مارګریتا، یوه ۳۳کلنه الماني ګرځندوې، په ټولنیزو رسنیو کې له محرم پرته، د طالبانو تر واک لاندې افغانستان د خپل درې میاشتني سفر ویډیوګانې خپروي، چې دا کار یې له سختو غبرګونونو سره مخ کړی دی.
د رویټرز خبري اژانس د راپور له مخې، د فلسطیني ډلې حماس ویاند د جمعې په ورځ، د زمري۱۷مه، د اسراییلو لهخوا د غزې ښار د کنټرول پرېکړه «جنگي جنایت» بللی دی.
د بې پولې خبریالانو سازمان یا «ار ایس ایف» په څه کم درېیو اونیو کې په کابل د طالبانو له لوري د څلورو خبریالانو او د رسنیو د کارکوونکو نیول کېدل غندلي دي.
د ملګرو ملتونو د روغتیا نړیوال سازمان په سوډان کې د روانو جګړو له امله د لوږې کچې ډېرېدو او ناروغیو خپرېدو په اړه جدي اندېښنې ښودلي دي او وايي، که د سوډان خلکو ته رسېدنه ونه شي وضعیت به نور هم بحراني شي.
د طالبانو د کورنیو چارو وزارت ویلي، د شمالي ولایتونو د امنیتي ازرونې او د هبت الله د فرمانونو د تطبیق په موخه د بلخ د والي یوسف وفا په مشرۍ د جمعې په ورځ په سرپل ولایت کې ناسته شوې ده. په دغه ناسته کې د ځیرک مبایلونو د استعمال د محدودیت په اړه هم پرېکړه شوې ده.
د هند لومړي وزیر نریندرا مودي ویلي، له خپل روسي سیال ولسمشر ولادیمیر پوتین سره یې په اوکراین کې وروستیو پرمختګونو او د هند ـ روسیې پر دوه اړخیزو اړیکو مفصلې خبرې کړې دي.
سعودي عربستان د اسرایيل له لوري د غزې تړانګې د نیولو پرېکړه په کلکو ټکو غندلې او دغه عمل یې غیر انساني، د سولې لپاره خطرناک او د فلسطيني ولس پر وړاندې د نسل وژنې هڅه بللې ده.
د پاکستان پوځ د یوې خبرپاڼې په خپرولو سره ویلي، چې د افغانستان پولې ته څېرمه د بلوچستان ایالت د ژوب ولسوالۍ په سمبازه سیمه کې یې ۳۳ وسله وال وژلي دي. د پاکستان پوځ د عامه اړیکو دفتر ویلي، دغو وسلهوالو غوښتل چې د افغانستان او پاکستان ترمنځ سیمو کې نفوذ وکړي.
د ټرمپ له لوري د هند پر صادراتو د تعرفو د لوړولو له اعلان وروسته، هند له امریکا څخه د وسلو او الوتکو د پېرلو پلانونه ځنډولي دي. بل لور ته هندي سرچینو ویلي چې د هند د دفاع وزیر راجنات سینګ په دې اړه واشنګټن ته د سفر پلان درلود، خو دا سفر لغوه شوی دی.
د غزې د نیولو لپاره د اسراییل د پرېکړې تر اعلان وروسته، د جرمني حکومت وویل چې تر بلې خبرتیا پورې به اسراییل ته د هېڅ ډول پوځي تجهیزاتو د لېږلو اجازه ور نه کړي. د جرمني صدراعظم ټینګار کړی، چې د اسراییلي یرغمل شوو کسانو ازادول او د اوربند خبرې د برلین له اساسي لومړیتوبونو څخه دي.
د باجوړ په قبایلي سیمو کې چارواکو د امنیتي ګواښونو د له منځه وړلو لپاره له قبیلو غوښتي یا له خپلې سیمې وسله وال اوباسي او یا دې سیمه خالي کړي چې امنیتي ځواکونه خپله لاس پکار شي.
د چين د دولتي رسنيو د راپورونو له مخې، د ګانسو ولايت د یوجونګ ولسوالۍ په سېلاوونو کې لږ تر لږه ۱۰ کسان مړه شوي او ۳۳ نور تری تم شوي دي. د بارانونو له امله د شينګلونګ غره په سيمه کې برېښنا او مخابراتي خدمتونه پرې شوي او تر ۴ زره زيات کسان بند پاتې دي.
د افغانستان د اورګاډي ګډ کنسرسیوم مرستیال ویلي، چې په ورستیو میاشتو کې د خواف ـ هرات د اوسپني پټلۍ له لارې افغانستان ته د توکو انتقالات ډېر شوي دي او له دې لارې په میاشت کې ۴۰ زره ټنه توکي انتقالیږي.
د طالبانو د اوبو او انرژۍ وزارت د اوبو معین مجیب الرحمن عمر اخندزاده په انقره کې د طالبانو له سفیر شیخ صنیعالله فرهمند سره لیدنه کې ویلي، چې ترکي او نور بهرني شرکتونه دې وهڅول شي څو د افغان انجنیرانو په همکارۍ د اوبو پروژو کې برخه واخلي.
سرچینې وايي، تېره شپه د کندهار ښار په عینو مېنه کې د دوست محمد په نوم یو سوداګر د خپلو ملګرو له لخوا په خپل کور کې په چړو وهل شوی او وژل شوی دی. د نوموړي قاتلین په تیښته بریالي شوي دي.
د امریکا د بهرنیو چارو وزارت مرستیال ویاند ټامي پيګاټ په یوې خبري ناسته کې د یوه خبریال د پوښتنې په ځواب کې ویلي، چې د کډوالۍ ځانګړو وېزو بهیر اوس هم دوام لري.
د پاکستان ملي شورا د زنداني پخواني لومړي وزیر عمران په مشرۍ د پاکستان تحریک انصاف یا پيټيای درې مهم غړي له مهمو پارلماني څوکیو لرې کړي دي. دغه پرېکړه وروسته له هغه وشوه، چې د دغه ګوند څو غړي د پاکستان د ټاکنو کمېسیون لهخوا بېواکه شول.
د پاکستان د بهرنیو چارو وزارت خبر ورکړی، چې نن د اسلاماباد په نړۍوال هوايي ډګر کې د دغه هېواد د اطلاعاتو وزیر عطاالله تارړ د یو لړ مراسمو په لړ کې غزې ته بشري مرستې واستولې.
په هرات کې یو پانګهوال خبر ورکړی، چې د دغه ولایت په صنعتي ښارګوټي کې یې د ۷مېلیونه امریکایي ډالرو په لګښت د اوسپنې ویلي کېدو فابریکه جوړه کړې ده. خان ګل اسحاقزي ویلي، چې دغه کارخونه په ورځ کې د ۱۵۰ ټنو په کچه د ډول، ډول اوسپنو ویلي کېدو ظرفیت لري.
یوه مصري ډيپلوماټ خبرداری ورکړی، چې د اسراييل نوې جنګي طرحه به د حماس لهخوا د اسراييلي زندانیانو د وژل کېدو لامل شي. دغه ډول د مصر ولسمشر عبدالفتاح السیسي هم غوښتنه کړې، چې باید په دې اړه په مستقیم ډول له ټرمپ سره خبرې وشي.
د برېتانیا لومړي وزیر کېیر سټارمر جمعه (د زمري ۱۷مه) پر اېکس پاڼه د غزې د بشپړ نیولو په اړه د اسراييل د نوې پرېکړې په غبرګون کې ویلي، چې دغه پرېکړه ناسمه ده. هغه اندېښنه ښودلې، چې دغه پرېکړه به په غزه کې د لا وینې تویېدو لامل شي.