د امریکا متحده ایالاتو فدرالي ادارو خبرداری ورکړی چې له ایران سره تړلې سایبري ډلې او هېکران ممکن د امریکا پر شرکتونو، دفاعي برخو او حیاتي زیربناوو، په ځانګړې توګه هغو ادارو، چې له اسراییل سره اړیکې لري، بریدونه وکړي.
هند د لوړ ظرفیته توغندیو یوه نوې لړۍ جوړوي چې د ژورو او کانکریټي پټنځایونو د ویجاړولو وړتیاوې ولري. انډیا ټایمز وايي، د هند د دفاعي څېړنو او پراختیا اداره پر دې کار کوي چې د اګني ۵ بالستیک توغندي یوه نوې بڼه جوړه کړي اوتر پیاوړو دفاعي خنډونو لاندې ودانیو کې نفوذ وکړای شي.
د ډله ییز امنیت تړون سازمان (CSTO) د غړو هېوادونو د بهرنیو چارو وزیرانو یو ځل بیا ژمنه کړې چې د افغانستان د ثبات، سولې او پراختیا لپاره به خپلو هڅو ته دوام ورکړي او له نړیوالو شریکانو سره به همکاري پراخوي.
د جرمني پخوانۍ لومړۍ وزیرې انګېلا مېرکل د اوسني لومړي وزیر فریدریښ میرڅ د حکومت د کډوالۍ پر پالیسیو نیوکه کړې او ویلي یې دي چې حکومت د هغو افغانانو پر وړاندې مکلفیت لري چې د برلین ته د انتقال ژمنه ورسره شوې. مېرکل وايي، د پناه غوښتنې د غوښتنلیکونو ردول د قانوني تګلارو خلاف دي.
د بښنې نړیوال سازمان پر پاکستان غږ کړی چې د افغان کډوالو جبري ایستل بند کړي او د پي او ار کارت لرونکو د استوګنې موده ژر تر ژره وغځوي. ددې کارتونو موده، چې شاوخوا ۱،۴ میلیونه افغانانو ته ورکړل شوي، نن پای ته رسیږي.
په بدخشان کې سرچینې وايي چې اوس مهال په خاش ولسوالۍ کې د طالبانو او ځایي اوسیدونکو ترمنځ نښتې روانې دي. په یاد ولایت کې د طالبانو یوه چارواکي افغانستان انټرنشنل ته وویل چې په دې نښتو کې تر اوسه څلور کسان وژل شوي او لس نور ټپیان دي.
د دوشنبې په ورځ د اسراییل له خوا د ډلهییزې تخلیې تر امر وروسته، تېره شپه د شمالي غزې اوسېدونکو لپاره له ناورین ډکه وه. په داسې حال کې چې د اسراییل چارواکي د ټرمپ حکومت له خوا وړاندیز شوي اوربند او خبرو لپاره واشنګټن ته روان دي، اسراییل خپل بریدونه چټک کړي.
ځايي سرچینو افغاستان انټرنشنل ته وویل چې طالبانو د پکتیکا په جاني خېلو ولسوالۍ کې د عبدالعلیم خاموش په نوم د لیسې یو ښوونکی د عصري علومو د اهمیت د بیانولو له امله زنداني کړی دی. سرچینې وايي، عبدالعلیم خاموش د طالبانو سیمه ییزې محکمې په دوه کاله بند محکوم کړی دی.
د فرانسې په لیل ښار کې یوې محکمې د دوشنبې په ورځ نهه کسان (اووه افغانان او دوه عراقي کردان) د کډوالو د قاچاق او د ۲۰۲۲ کال په ډسمبر کې په مانش کانال کې د بېړۍ ډوبیدو په پیښه کې د اتو پناه غوښتونکو د مړینې په تور له اوو تر اتو کلونو بند باندې محکوم کړل.
هند د خپلې دفاعي څارنې د پراختیا لپاره د ۵۲ سپوږمکیو د ځای پر ځای کولو بهیر چټک کړی، چې د چین، پاکستان تحرکات او د هند سمندري سیمو کې دښمنانه فعالیتونه په ریښتیني وخت او لوړ دقت وڅاري.
د بلغاریا دولتي خبري اژانس رپوټ ورکړی چې د صوفیا ښار یوې محکمې اعلان کړی چې د منظمو جرمونو او د کډوالو د مړینې په تور د یوې ډلې محاکمه به په دوو ورځو کې پیل شي. دا قضیه د ۱۸ افغان وګړو له مړینې سره تړاو لري چې دوه کاله وړاندې یې مړي پلازمېنې ته نږدې له یوه موټره وموندل شول.
د پاکستان د دفاع وزیر خواجه اصف ادعا کړې، چې افغان وګړي په پاکستان کې ناقانونه کاروبارونه کوي او د دولتي ځمکو پر غصب هم تورن دي. هغه وویل، « زموږ د ټولو نهرونو غاړې افغانانو نیولې دي». خواجه اصف وايي، که افغانان لاړ شي، نو د پاکستاني وګړو لپاره به د کار زمینه برابره شي.
د روسیې د بهرنیو چارو وزیر سرګي لاوروف د دوشنبې په ورځ وویل چې مسکو پلان لري خپلې دفاعي بودجې کې کموالی راولي. خو هغه دا هم وویل چې د ناټو د غړو هېوادونو له خوا د دفاعي لګښتونو زیاتوالی ښایي په پای کې د دغه پوځي تړون د ړنګېدو لامل شي.
په کابل کې د اوسپنې ویلې کولو فابریکو یو شمېر مسوولانو افغانستان انټرنشنل ته وویل چې د طالبانو د افغانستان برېښنا شرکت رییس عبدالباري عمر د اوسپنو ویلي کولو پر فابریکو برېښنا کمه کړې ده. د فابریکو مسوولان وايي، زیات شمېر کاریګر یې رخصت کړي او فابریکې د بندیدو له ګواښ سره مخ دي.
اسراییل ټایمز وايي، د یکشنبې - دوشنبې په شپه په لوېدیزه غاړه کې لسګونو یهودي افراطیانو په لویدیزه غاړه کې یو امنیتي مرکز ته اور واچاوه. دا پېښه پر کفر مالک فلسطیني کلي د اسراییلي میشتو له برید وروسته شوې. بلواګرو له دې وړاندې یو اسراییلی افسر هم ډبولی و.
د طالبانو د بهرنیو چارو وزیر امیرخان متقي له یو شمېر افغان سوداګرو سره په ناسته کې د ویزو، ټرانزیټي لارواو د افغاني محصولاتو لپاره د بازار موندنې پر موضوعاتو خبرې وکړې، او ویې ویل چې هڅه کوي له ګاونډیو او د سیمې هېوادونو سره د سوداګرۍ دروازې بېرته پرانیزي.
ایران د اصفهان په مرکزي زندان کې هغه افغان چې د قتل په جرم په اعدام محکوم شوی و؛ په دار وځړاوه. د ایران د بشري حقونو سازمان راپور ورکړی، چې د اعدام شوي افغان نوم قربان زین النوري و او درې کاله وړاندې په کار ځای کې د قتل په تور نیول شوی و.
پاکستان او چین د «سارک» په ځای د یوه نوي سیمهييز سازمان د جوړولو لپاره سلا مشورې پیل کړې دي. سارک هغه سازمان ګڼل شوی، چې له ۲۰۱۶کال راهیسې تر ډېره غیرفعاله پاتې شوی او ګټورې چارې یې نه دي ترسره کړې.
د پاکستان د بهرنیو چارو وزیر اسحاق ډار کابل ته د خپل وروستي سفر ته په اشارې سره ویلي، چې له افغانستان سره د پاکستان اړیکې مثبت لور ته روانې دي.
سره له دې چې طالبانو د خپلې دویم ځل واکمنۍ له پیل راهیسې د چرګانو پر جنګولو بندیز اعلان کړی؛ خو د کابل لارې او کوڅې لا هم د دې وینه بهوونکې لوبې شاهدې دي. د اسوشیټېډ پرېس اژانس ویلي، چې لا هم خلک د چرګانو جنګولو لپاره راټولېږي او قمار پرې وهي.
د الجزیرې خبري شبکې راپور ورکړی، چې اسراییل د جبري تخلیې له اعلان وروسته یوازې پرون پرغزې ۵۰ هوايي بریدونه کړي دي. د راپور له مخې؛ یادو بریدونو کې ۶۷ فلسطینان وژل شوي دي.