د طالبانو د حج او اوقافو وزارت وايي، عربستان ته د روان کال د حاجیانو د انتقال بهیر نن (چهارشنبه د غويي ۳۰مه) بشپړ شو. دغه بهیر شاوخوا یوه میاشت مخکې پیل شوی وو. سره له دې چې طالبان افغان حاجیانو ته د ښو خدماتو د وړاندې کولو ادعا کوي، خو افغان حاجیان له کمزوري خدماتو شکایت لري.
د طالبانو تر ادارې لاندې له پېښو سره د مبارزې ادارې ویلي، چې په کابل کې یې پنځه ټنه ناچاوده توکي تر کشف کېدو وروسته لهمنځه وړل شوي دي. یادې ادارې زیاته کړې چې دغه ناچاوده توکي د کابل ښار په ګډون له بېلابېلو ولسوالیو څخه راټول شوي وو.
د ایران ولسمشر مسعود پزشکیان ویلي، چې د فشار او اجبار له لارې د ایران د تسلیمولو هڅه «یوازې یو خیال» دی او ټینګار یې کړی چې متقابل درناوی د جګړې په پرتله ډېر معقول، خوندي او دوامدار انتخاب دی.
ملګرو ملتونو او همکارو مرستندویه بنسټونو یې د ۲۰۲۶ کال لپاره د هغو ۲،۷ میلیونه افغان کډوالو د ملاتړ په موخه د ۵۲۹ میلیونه امریکایي ډالرو په ارزښت یوه جامع طرحه اعلان کړه، چې تمه ده له ایران او پاکستان څخه راستانه شي.
د اغا خان بنسټ مرستیال عبدالضیا نوري وايي، د اسیا له پراختیايي بانک څخه یې ۵۵ میلیونه ډالره ترلاسه کړي او څه باندې ۳۱ میلیونه ډالره به یې په افغانستان کې د پېښو د ګواښونو د مدیریت په برخو کې ولګوي. د نوموړي په وینا، دغه پروژې به د ۱۱ ولایتونو په ۸۰ ولسوالیو کې پلې شي.
د طالبانو د ټرانسپورټ او هوايي چلند وزارت د هوا پوهنې ادارې د هېواد په ۲۱ ولایتونو کې د سختو بارانونو، تالندې او برېښنا، تېزو بادونو او ناڅاپي سېلابونو د راوتلو په اړه بیړنی خبرداری ورکړی دی.
د طالبانو د هرات والي نوراحمد اسلامجار د تازه میوو د صادراتو د بهیر د ښهوالي په موخه غونډه کې وویل، تازه مېوې باید له ځنډ پرته په ګمرکونو او سرحدونو کې صادرې شي، څو د محصولاتو له ضایع کېدو او سوداګرو او دهاقینو ته له زیان رسېدو مخنیوی وشي.
د طالبانو د کډوالو او راستنېدونکو چارو وزارت وايي، چې د کونړ سرکاڼو ولسوالۍ لپاره د استوګنې ښارګوټي پلان په بحث کې دی او د سیمې کډوالو ته د استوګنې د ځمکو د ورکولو وړاندیزونه شریک شوي دي. دا موضوع د طالبانو د کډوالو او راستنېدونکو وزیر عبدالکبیر سره د سرکاڼو قومي مخورو بحث کړې.
په ننګرهار کې د طالبانو سیمهییزو چارواکو اعلان کړی، چې په جلالاباد ښار کې یې د دوو خیریه بنسټونو او دوو اتحادیو دفترونه تړلي دي. په ننګرهار کې د طالبانو د عدلیې ریاست ویلي، چې دا اقدام د یادو بنسټونو د قانوني کاري جوازونو د مودې د پای ته رسېدو له امله شوی دی.
د امریکا ولسمشر ډونالډ ټرمپ د چهارشنبې په ورځ وویل، چې له ایران سره خبرې اترې «وروستیو پړاوونو» ته رسېدلې دي، خو خبرداری یې ورکړ چې که تهران د سولې له تړون سره هوکړه ونه کړي، نو نور بریدونه به هم ترسره شي.
د طالبانو د چاپېریال ساتنې ادارې مشر مطیعالحق خالص د اذربایجان په پلازمېنه باکو کې د هند له یوه پلاوي سره کتلي دي. دا لیدنه د دیارلسم نړیوال ښاري فورم په څنډه کې شوې او پر دوه اړخیزو همکاریو بحث شوی دی.
په پاکستان افغان کډوال خبریال پرویز امینزاده د دغه هېواد په راولپنډۍ ښار کې د پولیسو له لوري نیول شوی دی. دغه افغان خبریال ته نږدې کسانو ویلې، چې پرویز امین زاده اوس مهال د جبري ستنولو له ګواښ سره مخ دی.
د طالبانو د المپیک، بدني روزنې او سپورټ عمومي ریاست خبر ورکړی، چې د مویتای افغان اتل محمد یوسف جهانګیر د سعودي عربستان د سپورټي چارواکو په رسمي بلنه د دغه هېواد پلازمېنې ریاض ته تللی دی.
د طالبانو د کار او ټولنیزو چارو وزارت اعلان کړی، چې ترکیې ته د افغان کارګرانو د استولو په اړه یې له دغه هېواد سره هېڅ ډول رسمي هوکړه نه ده لاسلیک کړې. دغه وزارت ویلي چې اوسمهال د ترکیې حکومت افغانانو ته د کاري ویزو د ورکړې کوم پروګرام نه لري.
د سعودي عربستان د بهرنیو چارو وزیر ویلي چې ریاض د ډونالډ ټرمپ دا پرېکړه ستایي چې د جګړې د پای ته رسولو لپاره یې ډیپلوماسۍ ته د فرصت ورکولو پرېکړه کړې ده. فیصل بن فرحان پر ایران غږ کړی، چې له اوسني فرصت نه د خبرو اترو د پرمختګ په برخه کې ګټه واخلي.
د طالبانو ویاند ذبیحالله مجاهد د «زوجینو د تفریق اصولنامې» په اړه د نیوکو په غبرګون کې ویلي، چې دغه اصولنامه د کمعمره نجونو د ودولو مانا نه لري، بلکې د قضاتو لپاره ده، چې په پخوانیو او پېچلو کورنیو قضیو کې روښانه پرېکړې وکړای شي. هغه ویلي، چې نیوکو ته باید ارزښت ورنه کړل شي.
د طالبانو د ریاستالوزرا اقتصادي مرستیال ملا عبدالغني برادر په بلخ ولایت کې د لاجورد استوګنیز کمپلیکس د بنسټ ډبره کېښوده. پر دغه۱۴۴۸ اپارتمان لرونکي کمپلېکس خصوصي سکټور شاوخوا ۱۵۰ میلیونه ډالره پانګونه کوي.
د ایران «ساها» هوایې شرکت د مشهد او مزار شریف تر منځ مستقیمې الوتنې پیل کړې. د یاد شرکت مسوول علي حیدري وایي، په لومړنۍ الوتنه کې ۱۳۵ مسافر له مزارشریف څخه مشهد ته لېږدول شوي او د ټکټونو بیې هم تر پخوا ۵۰ سلنه راټیټې شوې دي.
ولسمشر ډونالډ ټرمپ ویلي چې له ایران سره خبرې اترې د پای مرحلې ته رسېدلې دي، خو خبرداری یې ورکړی چې که تهران د توافق منلو ته غاړه کېنږدي، نو نور بریدونه هم ممکن دي.
د طالبانو لوی درستیز فصیحالدین فطرت په دغه ولایت کې د محلي طالبانو ترمنځ د سرو زرو د کانونو د کنټرول پر سر د راولاړې شوې شخړې د هواري لپاره په چورلکه کې نسي ولسوالۍ ته تللی.
د کابل د ځان سوځونې په پرونۍ پېښه کې سوځېدلي افغان نن د ټپونو له امله سا ور کړې ده. یاد کس، چې انجنیر یاد شوی، د بېکارۍ او بېوزلۍ پر ضد د اعتراض په موخه ځان ته اور اچولی و، خو نورو خلکو اور ترې مړ کړی و.