آرشیف

په خيبرپښتونخوا کې امنیتي سرچیني وایي، چې د پېښور په حسن خېلو سيمه کې پر يوه کور د ډرون بريد له امله يوه ښځه وژل شوې او پنځه تنه نور ټپيان شوي دي.

د پکتیکا ولایت په جاني خېل ولسوالۍ کې ځایي سرچینو افغانستان انټرنشنل- پښتو ته ویلي، چې طالبانو د تېر جمهوري نظام یو پخوانی ملي پولیس محمد عمر ترور کړی او په ورته وخت کې یې په یحیی خېل ولسوالۍ کې د یو بل پخواني محلي پولیس کور په بمونو الوزولی دی.

د طالبانو دفاع وزارت وایي چې د دوی هوايي ځواکونو په بلوچستان او خیبرپښتونخوا ایالتونو کې د داعـ . ـش پر ګډو مرکزونو هوايي بریدونه کړي دي. د خبرپاڼې له مخې، دا بریدونه نن شپه د پشین ولسوالۍ په سرانان او د خیبرپښتونخوا په قمبرخېلو او چترال سیمو کې شوي دي.

په بلوچستان کې د ډرون بریدونو وروسته، د کابل ښار ځینو اوسېدونکو افغانستان انټرنشنل – پښتو ته ویلې چې د کابل ښار په فضا کې د جېټ الوتکو غږونه اورېدل کېږي. دوی زیاتوي چې طالبان له لاندې څخه پر دغو الوتکو دفاعي ډزې کوي چې د اوسېدونکو اندېښنه یې لا پسې زیاته کړې ده.

افغانستان انټرنشنل – پښتو ته یو شمېر سرچینو ویلي چې د بلوچستان د پښین ولسوالۍ په سرانان سیمه کې دوه ډرون بریدونه ترسره شوي دي. بل لور ته طالبانو ته نږدې رسنۍ «حریت» وایي چې یاد بریدونه د داعـ . ـش او د طالبانو د مخالفو وسله‌والو پر مرکزونو ترسره شوي دي.

د پاکستان تر ولکې لاندې په کشمير کې د ولسي ګډې کاري کمېټې مشر شوکت نواز میر د پولیسو له لوري نیول شوی دی. کشميري چارواکو او ولسي ګډې کاري کمېټې هم د هغه نيول تاييد کړي دي.

په اسټرالیا کې د افغانستان سفیر وحیدالله ویسي د خپل ماموریت په وروستیو ورځو کې د دغه هېواد له لوی والي سام موسټین سره کتلي او په افغانستان کې یې د میلیونونو افغانانو، په ځانګړې توګه د ښځو او نجونو د وضعیت او هیلو په اړه ورسره خبرې کړي.

چینايي کارګرو د تاجکستان او افغانستان پولې ته نږدې د یوې لویې لارې د جوړولو چارې له څو میاشتني ځنډ وروسته بېرته پیل کړې دي. دغه ځنډ د هغو خونړیو پېښو له امله و چې تاجک چارواکو یې پړه په افغانستان کې پر میشتو وسله‌والو ډلو اچوله.

نړیوال بانک وايي، افغانستان د اقتصادي ناورین او جوړښتي محدودیتونو له امله د خوړو امنیت او کارموندنې په برخو کې له جدي ننګونو سره مخ دی. بانک اټکل کړی، چې تر ۲۰۵۰ کال پورې به د خوراکي توکو نړیواله تقاضا ۶۷ سلنه لوړه شي او دا به د افغانستان په څېر هېوادونه لا ترفشار لاندې راولي.

د امریکا سترې محکمې پرېکړه کړې چې هغه ماشومان چې په متحده ایالاتو کې د هغو والدینو څخه زېږېدلي وي چې په غیرقانوني یا موقتي ډول په دغه هېواد کې مېشت دي، د اساسي قانون له مخې د امریکا تابعیت ترلاسه کوي.

د پاکستان د لاهور ښار د کاهنه سیمې د زده کړو په یوه خصوصي مرکز کې د چت د ناڅاپي پرېوتو له امله لږ تر لږه ۱۴ ماشومان مړه شوي دي. د روغتون مسوولینو تایید کړې چې د پېښې له ځایه ۱۹ ماشومان روغتون ته لېږدول شوي، چې له دې ډلې ۱۴ تنه مړه شوي او پاتې پنځه ماشومان ټپیان دي.

په عمان کې د طالبانو تر کنټرول لاندې د افغانستان سفارت وایي، د دغه سفارت سرپرست حافظ عمر د عمان د بهرنیو چارو وزارت د کونسلي چارو له رییس محمد بن ناصر المبسلي سره د افغانانو لپاره د عمان د ویزو د ورکړې د بیا پیل په اړه خبرې کړې دي.

درېیو ځايي سرچینو افغانستان انټرنشنل ته تایید کړې چې د طالبانو استخباراتو په بدخشان کې خپل سیمه‌ییز قوماندان، جمعه، نیولی دی. د سرچینو په وینا، جمعه د سیمې له اغېزناکو سیمه‌ییزو قوماندانانو څخه ګڼل کېږي. د هغه د نیولو لامل تر اوسه نه دی روښانه شوی.

د چین دولتي خبري اژانس «شین‌هوا» راپور ورکړی چې د دغه هېواد د بهرنیو چارو وزیر وانګ یي له خپل سعودي سیال سره په ټلیفوني خبرو کې ټینګار کړی، چې بېجینګ د واشنګټن او تهران ترمنځ د خبرو اترو د بهیر د دوام ملاتړ کوي.

د پاکستان وروستي هوايي بریدونه پر پکتیا، پکتیکا او کونړ یوازې د دوو هېوادونو ترمنځ د سرحدي شخړې یا امنیتي عملیاتو په چوکاټ کې نه شي محدودېدای. تازه د بشري حقونو یو شمېر بنسټونو، سیاستوالو او ټولنیزو فعالانو غوښتنه کړې چې دا بریدونه باید د نسل وژنې له زاویې وڅېړل شي.

د طالبانو د ننګرهار د کور او ښار جوړولو ریاست وایي، د روداتو ولسوالۍ په تور راغه ښارګوټي کې یې راستنو شویو کورنیو ته ۴۵۶ د استوګنې نومرې وېشلې دي.

د امریکا سترې محکمې پرېکړه کړې چې د دغه هېواد ولسمشر ډونالډ ټرمپ کولای شي د اجراییوي څانګې هغه چارواکي له دندو ګوښه کړي چې د ولسمشر له خوا ټاکل شوي وي.

د طالبانو د دفاع وزارت د صحي قوماندانۍ مسوول ډاکټر محمد طاهر احرار وایي، د ټیټ کیفیت له امله یې له پاکستان څخه د درملو واردات منع کړي دي. نوموړي ویلي، پاکستان د افغان ناروغانو اړتیاوې د فشار د وسیلې په توګه کاروي او ادعا یې کړې چې پاکستاني درمل لازم کیفیت نه لري.

د خېبر پښتونخوا د کورنیو چارو محکمې د دیر ولسوالۍ د ۱۵ مطلوبو وسله والو نوی نوملړ خپور کړی او د هغوی د نیولو یا د نیولو په برخه کې د معلوماتو ورکولو په بدل کې یې د میلیونونو کلدارو نغدي انعامونه اعلان کړي دي.

د قطر د بهرنیو چارو وزارت ویاند ویلي، د امریکا ځانګړی استازی سټیو وېټکاف او د ولسمشر ډونالډ ټرمپ زوم جېرېډ کوشنر به دوحې ته ولاړ شي، څو له قطري منځګړو سره د امریکا او ایران د خبرو په اړه سلا مشورې وکړي. هغه زیاته کړې د واشنګټن او تهران ترمنځ به د لوړې کچې کومه لیدنه ترسره نه شي.

د ایران د بهرنیو چارو وزارت ویاند اسماعیل بقايي وايي، تهران په راتلونکو ورځو کې له امریکايي لوري سره په هېڅ کچه د لیدنې پلان نه لري. بقايي د سې‌شنبې په ورځ په یوې خبري غونډه کې وویل، چې په لبنان کې د جګړې پای ته رسول د امریکا ژمنه ده او واشنګټن باید اسراییل هم دې کار ته اړ کړي.