آرشیف

په بلخ ولایت کې د طالبانو د عامې روغتیا ریاست د معلوماتو له مخې، د تېر یوه کال په موده کې د ابوعلي سینا بلخي حوزوي او تدريسي روغتون له خوا ۴۳،۷۷۶ وړیا جراحي عملیات ترسره شوي دي.

د امریکا د سنا د بهرنیو اړیکو کمیټې ډیموکراټانو د دوشنبې په ورځ په یوه راپور کې وویل، چین د امریکا د ولسمشر د پالیسۍ له امله رامنځته شوې خلاوې ډکوي او په نړیواله کچه خپل نفوذپراخوي خو امریکا بیا په نړۍواله کچه خپل حضور راکموي.

د امریکا ولسمشر ډونالډ ټرمپ ګواښ کړی چې که له روسیې سره د اوکراین د جګړې د ختمېدو لپاره د ۵۰ ورځو دننه کومه موافقه ونه شي، پر مسکو به "ډېرې ډېرې سختې" ګمرکي تعرفې ولګوي. نوموړي وویل چې له روسیې سخت ناخوښه دی.

د طالبانو مشر د دوشنبې په ورځ د کندهار ولایت له میرویس حوزوي روغتون څخه لیدنه کړې او له ناروغانو سره یې نغدې مرسته کړې ده. د یاد روغتون چارواکو او د طالبانو د عامې روغتیا وزارت مسوولینو تایید کړې چې نوموړی د روغتون د خدماتو، ناروغانو وضعیت او موجودو امکاناتو ارزونې لپاره تللی و.

د ایران د کورنیو چارو وزیر اسکندر مومني وایي چې له ایران څخه د افغان کډوالو د ایستلو بهیر «منطقي» پرمخ روان دی او هېواد یې افغان کډوالو ته په بد نظر نه ګوري. نوموړی وايي، له ۷۰۰ زرو زیات افغان کډوال تر دې دمه له ایران نه وتلي او تر ۷۰ سلنه یې "داوطلبانه " ستانه شوي.

د طالبانو د ريیس الوزرا په مشرۍ ددې ډلې کابینې د پلازمينې کابل اړوند شاه و عروس بند څخه نږدې سیمو ته د اوبو رسولو په موخه د چارو ادارې ریاست ته سپارښتنه کړې، چې له اړوندو ادارو سره خبرې وکړي او وروستۍ پایله یې د ریاست الوزرا له مقام سره شریکه کړي.

بریتانیايۍ ورځپاڼې سنډې ټایمز رپوټ ورکړی چې ایران په معاصر تاریخ کې د کډوالو د شړلو یوه ستره لړۍ پیل کړې او تر اوسه یې له یوه میلیون زیات افغان کډوال له هېواده شړلي دي. له دې شمېرې نيمایي یوازې په تېرو پنځو اونیو کې اخراج شوي.

د طالبانو د عدلیې وزارت سرپرست په کابل کې د اندونیزیا سفارت له شارژدافیر سره په کتنه کې افغانستان او اندونیزیا د اسلامي او کلتوري مشترکاتو درلودونکي دوه هېوادونه وبلل او څرګنده یې کړه چې «د اسلامي هېوادونو ترمنځ اړیکې او همکارۍ باید تر هغې کچې وي چې ټول یو هېواد وبلل شي».

د خیبر پښتونخوا د طبیعي پېښو د مدیریت ایالتي ادارې د دوشنبې په ورځ وویل چې په تیرو ۲۴ ساعتونو کې د بارانونو له امله د څلورو ماشومانو په ګډون شپږ کسان مړه شوي او یو کس ټپي شوی دی.

له افغانستان نه پاکستان ته د سکرو د واردوونکو ټولنې غړو د افغانستان لپاره د پاکستان له ځانګړي استازي سره په کتنه کې د اصلیت تصدیق پاڼې پر سر له رامنځته شویو ستونزو شکایت کړی او په دې برخه کې یې د دواړو هېوادونو د همکاریو غوښتنه کړې ده.

د اوکراین ولسمشر ولادیمیر زېلېنسکي اعلان وکړ چې یولیا سویریدینکو یې د اوکراین د نوې صدراعظمې په توګه وړاندیز کړې. نوموړې اقتصادپوهه ده او له دې وړاندې یې له واشنګټن سره د منرالونو پر سر د مهمو خبرو مشري کړې ده.

د طالبانو د اقتصاد وزارت سرپرست او د راستنېدونکو افغانانو لپاره د مرستو د جلب او جذب کمېټې رییس دین محمد حنیف د غیر دولتي کورنيو او بهرنیو موسساتو له استازو سره په کتنه کې د راستنو شویو افغانانو د ستونزو پر حل او زیاتو مرستو ټینګار کړی.

د افغانستان لپاره د ملګرو ملتونو د بشرپاله مرستو د همغږۍ دفتر ريیسې او د یونېسف رييسې د بامیان له والي سره په کتنه کې په دغه ولایت کې راستنېدونکو افغانانو ته د زده کړو او ټولنیزو خدماتو د برابرولو په برخو کې له خپل هر اړخیز ملاتړه ډاډ ورکړی.

د بښنې نړیوال سازمان د روان کال په لومړیو شپږو میاشتو کې د افغانستان او څو نورو هیوادونو د بشري حقونو د لاسته راوړنو نوملړ خپور کړی او په سر کې یې د طالبانو د دوو مشرانو د نیولو په تړاو د جرمونو نړیوالې محکمې حکم د بشري حقونو لپاره مهمه لاسته راوړنه بللې ده.

د سوریې په سوېدا ښار کې، چې اکثریت یې د دروز اقلیت اوسېدونکي دي، شپږ امنیتي سرتېري د مذهبي شخړو د مهارولو پر مهال وژل شوي دي. د سوریې د کورنیو چارو وزیر په سوېدا او شاخوا سیمو کې د دولتي بنسټونو، په ځانګړې توګه نظامي او امنیتي ادارو، نشتوالی د روانو ترینګلتیاوو لامل ګڼلی.

د افغان سندرغاړې زلاله هاشمي کورنۍ افغانستان انټرنشنل ته وویل چې د نوموړې له نادرکه کېدو ۴۸ ورځې تېریږي خو طالبان د هغې په موندلو کې لازمه مرسته ورسره نه کوي. کورنۍ یې نیوکه کوي، چې د شکمنو کسانو په نیولو کې هم طالبان ورسره مرسته نه کوي.

پاکستان له څو میاشتو انتظار وروسته د هغو شاوخوا ۲۵۰۰ افغان کډوالو پر ضد اقدامات پیل کړي چې جرمني د منلو رسمي ژمنې ور کړې، خو اوس هم لاپه پاکستان کې بند پاتې دي. شاوخوا ۱۲۵ افغانان د اخراج کمپونو ته لېږدول شوي.

په متحده عربي اماراتو کې د طالبانو سفیر بدرالدین حقاني د خلیفه بن زاید ال نهیان خیریه موسسې له ریيس محمد حاجي الخوري سره کتنه کې له افغان کډوالو سره د یاد بنسټ د مرستې او همکارۍ غوښتنه کړې ده.

د طالبانو د ټرانسپورټ او هوايي چلند وزارت د هوا پېژندنې ادارې ویلي، د هېواد په ۲۱ ولایتونو کې د سختو بارانونو د ورېدو، تالنده برېښنا، چټکو بادونو او د سېلابونو د راوتلو اټکل شوی.

تاجکستان له افغانستان سره د برېښنا، سیمنټو او سکرو په برخو کې خپله سوداګري ډېره کړې ده. د تاجکستان د احصایې ادارې د معلوماتو له مخې، د روان کال په لومړیو پنځو میاشتو کې د تاجکستان او افغانستان تر منځ دوه اړخیز سوداګریز تبادلات نږدې ۴۰میلیونه ډالرو ته رسېدلي دي.

د طالبانو د امربالمعروف او نهی عن المنکر وزارت وايي، د فاریاب د ګرزیوان ولسوالۍ په تګاب کلي کې یې د یوه تحمیلي واده مخنیوی کړی دی. یاد وزارت وايي، یوه ۱۴ کلنه نجلۍ له رضایت پرته یوه ۷۰ کلن سپین ږیري ته نکاح شوې وه خو د یادې نجلۍ له شکایت وروسته یې نکاح فسخه کړه.