د جرمني د زرغون ګوند مشر فلیکس باناژاک د افغان پناه غوښتونکو او د جرمني د پخوانیو همکارانو په اړه د اسلاماباد او برلین چلند د شرم وړ بللی دی. هغه ویلي، چې د جرمني حکومت باید له پاکستان سره د تړونونو له لارې دا هېواد قانع کړي چې د افغانانو د اېستلو بهیر ودروي.
د ملګرو ملتونو امنیت شورا کې د روسیې استازي خبرداری ورکړ، چې پر قطر د اسراییل برید به د غزې پر وضعیت او د ټولې منځنۍ ختیځ د سیمې پر امنیت جدي پایلې ولري.
د ایران د اسلامي شورا مجلس استازي مجتبی زارعي د اېکس خواله رسنۍ له لارې د قطر امیر ته په پیغام کې وړاندیز کړی، چې د خپل هېواد د دفاع لپاره یې د ایران د سپاه پاسدارانو له ځواک څخه مرسته وغواړي.
د ملګرو ملتونو امنیت شورا کې د امریکا استازې وویل، په قطر کې د حماس پر مشرانو د اسراییل برید د دغه هېواد په ګټه نه دی او نه شي کولی د اسراییل ګټې د غزې په جګړه کې پر مخ یوسي.
د ملګرو ملتونو امنیت شورا د قطر پر پلازمېنې دوحې د اسراییل وروستي بریدونه په کلکه وغندل، خو په ګډه اعلامیه کې یې د برید کوونکي هېواد نوم وانخیست. دغه پرېکړه د شورا ټولو ۱۵غړو چې امریکا هم پکې شامله ده، په اجماع تصویب کړه.
د افغانستان د ملي امنیت پخواني مشر احمد ضیا سراج خبرداری ورکړی، چې د ترهګرو ډلو شتون یوازې د افغانستان تر پولو پورې محدود نه دی، بلکې ډېر ژر به نورو هېوادونو ته هم خپور شي. نوموړي وویل، هېوادونه به د افغانستان د سقوط بیه په خپله ورکړي.
د اسراییل لومړي وزیر بنیامین نتنیاهو ویلي، هېواد به یې له خپلو ټاکل شویو موخو په شا نه شي او په پیاوړې توګه به خپلې لارې ته دوام ورکړي.
اسراییلي رسنیو راپو ورکړی، چې ترکي هکرانو د دغه هېواد د دفاع وزیر یسراییل کاټز د ټلیفون شمېره موندلې او له هغه سره یې د ویډیويي تماس هڅه کړې ده. د راپورونو له مخې، کاټز دغه اړیکه په تېروتنې سره ځواب کړې او څو شېبو کې یې بېرته پرې کړې ده.
د طالبانو د استخباراتو مشر عبدالحق وثیق ادعا کوي، چې د داعش ډلې مرکزونه د افغانستان دننه نه، بلکې د هېواد له پولو بهر دي او ځینې هېوادونه د دې ډلې جنګیالي د افغانستان د ناامنه کولو لپاره را لېږي.
په لندن کې د برونل پوهنتون په کوربهتوب په افغانستان کې د جمهوري نظام د نسکورېدو او د طالبانو د بیا واکمنۍ د اغېزو په اړه یو علمي-څېړنیز کنفرانس جوړ شو، چې پوهانو، سیاستوالو او د مدني ټولنې فعالانو پکې ګډون کړی وو.
د کډوالو په چارو کې د ملګرو ملتونو عالي کمېشنرۍ «یو اېن اېچ سي ار» اعلان کړی، چې د طالبانو د بندیزونو له امله یې په افغانستان کې د نغدي مرستو مرکزونه د لنډمهال لپاره تړلي دي.
د افغانستان پخواني ولسمشر ډاکټر محمد اشرف غني د خپلو پوډکاسټونو په لړۍ کې د هېواد د وروستیو څلوېښتو کلونو د جګړو، اقتصادي ګډوډۍ او د نړۍوالو اړیکو د سیاست په اړه پراخې خبرې کړې دي. نوموړي ټینګار کړی، د قاچاق، فساد او زورواکو واکمني د دولتونو د بنسټونو د کمزورۍ اساسي لاملونه وو.
د کډوالۍ نړۍوال سازمان «ای او اېم» له نړۍوالو مرسته کوونکو څخه غوښتي، چې د افغانستان په ختیځ کې د وروستۍ زلزلې له امله زیانمنو شویو لسګونه زره کورنیو سره د مرستې لپاره بېړني مالي امکانات برابر کړي.
د افغانستان لپاره د ملګرو ملتونو سیاسي استازولۍ (یوناما) ددغه سازمان پر ښځینه کارکوونکو د طالبانو د بندیزونو لرې کولو غوښتنه کړې ده او وايي، دا بندیزونه له طالبانو سره د هوکړو خلاف دي.
د امریکا لپاره د بریتانیا سفیر پیټر منډلس د پنجشنبې په ورځ د بریتانیا د لومړي وزیر کیر سټارمر له خوا له دندې ګوښه شو. دا ګام وروسته له هغه واخیستل شو چې په جنسي جرمونو تورن جیفري اپسټین سره د منډلس د اړیکو په اړه ګڼ ایمیلونه او لیکونه افشا شول.
د طالبانو د بلخ والي محمد یوسف وفا نن د افغانستان لپاره د ایران له سفیر علیرضا بیګدلي سره په مزارشریف کې لیدلي. د بلخ د مقام دفتر ویلي، چې دواړو لوریو د برېښنا او ټرانزیټ، کانونو، صنعت او د کرنیزو محصولاتو لپاره د بازارموندنې په تړاو پر همکاریو خبرې کړې دي.
د طالبانو د بهرنیو چارو وزیر امیرخان متقي په کابل کې د بهرنیو هېوادونو او نړیوالو سازمانونو له استازو سره د غونډې پرمهال ویلي، چې د وروستۍ زلزلې د ژغورنې چارو په عملیاتو کې د الوتکو رول مهم و او هغه الوتکې چې څلور کاله وړاندې تښتول شوې دې بېرته دې افغانانو ته وسپارل شي.
د ماشومانو د خوندیتوب سازمان ویلي، چې د افغانستان په ختیځ کې د وروستۍ زلزلې له امله نږدې ۲۱۰۰ کسان مړه شوي چې له نیمايي څخه ډېر یې ماشومان دي.
بېلاروس د امریکا د ولسمشر ډونالډ ټرمپ په غوښتنه ۵۲ بندیان خوشې کړل او د امریکا له مرکچي پلاوي سره لیتوانیا ته ولاړل. په ویلنیوس کې د امریکا سفارت ویلي، چې دا د بندیانو تر ټولو ستره ډله ده چې ولسمشر الکساندر لوکاشینکو یې بښي.
د روسیې له خوا د پولنډ د هوايي حریم له نقض کولو وروسته د اوکراین ولسمشر ولادیمیر زیلینسکي له خپلو متحدینو غوښتنه کړې، چې د خپلو هوايي دفاعي وړتیاوو ارزونه دې له سره وکړي.
د افغانستان په اړه د شانګهای همکارۍ سازمان د غړو هېوادونو مشورتي ناسته د پنجشنبې په ورځ د تاجکستان په دوشنبه ښار کې جوړه شوه. په دې دوه ورځنۍ ناسته کې د افغانستان پر اوسني وضعیت او پر سیمې یې د اغیزو په اړه خبرې کیږي.