د طالبانو د امر بالمعروف وزیر د سویل ختیځو ولایتونو له دیني عالمانو او قومي مشرانو سره په لیدنه کې ویلي، چې د یادې ډلې د مبارزې هدف د بشپړ او مطلق شریعت پلي کول دي. نوموړي ټینګار کړی، تر څو چې په ټوله جغرافيه کې دین په بشپړ ډول حاکم نه شي، ټول به د خدای پر وړاندې مسوول وي.
د طالبانو د کورنیو چارو وزارت وايي، چې په پنځو ولایتونو کې یې د نشهيي توکو د قاچاق او پلور په تور ۳۲ کسان نیولي ديي. دغه کسان په کندهار، ننګرهار، کندوز، لغمان او پنجشېر ولایتونو کې نیول شوي دي.
طالبانو په افغانستان کې بند پاتې پاکستاني محصلانو ته د تورخم له لارې خپل هېواد ته د ستنېدو اجازه ورکړي ده. پاکستاني محصلانو ویلي، چې طالبانو تېره شپه ۶۸ تنو ته اجازه ورکړه، څو د تورخم له لارې خپل هېواد ته داخل شي.
د ملګرو ملتونو د بشري چارو د همغږۍ دفتر (اوچا) په روان میلادي کال کې د افغانستان د وګړو شمېر ۴۸،۶ میلیونه اټکل کړی. دا کچه د طالبانو د ادارې او پخوانیو اټکلونو څخه لوړه ده.
په بدخشان کې د طالبانو والي محمد اسماعیل غزنوي د دغه ولایت د ناراضه سیمه ییز قومندان جمعهخان فاتح رول کمارزښته بللی او ویلي یې دي چې په بدخشان کې وروستي مخالفتونه یو «بېخي عادي» مسله وه او اوس په بشپړ ډول هواره شوې ده.
په ننګرهار کې د ځینو کارخونو مسولینو افغانستان انټرنشنل ته وویل، چې د ننګرهار برېښنا شرکت ریاست د برېښنا د نه پرې کولو په تړاو د خپل مشر هبتالله شفاهي هدایت نه مني او پر فابریکو برېښنا پرې کوي. د دوی په وینا، د دغې ادارې مسوولین د بډو اخیستلو او شخصي ګټو لپاره دا کار کوي.
افغانې سوداګرې چې له افغانستانه تر وتلو وروسته په امریکا کې مېشته شوي، د سانتافې په نړیوال لاسي هنرونو بازار کې د افغاني ښځینه هنرمندانو د لاسي صنایعو په نندارې او پلورلو سره هڅه کوي چې د هغوی د عاید او اقتصادي ملاتړ زمینه برابره کړي.
د پاکستان په بېلابېلو سیمو کې د بې اسنادو افغان کډوالو پر ضد د عملیاتو له دوام سره هممهاله، د بلوچستان د مرکز کوټې چارواکي وایي چې د روانو اعتراضونو او امنیتي وضعیت له امله تر اوسه په ښار کې د افغان کډوالو پر ضد منظم عملیات نه دي پیل شوي.
د ملګرو ملتونو د کډوالو عالي کمېشنرۍ د افغان کډوالو د جبري ایستلو په اړه د اندېښنې له څرګندولو سره هممهاله، د پاکستان له حکومت غوښتي چې هغه افغانان دې جبري نه ستنوي چې په افغانستان کې یې ژوند له ګواښ سره مخ دی.
د طالبانو د کرنې، اوبو لګولو او مالدارۍ وزیر عطاالله عمري، هند ته د خپل رسمي سفر په دوام، د «افغانستان او هند د سوداګریزو فرصتونو» په نوم تعاملي غونډه کې د افغانستان او هند ترمنځ د کرنې په برخه کې د سوداګریزو او اقتصادي همکاریو پر پراختیا ټینګار کړی.
طالب ناراضه چارواکی، جمعهخان فاتح له طالبانو سره د وفادارۍ تر بیا اعلان وروسته د هوایي ځواک په چورلکه کې خپلې اصلي سیمې، درواز، ته ستون شوی. د طالبانو د بدخشان والي ویلي، فاتح به د طالبانو له حکومت سره خپل ملاتړ ته دوام ورکړي.
د اوکراین ولسمشر ولادیمیر زیلنسکي ویلي، روسیې تېره شپه پر اوکراین له ۱۲۰ څخه د ډېرو بېپیلوټه الوتکو او ۱۲ توغندیو بریدونه کړي، چې له امله یې په پلازمېنه کییف کې د یوه ماشوم په ګډون ۱۱ تنه ټپیان شوي دي. نوموړي له ناټو د هغو ژمنه شویو دفاعي مرستو د چټک عملي کېدو غوښتنه هم کړې ده.
د طالبانو امر بالمعروف وزیر مولوي خالد حنفي د ښځو د حقونو په اړه د نیوکو په ځواب کې ویلي، هغه کسان چې د ښځو د حقونو خبره کوي، باید په بګرام کې د ښځو د زنداني کېدو موضوع هم یاده کړي. نوموړي همداراز ادعا کړې چې په تېرو شلو کلونو کې د دیني ارزښتونو د کمزوري کولو هڅې شوې دي.
د پاکستان سترې محکمې د یوه دولتي ښوونځي پر مشرې شازیه اقبال لګېدلې جزا چې نږدې دوه نیم کاله وړاندې ورته ټاکل شوې وه یو ځل بیا تایید کړې. نوموړې تورنه وه چې د خپل ښونځي د ښځینه ښوونکو د جنسي ځورونې مخنیوي په برخه کې یې پاملرنه نه وه کړې.
د روغتیا نړیوال سازمان د ختیځې سیمې مشرې ډاکټر حنان بلخي، افغانستان ته د خپل سفر په پای کې ویلي، افغانستان لا هم د نړۍ له هغو دوو هېوادونو څخه دی چې د ګوزڼ وحشي ویروس پکې شتون لري او د دې ناروغۍ د له منځه وړلو لپاره دوامداره نړیوال ملاتړ اړین دی.
شمالي کوریا د ناټو د وروستۍ سرمشریزې پرېکړه غندلې او ویلي یې دي چې د نړیوال اټومي بېوسلې کېدو لپاره باید لومړی امریکا او د هغې متحدان خپلې وسلې او پوځي پراختیاوې محدودې کړي.
د پاکستان د بشري حقونو کمېسیون په یوه تازه راپور کې ویلي، د خیبر ولسوالۍ د تیرا درې د اوسېدونکو جبري بېځایه کېدو پراخ بشري ناورین رامنځته کړی، چې پکې د ملکي وګړو مرګژوبله، د خلکو د عاید له منځه تګ، د مرستو ځنډ او د بېځایه کېدو د پرېکړې په اړه ګډوډي شامله ده.
هلمند کې د طالبانو امنیې قوماندانۍ خبر ورکړی چې د هرات- کندهار په لویه لار د دوو موټرو د ټکر له امله ۵تنه مړه شوي او ۱۶نور ټپیان دي.
پېښور کې سوداګر وایي، د ډیورنډ کرښې د نهه میاشتو د تړل کېدو له امله، د افغانستان او پاکستان سوداګرو ته درانه مالي زیانونه اوښتي او زرګونه کسان بېکاره شوي دي. د رېپورټونو له مخې په دې موده کې دواړه خواو سوداګرو ۱،۵۱ ملیارده ډالر تاوان کړی.
د کډوالۍ نړیوال سازمان په خپل تازه راپور کې ویلي، د ۲۰۲۶ کال د جون له ۲۲مې څخه د جولای تر ۶مې پورې له ایران او پاکستان څخه افغانستان ته د راستنېدونکو کډوالو شمېر د تېرې دورې په پرتله د پام وړ کم شوی دی.
د نیشنل انټرسټ یو تازه تحلیلي راپور کې راغلي چې، د افغانستان او پاکستان ترمنځ روان کړکېچ د منځنۍ اسیا هېوادونه اندېښمن کړي، ځکه د جګړې دوام کولی شي د سیمې د سوداګرۍ، انرژۍ او ترانزیټ مهمې پروژې له خنډ سره مخ کړي.