زرګونه افغان کډوال چې د اروپايي هېوادونو په ځانګړې توګه د یونان او بلغاریا له لوري یې د پناه غوښتنې رد شوې، لاهم له ناروښانه برخلیک سره مخ دي. له دې ډلې ډېری یې قانوني اسناد نهلري، نه افغانستان ته ستنېدی شي او نه هم په هغه هېوادونو کې چې اوسېږي د دایمي استوګنې حق ترلاسه کولی شي.
د طالبانو مخالفې ډلې «ازادی جبهې» ادعا کړې، چې په کندوز لایت کې یې د طالبانو پر یوې ګزمې برید کړی چې په پایله کې یې دوه طالبان وژل شوي او یو بل ټپي دی.
د ګډ امنیتي تړون سازمان سرمنشي تولګابېک مسادکوف د تاجکستان او افغانستان د ګډې پولې له بېلابېلو برخو لیدنه کړې. هغه چې د تاجکستان د ولسمشر امامعلي رحمان په بلنه دغه هېواد ته سفر کړی، د تاجکستان او افغانستان پر پوله یې د امنیتي پیاوړتیا پروګرام پلي کېدو بهیر ارزولی دی.
د ملګرو ملتونو د بشري چارو د همغږۍ دفتر (اوچا) وايي، افغانستان د ماینونو د ګواښ له پلوه درېیم هېواد دی چې لاهم د ناچاوده توکو له جدي ګواښ سره مخ دی او د دغه پېښو قربانیان تر ډېره ماشومان دي.
د افغانستان د نورستان ولایت د اشتیوي کلي ښځینه بزګرې وايي، د سختو کاري شرایطو او محدودیتونو سربېره لاهم د خپلو کورنیو د خوړو برابرولو او د کلي د ژوند د دوام لپاره په کرنه بوختې دي.
د بلوچستان ایالت د هرنایي ولسوالۍ د شاهرګ په زرغون سیمه کې ناپېژاندو وسلهوالو د ماړي ګاز شرکت شپږ کارکوونکي تښتولي دي. د پولیسو په وینا؛ ټول تښتول شوي کارکوونکي پښتانه دي او د دمړ قبیلې پورې تړاو لري.
په بشکېک کې د طالبانو سفارت خبر ورکړی، چې د یاد سفارت سرپرست عبدالشکور حقاني د قرغزستان د بهرنیو چارو وزارت د څلورمې سیاسي څانګې له رییس میربېک باکیتوویچ سره د اقتصادي او سوداګریزو اړیکو پر پراختیا او بار وړونکو موټر چلوونکو ته د ویزو پر اسانتیا خبرې کړې دي.
یوشمېر افغان کډوال ادعا کوي، چې افغانستان ته د ستنېدو پر مهال په چمن پنډغالي کې له هغوی څخه په ناقانونه توګه د بډې اخیستو غوښتنه کېږي او که څوک دغه پیسې ورنه کړي؛ نو د بېرته ستنېدو بهیر یې ځنډول کېږي.
د فرانسې د ملي لوبډلې ستوري کیلیان امباپي له سویډن څخه د خپلې لوبډلې د درې پر صفر بریا وروسته وویل، چې د نړۍوال جام د ګولونو ریکارډ ماتول یې لومړیتوب نهدی؛ بلکې تر ټولو مهمه موخه یې د فرانسې اتلولي ده.
د پاکستانۍ مور او افغان پلار زوی کامران په پاکستان کې د خپلې مور د هویت اسنادو د بېرته فعالولو او د قانوني استوګنې د حق ترلاسه کولو لپاره د پېښور سترې محکمې ته عریضه کړې ده.
په دایکنډي کې د طالبانو د کور او ښار جوړولو رییس عصمتالله صالحي وایي، چې د ۶۹۲ راستنو شویو کډوالو کورنیو لپاره یې د استوګنیزو نومرو د وېش لړۍ پیل کړې ده. د هغه په وینا؛ د ۱۱زره او ۳۵۹ راستنو شویو کډوالو نوملړ یې ترلاسه کړی، چې له دې ډلې تر ۵زرو د زیاتو کسانو اسناد بشپړ شوي.
د پاکستان د نيمه پوځي ځواک «اېف سي» بلوچستان څانګې خبر ورکړی، چې د دغه ایالت د چاغۍ ولسوالۍ مرکزي ښار دالبندین اړوند سیاهدک سیمه کې یې د یو لړ عملیاتو پرمهال د انساني قاچاق یوه هڅه شنډه کړې او ۱۱۲ افغانان یې نیولي دي.
په پنجشېر کې د طالبانو د والي ویاند سیفالدین لټون خبر ورکړی، چې په لومړي ځل په دغه ولایت کې د زرغون ګارنېټ ګران بیه ډبرو ۱۳ نمونې د ۲۵۰ امریکايي ډالرو په ارزښت وپلورل شوې. نوموړي زیاته کړې، ورته مهال ۳زره او ۲۹۷ قیراطه زمرد هم پر کورنیو سوداګرو پلورل شوي.
د افغانستان د فوټبال فدراسیون اعلان کړی، چې د هېواد تر ۱۵ کلنو کم عمره د فوټبال ملي لوبډلې د ۱۵ کلنو نړۍوال جام او د ۲۰۲۶کال فیفا فستیوال کې د ګډون جواز ترلاسه کړی دی. دغه سیالۍ د فیفا د بنسټیز فوټبال د پراختیايي پروګرامونو په چوکاټ کې ترسره کېږي.
د امریکا مرستیال ولسمشر جيډي وېنس ویلي چې متحده ایالات له ایران سره په روانو خبرو اترو کې «ټولې برلاسۍ وسیلې» په واک کې لري او د ډونالډ ټرمپ اداره، که ډیپلوماسي بریالۍ شي او که ناکامه، ځان په یوه «ګټونکي» دریځ کې ویني.
د ایران دپارلمان مشر محمدباقر قالیباف ویلي، د ایران پر تیلو د لګول شویو بندیزونو له موقتي لغوه کېدو وروسته، دغه هېواد خپل نفت ۲۰ سلنه په لوړه بیه پلوري.
ایراني رسنیو راپور ورکړی چې سلګونه افغانان د ایران د پخواني مذهبي مشر علي خامنهيي د جنازې په مراسمو کې د ګډون لپاره د مشهد ښار ته د سفر تیاری نیسي. د ایراني چارواکو په وینا، د افغانستان وګړو ته د دغو مراسمو لپاره دوه زره او ۵۰۰ وړیا ویزې صادرې شوې دي.
د نایجریا سیمهییزو چارواکو ویلي چې د دغه هېواد په شمالختیځ کې پر یوه ښوونځي له برید وروسته لږ تر لږه ۳۶ زدهکوونکي او د ښوونځي یو کارکوونکی لا هم د وسلهوالو په بند کې دي.
د افغانستان لپاره د ازبکستان د ولسمشر ځانګړي استازي عصمتالله ایرګاشف په دغه هېواد کې د قطر له سفیر حسن حمزه هاشم سره لیدلي او په افغانستان کې یې د پراختیا او نورو بېلابېلو مسایلو خبرې کړې دي.
د پاکستان پوځ ویلي چې افغان طالبانو د سېشنبې په ورځ د بلوچستان ایالت پر لور څلور «ابتدایي ډرونونه» توغولي دي. دوی ادعا کړې چې دغه اقدام د هغو وسلهوالو ډلو د ملاتړ په چوکاټ کې ترسره شوی چې د اسلاماباد په وینا، د طالبانو تر ولکې لاندې سیمو کې فعالیت کوي.
په خيبرپښتونخوا کې امنیتي سرچیني وایي، چې د پېښور په حسن خېلو سيمه کې پر يوه کور د ډرون بريد له امله يوه ښځه وژل شوې او پنځه تنه نور ټپيان شوي دي.