آرشیف

د ننګرهار ولایت مرکز جلال اباد ښار او ۱۲ ولسواليو کې د تېرو ۲۴ ساعتونو په ترڅ کې د سېلابونو راوتلو او د کورونو د ړنګېدو له امله ۱۶ کسان مړه شوي او ۳۳ نور ټپیان دي.

د طالبانو تر واک لاندې د افغانستان برېښنا شرکت وايي، ددغه شرکت رییس عبدالحق همکار د تاجکستان د انرژۍ له وزیر دلیر جمعه سره د کاسا–۱۰۰۰ پروژې د پرمختګونو او شته ننګونو په تړاو انلاین ناسته وکړه. په دې ناست کې ټینګار شوی، چې د کاساـ۱۰۰۰ پروژې چارې تر ټاکلي وخت پورې بشپړې شي.

په خیبر پښتونخوا کې د طالبانو د کونسلګرۍ ډېپلوماتانو د پېښور ښار له کمیشنر رياض خان محسود سره په لیدنه کې په تورخم کې د کډوالو د ستنېدو سيستم د بيا فعالېدو او د هر اړخيزو اسانتياوو برابرولو په تړاو خبرې کړې دي.

په کونړ کې ځایي سرچینو افغانستان انټرنشنل ته وویل، چې ددغه ولایت د نرنګ ولسوالۍ په کړمار کلي کې د اکرام په نامه یو ځوان له واده دوه ورځې وړاندې ځان وژنه کړې ده. اکرام نن سهار په خپل کور کې دتومانچې په ډزو ځان وژلی دی. نژدې خپلوان یې وايي چې د نوموړي اقتصادي وضعیت ښه نه و.

د طالبانو د بهرنیو چارو وزارت اداري مرستیال محمد نعیم د ماین پاکۍ نړیوالې ورځې په نمانځغونډه کې له نړیوالې ټولنې غوښتي، چې د ماین پاکۍ په برخه کې له افغانستان سره دوامداره مرسته او همکاري وکړي. نوموړي له نړیوالې ټولنې نه په دې برخه کې د پرمختللو تجهیزاتو غوښتنه کړې ده.

په کابل کې د چین سفیر د طالبانو د بهرنیو چارو وزیر امیرخان متقي سره د دوه اړخیزو همکاریو، سیمه‌ییزو تحولاتو او د چین په ارومچي کې د طالبانو او پاکستان د روانو خبرو اترو په تړاو ناسته کړې ده. ژاو شینګ ویلي، بېجینګ هڅه کوي چې د افغانستان او پاکستان ترمنځ د باور فضا رامنځته کړي.

د طالبانود کورنیو چارو وزارت وايي، چې په غزني، کابل، ننګرهار، کاپیسا، هلمند، پروان، جوزجان، کندز، بامیان، سمنګان او پکتیکا ولایتونو کې یې ۴۰ تنه د نشه يي توکو د قاچاق او پلور په تړاو نیولي. د وزارت په وینا، یاد کسان به له لومړنیو څېړنو وروسته عدلي او قضايي ارګانونو ته وسپارل شي.

د طالبانو د ټولګټو چارو وزارت وزیر ملا محمدعیسی ثاني د ایران اسلامي جمهوریت له سفیر علیرضا بیکدلي سره په کتنه کې پر سوداګرۍ، د ترانزیټ پر اسانتیاوو او د اوسپنې پټلۍ په تړاو خبرې کړې دي.

د طالبانو د کډوالو چاور وزیر عبدالکبیر په خپل دفتر کې په پېښور کې ددې ډلې له جنرال کونسل محب الله شاکر سره په لیدنه کې ویلي، چې د ډیورنډ کرښې هغې غاړې ته د بند پاتې راستنېدونکو افغانانو د ستونزو د حل په موخه د خوراکي او نورو توکو د چمتو کولو لپاره به مالي امکانات ولېږي.

د پاکستان پوځ وايي، چې په راولپنډۍ کې د قول اردوګانو د قوماندانانو په غونډه کې «په افغانستان کې د وسله والو د پټنځایونو» تر له منځه وړو پورې د بریدونو پر دوام ټینګار شوی. په دې غونډه کې د سعودي عربستان پر پټرولیمي او صنعتي تاسیساتو بریدونه اندېښمنوونکي بلل شوي.

د طالبانو د ټولګټو وزارت د سې شنبې په ورځ اعلان وکړ، چې په ځینو ولایتونو کې د واورې، بارانونو، سېلابونو او ځمکې ښویېدو له امله د سالنګ، کابل-جلال اباد، سمنګان-مزار شریف لویې لارې او څو نورې لویې لارې د موټرو د تګ راتګ پر مخ تړل شوې دي.

ایران داسې هېڅ نښه نه ده ښودلې چې د امریکا د ولسمشر ډونالډ ټرمپ ګواښ ته پکې نرمښت وبرېښي. ټرمپ ویلي چې ایران باید تر سې‌شنبې هرمز تنګی بېرته پرانیزي او که نه نو له پراخو بریدونو سره به مخ شي او دوزخ به یې وګرځوي.

دطالبانود ننګرهار ولایتي چارواکو ویلې چې د جلال اباد د ښار په دویمه ناحیه کې د یو استوګنیز کور چت نړېدلی، چې له امله یې پنځه تنه مړه شوي او دوه نور ټپیان دي. یو بل تن له نیز نه د لرګیو ټولولو پرمهال د نیز څپو وړی دی.

د جرمني په بن ښار کې یو شمیر افغانانو افغانستان انټرنشنل ته وویل، چې د طالبانو تر واک لاندې د بن کونسلګرۍ یو نوبت په تور بازار کې په « ۴۰۰» یورو پلورل کېږي. د بن کونسلګرۍ د نوبت اخېستلو انلاین پروسه په ځانګړي وخت کې پرانېستل کېږي، چې یوازې کمیشنکاران ترې خبر وي.

د افغانستان پخواني ولسمشر حامد کرزي د ملګرو ملتونو سرمنشي انتونیو ګوترېش ته په یوه لیک کې پر افغانستان د پاکستان وروستي بریدونه د نړۍوالو اصولو خلاف بللي او د دغو بریدونو د غندنې غوښتنه یې کړې ده.

د «راوا» په نوم د ښځو او بشري حقونو د ملاتړ او ودې بنسټ په یوې اعلامیه کې په ګاونډیو هېوادونو کې د افغان کډوالو د ملاتړ غوښتنه کړې او ویلي یې دي، چې زرګونه افغانان له سختو او ناامنه شرایطو سره مخ دي.

د افغانستان لپاره د ملګرو ملتونو ځانګړي راپور ورکوونکي ریچارډ بېنېټ د روغتیا د نړۍوالې ورځې په مناسبت ویلي، چې افغان ښځې او نجونې لا هم روغتیايي خدمتونو ته د لاسرسي په برخه کې له جدي خنډونو سره مخ دي.

په پنجشېر کې د طالبانو والي محمد اغا حکیم ویلي، چې د دغه ولايت له کانونو استخراج شوي ۲زره او ۶۳۹ قیراطه زمرد یې په څه باندې درې مېلیونه او ۱۷۲ زره افغانیو په ارزښت وپلورل. هغه زیاته کړې، چې یاد زمرد یې د یوې داوطلبۍ له لارې پر ملي سوداګرو پلورلي دي.

د چمن ځايي اوسېدونکو افغانستان انټرنشنل-پښتو ته ویلي، د چمن-سپین بولدک لاره له څو میاشتو راهیسې د عامه تګ‌راتګ او سوداګرۍ پر مخ تړلې ده او یوازې افغان کډوال له دې لارې هېواد ته ستنېږي. د دې ستونزې له امله د تېرې میاشتې له ۲۸مې راهیسې د چمن اوسېدونکو او سوداګرو پرلت کړی دی.

د طالبانو د عدلیې وزارت ویلي، چې د دغه وزارت په مشرۍ د کورونو د کرایې د تنظیم کمېټې چې په‌کې د امنیې قوماندانۍ، استخباراتو، ښاروالۍ او نورو اړوندو ادارو استازي شامل دي، پرېکړه کړې چې د کرایو لوړول له ټاکلي حد څخه منع دي او له سرغړوونکو سره به قانوني چلند وشي.

د طالبانو تر واک لاندې د کابل ښاروالۍ په یوې خپره کړې اعلامیه کې له کابل ښاریانو غوښتي، چې کابل سیند کې د کثافاتو او خځلو له غورځولو ډډه وکړي.