په نورستان کې سرچینو افغانستان انټرنشنل ته وویل، چې د برګمټال او کامدېش ولسوالیو او د چترال د قومي مشرانو له ناستې وروسته د کونړ له ناړۍ ولسوالۍ څخه کامدېش او برګمټال ولسوالیو ته غځېدلې لار پرانېستل شوه.
د امریکا او ایران تر منځ د اسلام اباد له ناکامو مذاکراتو څخه وروسته د اوربند د ماتېدو ګواښ زیات شوی دی. همدا څو شېبې وړاندې د امریکا پوځونو د هرمز تنګي محاصره پیل کړه، چې له امله یې په نړۍوال بازار کې د انرژۍ بیې مخ په لوړېدو دي.
افغانستان انټرنشنل ته په رسېدلو ویډیوګانو او غږونو کې د لوګر یو شمېر اوسېدونکو شکایت کړی، چې د طالبانو والي د ښار جوړونې له رییس سره په همغږۍ د پل علم د بابوس ویالې ترڅنګ څه دپاسه ۲۰۰ نومرې شنه سیمه د استوګنیزو نومرو په نامه د نږدې ۵ تر ۸ زره ډالرو په بدل کې وېشلې ده.
د طالبانو د ننګرهار والي رسنیز دفتر وايي، چې په دغه ولایت کې د بیو د کنټرول او احتکار مخنیوي لپاره د نانوايانو، هوټلونو، قصابانو او د چرګانو اتحادیو پر مسوولینو یې ژمنلیکونه لاسلیک کړل. په دې وروستیو کې د هېواد د بېلابېلو ولایتونو اوسېدونکي له احتکار څخه شکایت کوي.
د طالبانو د پېښو پر وړاندې د مبارزې ادارې ویلي چې د وري میاشتې له ۶مې نېټې څخه تر اوسه د هېواد په بېلابېلو ولایتونو کې د سختو ورښتونو، سېلابونو، زلزلو، د چت نړېدو، تالندې او برېښنا، د غره ښویېدنې او ډبرو ښویېدو له امله ۱۸۹ تنه مړه شوي، ۲۵۳ تنه ټپیان شوي او ۹ تنه لا درکه دي.
ترکیې د دوشنبې په ورځ وویل چې د ناټو متحدین باید په انقره کې د جولای میاشتې له سرمشریزې ګټه واخلي او د امریکا له ولسمشر ډونالډ ټرمپ سره دې اړیکې له سره تنظیم کړي او په ایتلاف کې د امریکا د حضور کمېدو ته هم باید چمتو و اوسي.
د طالبانو د کانونو او پټرولیم وزارت وايي، چې ددغه وزارت وزیر ملاهدایت الله بدري د عزیزي انرژي ګروپ د تخنیکي کمېټې له استازو سره لیدلي او یاد ګروپ په افغانستان کې د ګازي سرچینو د لا ښه اکتشاف، استخراج او له هغو څخه د برېښنا د تولید پروپوزل ورسره شریک کړی دی.
د پاکستان د ګلګت بلتستان ایالت د دیامر ولسوالۍ اړوند چېلاس سیمه کې وسله والو د پولیسو پر موټر ډزې کړې دي او درې پولیس یې وژلي او څلور نور یې ټپیان کړي دي.
د طالبانو سترې محکمې ویلي چې د میدان وردګو ولایت په سیداباد او د زابل ولایت په شاجوی ولسوالیو کې پنځه تنه د غلا او «اخلاقي فساد» په تور په ۳۹–۳۹ درو سزا او له دوو تر درې کلونو تنفیذي بند محکوم او سزاوې پرې عملي شوې دي.
د طالبانو د کلیو د بیارغونې او پراختیا وزارت وايي، چې ددغه وزارت وزیر عبداللطیف منصور د ترکیې، کینیا، بورکینا فاسو، نایجیریا، موریتانیا او سربیا هېوادونو له دیني عالمانو سره کتلي دي. منصور ویلي، چې په افغانستان کې« اسلامي نظام حاکم دی او ټول ولس ورسره په خوښۍ ولاړ دی».
ځايي سرچینو افغانستان انټرنشنل ته وویل، چې د نورستان د کامدېش ولسوالۍ په کمو کلي کې ۶ ماشومان د خوارځواکۍ له امله مړه شوي او درې مېرمنې په برګمټال کې د زیږون پرمهال مړې شوې دي.
د طالبانو د امر بالمعروف وزارت وايي، چې د بادغیس په قادس ولسوالۍ کې یې د غیاث الدین په نامه هغه کس محکمې ته سپارلی، چې د پیغمبرۍ ادعا یې کړې ده. غیاث الدین په یوه ویډیو کې ویلي، چې «له خدای سره مې ملاقات شوی». طالبانو ویلي چې نوموړی له روغتیايي ارزونې وروسته محکمې ته سپارل شوی.
له پاکستان نه تازه ستانه شوي افغان کډوال وایي، چې د لنډي کوتل په حمزه پنډغالي کې له ګڼو ستونزو سره مخ وو. دوی وایي، د یادو ستونزو له امله اړ وو چې د اداري لړۍ د بشپړېدو لپاره په ساعتونو انتظار وباسي او پاکستاني مامورینو د اداري چارو د چټکتیا په بدل کې له خلکو پیسې اخیستې.
په اسلاماباد کې د طالبانو سفارت او په پېښور کې ددې ډلې د کونسلګرۍ یو ګډ پلاوي د اپرېل پر ۱۱مه او ۱۲مه د خیبر پښتونخوا په بېلابېلو سیمو کې د ستنېدونکو افغان کډوالو وضعیت له نږدې کتلی دی.
پاکستاني رسنیو د دغه هېواد امنیتي ادارو په حواله راپور ورکړی، پر هغه ۲۳نيول شویو افغانانو د «ترهګرۍ» قضیه ثبت شوې چې د اسلاماباد په سرای خربوزه سیمه کې د بېاسناده افغان کډوالو د پلټنې عملیاتو پرمهال یې مقاومت وکړ او عملیات یې په تاوتریخوالي واړول چې له امله یې ۴پولیس ټپیان شول.
په کابل کې د افغان او ازبکستاني سوداګرو ترمنځ د ۵۲۰ میلیونه ډالرو په ارزښت ۳۸ هوکړه لیکونه لاسلیک شوي. یادې هوکړې د اوسپنې ویلې کولو فابریکو د جوړولو، د پنبې پروسس، د سمنټو تولید، د هګیو تولید، ازبکستان ته د افغانستان د سکرو صادراتو او د موټرو د پرزو په برخو کې شوې دي.
ایران په ۲۰۲۵ کال کې لږ تر لږه ۱۶۳۹ کسان اعدام کړي، چې دا له ۱۹۸۹ کال راهیسې د اعدام تر ټولو ستر شمېر بلل شوی. د بشري حقونو دوو سازمانونو په خپل ګډ رپوټ کې خبرداری ورکړی چې که اوسنی کړکېچ وغځیږي او حکومت پر ځای پاتې شي، امکان شته چې اعدام لا ډېر د فشار د وسیلې په توګه وکارول شي.
په هرات کې د طالبانو د امربالمعروف رییس عزیز الرحمان المهاجر وايي، چې په دغه ولایت کې یې د یوه کال په لړ کې ۲۱ کوډګر او «غیر شرعي» تعویذ لیکونکي نیولي دي. د هغه په وینا؛ دغه کسان تر پلټنو وروسته نیول شوي او یوشمېر قضايي ادارو ته ورپېژندل شوي هم دي.
د طالبانو د کډوالو او بېرته راستنېدونکو چارو وزارت وایي، د راستانه شویو کډوالو او بېځایه شویو لپاره د زدهکړې او کاري زمینې برابرولو په موخه یې له دوو مرستندویه موسسو سره د نږدې یو مېلیون ډالرو په ارزښت د همکارۍ هوکړې لاسلیک کړې دي.
د امریکا او ایران ترمنځ په اسلاماباد کې تر خبرو اترو وروسته هم د یاد ښار ټرافیکو پولیسو یوه خبرتیا خپره کړې، چې د اسلاماباد سختې امنیتي سیمې او د هغو شاوخوا ځینې نورې سیمې په بشپړه توګه د خلکو د تګراتګ لپاره تړل شوې او یوازې دولتي موټرو ته د تګراتګ اجازه ورکول کېږي.
د طالبانو د کرنې، اوبو لګولو او مالدارۍ وزارت خبر ورکړی، چې د دغه وزارت مسوولینو د ازبکستان هېواد له چارواکو سره د لیدنې په څنډه کې له یاد هېواد سره د «همکار پرنده» شرکت او د افغانستان د «یشلر سمرقند» شرکت ترمنځ د دوه مېلیون ډالرو په ارزښت تړون لاسلیک کړی دی.