آرشیف

لوړپوړي امریکايي چارواکي ټام هومن افغانستان انټرنشنل ته ویلي، چې ټول غېرقانوني کډوال په ځانګړي ډول هغه افغانان چې ناقانونه د امریکا خاورې ته داخل شوي، د قانون له مخې به وڅارل شي.

له ایرانه په بې درېغه او بې ساري ډول د افغان کډوالو د اېستنې په درشل کې د ځینو کارخونو مالکین د افغانانو د حقوقو او همداراز د هغو کورونو مالکین چې خپل کورونه یې افغانانو ته په ګرو ورکړي، د ګروي پیسو له ورکړې ډډه کوي.

که څه هم د امریکا د قانون له مخې، په دغه هېواد کې زېږېدلي ماشومان د امریکا تبعه ګڼل کېږي، خو یوه فدرالي قاضي د ټرمپ له ادارې پوښتنه کړې چې که د تابعیت د محدودولو فرمان عملي شي، نو ایا هغه نوي زېږېدلي ماشومان به هم له هېواده وشړل شي چې د هغوی مور او پلار قانوني اسناد نه لري؟

د طالبانو د اوبو او انرژۍ وزارت وايي، د هلمند په سنګین ولسوالۍ کې د نهر سراج کانال به د څه باندې ۲۷۵ اعشاریه ۸۸ میلیونه افغانیو په لګښت جوړ شي.

د سوریې د بهرنیو چارو وزیر اسعد الشیباني وایي، چې د امریکا د ولسمشر ډونالډ ټرمپ له خوا د سوریې پروړاندې د بندیزونو لرې کول به د دې هېواد لپاره د بیارغونې او پرمختګ دروازې پرانیزي. د نوموړي په وینا: «موږ له ډېرې مودې راهیسې دې فرصت ته په تمه و.»

هایفن کلتوري وېبپاڼه وایي، چې د طالبانو له بیا واک ته رسېدو نږدې څلور کاله تېرېږي، خو لا هم زرګونه افغان مېرمنې له تعلیم، کار او ازاد ژوند څخه محرومې پاتې دي. اروپایي ټولنې ژمنه کړې وه، چې له افغان مېرمنو به ملاتړ کوي، خو تر ډېره یې دغو ژمنو ته عملي بڼه نه ده ورکړې.

د کییف انډپېنډنټ وېب پاڼه په یوه راپور کې وایي، چې د منځني ختیځ لپاره د روسیې تر ټولو نږدې متحد ایران په دې وروستیو کې له درنو ګوزارونو سره مخ شوی، خو دا ګوزارونه هله سخت شول کله چې اسراییل د دې هېواد پراخه نیابتي شبکه له منځه یوړه او بیا‌یې مستقیماً پر ایران بریدونه وکړل.

د جي۷ ډلې د هېوادونو د بهرنیو چارو وزیرانو په یوه ګډه اعلامیه کې د اسراییل او ایران ترمنځ له اوربند څخه ملاتړ کړی او غوښتنه یې کړې، چې د ایران د اټومي پروګرام په اړه د یوې موافقې لپاره خبرې بېرته پیل شي.

د کډوالو نړۍوال سازمان یا (ای او اېم) وايي، له ایرانه د بې اسناده افغانانو بې سارې راستنېدنه روانه ده او د روان کال یوازې په جون میاشت کې څه باندې ۲۵۶ زره افغان کډوال بېرته هېواد ته راستانه شوي او دغه شمېر په یوه میاشت کې ریکارډ جوړ کړی دی.

د طالبانو د امربالمعروف او نهې عن المنکر وزارت ویاند سیف السلام خېبر پر خپلې اېکس پاڼې لیکلي چې، یادې ډلې دوه کسان "مسیحیت" او "الحاد" ته د خلکو د وربللو په تور نیولي دي.

د تېر جمهوري حکومت د دفاع سرپرست وزیر شاه محمود میاخېل ویلي، چې ایران د افغانستان د ورانۍ او بې‌ثباتۍ په برخه کې له پاکستانه هم زیات رول لوبولی او د افغان جګړې له امله یې سترې نظامي او اقتصادي ګټې ترلاسه کړې دي.

سپینې ماڼۍ اعلان کړی، چې ولسمشر ډونالډ ټرمپ به د دوشنبې په ورځ د سوریې پروړاندې د امریکا د بندیزونو د لرې کولو په اړه یو اجراییوي فرمان لاسلیک کړي.

د ملګرو ملتونو د کډوالو ادارې د دوشنبې په ورځ راپور ورکړی، چې د ۲۰۲۵ کال په جون کې له ایران څخه شاوخوا ۲۳۳ زره افغان کډوال اېستل شوي، چې زیاتره په جبري ډول بېرته لېږل شوي، ځکه تهران د بې اسنادو افغانانو لپاره د وتلو وروستۍ نېټه د جولای شپږمه ټاکلې.

د طالبانو ځايي چارواکو ویلي، چې تېر ماښام په لوګر ولایت کې د سېلابونو له امله لږ تر لږه ۳ تنه مړه شوي، ۲۵۰ کورونه ویجاړ شوي او زرګونه جریبه کرنیزه ځمکه له منځه تللې ده.

په تېر جمهوري نظام کې د ننګرهار والي ضیاءالحق امرخېل وایي، چې په دې وروستیو ورځو کې له ایران څخه د زرګونو افغانانو جبري اېستل، نه یوازې یو بشري ناورین دی، بلکې د یوه ټپي ملت پر ټپونو د چاقو وارونه دي.

د ایران د بهرنیو چارو وزارت پخواني لوړپوړي چارواکي سېد رسول موسوي ویلي، چې په ایران کې د افغانانو لپاره باید د «کډوال» کلمه ونه کارول شي، ځکه ایران د کډوالو د منلو هېواد نه دی او د هغوی د منلو لپاره کوم رسمي قانون هم نه لري.

د سره صلیب او هلال احمر نړۍوال فډراسیون د افغانستان او ایران ترمنځ د پراخې راستنېدنې له امله د نړۍوالې ټولنې د بېړني او پراخ ملاتړ غوښتنه کړې ده. دغه فډراسیون په یوې اعلامیه کې خبرداری ورکړی، چې زرګونه افغانان د کور، کار او اساسي خدماتو له نشتوالي سره بېرته هېواد ته ستنېږي.

د افغانستان لپاره د پاکستان ځانګړي استازي محمد صادق خان د چین او روسیې له ځانګړو استازو سره په دوحه کې لیدلي او د افغانستان د وضعیت او سیمه‌ییزو همکاریو پر پراخولو یې بحثونه کړي دي.

په کونړ کې ځايي سرچینو افغانستان انټرنشنل ته وویل چې د یاد لايت لپاره د داعش خراسان ډلې والي قاري ابوبکر او د هغه ساتونکی له طالبانو سره په یوه نښته کې وژل شوي دي. د ترلاسه شویو معلوماتو له مخې، دا پېښه تېره ورځ د کونړ ولایت په کوړنګل دره کې شوې ده.

د امریکا متحده ایالاتو فدرالي ادارو خبرداری ورکړی چې له ایران‌ سره تړلې سایبري ډلې او هېکران ممکن د امریکا پر شرکتونو، دفاعي برخو او حیاتي زیربناوو، په ځانګړې توګه هغو ادارو، چې له اسراییل سره اړیکې لري، بریدونه وکړي.

هند د لوړ ظرفیته توغندیو یوه نوې لړۍ جوړوي چې د ژورو او کانکریټي پټنځایونو د ویجاړولو وړتیاوې ولري. انډیا ټایمز وايي، د هند د دفاعي څېړنو او پراختیا اداره پر دې کار کوي چې د اګني ۵ بالستیک توغندي یوه نوې بڼه جوړه کړي اوتر پیاوړو دفاعي خنډونو لاندې ودانیو کې نفوذ وکړای شي.