د طالبانو تر واک لاندې اریانا افغان هوايي شرکت ویلي، د ۱۴۰۵ لمریز کال د افغان حاجیانو د لېږد او بېرته راستنېدو بهیر په بشپړ ډول پای ته رسېدلی دی. دغه شرکت د سېشنبې په ورځ په یوه خبرپاڼه کې ویلي، سږکال یې د ۵۴ الوتنو له لارې ۶ زره او ۲۱۰ افغان حاجیان سعودي عربستان ته لېږدولي.
افغانستان انټرنشنل ته د رسېدلي مکتوب له مخې، د طالبانو رییسالوزرا په بدخشان کې د امنیت د ټینګښت لپاره د دفاع وزارت او استخباراتو ګډه عملیاتي طرحه تایید کړې، چې د پلي کېدو لپاره پکې د ۵۰ میلیونه افغانیو بودجه غوښتل شوې ده.
د طالبانو د ټولګټو وزارت ویلي، د سالنګونو پر لویه لار د اساسي بیارغونې چارې روانې دي او د دغو چارو د چټکتیا او ښه ترسره کېدو لپاره به د چڼګاښ له ۱۹مې نېټې د سالنګونو لویه لار د درنو بار وړونکو (ټېلري) موټرو پر مخ تر بلې خبرتیا پورې وتړل شي.
د طالبانو د ریاستالوزراء اداري مرستیال، مولوي عبدالسلام حنفي، ویلي چې په افغانستان کې جګړو، د طبي تجهیزاتو کمښت او د مسلکي بشري ځواک نشتوالي د هېواد پر روغتیايي خدمتونو او د طبابت پر کیفیت منفي اغېز کړی دی.
د طالبانو د پنجشېر ولایت ویاند، سیفالدین لټون، ویلي چې د دغه ولایت له کانونو څخه استخراج شوي ۳۲۹۷ قیراطه زمرد د ۱۹۸ زره او ۳۷۰ امریکایي ډالرو په ارزښت پر کورنیو سوداګرو پلورل شوي دي.
د طالبانو د بهرنیو چارو وزارت ویلي، چې په کابل کې د قطر سفیر مردف القاشوطي او امیرخان متقي د دوه اړخیزو اړیکو پر پراختیا او د ګډو ګټو پر یوشمېر سیمهییزو موضوعاتو خبرې کړې دي. طالبانو له نړۍوالې ټولنې سره د اړیکو په پراختیا کې د قطر د رول او هڅو ستاینه کړې.
د تېر جمهوري نظام د ولسمشر لومړي مرستیال، امرالله صالح، ادعا کړې چې که په راتلونکې اوونۍ کې په پکتیا ولایت کې ټاکنې ترسره شي، له ۹۰ سلنې ډېر خلک به جمهوري نظام، د افغانستان اساسي قانون او ملي بیرغ ته رایه ورکړي.
د هلمند ولایت د موسیکلا ولسوالۍ ځینو قومي مشرانو افغانستان انټرنشنل ته ویلي، طالبان د کوکنارو د کښت د اړولو پر مهال د خلکو کورونو ته ننوځي. د دوی په وینا، طالبان په داسې وخت کې هم کورونو ته ننوځي چې په کورونو کې نارینه حضور نه لري او دا کړنه د خلکو له نیوکو سره مخ شوې ده.
د طالبانو د سرحدونو، قومونو او قبایلو چارو وزیر نورالله نوري په کابل کې د شیعه علماوو یوې غونډې ته د وینا پرمهال ویلي، چې د افغانستان امنیت او د هېواد له خاورې ساتنه د طالبانو له لومړیتوبونو دي. نوموړي ویلي، هیچا ته به اجازه ورنه کړل شي چې د افغانستان امنیت ګډوډ کړي.
نړۍوال بانک په یوه راپور کې ویلي، چې افغانستان په وروستیو میاشتو کې د وارداتو او ترانزیټ په برخه کې په زیاتېدونکي ډول پر ایران تکیه کړې. د یاد بانک په وینا؛ دغه وضعیت افغانستان د سیمهییزو سیاسي کړکېچونو، د پولو تړل کېدو او د لوجستیکي ستونزو پر وړاندې له پراخو ګواښونو سره مخ کوي.
د طالبانو د ټولګټو چارو وزارت خبر ورکړی، چې په تېرې غبرګولي میاشت کې د اوسپنې پټلۍ له لارې ۷۹۷زره او ۴۸۲ مټریک ټنه انتقالات شوي دي. د دغه وزارت په وینا؛ یاد انتقالات د حیرتان، اقينې، تورغونډۍ او خواف-هرات بندرونو له لارې شوي دي.
د طالبانو د کورنیو چارو وزارت د سېشنبې په ورځ ویلي، چې د بېلابېلو عملیاتو پرمهال یې په ۷ ولایتونو کې ۵۵ کسان د «نشهيي توکو د پلور، کارولو او قاچاق» په تړاو نیولي دي. دغه وزارت زیاته کړې، چې نیول شوي کسان تر لومړنیو څېړنو وروسته قضايي ادارو ته سپارل شوي دي.
د جون ۳۰مه د خواله رسنیو له نړۍوالې ورځې سره برابره ده. افغانستان یو له هغه هېوادونو دی، چې د طالبانو له بیا واکمنۍ وروسته د خواله رسنیو کاروونکي او فعالان پهکې له بېلابېلو محدودیتونو او ننګونو سره خپل فعالیتونه پر مخ وړي.
د طالبانو عدلیې وزارت خبر ورکړی، د دغه وزارت د انسجام عمومي ریاست د معاملاتو لارښوونې او عریضه لیکونکو چارو ریاست په غبرګولي میاشت کې د معاملاتو لارښوونې ۶۳ دفترونه څارلي چې په ترڅ کې یې ۱۹ دفترونه د ناقانونه فعالیتونو او یوشمېر سرغړونو له امله تړل شوي دي.
د بېپولې ډاکټرانو (MSF) سازمان ویلي، په افغانستان او په ځانګړې توګه سویلي ولایتونو کې د خوراځواکو ماشومانو شمېر په بېساري ډول مخ په لوړېدو دی. دغه سازمان ویلي، د همدغه زیاتوالي له کبله په افغانستان کې د خوړو خوندیتوب وضعیت مخ په خرابېدو دی.
په ۲۰۲۶کال کې په کندهار کې د خوارځواکو ماشومانو شمېر د اندېښنې وړ لوړ شوی. د کندهار د میرویس حوزوي روغتون یوه سرچینه وایي، چې د روان کال په تېرو درېیو میاشتو کې تر ۴زره ډېر په خوارځواکۍ اخته ماشومان ور وړل شوي چې له دې ډلې تر ۳۰ ډېر ماشومان مړه شوي دي.
د سرپل یو اوسېدونکي افغانستان انټرنشنل ته ویلي، د دغه ولایت ډېرې سیمې او خلک د اوبو له سخت کمښت سره مخ دي. نوموړي د اوبو کمښت لاملونه په ځينو سیمو کې په خپلسرې توګه د خلکو لهخوا د څاه ګانو کېندل، اوږدمهاله وچکالي، د بارانونو نشتوالی او له اوبو سره نه احتیاط یاد کړي.
یو کابل مېشتي افغانستان انټرنشنل ته په رالېږلي پیغام کې ویلي، چې د ودانۍ جوړولو جواز ترلاسه کولو لپاره یې له یو کال څخه زیات وخت په بېځایه هڅو او ستونزو کې تېر کړی؛ خو لا یې هم هڅې بېپایلې پاتې دي.
په جلاوطنۍ کې د افغانستان د خلکو عالي شورا پوځي کمېټې د پاکستان له حکومته غوښتي، چې د افغان کډوالو د جبري اېستلو لړۍ ودروي. یادې شورا ویلي، په دغه کډوالو کې پخواني پوځيان، خبریالان او مدني فعالان شامل دي چې افغانستان ته په ستنېدو سره د مرګ او شکنجې له ګواښ سره مخ کېږي.
د بلوچستان په مرکز کوټه کې د بلوڅ یووالي کمېټې د مشرې ماهرنګ بلوڅ او صبغتالله شاه بلوڅ ته د عمري بند سزا پر ضد د اعتراضونو پر دوام پولیسو د احتجاج پرمهال یوشمېر نور معترضان هم نیولي دي.
د کورنیو چارو وزارت یو متقاعد جنرال افغانستان انټرنشنل ته په لېږلي پیغام کې ویلي، چې پنځه کاله کېږي نه یې تنخوا اخیستې او نه یې تقاعد. د هغه په خبره، متقاعدین څو ځلې د طالبانو یاد وزارت ته ورغلي؛ خو هیڅ پایله یې نهده ترلاسه کړې.