د طالبانو د کابل نړيوال ډګر مسوولانو مسافرو او ټکسي چلوونکو ته څوبرابره لوړه نرخنامه ټاکلې ده. په نرخنامه کې د کابل له هوايي ډګر څخه تر خوست پورې ۸۵۰۰ افغانۍ کرایه ټاکل شوې، خو له دې وړاندې کرایه څلور زره افغانۍ وه. ټکسي چلوونکي طالبان د ټکسي نظام په ګډوډولو تورنوي.
طالبانو په کابل کې د سولې عالي شورا پر پخواني رییس عبدالله عبدالله او نورو سیاسي څېرو فشارونه ډېر کړي دي. یوې باخبره سرچینې د دوشنبې په ورځ افغانستان انټرنشنل ته وویل، چې د دغو فشارونو له امله عبدالله خپل ټول رسنیز فعالیتونه درولي دي.
د تاجکستان پولیسو د خجند ښار په چشمه سیمه کې د یوې ښځې د وژلو په تور د محمد عمر رحماني په نامه یو افغان وګړی نیولی. په تاجکستان کې میشتو یو شمېر افغانانو افغانستان انټرنشنل ته وویل، چې له دې پېښې وروسته شاوخوا ۲۵۰ افغانې کورنۍ د اخراج له ګواښ سره مخ دي.
یوه افغان پناهغوښتونکي افغانستان انټرنشنل ته په یوه لېږلې ویډیو کې ادعا کړې، چې د ترکیې پوله ساتو ځواکونو سپي ور خوشې کړي او هغوی یې داړلي دي. په ویډیو کې د دغه پناهغوښتونکي پر بدن د ټپونو او وهلو څرګندې نښې هم لیدل کېږي.
د خوړو نړیوال پروګرام د افغانستان د برخې مشر ویلي، چې افغانستان ته د خوراکي توکو د انتقال لګښت درې برابره لوړ شوی. جان ايليیف ویلي چې مهم خوراکي توکي لکه تغذیوي بسکېټ او نور غذایي مواد اوس له دوبۍ نه د اوو هېوادونو له لارې په ځمکنیو بدیلو لارو کابل ته لیږدول کیږي.
د کونړ ځینو قومي مشرانو افغانستان انټرنشنل ته وویل، چې تېره ورځ د باجوړ قومي مشرانو د پاکستاني نظامیانو ځینې غوښتنې د کونړ له قومي مشرانو سره شریکې کړې دي. د پاکستاني ځواکونو لومړنۍ غوښتنه دا ده، چې طالبان به د کونړ په حدودو کې له ډیورنډ کرښې لرې کېږي او نور به تاسیسات نه جوړوي.
په هرات کې د ایران اسلامي جمهوریت سرکونسل ویلي، چې د اسلام کلا- دوغارون بندر له لارې عراق ته د افغان زیارت کوونکو د احتمالي سفر اسانتیاوې برابرې شوې دي. نوموړي ویلي، چې په تېرو څو میاشتو کې په دغه تړاو د ایران او طالبانو د چارواکو ترمنځ څو ناستې شوې دي.
د سپاه پاسداران ویاند حسین محبي ویلي، په هرمز تنګي کې به هغه سمندري تګراتګ چې د سپاه د سمندري ځواک له اعلان شویو اصولو سره په ټکر کې وي؛ له «جدي ګواښونو» سره مخ شي.
د طالبانو تر واک لاندې د ازموینو ملي ادارې خبر ورکړی، چې د ۱۴۰۵کال د کانکور ازموینه به راتلونکې اوونۍ (د غویي په ۲۲مې) نېټې پیل شي. د یادې ادارې د معلوماتو له مخې؛ د ازموینې لومړی پړاو به په ۱۵ ولایتونو کې ترسره شي.
د ایران پوځ د دوشنبې په ورځ امریکايي ځواکونو ته خبرداری ورکړ چې هرمز تنګي ته داخل نه شي. ولسمشر ډونالډ ټرمپ ویلي، واشګټن به د هغو بېړیو له خلاصون سره مرسته وکړي، چې د امریکا-اسراییل جګړې له امله په خلیج کې بندې پاتې دي.
د قزاقستان د ترانسپورټ وزارت وايي، چې افغانستان ته د غلو دانو صادرات د پام وړ زیات شوي؛ خو خلک بیا شکایت کوي چې په بیو کې هیڅ بدلون نهدی راغلی.
د طالبانو مشر هبتالله اخوندزاده ددې ډلې د اداري او امنیتي جوړښتونو په کچه یو لړ بدلونونه او نوې ټاکنې اعلان کړې دي. په نویو ټاکنو کې د فاریاب والي د مخابراتو وزیر ټاکل شوی او د بېلابېلو ولایتونو والیان، مرستیالان او امنیتي چارواکي له خپلو پخوانیو دندو بدل شوي.
د ملګرو ملتونو استوګنې اداره (UN-Habitat) وايي، په افغانستان، په ځانګړي ډول پلازمېنه کابل کې له هرو پنځو کسانو څخه یو په نامناسبو استوګنیزو شرایطو کې ژوند کوي او په نارسمي مېشتځایونو کې اوسېږي.
په کندهار کې د طالبانو تر واک لاندې د کانونو او صنعت خونې مسوولین وايي، چې په دغه ولایت کې شاوخوا ۲۴ د غوړو د تولید فابریکې فعاله دي. د یادې ادارې د مسوولینو په خبره؛ همدغه فابریکې په کال کې له پنبې دانې ۵۰زره ټنه خوراکي غوړي تولیدوي.
د ابراهیم دولتابادي، مهدي رسولي او محمد رضا میري په نوم هغه درې لاریون کوونکي چې د «ملي انقلاب» په نامه د ایران د وروستیو لاریونونو پرمهال نیول شوي وو، د مشهد په وکیلاباد زندان کې اعدام شول.
د طالبانو تر واک لاندې د ملي بس دولتي شرکت مشر حافظ عبدالباقي ویلي، په پام کې لري چې په نږدې راتلونکې کې له چین نه نوي ملي بسونه وارد کړي. نوموړي زیاته کړې، چې چین ته د یادې ډلې د پلاوي د سفر پرمهال به د نویو ملي بسونو واردولو لړۍ پيل کړي.
د طالبانو د عامې روغتیا وزارت د درملو او روغتیایي محصولاتو د تنظیم رییس نعیمالله ایوبي بنګلهدېش ته د سفر پرمهال د هغه هېواد د درملو د تنظیم ادارې له مشر محمد عالمګیر حسین سره په لیدنه کې د روغتیايي سکتور د همکاریو پر پراختیا او د دوهاړخیزو اړیکو پر پیاوړتیا خبرې کړې دي.
په افغانستان کې د ملګرو ملتونو د خوړو نړۍوال پروګرام مشر جان ایلیف ویلي، چې د هرمز تنګي د تړلو له امله افغانستان ته د بشري مرستو د لېږد لګښت په وروستیو میاشتو کې درې چنده لوړ شوی دی.
په تخار کې د طالبانو روغتیا ریاست وايي، چې د دغه ولایت د کلفګان ولسوالۍ په ګیزستان سیمه کې د ځمکې ښویېدو پېښه کې یو کس مړ او ۴ نور ټپيان شوي دي. ځایي طالب چارواکي وایي، د یادې پېښې ټپیان یې روغتون ته لېږدولي دي.
طالبان وايي، د کونړ په دانګام ولسوالۍ کې د پاکستاني پوځیانو د بریدونو له امله د ښځو او ماشومانو په ګډون ۳ ولسي وګړي وژل شوي او ۱۴ نور ټپيان دي. په دغه تازه بریدونو کې د نجونو او هلکانو دوه ښوونځي، یو روغتیايي مرکز او دوه جوماتونه هم ویجاړ شوي دي.
په کندهار کې د طالبانو د امربالمعروف محتسبینو له لوري د ږېرو په اړه وروستي اقدامات د دغه ښار د اوسېدونکو لپاره په یوې نوې اندېښنې بدله شوې ده. خلک وايي، دغه لړۍ چې پخوا یوازې تر هټیو او مارکېټونو محدوده وه؛ اوس عامو سړکونو ته غځېدلې او ورځ تر بلې سخت دریځ خپلوي.