې تر ټولو ډېر کډوال له پاکستان نه راستانه شوي دي.
د هرات د جبریل سیمې دیني عالمانو او قومي مشرانو د حجاب په ملاتړ او په دې سیمه کې د شوي لاریون د وضاحت په اړه په یوه رسنیز کنفرانس کې د حجاب پر پلي کېدو ټینګار کړی او پر ځوانانو یې غږ کړی چې د ستونزو د حل لپاره دې د خبرو اترو او تفاهم لاره غوره کړي.
په کابل کې د طالبانو امنیې قوماندانۍ خبر ورکړی، چې ځواکونو یې د کابل ښار په ۱۳مه حوزه کې د غلو یوه اته کسیزه ډله نیولې ده. بلخوا د طالبانو د کورنیو چارو وزارت وایي، چې د ۱۴زره نشهیي ګولیو د لېږد په تړاو یې په خوست کې یو کس نیولی دی.
د ملګرو ملتونو امنیت شورا د دوشنبې په ورځ (د غبرګولي ۲۵مه) په افغانستان کې د ملګرو ملتونو د مرستندویه پلاوي (یوناما) ماموریت د غځولو په اړه ناسته کوي. دغه غونډه به د کابل په وخت د ماښام په ۶:۳۰ بجو پیل شي.
د خیبر پښتونخوا په بنو ولسوالۍ کې د ځمکې پر سر شخړه په خونړۍ نښته بدله شوه او د یوې کورنۍ څلور غړي پهکې ووژل شول. د ژغورنې ادارې د معلوماتو له مخې؛ پېښه د بنو ولسوالۍ د اودین کلي په سیمه کې شوې ده.
د روغتیا نړۍوال سازمان په خپل تازه راپور کې ویلي، چې د وینې د خوندیتوب او بسپنې په برخه کې د پام وړ پرمختګ شوی؛ خو لاهم په ټیټ او منځني عاید لرونکو هېوادونو کې د وینې کمښت او د روغتیايي سیستمونو نیمګړتیاوې د خلکو ژوند له ګواښ سره مخ کوي.
د طالبانو تر واک لاندې د افغاني سرې میاشتې ټولنې مشر شهابالدین دلاور د سره صلیب نړۍوال فدراسیون له سکرتر جنرال جګن چاپاګین او د افغانستان لپاره د یاد فدراسیون له مشر حسام فیصل سره په لیدنه کې ویلي، افغانان د جګړو او طبیعي پېښو له امله پراخو بشري مرستو ته اړتیا لري.
د طالبانو مخالفې مقاومت جبهې ویلي، چې د بغلان ولایت په فرنګ ولسوالۍ کې یې د عملیاتو پرمهال یو طالب وژلی او ۳ نور یې ټپیان کړي دي. د یادې جبهې د ادعا له مخې؛ دغه عملیات د جمعې په ورځ (د غبرګولي ۲۲مه) د شپې په شاوخوا ۱۲ بجو شوي دي.
د ملګرو ملتونو د بشري مرستو همغږۍ دفتر (اوچا) ویلي، چې سویډن د افغانستان د بشري مرستو له صندوق سره ۲۸ مېلیون کرونه (۲.۹۹ مېلیونه امریکایي ډالر) مرسته کړې ده. اوچا ویلي، چې دغه مرسته د بشري مرستو پیاوړتیا او په افغانستان کې له بېړنیو پېښو سره د مبارزې په برخه کې مهمه ده.
د ایران د خرمشهر بندر او سمندري چارو رییس علي عسکري افغانستان او پاکستان ته د ګډ ترانسپورټي سیستم له لارې د اوبلن ګاز د صادراتو د پیل خبر ورکړی دی. نوموړي ویلي، چې دغه اقدام د صادراتي لارو د پراختیا او د ایران په لوژستیکي شبکه کې د خرمشهر بندر د رول پیاوړتیا لپاره مهم ګام دی.
د طالبانو د ۳۱۳ مرکزي قول اردو خبر ورکړی، چې په ماهیپر کې د دوو ډوب شویو دوو ځوانانو جسدونه یې موندلي او خپلو کورنیو ته یې ورسپارلي دي. د یادې قول اردو په خبره؛ دغه دوه ځوانان پرون شنبه (د غبرګولي ۲۴مه) د ماهیپر په سیند کې ډوب شوي وو او تر نن سهاره لادرکه وو.
د امریکا په ویسټ فارګو کې مېشت یو افغان پناه غوښتونکی او پخوانی پوځي چې د درېیو میاشتو لپاره د امریکا د کډوالۍ او ګمرکونو ادارې (ICE) لهخوا نیول شوی و، په خپلې حقوقي دعوه کې بریالی شو.
په افغانستان کې د ملګرو ملتونو د سیاسي استازولۍ (یوناما) مرستیالې جورجیت ګانیون ویلي، چې په افغانستان کې د ۷ او ۱۸ کلونو ترمنځ شاوخوا ۳.۸ مېلیونه نجونې له زدهکړو بېبرخې دي. د هغې په وینا؛ هر کال شاوخوا ۲۵۰زره نجونې د منځنیو زدهکړو له حقه بېبرخې کېږي.
په کندهار کې د طالبانو د کرنې، اوبو لګولو او مالدارۍ ریاست ویلي، چې سږکال په دغه ولایت کې د سپینې او تورې زڼکۍ «زیرې» د حاصلاتو کچه د پام وړ لوړه شوې ده. د دغه ریاست په وینا؛ په ټولیز ډول په کندهار ولایت کې پر ۶زره او ۴۵۵ هکټاره ځمکه سپینه او توره زڼکۍ کرل شوې ده.
د خیبرپښتونخوا په بېلابېلو سیمو کې د سختو ورښتونو، توپان او تندر پرېوتو له امله لږترلږه ۷ کسان مړه او ۳۳ نور ټپیان شوي دي. ځایي چارواکي وایي، په مړو شویو کسانو کې ۲ ماشومان، ۴ نارینه او یوه ښځه شامله ده او په ټپیانو کې ۷ نارینه، ۱۲ ښځې او ۱۴ ماشومان شامل دي.
د طالبانو تر واک لاندې د المپیک، بدني روزنې او ورزش ریاست خبر ورکړی، چې د کورش د ۱۵م پړاو په اسیایي سیالیو کې افغان لوبغاړو دوه د برونزو مډالونه ګټلي دي.
د هرات یوې اوسېدونکې افغانستان انټرنشنل پښتو ته ویلي، د جمعې په ورځ (د غبرګولي ۲۲مه) طالبانو د اسلامکلا پر لاره یو موټر درولی و چې د تالاشۍ پرمهال د یادې ډلې د امر بالمعروف محتسبینو له یوې درې کلنې ماشومې د هغې نانځکه اخیستې ده.
یوې افغانې مور افغانستان انټرنشنل پښتو ته په دغه رالېږلي پیغام کې ویلي، چې د طالبانو له لوري د نجونو پر زدهکړو د بندیز له امله د خپلې لور ناروښانه راتلونکې په اړه ژوره اندېښنه لري.
د افغانستان د علماوو د مجمع رییس او دیني عالم مولانا عبدالصبور عباسي په یوه تفصیلي لیکنه کې طالبانو ته په اشارې ویلي، چې د دین په تعبیر کې باید له افراط څخه ډډه وشي او د عصر له غوښتنو سره د قران او سنت په رڼا کې متوازن چلند غوره شي.