د عراق د ټاکنو خپلواک کمېسیون د چهارشنبې په ورځ اعلان وکړ، چې د عراق د لومړي وزیر محمد شیاع السوداني په مشرۍ سیاسي اېتلاف د دغه هېواد په پارلماني ټاکنو کې ترټولو مخکښ دی. د کمېسیون په وینا؛ دغه اېتلاف له یو مېلیون او ۳۰۰زرو ډېرې رایې ترلاسه کړې دي.
د امریکا د بهرنیو چارو وزارت مرستیال ویاند وايي، د ایران د توغندیو او بېپیلوټه الوتکو د تدارکاتي شبکو پر ضد د امریکا نوي بندیزونه د ملګرو ملتونو د بندیزونو د پلي کولو په ملاتړ لګول شوي دي.
د ایران د بهرنیو چارو وزارت مرستیال کاظم غریب ابادي په تهران کې د طالبانو له سفیر سره د لیدنې پر مهال له سلما بند څخه مشهد ته د اوبو د خوشې کولو غوښتنه کړې ده. هغه همدارنګه د هلمند د سیند د اوبو د حق په اړه هم خبرې کړي.
ملګرو ملتونو د چهارشنبې په ورځ ویلي، چې په غزه کې د دوو کلنو جګړو له امله په هرو پنځو ماشومانو کې یو یې له واکسین څخه بېبرخې شوی. دوی زیاتوي، له واکسین څخه د ماشومانو پاتې کېدل هغوی له وژونکو ناروغیو سره مخ کړي.
د طالبانو د امربالمعروف وزیر خالد حنفي د اسلامي همکاریو سازمان له ځانګړو استازو سره د اسلامي ارزښتونو پر ترویج خبرې وکړې. د طالبانو یاد وزیر د تخنیکي ملاتړ، ظرفیت لوړونې او روزنیزو سیمینارونو غوښتنه کړې.
د پښتونخوا د ملي عوامي پارټۍ مشر وايي، هغه د ټولو هېوادونو سفیرانو ته لیکونه لېږي او له نږدې ورته څرګندوي: «تاسو چې د دې بېاستازي حکومت سره تړونونه کړي، دا د پاکستان خلکو ته د منلو نه دي.» هغه زیاته کړې، د نړۍ خطرناک هېوادونه غواړي دغه سیمې د معدني زېرمو لپاره د جګړې ډګر وګرځوي.
په اسلاماباد کې د تېرې ورځې له ځانمرګي برید یوه ورځ وروسته، د پاکستان لومړي وزیر شهباز شریف د دې هېواد په پارلمان کې هند او افغان طالبان د پاکستان په ترهګریز برید کې پر لاس لرلو تورن کړل.
د امریکا د خزانې وزارت په ایران کې د ۳۲ کسانو او ادارو په ګډون پر متحده عربي اماراتو، ترکیې، چین، هانګ کانګ، هند، جرمني او اوکراین بندیزونه ولګول.
د سريلانکا د کرېکټ ملي لوبډلې لږ تر لږه اته لوبغاړي، پرته له دې چې د «پاکستان او زمبابوې» سره درې اړخیزې سیالۍ ترسره کړي، له پاکستان څخه وتلي دي. دا پرېکړه د سې شنبې په ورځ په اسلاماباد کې له هغه ځانمرګي برید وروسته وشوه، چې په کې ۱۲ کسان ووژل شول.
د طالبانو د افغانستان بانک د نظارت او مالي خدمتونو عمومي امر لطفالله خیرخواه اېمل ولي خان ته په خطاب کې ویلي: «زه تاسو ته مشوره درکوم چې په پوره غور سره فکر او تحلیل وکړئ.» اېمل ولي خان تر دې وړاندې ویلي و، چې افغان طالبان د افغانانو اصلي څېره نه دي.
د بښنې نړۍوال سازمان د چهارشنبې په ورځ (د لړم ۲۱مه) په خپل تازه راپور کې خبرداری ورکړی، چې د نړۍ د فوسیلي سون توکو زیات استعمال د بشري حقونو او د خلکو د ژوند لپاره لوی ګواښ دی.
د پاکستان د خلکو ګوند مشر بلاول بوټو زرداري د دغه هېواد پارلمان ته په خبرو کې ویلي، چې له «ترهګرو سره د مبارزې» لپاره باید د خلکو استازي، حکومت، اپوزیسیون او سیاستوال سره یو موټي شي. نوموړي ویلي، چې پاکستان لا له وړاندې ترهګرو ته ماتې ورکړې.
د پاکستان د دفاع وزیر د طالبانو د اقتصادي مرستیال ملا عبدالغني برادر د څرګندونو په غبرګون کې ویلي، چې د پاکستان او افغانستان ترمنځ د سوداګریزو اړیکو کمول به اسلاماباد ته ګټه ورسوي. هغه وویل، چې له افغانستان سره د اقتصادي اړیکو پرې کېدل به پاکستان ته هېڅ ډول زیان ونه رسوي.
طالبانو د ننګرهار په لعلپورې ولسوالۍ کې «له کور څخه د تېښتې، شراب خرڅولو، لواطت او غلا» په تور د يوې ښځې په ګډون ۱۴ کسان په دُرو وهلي دي. د طالبانو سترې محکمې د چهاشنبې په ورځ (د لړم ۲۱مه) د یوې خبرپاڼې په خپرولو سره ویلي، چې یاد کسان له ۳۰ تر ۳۹ دُرو وهل شوي دي.
د عوامي نشنل ګوند مشر اېمل ولي خان وايي، دا د منلو نه ده چې افغان طالبان دې د افغانستان د ولس اصلي استازیتوب وکړي او نه هم ټيټيپي او پيټيای د پښتونخوا د خلکو نمایندګي کوي. نوموړی زیاتوي، چې دغه ډلې او تحریکونه د لوېدیځ جوړې شوې پروژې دي.
د پخواني جمهوري نظام د ماليې وزیر حضرت عمر زاخېلوال د طالبانو د اقتصادي مرستیال ملا عبدالغني برادر د وروستیو څرګندونو په تړاو ویلي، چې په وچه کې بند هېواد ټرانزیټ د ګاونډي هېواد «امتیاز یا ډالۍ» نه، بلکې د نړیوالو قوانینو او دوه اړخیزو سوداګریزو تړونونو له مخې مشروع حق دی.
د هند حکومت اعلان وکړ، چې د نوي ډیلي موټر چاودنه چې اته تنه یې وژلي او لږ تر لږه ۲۰ نور یې ټپیان کړي، ترهګریزه پېښه ګڼي. د هند ترهګرۍ ضد ملي ادارې (NIA) د پلټنو مسوولیت پر غاړه اخیستی، خو تر اوسه یې تبصره نه ده کړې.
د پښتون ژغورنې غورځنګ مشر منظور احمد پشتین ویلي، چې د پېښور امن جرګه کې د غورځنګ د استازو بې احترامي شوې او هغوی ته د وینا ورکولو اجازه نه ده ورکړل شوي. پشتین ویلي، د جرګې له تالار نه تر وتلو وروسته د غورځنګ د استازو ګرځند ټیلیفونونه بند دي او بیا هېڅ اړیکه ورسره نه ده شوې.
د بې پولې ډاکټرانو نړیوالې ادارې ویلي، چې د ختیځ افغانستان وروستۍ زلزلې زرګونه کسان زیانمن کړي، چې اوس د زلزلهځپلو خلکو ترمنځ دناامیدۍ، ژور خپګان او رواني فشارونو کچه لوړه شوې ده.
پخوانۍ سناتورې او د عبدالرشید دوستم لور راحله دوستم، د طالبانو له خوا د جوزجان پوهنتون له لوحې څخه د ازبکي ژبې پر حذف کیدو غبرګون ښودلی او دا یې د ترک توکمه افغانانو پر هویت د هدفمند فشار برخه بللې ده.
په مسکو کې د طالبانو سفارت وایي چې طالب سفیر مولوي ګل حسن حسن د مسکو د نړیوال هوایي ډګر (دومودیدوو) له مشر اندرې ایوانوف سره کتلي او له افغانستان څخه مسکو ته د اوونیزو الوتنو د پیل په اړه یې ورسره خبرې کړي دي.