د نړۍ ۱۴ لوړو څوکو ته د ختلي ریکارډ لرونکی نیپالی غرختونکی نیرمل پورجا په ګډون په پاکستان کې د واورې ښویېدنې په پېښه کې ۹ غرغتونکي مړ شوي دي. په مړوشویو کې شپږ نیپالیان او نور د پاکستان، عمان، امریکا او چین اوسېدونکي وو.
تحریک طالبان پاکستان ادعا کړې چې د جولای په میاشت کې یې په ټول پاکستان کې ۳۱۵ وسله وال بریدونه کړي دي. د دغې ډلې په وینا، په دغو بریدونو کې تر ۳۰۰ ډېر پاکستاني امنیتي سرتېري وژل شوي دي.
پاکستاني پوځ ویلي، چې په شمالي وزیرستان کې د استخباراتي عملیاتو پر مهال د دوی یو لوړپوړی پوځي افسر وژل شوی. د وژل شوي پوځي نوم جګړن احسان الهی او د میانوالې اوسېدونکی ښودل شوی.
د جنرال سمیع سادات په مشرۍ د افغانستان متحدې جبهې په یوه اعلامیه کې د طالبانو پر ضد د نظامي عملیاتو د پیلولو اعلان وکړ. دغه جبهه وایي، د طالبانو هغه مشران به یې اصلي هدف وي چې پر پخوانیو ځواکونو او ښځو یې ظلمونه کړي. جبهې ځان د هېواد د اساسي قانون او ملي بیرغ وارث بللی.
د هند لومړی وزیر نریندرا مودي وايي، هغه محصلان به وبښي، چې د تېرې میاشتې په اعتراضونو کې یې په ده پسې سپکې خبرې کړې وې، ځکه دده په وینا، د هغوی مجازات کول او پرلهپسې محکمې ته کشول د ستونزې د حل لاره نه ده.
د پاکستان د جګړې او امنیتي مطالعاتو انسټیټیوټ (پکس) په خپل نوي راپور کې ویلي چې د چنګاښ په میاشت کې په دغه هېواد کې د بریدونو او پوځي عملیاتو له امله ۶۰۶ کسان وژل شوي او ۲۳۲ نور ټپیان شوي دي. راپور وايي، په دې میاشت کې لږ تر لږه ۱۱۲ پاکستاني سرتېري او ۴۰۱ وسلهوال وژل شوي.
د ایران د ولسمشر د لومړي مرستیال په مشرۍ ددغه هېواد د ملي دهلېزونو د کمېټې په غونډه کې د ختیځ ـ لویدیځ دهلېز د سند عمومي طرحه، چې د هرات ـ مزارشریف د اوسپنې پټلۍ پروژې په محوریت ولاړه ده، تصویب شوې ده.
په افغانستان کې د ملګرو ملتونو پراختیایي اداره یا یو این ډي پي وایي، چې ۷۵ سلنه افغانې کورنۍ د خوړو، سرپناه او روغتیايي خدمتونو په ګډون د خپلو لومړنیو اړتیاوو په پوره کولو کې پاتې راغلې دي. دغه سازمان د افغانانو اقتصادي وضعیت خورا نازک بللی.
د هند د ګوا ایالت په مندرم سیمه کې پولیسو دوه افغانان له معتبرې ویزې او سفري اسنادو پرته په دغه هېواد کې د اوسېدو په تور، نیولي دي.
د هند د بهرنیو چارو وزارت ویلي، چې د چابهار بندر پروژې لپاره د امریکا له بندیزونو مشروط معافیت د اپرېل په ۲۶مه پای ته رسېدلی او نوی ډیلی د بندیزونو د اغیزو د ارزونې لپاره له اړوندو لوریو سره په خبرو بوخت دی.
ناپېژاندو وسلهوالو د شنبې په غرمه د بدخشان د مرکز فیضاباد ښار په نوي ښار کې د طالبانو د استخباراتو پر ریاست ډزې وکړې. له فیضاباد څخه سرچینو وویل چې ډزې داسې مهال وشوې چې د استخباراتو په ریاست کې له کابل څخه د ورغلي پلاوي په حضور کې غونډه روانه وه.
د طالبانو د قومونو، قبایلو او سرحدونو چارو وزیر وايي، اوس د جګړو وخت پای ته رسېدلی او د هيواد د ابادۍ او پرمختګ پړاو پیل شوی. نورالله نوري ادعا کړې، چې طالبانو د داود خان د وخت پروژې، چې د ده په وینا، د « ویرې او غلامۍ» له امله نورو حکومتونو پلې نه کړای شوې، پیل کړې دي.
د تمدن خصوصي ټلوېزیون مسوول مدیر محمد رحمتي او د دې شبکې کارکوونکی محمدرضا احساني له زندان نه خوشې شول. دا دوه خبریالان د چنګاښ په لومړیو کې د طالبانو د عدلیې وزیر عبدالحکیم شرعي په امر نیول شوي وو.
ازادۍ جبهې خبر ورکړی، چې د بدخشان زیباک ولسوالۍ ته په غځېدلې لاره کې یې «د طالبانو بهرنیو ملاتړو وسله والو» ته کمین نیولی او برید یې پرې کړی. یادې جبهې ادعا کړې چې په دغه برید کې لږ تر لږه دوه بهرني جنګیالي وژل شوي او درې نور ټپیان دي.
د پخواني حکومت د اردو د جنرال سمیع سادات په مشرۍ د متحدې جبهې سرچینو افغانستان انټرنشنل ته وویل، چې دې جبهې له کندهاره وسله وال فعالیتونه پیل کړي دي. متحدې جبهې په یوه ویډیو کې ادعا کړې، چې د زمري پر ۸مه یې د کندهار - سپین بولدک ترمنځ پر طالبانو برید کړی.
د طالبانو اړوند له «افغان شخصیتونو سره د اړیکو کمیسیون» ویلي، چې د پخواني حکومت د ملي امنیت د حفظ او مراقبت مرستیال او په ولسي جرګه کې د بلخ یو پخوانی وکیل د دغه کمیسیون له لارې افغانستان ته ستانه شوي دي.
د بلوچستان د کوټې ښار شمال ختیځ ته د سورینج په سیمه کې د جولای په ۳۰مه د سکرو په یوه کان کې د مېتن ګاز د راټولېدو له امله ۳۴ کانکیندونکي ووژل شول. دغه کارکوونکي ټول د خیبر پښتونخوا اوسېدونکي وو.
د طالبانو تر واک لاندې د اوبو رسولو او ښاري فاضل اب دولتي شرکت وایي، په تېرو نږدې پنځو کلونو کې یې د هېواد په بېلابېلو سیمو کې د اوبو رسولو شبکو د پراختیا او د بېلابېلو پروژو د پلي کېدو له لارې څه باندې ۶۵۰ زره کسانو ته د څښاک پاکو اوبو د لاسرسي زمینه برابره کړې ده.
له پاکستانه د افغان کډوالو د ستنېدو له بهیر سره هممهاله، افغان محصلین وايي چې د قانوني او مالي ستونزو له امله یې زدهکړې او راتلونکی له خطر سره مخ دي. افغان ښځينه زده کړیالانې هم اندېښنه لري چې ښايي خپلې زدهکړې بشپړې نه کړای شي.
له بدخشان نه سرچینو افغانستان انټرنشل ته ویلي چې د دغه ولایت د زیباک ولسوالۍ په سنګلېچ کلي کې د طالبانو او د هغوی د مخالفو وسلهوالو ترمنځ نښتې له سره پیل شوې دي. په هغه ویډیو ګانو کې چې افغانستان انټرنشل ته رسیدلي د زیباک ولسوالۍ په فضا کې چورلکه لیدل کېږي.
د خیبر پښتونخوا سویلي وزیرستان په برمل تحصیل کې د جمعیت علمای اسلام ګوند اړوند دیني عالم مولانا محمد اسماعیل د نامعلومو وسلهوالو په ډزو وژل شوی دی.