سرچینې وايي، د طالبانو د استخباراتو غړی عبدالصبور سیرت، چې په سمنګان ولایت کې د یوه قومي مشر حاجي اکبر نیازي، په وژنه تورن شوی و، له شاوخوا شپږ میاشتني بند وروسته له زندان څخه خوشې شوی دی.
د محمد محقق په مشرۍ اسلامي وحدت ګوند د شیعه مذهبو د فرهنګي مرکزونو د تړلو او پر شیعه مشرانو د طالبانو وروستي فشارونه «غیرقانوني او تبعیضي» بللي دي. دغه ګوند په یوه اعلامیه کې ویلي چې د طالبانو دا اقدامات د هغه څه نښه ده چې دوی یې د «استبدادي رژیم د بېوسۍ» په توګه یادوي.
په هېواد کې د ژبنیو اختلافونو د زیاتېدو په لړ کې یو شمېر افغان فرهنپالو د یوې اعلامیې په خپرولو سره له ټولو افغانانو غوښتي چې دغو «خوابدوونکو او ناعلمي شخړو» ته د پای ټکی کېږدي او په وینا یې تر دې زیات د افغانانو ملي یووالی زیانمن نهکړي.
د طالبانو د المپیک، بدني روزنې او سپورټ عمومي اداره وايي، په سوېللوېدیځ زون کې د سوک وهنې د دویم پړاو سیالۍ د غزني ولایت په کوربهتوب پیل شوې.
د بنګلهدېش د «المرکز الاسلامي» د روغتیايي ټیم له لوري د طالبانو تر کنټرول لاندې د افغاني سرې میاشتې په روغتون کې د شونډې او تالو چاود لرونکو ماشومانو د وړیا درملنې او جراحي عملیات پیل شول. د یاد مرکز مسوولینو ویلي، دا ۴م ځل دی چې د دغه ډول عملیاتو ترسره کولو لپاره کابل ته راځي.
په کابل کې د پاکستان سفارت د سپټمبر ۶مه، له هند سره ۶۱ کاله پخوا په جګړه د وژل شویو سرتېرو په یاد کې د «پاکستان دفاع» په نوم ورځ ونمانځله. په داسې حال کې چې له یوه کال راهیسې په کابل او د ډیورند کرښې په اوږدو کې د پاکستاني ځواکونو په بریدونو کې سلګونه بېګناه افغانان وژل شوي دي.
د پاکستان د جمعیت علمای اسلام ګوند مشر مولانا فضل الرحمان په خیبر پښتونخوا کې د امنیتي وضعیت په اړه اندېښنه څرګنده کړې او ویلي یې دي چې په دغه ایالت کې عملاً حکومت نشته او د باج اخیستنې ترڅنګ د ناامنۍ پېښې هم زیاتې شوې دي.
د طالبانو د کلیو او پراختیا وزارت وایي، د ټولنیز ملاتړ او معیشت پروګرام په همغږۍ یې د هېواد په ۲۳ ولایتونو کې د ۸۷ ميليونه ډالرو په لګښت ګڼې پروژې پيل او په دې سره به زرګونه کسانو ته د کار زمینه برابره شي. بل لورته نړیوال بانک وايي، نږدې له هر څلورو افغانانو څخه یو یې بېکاره دی.
د ملګرو ملتونو د کډوالو عالي کمېشنرۍ وايي، هغه کسان چې په جبري ډول بېځایه شوي، د ګڼو ستونزو له زغملو سره سره هره ورځ د خپل ژوند د ښه کولو لپاره هڅې کوي. دغه نړیوالې ادارې زیاته کړې چې دا خلک نړیوال ملاتړ ته اړتیا لري.
د اسراییل لومړي وزیر بنیامین نتنیاهو د کابینې په غونډه کې ادعا کړې چې د ایران حکومت «د پای ته رسېدو په درشل کې دی، کمزوری شوی، د خپل بقا لپاره مبارزه کوي او د ړنګېدو په حال کې دی».
د افغانستان د خبریالانو مرکز د «راه فردا» ټلویزیون تړل او د امتیاز د څښتن نیول یې په کلکه غندلي. طالبانو نن (یکشنبه د وږي ۱۵مه) په کابل کې د «راه فردا» ټلویزیون دفتر وتاړه او د سرچینو په وینا، د همدې دفتر ترڅنګ د اهل تشیع د عامه اړیکو د دفتر یو شمېر غړي یې هم نیولي دي.
د پښتون ژغورنې غورځنګ مشر منظور پشتین د مریم نواز د وروستیو څرګندونو په غبرګون کې ویلي، د هغې ستونزه له هند سره نه، بلکې له «محکومو ایالتونو» سره ده. هغه پوښتنه کړې چې په پښتونخوا او بلوچستان کې د ولس پر ضد بمبارۍ، ډرون بریدونه او لادرکۍ د هند کار دي که د پنجاب د جنرالانو.؟
ملګري ملتونه وایي، هره ښځه او نجلۍ حق لري چې په هر ځای کې د خوندیتوب احساس وکړي او حکومتونه باید د جنسیت پر بنسټ د تاوتریخوالي د مخنیوي لپاره جدي اقدامات وکړي. د ملګرو ملتونو دا څرګندونې په داسې حال کې دي چې افغانې ښځې او نجونه د طالبانو له لوري د پراخو محدودیتونو سره مخ دي.
د هېواد د ختیځو ولایتونو یو شمېر اوسېدونکي افغانستان انټرنشنل- پښتو ته وايي، له څه مودې راهیسې په وقفهيي ډول د ننګرهار او کونړ ولایتونو پر فضا د ګاونډي هېواد جېټ الوتکې ګزمې کوي. له دې سره سم طالبان بیا د هېواد له سرحدونو ساتنه «فرض» بولي.
د طالبانو تر واک لاندې اریانا افغان هوايي شرکت ځینو رپوټونو ته په غبرګون کې ویلي، چې په کابل کې له ځغل لیکې د الوتکې د وتلو او له راداره د الوتکې د ورکېدو ادعاوې بېبنسټه دي.
نامتو سندغاړې ښاپیرۍ نغمې د عایشه وهاب د ملاتړ په غونډه کې پر طالبانو غږ کړی چې د افغان نجونو پر مخ دې ښوونځي پرانیزي. نوموړې له عایشه وهاب څخه غوښتنه کړې چې د امریکا پر هر دریځ دې د افغان ښځو او نجونو د حقونو غږ پورته کړي.
د افغانستان پخواني ولسمشر حامد کرزي د امریکا کانګرس ته د افغانالاصلې عایشه وهاب د ټاکل کېدو له امله مبارکي ویلې او دا یې د هغې د سخت کار، هڅو او مبارزو پایله بللې ده. کرزي په کالیفورنیا کې د عایشه وهاب په ویاړ غونډې ته په ویډیو پیغام کې بهرمیشتي افغانان زده کړو او کار ته وهڅول.
د طالبانو د خوست مرستیال والي محبوب شاه قانت وايي، څوک چې په خپل هېواد کې ژوند کوي، باید راکړه ورکړه په خپلو ملي اسعارو وکړي. هغه ټینګار کړی چې د افغانۍ کارول د نظام اطاعت دی او اطاعت د نظام اساس دی.
ایراني چارواکو ۲۹ کلن معلول افغان زنداني ولی جان نورزی د کرمان ولایت په رفسنجان مرکزي زندان کې په داسې حال کې اعدام کړی، چې په ویلچیر کې ناست و. هغه د قتل په قضیه کېد ښکیلتیا له امله په اعدام محکوم شوی و.
د طالبانو لوړو زدهکړو وزارت د کابل پولي تخنیک پوهنتون په اډانه کې د هوافضا او پرمختللو سیستمونو د انجنیري پوهنځی اعلان کړ، چې اویونیک انجنیري، هوايي رادار او د ډرون پروګرامونه پکې شامل دي. وزارت ۲۴ نوي پوهنځي اعلان کړي او د شته پوهنځیو په اډانه کې یې ۲۹ څانګې اضافه کړې دي.
د طالبانو د ریاست الوزرا د دفتر رییس د یوناما د سیاسي برخې له مشر سکاټ سمېټ سره په لیدنه کې له یوناما غوښتي، چې د افغانستان موجود واقعیتونه په «ښه ډول» منعکس کړي او اړو افغانانو ته مرسته رسول په لومړیتوبونو کې راولي.