د ملګرو ملتونو د عمومي اسمبلۍ مشرې انالنا بربوک د پنجشنبې په ورځ (د کب ۲۱مه) په نیویارک کې له درې افغان ورزشکارانو او د ښځو د حقونو له فعالانو سره د افغانستان د بشري حقونو د وضعیت او په دغه هېواد کې د جنسیتي اپارتاید د رسمیت پېژندنې د کمپاین په اړه خبرې وکړې.
د طالبانو مالیه وزارت وايي، چې په تېرو درېیو اونیو کې یې په کندهار، نیمروز، فراه، هرات او هلمند ولایتونو کې له پاکستان او ایران څخه لسګونه زره کیلوګرامه واردېدونکي قاچاقي توکي نیولي دي.
د طالبانو ویاند ذبیحالله مجاهد وایي، د امریکا هغه پرېکړه چې افغانستان یې د «برمته نیوونکو هېوادونو» په نوملړ کې شامل کړی، د دې لپاره ده، چې د طالبانو پر ضد د راتلونکو سناریوګانو لپاره پلمه برابره کړي.
د طالبانو د کور او ښار جوړولو وزارت وايي، په غزني کې یې په ۱۹۰۷ جریبه ځمکه کې د کډوالو د ښار ګوتي جوړولو لپاره د استوګنیزو نمرو د وېش بهیر پیل کړ.
د بشري حقونو نړیوال بنسټ په یوې تازه اعلامیه کې د خوست په عليشېر ولسوالۍ کې د ملکي وګړو پر کورونو توغندیز بریدونه غندلي دي. دې سازمان ویلي، چې پنجشنبه د کب (۲۱مه) سهار وختي پاکستاني عسکرو په توغندیزو بریدونو کې ۳ ماشومان وژلي او شپږ نور یې ټپیان کړي دي.
د طالبانو د کور او ښار جوړولو وزیر نجیبالله حیات حقاني د لوګر ولایت د محمداغې صنعتي پارک تفصیلي پلان تایید او لاسلیک کړی دی. دغه صنعتي پارک، د هېواد په مرکزي حوزه کې یو له مهمو صنعتي مرکزونو شمېرل کېږي.
د افغانستان لپاره د پاکستان ځانګړي استازي محمد صادق او د چین استازي یو شیاویونګ نن په اسلام اباد کې د «ټيټيپي او د ترکستان اسلامي غورځنګ» د ګواښونو په تړاو خبرې کړې دي. محمد صادق ویلي، چې دواړه وسلهوالې ډلې پاکستان او چین ته ترهګریز ګواښونه پېښوي.
د پاکستان د بریدونو له امله په کونړ کې ګڼ شمېر کورنیو خپل کورونه پرېښي او د اسعداباد ښار په څنډو کې په خیمو او تر شنه اسمان لاندې شپې او ورځې تېروي.
طالبان ادعا کوي چې په افغانستان کې یې د وسلو او مهماتو د تولید او ترمیم څو فابریکې جوړې کړې او د بېپیلوټه الوتکو د جوړولو وړتیا یې هم پیدا کړې ده. طالبانو په یوه رپوټ کې ویلي، چې د هوايي دفاع ځینې سیستمونه یې بیا فعال کړي او له پاکستان سره په وروستیو نښتو کې ترې کار اخیستل شوی.
افغانستان انټرنشنل ته باخبره سرچینو ویلي چې ټاکل شوې ده د روانې کب میاشتې پر ۲۷ او ۲۸مه نېټه اروپایي پارلمان او د بلجیم سنا مجلس د لومړي ځل لپاره د طالبانو د یو شمېر سیاسي او پوځي مخالفانو کوربه توب وکړي.
د روسیې د دفاع وزارت ادعا کړې، چې د دونېڅک په سیمه کې پر یوه طبي مرکز د اوکراین د بېپیلوټه الوتکې (ډرون) په برید کې اته طبي کارکوونکي وژل شوي او لس نور ټپیان شوي دي.
د امریکا د ویرجینیا ایالت دنورفولک ښار په اولډ ډومینیون پوهنتون کې د پنجشنبې په سهار د ډزو یوه پېښه شوې، چې دوه کسان پکې ټپیان شوي. وسله وال کس امنیتي ځواکونو وژلی دی.
د ملګري ملتونو سرمنشي، انتونیو ګوترېش د زدهکوونکو د خوړو د نړیوالې ورځې په مناسبت ویلي چې لوږه د ماشومانو پر مخ د زدهکړو لارې تړي او د ټولنې پر راتلونکي منفي اغېز کوي.
د طالبانو د کانونو او پټرولیم وزیر ملا هدایتالله بدري د ترکمنستان سفیر خواجه عوضوف او د ټاپي پروژې له رییس سره د دې پروژې د چارو د پرمختګ په اړه خبرې اترې کړې دي. د طالبانو د کانونو وزارت وايي، په ناسته کې د ګازو نل لیکې د عملي چارو د څرنګوالي په اړه معلومات ورکړل شوي.
یو شمېر کورنیو، چې د جمهوريت دورې د شهیدانو او معلولینو د امتیازي معاشونو د ترلاسه کولو حق لري، افغانستان انټرنشنل ـ پښتو ته په لېږلو پیغامونو کې شکایت کړی چې معاشونه یې نه دي ورکړل شوي او کارکوونکي ورته وایي چې له اختر وروسته دې د خپلو معاشونو پوښتنه وکړي.
د هند د بهرنیو چارو وزارت ویاند رندهیر جیسوال د پاکستان هغه ادعاوې چې ګواکې نوی ډیلی د طالبانو او پاکستان ترمنځ د جګړې د شدت لامل شوی، رد کړې او دا یې «بېاساسه» تورونه وبلل. نوموړي وویل، «هېڅوک نور د پاکستان په هغو لوبو باور نه کوي چې خپل ځان پکې د ترهګرۍ قرباني ښیي».
د روسیې بهرنیو چارو وزارت وايي چې مسکو د ملګرو ملتونو د جرمونو او نشهيي توکو پر ضد دفتر د هغو هڅو ملاتړ کوي چې په سیمه، په ځانګړي ډول په افغانستان او د منځنۍ اسیا هېوادونو کې د ځوانانو ترمنځ د نشهيي توکو د کارونې د مخنیوي لپاره کېږي.
د اې این پي ګوند مشر ایمل ولي خان په خیبر پښتونخوا کې پر روان وضعیت اندېښنه ښودلې او وايي، چې د پښتونخوا خلک نور د تجربو او ناکامو پالیسیو قرباني کېدای نه شي. هغه زیاته کړې، چې د بیا ځل لپاره د ترهګرۍ په اور کې د پښتون وطن د غورځولو هر ډول پالیسي باید ودریږي.
د اې این پي مشر وايي، چې له پولو بهر د وسله والو د مرکزونو له منځه وړو ادعاوې کیږي، خو په خیبر پښتونخوا کې پرې غلي دي. ایمل ولي خان ویلي، چې له هر برید وروسته پر افغانستان مسوولیت غورځول له خپلو مسوولیتونو تېښته کول دي او که حکومت وغواړي د انګورو یوه دانه به هم راتېره نه شي.
د طالبانو ستره محکمه وایي چې په تېره یوه اونۍ کې یې د افغانستان په بېلابېلو ولایتونو کې پر ۴۷ کسانو د بند او دُرو وهلو سزاوې عملي کړې دي.
د افغانستان-پاکستان د سوداګرۍ او صنایعو ګډې خونې رییس خان جان الکوزی وايي چې د کرښې تړل کېدل او د ترانزیټ درېدل د دواړو هېوادونو لپاره اقتصادي زیانونه لري، خو په ځانګړي ډول پاکستان ته ډېر زیان رسېدلی دی.