آرشیف

د طالبانو تر واک لاندې د کابل ښاروالۍ په یوې خپره کړې اعلامیه کې له کابل ښاریانو غوښتي، چې کابل سیند کې د کثافاتو او خځلو له غورځولو ډډه وکړي.

سرچینې وايي، چې د سختو ورښتونو او سېلابونو له امله د مزارشریف-سمنګان لویه لار له تېرې شپې راهیسې د سمنګان د خُلم ولسوالۍ په تاشقرغان تنګي کې تړل شوې ده. د راپورونو له‌مخې، د لارې د بندېدو له کبله دواړو خواوو ته لسګونه مساپر وړونکي او بار وړونکي موټر ایسار پاتې دي.

د طالبانو د سوداګرۍ او پانګونې خونې ویلي، افغان او ازبک سوداګرو د ازبکستان په فرغانه کې د یوې غونډې پر مهال د ۴۰۰ مېلیونه ډالرو په ارزښت ۲۰ هوکړې لاسلیک کړې. دا تېرو څو اوونیو کې د افغان او ازبک سوداګرو ترمنځ څلورم ځل دی چې د مېلیونونو ډالرو په ارزښت سوداګریزې هوکړې لاسلیک کوي.

د ملګرو ملتونو د نفوسو صندوق د روغتیا د نړۍوالې ورځې په مناسبت په خپره کړې اعلامیه کې ویلي، چې اوسمهال افغانستان د اسیا پاسفیک هېوادونو په ډله کې د میندو د مړینې تر ټولو لوړه کچه لري.

له طبیعي پېښو سره د طالبانو د مبارزې ادارې ویاند محمد یوسف حماد وايي، چې د ۲۰۲۵ کال له اپرېل څخه د ۲۰۲۶ کال تر مارچ میاشتې پورې په افغانستان کې د ماینونو او ناچاودو توکو ۲۲۵ پېښې ثبت شوې دي. نوموړي زیاته کړې، چې په دې پېښو کې ۹۶ تنه وژل شوي او ۳۷۸ نور ټپیان دي.

پولیټیکو خبر ورکړی چې پنټاګون په ایران کې د خپلو پوځي اهدافو نوملړ ته د داسې ګډو تاسیساتو په ورزیاتولو کار پیل کړی، چې ملکي او پوځي دواړو برخو ته انرژي رسوي. د راپور له‌مخې، امریکا غواړي پر بنسټیزو زېربناوو د احتمالي برید په صورت کې ځان د جنګي جرمونو له تورونو وژغوري.

د کډوالو ستونزو ته د طالبانو د رسېدنې عالي کمېسیون خبر ورکړی، چې تېره ورځ (د وري ۱۷مه) ۶۰۴ کډوالې کورنۍ چې ټولټال ۲زره او ۳۶۳ کسان کېږي، له ایران او پاکستان څخه بېرته هېواد ته ستنې شوې دي.

د امریکا د کوینز بلفاسټ پوهنتون استاد مایکل سمپل وايي، د طالبانو یو شمېر وزیران نه غواړي د دې ډلې د لومړۍ واکمنۍ په څېر یو ځل بیا د یوه کس یا یوې ډلې لپاره قرباني شي. نوموړی زیاتوي، دغه وزیران واک او صلاحیت نه‌لري او پرېکړې هبت‌الله په پټه او غېرشفاف ډول کوي.

رویټرز د سې‌شنبې په ورځ (د وري ۱۸مه) راپور ورکړی، چې د اسټرالیا فدرالي پولیسو د رابرټس سمېټ په نوم یو اسټرالیایي سرتېری نیولی دی. دراپور له‌مخې، پر هغه تور دی چې له ۲۰۰۹ تر ۲۰۱۲ کال پورې یې په افغانستان کې د خپل ماموریت پر مهال بې‌وسلې افغانان وژلي او ښایي په عمر قید محکوم شي.

د طالبانو د ټولګټو چارو وزارت ویاند محمد اشرف حق شناس د سې‌شنبې په ورځ (د وري ۱۸مه) وایي، چې د سالنګونو او کابل-جلال‌اباد لویې لارې لا هم د ترافیکو پرمخ تړلې دي، خو د کابل-کندهار لویه لار بېرته پرانیستل شوې ده.

د طالبانو تر واک لاندې ملي ټلوېزیون د سې‌شنبې په ورځ (د وري ۱۸مه) خبر ورکړ، چې د ننګرهار ولایت د شېرزاد ولسوالۍ په ګندمک کلي کې د وروستیو ورښتونو له امله د یوه کور چت رالوېدلی، چې په پایله کې یې درې ښځې مړې شوې دي.

الجزیرې د یوې امریکایي رسنۍ د معلوماتو پر بنسټ راپور ورکړی، چې د امریکا ولسمشر ښايي له ایران سره د یوې هوکړې د رامنځته کېدو د رښتینو نښو په لیدو سره هغه پوځي عملیات وځنډوي، چې ټاکل شوې د سې‌شنبې په ورځ د ایران د بنسټیزو تاسیساتو پر ضد پیل شي.

د امنیت شورا د راپور له‌مخې، ټاکل شوې ده چې د ملګرو ملتونو امنیت شورا نن سې‌شنبه (د وري ۱۸مه) د یوه پرېکړه‌لیک پر مسودې رایه اچونه وکړي، چې موخه یې د هرمز تنګي کې د بېړیو د تګ‌راتګ خوندیتوب او د سیمه‌ییز تاوتریخوالي کمول دي.

د عراق په کردستان کې چارواکو اعلان کړی، چې د اربیل ولایت په لوېدیځ کې پر یوه کلي یوه بې‌پیلوټه الوتکه راغورځېدلې، چې له امله یې په یوه کور کې مېړه او ښځه وژل شوي دي.

په میدان وردګ کې طالبانو خلکو ته خبرداری ورکړی، چې د مرغانو له هر ډول ښکار، ځورونې او له‌منځه وړلو څخه ډډه وکړي. د طالبانو د اطلاعاتو او فرهنګ ریاست ویلي، چې له سرغړوونکو سره به سخت قانوني چلند وشي.

د بلوچستان ایالت د کله عبدالله ولسوالۍ اړوند د نورک سلیمان‌خېل سیمې په یوه کور د تندر لوېدو له امله دوه کسان مړه شوي او یو بل ټپي شوی دی. د پولیسو په وینا، مړي او ټپی سمدستي دولتي روغتون ته لېږدول شوي دي.

ایران انټرنشنل ته رسېدلي معلومات ښيي، چې د ایران په لوړو حکومتي کړیو کې بې‌ساري اختلافات رامنځته شوي دي. د راپورونو له‌مخې، د ایران د ولسمشر مسعود پزشکیان او د سپاه پاسداران د لوړپوړو قومندانانو ترمنځ ناندرۍ او ښکاره تقابل روان دی.

د جاپان لومړۍ وزیره سانای تاکایچي د سې‌شنبې په ورځ ویلي، چې په منځني ختیځ کې د «تاوتریخوالي د کمولو» لپاره به خپلې ټولې هڅې وکړي او د ایران له «مشرانو» سره د خبرو اترو لپاره یې خپل چمتووالی څرګند کړی دی.

د برېتانیا ټایمز ورځپاڼې د امریکا او اسراییل د استخباراتي ارزونو پر بنسټ راپور ورکړی، چې مجتبی خامنه‌يي د علي خامنه‌يي پر استوګنځي له برید وروسته سخت ټپي شوی او اوس په کوما حالت کې دی.

د طالبانو د ټولګټو چارو وزارت ویاند محمد اشرف حق شناس وایي، د تېزو ورښتونو او سېلابونو له امله د کابل-کندهار لویه لار د زابل په فولادګي مانده سیمه کې د ترافیکو پر مخ تړل شوې. نوموړي زیاته کړې، چې ټیمونه یې په سیمه کې دي او د سېلابونو له کمېدو سره سم به لاره بېرته خلاصه کړي.

د راپورونو له‌مخې، نن سې‌شنبې (د وري ۱۸مه) د سهار شاوخوا درې بجې د تهران په بېلابېلو سیمو کې د نوې څپې چاودنو غږونه او د جنګي الوتکو الوتنې اورېدل شوې دي.