د روسیې ولسمشر ولادیمیر پوتین له ډونالډ ټرمپ سره د کتنې په اړه د شمالي کوریا مشر کېم جونګ اون ته معلومات ورکړي دي. که څه هم په دې اړه ډېر جزییات نهدي خپاره شوي؛ خو د پوتین او کېم جونګ اون رسنیزو دفترونو ویلي، چې په دغه ټیلفوني خبرو کې دواړو مشرانو د اړیکو پر پراختیا بحث کړی.
امریکايي سناتور ریچارډ بلومنتال وايي، چې له څلورو کلونو راهیسې شاوخوا ۱۵۰۰ پخواني افغان همکاران په قطر کې د انتقال په تمه دي. هغه وایي:« باید په دې اړه د ټرمپ حکومت خپلې ژمنې پوره کړي او که دغه ژمنه پوره نهشي؛ نو مسوولیت به یې زموږ پر غاړه وي.»
په ګواتیمالا کې یوې محکمې د پخواني حکومت ۶ چارواکي په ۲۰۱۷کال کې د هغه ۴۱ نجونو د وژنې په پېښه کې مجرم ګڼلي، چې د حکومت ترکنټرول لاندې په یوه پناه ځای کې د اورلګېدنې له کبله رامنځته شوې وه.
د امریکا ولسمشر ډونالډ ټرمپ د جرمونو د مخنیوي لپاره د امریکا په پلازمېنه واشنګټن ښار کې د ملي ګارد ۸۰۰ ځواکونو او ۵۰۰ فډرالي پولیسو د ځای پرځای کولو امر کړی دی. د راپورونو له مخې؛ دغه ځواکونه واشنګټن ته رسېدلي دي.
که څه هم طالبانو د ۲۰۲۲کال (د اپرېل میاشتې په ۳مه نېټه) د نشهيي توکو کاروبار منع کړ؛ خو په حقیقت کې دغه کاروبار په یوې نوې بڼه او تاکتیک نور هم پراخ شوی او د نشهيي توکو د کاروبار جغرافیه او بڼه بدله شوې ده.
د امریکا د بهرنیو چارو وزیر مارکو روبیو په یوه راډيويي پروګرام کې، په راتلونکې میاشت کې د ځينو لویدیځو هېوادونو له لوري د فلسطین هېواد رسمیت پېژندنه «تر ډېره بې معنا» بللې او هغه یې د یادو هېوادونو د داخلي پالیسیو د ملاحظاتو پایله ګڼلې ده.
د ملګرو ملتونو د ښځو څانګې ویلي، چې طالبان څلور کاله وروسته له دې چې یو ځل بیا پر افغانستان واکمن شوي، خپل هغه لیدلوري ته نږدې شوي چې له مخې یې مېرمنې له ټولنې په بشپړ ډول حذف شي.
رویټرز خبري اژانس راپور ورکړی، چې د امریکا ولسمشر ډونالډ ټرمپ د «سرو زرو ګنبد» په نوم د څلور پوړیز هوايي دفاعي سیستم د جوړولو پلان لري.
د طالبانو ازبک قومندان او د لوګر والي صلاح الدین ایوبي د دغه ډلې لومړۍ قومندان و، چې د جمهوري نظام د ړنګېدو پر مهال ارګ ته ننوت. هغه وايي: «لومړني څه مې چې په ارګ کې ولیدل هغه د اشرف غني لنګۍ، چپنه او یو کتاب و.»
د غزې عامې روغتیا وزارت وايي، په تېرو ۲۴ ساعتونو کې په غزه کې د لوږې له امله ۵ نور فلسطینیان مړه شوي دي. په دې سره د لوږې له امله د مړه شویو کسانو شمېر ۲۲۷ ته ورسېد.
حال وش بشر حقونو سازمان وایي، چې د ایران په اصفهان، یزد او خراسان کې د هغو ۱۱ بلوڅو مړي موندل شوي، چې د دغه هېواد د امنیتي ځواکونو په عملیاتو کې وژل شوي. د سازمان معلوماتو له مخي، د دې کسانو مړي له ۱۸ ورځو ځنډ وروسته خپلو کورنيو ته سپارل شوي دي.
د افغانستان د تېر جمهوري نظام د ملي امنیت شورا ویاند رحمت الله اندړ، د طالبانو د اطلاعاتو او کلتور وزارت مشر، هغو څرګندونو ته په غبرګون کې چې «اشغالګرو» دین ته زیان رسولی ویلي، «اشغالګر» دین ته زیان نشي رسولی، بلکې هغه کسان زیان رسوي چې د دین په نوم خپلې نادودې توجیه کوي.
د کرېکټ نړیوالې شورا د معلوماتو له مخي، وېسټ انډېز کرېکټ لوبډلې پاکستان ته په درې یو ورځنیو سیالیو کې ماتې ورکړه او دغه لوبلړې یې په خپل نوم کړه. په دې سیالیو کې لومړۍ لوبه پاکستان او دوه پرله پسې لوبې وېسټ انډیز کرېکټ لوبډلې ګټلي.
د اسراییل لومړي وزیر بنیامین نتنیاهو ویلي، د ایران خلک له نږدې پنځو لسیزو راهیسې له لومړنیو انساني حقوقو څخه محروم دي. هغه له ایرانیانو غوښتي چې سړکونو ته راووځي او د مبارزې له لارې خپله ازادي ترلاسه کړي، او باید په دې برخه کې خطر ومني.
د طالبانو د صنعت او سوداګرۍ وزیر نورالدین عزیزی چې پرون (دوشنبه د زمري په ۲۰مه) د بشکېک په اقتصادي فورم کې د ګډون په موخه قرغزستان ته تللی وو، نن یې (د زمري په ۲۱مه) د قرغزستان د اقتصاد او سوداګرۍ له وزیر سره په کتنه کې دوه سوداګریزې هوکړې لاسلیک کړې.
په ننګرهار کې طالبانو د یوه وژل شوي کس کورنۍ ته د قناعت ورکولو وروسته تر یو میلیون زياتې افغانۍ ورکړي. د ننګرهار د سپين غر ولسوالۍ د شډل سېمې اوسېدونکی مطیع الله څه موده وړاندې د طالبانو د شنې قطعې د جنګیالیو له لوري په ډزو سره وژل شوی وو.
د طالبانو د امربالمعروف او نهې عن المنکر وزارت وايي، یو ماهر جادوګر چې په دې وروستیو کې له ایرانه راغلی وو په بلخ ولایت کې یې نیولی دی. د دغه وزارت په وینا، یاد شخص د ساحري فعالیتونو لپاره افغانستان ته راغلی، خو دا یې نه ده روښانه کړې چې دغه نیول شوی جادوګر افغان که ایرانی دی.
د افغانستان بشري حقونو کمېسيون پخوانۍ مشره سیما ثمر وايي، چې په تېرو څلورو کلنو کې د ښځو، عامه خلکو او بشري حقونو په وړاندې د طالبانو بندیزونو ته په کتلو سره دغه ډلې د تېر په پرتله هيڅ بدلون نه دی کړی، او افغانستان په نړۍ کې یوازنی هېواد دی، چې له دین څخه دا ډول استفاده کوي.
د ایمرجنسي په نوم یو فعال نړیوال روغتیایي بنسټ د طالبانو د حاکمیت د څلورمې کلیزې په درشل کې ویلي، چې په افغانستان کې د جمهوري نظام له ړنګېدو وروسته په دغه هېواد کې روغتیایي بحران لا پسې ژور شوی او میلیونونه افغانان له لومړنیو درملنیزو خدمتونو بې برخې دي.
د ملګرو ملتونو سرمنشي انتونیو ګوترېش د ځوانانو د نړۍوالې ورځې په مناسبت په خپل پیغام کې ویلي، د ځوانانو غږ، نظرونه او مشرتابه ډېر ارزښت لري او باید د ځوانانو په مشرۍ د حل لارو ملاتړ وشي څو له بنسټ څخه یوه عادلانه، سوله ییزه او دوامداره نړۍ رامنځته شي.
یو ژورنال په ویتنام او افغانستان کې د امریکا ښکیلتیا، شخړو او ناکامیو ته په کتلو سره په یو څېړنه کې ویلي: «څنګه چې په نړۍ کې د شخړو امکان زیاتيږي، امریکا باید له هغو ناکامو جګړو څخه درس واخلي، چې په دې هېوادونو کې یې تجربه کړي.»