د طالبانو د کډوالو او راستنېدونکو چارو وزارت وایي، په پاکستان کې د افغان کډوالو طالب چارواکي او د ملګرو ملتونو د کډوالو عالي کمېشنرۍ نوې استازې مانویل سانچر د اسلاماباد په لیدنه کې د افغان کډوالو پر ستونزو، د ثبت بهیر او د اسانتیاوو پر ښهوالي خبرې کړې دي.
د افغانستان د ځانګړو ځواکونو پخواني قوماندان سمیع سادات ادعا کړې، چې د طالبانو په داخل کې ژور سیاسي اختلافات دي او د ده په وینا، د ډلې مشرتابه له داخلي فشارونو سره هممهاله له پاکستان سره د اړیکو پیاوړتیا هڅې کوي. هغه دا وضعیت د طالبانو د راتلونکي ثبات لپاره «حساس او نازک» بللی.
د ملګرو ملتونو د ماشومانو څخه د ملاتړ صندوق (یونیسف) په خپل یوه تازه راپور کې ویلي، چې که څه هم په تېرو ۱۲میاشتو کې یې په افغانستان کې میلیونونو ماشومانو او کورنیو ته خدمات رسولي، خو د بشري اړتیاوو کچه لا هم لوړه او اندېښمنوونکې ده.
د کډوالو په چارو کې د ملګرو ملتونو د عالي کمېشنرۍ مرستیالې وینسا مټر بولي ویلي، د بودیجې له زیاتوالي سره به راتلونکی کال افغان کډوالو او راستنېدونکو ته مرستې پراخې شي. بل پلو طالب چارواکي د کډوالو د جبري ستنولو او خراب وضعیت په اړه اندېښنه ښيي.
د پاکستان د بشري حقونو کمېسيون (اېچ ار سي پي) په خپل کلني راپور کې ویل، چې په دغه هېواد کې د بیان ازادي او د قانون واکمني تر سخت فشار لاندې ده.
د سياېای پخوانۍ مامورې سارا اډمز ادعا کړې، چې د هغې د درې ورځنۍ ارزونې له مخې، د داعش خراسان ډلې د پوځي شورا پر وړاندې د طالبانو له لوري د نیونو او یا وژنو کوم تایید شوي موارد نه دي ثبت شوي.
د طالبانو د ویاند مرستیال حمدالله فطرت وایي، چې د پاکستاني ځواکونو په تازه بریدونو کې د کونړ ولایت په دانګام ولسوالۍ کې درې ملکي وګړي وژل شوي او ۱۴ نور ټپیان دي، چې ډېری یې ښځې او ماشومان دي.
د افغانستان لپاره د پاکستان پخواني ځانګړي استازي اصف دُراني ویلي، د «رژیم بدلون» بحثونه د اصلي ستونزې حل نه دی، بلکې د افغانستان ثبات هغه وخت ټینګېږي چې یو ټولشموله او مشروع سیاسي نظام د افغانانو لهخوا رامنځته شي.
طالبانو اعلان کړی، چې د فاریاب ولایت په اندخوی ولسوالۍ او د فراه په مرکز کې د دوو جلا ترافیکي پېښو له امله ۷ تنو خپل ژوند له لاسه ورکړی دی.
د متحده عرب اماراتو چارواکو ویلي چې د ایران له خوا توغول شوې څو بېپیلوټه الوتکې او توغندي یې شنډ کړي، چې له امله یې لږ تر لږه درې کسان ټپیان شوي او په ځینو سیمو کې اور لګېدلی.
د هند د لومړي وزیر نریندرا مودي واکمن ګوند د دوشنبې په ورځ د څلورو مهمو ایالتي ټاکنو له ډلې په دوو کې بری ترلاسه کړی. که دا پایلې رسمي شي، نو د هند له۲۸ ایالتونو ۲۰ او له درې فدرالي سیمو دوه به د مودي او د هغه د متحدینو تر کنټرول لاندې راشي.
د کونړ او باجوړ قومي مشرانو ترمنځ د تړون یوه کاپي افغانستان انټرنشنل ته رسېدلې او ښيي، چې طالبانو د قومي جرګې له لارې له پاکستاني ځواکونو سره په کونړ کې اوربند کړی دی. د تړون په لومړی ماده کې راغلي، چې دواړه لوري به په خپلو پخوانیو پوستو کې ځای پر ځای کېږي.
د جرمني د لایپزیګ ښار په مرکزي برخه کې د دوشنبې په مازیګر پر یوه ګڼ مېشتې سیمه او پلې موټر ورننوتلی، دوه تنه یې وژلي او ګڼ نور ټپیان دي. پولیسو تراوسه پر پلې لار د موټرځغلونې لامل او د موټرچلوونکي هویت نه دی په ډاګه کړی.
د طالبانو تر واک لاندې د افغانستان د احصايې او معلوماتو ملي ادارې په خپل اېکس حساب کې له نوم څخه ملي کلمه لرې کړې ده. له دې وړاندې افغانستان انټرنشنل سندونه خپاره کړي ول، چې د طالبانو مشر په دولتي چوکاټ کې د «ملي» کلمې پر کارولو بندیز لګولی دی.
د طالبانو د کندهار والي رسنیز دفتر وايي، د ملاهبت الله د حکم پر بنسټ د کور او ښارجوړولو وزارت د کندهار ښار پر ماسټر پلان بیا کتنه کوي. د طالبانو کندهار والي ملا شیرین ویلي، چې د کندهار ښار ماسټر پلان پخوا جوړ شوی او د ننني عصر اړتیا ده، چې اړوندې ادارې یې بیا وګوري.
افغانستان انټرنشنل یو رسمي مکتوب ترلاسه کړی، چې ښيي طالبانو د بهرنیو چارو وزارت له تشکیل څخه د بشري حقونو او ښځو چارو ریاست تنقیص اعلان کړی دی. د طالبانو د بهرنیو چارو وزارت یوه چارواکي او یوه کارکوونکي د دوشنبې په ورځ افغانستان انټرنشنل ته دغه مکتوب تایید کړی.
په پکتیا او ننګرهار کې د پوهنتونو یو شمیر محصلانو افغانستان انټرنشنل ته وویل، چې طالبانو ورباندې ژمنلیکونه لاسلیک کړي چې ږېرې پرېږدی. د محصلانو په وینا، پر ږیرې سربېره د طالبانو د امربالمعروف تصویب شوي قانون د عملي کولو په تړاو هم له دوی ژمنې اخېستل کیږي.
د خوست ولایت د اسماعیلخېلو او مندوزیو ولسوالۍ یو شمېر اوسېدونکو افغانستان انټرنشنل ته د اسنادو په ښودلو سره د ۱۲ نیم زره جریبه ځمکې د دولتي کولو په تړاو د طالبانو د محکمې پر پرېکړې اعتراض کړی. معترضان وايي، چې محکمې خلکو ته ددفاع لازم فرصت نه دی ورکړی.
یو شمېر پخوانیو بالمقطع ښوونکو، چې په کندهار کې یې د جمهوریت په وروستیو میاشتو کې دندې ترسره کړې، ویلي، چې د اتو میاشتو معاشونه یې نه دي ورکړل شوی او څو ځله یې د طالبانو د مشر دفتر ته هم عریضه کړې ده.
د جرمني د دفاع وزارت ویلي چې امریکا په دغه هېواد کې د لرواټنه وسلو یا توماهاک توغندیو د ځای پر ځای کولو پلان په بشپړه توګه نه دی لغوه کړی. امریکا په دې وروستیو کې په جرمني کې د خپلو ځواکونو د شمېر کمولو پرېکړه کړې ده.
د طالبانو د کابل نړيوال ډګر مسوولانو مسافرو او ټکسي چلوونکو ته څوبرابره لوړه نرخنامه ټاکلې ده. په نرخنامه کې د کابل له هوايي ډګر څخه تر خوست پورې ۸۵۰۰ افغانۍ کرایه ټاکل شوې، خو له دې وړاندې کرایه څلور زره افغانۍ وه. ټکسي چلوونکي طالبان د ټکسي نظام په ګډوډولو تورنوي.