د اسراییل د دوه کلنې جګړې له امله په غزه کې د روان بشري ناورین سره، سره د توپانونو او سېلابونو اټکل شاوخوا ۹۰۰زره بېځایه شوي فلسطینیان له ګواښ سره مخ کړي دي. د فلسطین د هواپوهنې ادارې د جمعې او شنبې په ورځ په ځینو سیمو کې د سېلابونو د راوتلو خبرداری ورکړی دی.
د طالبانو تر واک لاندې ملي راډیو ټلوېزیون خبر ورکړی، چې تېره ورځ شنبه د (لړم ۲۲مه) له پاکستان نه ۶زره او ۷۱۲ افغانان خپل هېواد ته ستانه کړای شوي دي. همداراز ۹۳۴ افغانان بیا د اسلامکلا او ورېښمو پله له لارې افغانستان ته ستانه شوي دي.
د ملګرو ملتونو د کډوالو عالي کمېشنرۍ (UNHCR) یوه نوې سروې ښيي، چې په پاکستان کې د افغان کډوالو د کورنیو منځنی شمېر د کوربه ټولنې له منځني شمېر څخه په څرګند ډول لوړ دی او د هغوی د سرپرستۍ بار هم خورا دروند دی.
د طالبانو د کډوالو او بېرته راستنېدونکو چارو وزارت خبر ورکړی، چې د روان کال له پیل راهیسې د بندیانو په ګډون تر ۲ مېلیونه او ۴۳۰زره ډېر کډوال په خپله خوښه او جبري توګه له ګاونډیو هېوادونو بېرته افغانستان ته ستانه شوي دي.
د ملګرو ملتونو د ماشومانو د ملاتړ نړۍوال صندوق (یونسېف) وایي، چې په فلیپین کې وروستیو فنګ وونګ توپانونو تر ۱.۷ مېلیونه ډېر ماشومان اغېزمن کړي دي. یاد بنسټ وایي، دغه توپانونو د فلیپین په ۱۶ سیمو کې سرپناوو، ښوونځیو او روغتیایي خدمتونو ته ماشومان له لاسرسي بېبرخې کړي دي.
پاکستانۍ اېکسپرېس ټرېبیون ورځپاڼې جمعه د (لړم ۲۳مه) یو راپور کې ویلي، څېړنو روښانه کړې چې د اسلاماباد قضایي ادارو ته نږدې او د سویلي وزیرستان په واڼه سیمه کې پر پوځي کالج ځانمرګي بریدګر افغان وګړي وو. د دغو بریدونو مسوولیت د «ټيټيپي» وسلهوالې ډلې منلی و.
امریکا په جرمني، اېټالیا او یونان کې مېشتې څلور کیڼ اړخې ډلې د ترهګریزو سازمانونو په توګه اعلان کړې. د امریکا د بهرنیو چارو وزیر مارکو روبیو اعلان وکړ، چې په جرمني کې د «انټيفا اوست» ډله او په یونان او اېټالیا کې درې نورې ډلې د «ځانګړو نړۍوالو ترهګرو» په نوملړ کې اضافه شوې دي.
ننګرهار کې د طالبانو ولایتي رسنیز دفتر وایي، د ملاهبت الله د ځانګړي حکم پر بنسټ د دغه ولایت د ښېوې ولسوالۍ اړوند په ګمبیري دښته کې د کونړ زلزله ځپلو لپاره ۱۰۰۰جریبه ځمکه ځانګړې شوه. دوی وایي، دغه ځمکه کې د استوګنې لپاره پر نقشې هم کار پیل شوی دی.
پاکستاني ځواکونو د خیبر پښتونخوا په کوهاټ او کرک ولسوالیو کې د یو لړ عملیاتو په ترڅ کې ۴ وسلهوال وژلي دي. د کوهاټ په بازید خېلو کې د یادو عملیاتو په ترڅ کې ۳وسلهوال وژل شوي دي.
د روغتیا نړۍوال سازمان په یوه نوي راپور کې ویلي، چې (توبرکلوز) نري رنځ تېر کال له ۱.۲ مېلیونو څخه ډېر کسان مړه کړي او له ۱۰ مېلیونو څخه ډېر کسان بیا په دغې ناروغۍ اخته شوي دي. د نري رنځ ناروغي په نړۍ کې یو له وژونکو ساري ناروغیو څخه ده.
سرچینو افغانستان انټرنشنل ته ویلي، طالبانو د جوزجان پوهنتون له لوحې ازبکي ژبه حذف کړې ده. د طالبانو دغې چارې ګڼ غبرګونونه راپارولي او د پخوانۍ ولسي جرګې غړې فوزیه کوفي وايي، له یادې لوحې یوازې ازبکي ژبه نه، بلکې فارسي هم حذف شوې ده.
د جمهوري نظام د بهرنیو چارو پخواني وزیر محمد حنیف اتمر د ازبکي ژبې سپکاوی او تبعیض د ټولو افغانانو سپکاوی ګڼلی دی. سرچینو افغانستان انټرنشنل ته ویلي، طالبانو د جوزجان پوهنتون له لوحې ازبکي ژبه حذف کړې ده.
د متحدې جبهې مشر جنرال سمیع سادات وایي، څلور ویشت کاله وړاندې په همدې ورځ د نومبر ۱۳مه کابل د طالبانو له واکمنۍ څخه ازاد شو او نوي جمهوریت خپل کار پیل کړ. هغه ادعا کړې چې د جمهوریت له پیل څخه تر پایه د افغان ځواکونو په ګډون ۵۱۳ زره افغانان وژل شوي دي.
د افغانستان لپاره د پاکستان پخواني ځانګړي استازي اصف دراني یوې ایرانۍ رسنۍ ته د یوه لیک په استولو سره ویلي، له طالب وزیرانو یې اورېدلي، چې د دوی مشر هبتالله اخوندزاده پر پاکستان برید «حرام» اعلان کړی دی. د ده په خبره، دغه پرېکړه په ښکاره ډول نه اعلان شوې او نه هم پلې شوې ده.
د ایران د بهرنیو چارو وزیر عباس عراقچي د ملګرو ملتونو سرمنشي انتونیو ګوترېش او د امنیت شورا ته یو رسمي لیک لیږلی او په لیک یې غوښتنه کړې چې د ایران پر اټومي تاسیساتو د اسراییل د جون میاشتې بریدونو په تړاو دې امریکا او اسراییل مسوول وبولي.
د طالبانو له پېښو سره د مبارزې ادارې ویلي، چې د افغان کډوالو د مرستو لپاره له ډنمارک کمېټې سره یې د یو میلیون ۸ سوه ۱۰۹۴ ډالرو په ارزښت د کډو همکاریو هوکړه لاسلیک کړه. طالبانو ویلي، چې په دې سره به د ۵ ولایتونو په ۳۳ ولسوالیو کې خلکو ته اساسي او وقایوي پروژې تطبیق کړي.
د ایران د بهرنیو چارو وزارت ویاند اسماعیل بقایي د جي۷ هېوادونو د بهرنیو چارو وزیرانو وروستي بیان ته غبرګون ښودلی او د ایران په اړه یې د دغې ډلې ادعاوې بېاساسه، نامسوولانه او د نه منلو وړ بللې دي.
بیبيسي ټلویزیون دپنجشنبې په ورځ د امریکا له ولسمشر ډونالډ ټرمپ څخه د هغه د وینا د ایډیټ له امله، بښنه وغوښته. خو بيبيسي د ټرمپ د تاوان غوښتنه رد کړې ده.بيبيسي د ټرمپ وینا داسې ایډیټ کړې وه، چې ګواکې هغه د تاوتریخوالي ملاتړ کړی دی.
د پاکستان د اطلاعاتو وزارت په یوې خبرپاڼه کې ویلي، چې د سوېلي وزیرستان په مرکز واڼه کې پر پوځي پوهنتون برید افغان وسلهوالو کړی دی. یاد وزارت زیاته کړې، چې په برید کې امریکایي وسلې او مهمات کارول شوي دي.
یوه لوړپوړي اسراییلي چارواکي ویلي، هغه مرستې چې متحده ایالات یې هر کال اسراییل ته ورکوي، د امریکا د هغو لګښتونو پرتله چې په افغانستان او منځني ختیځ کې شوي ډېرې کمې دي.
رویټرز د پنجشنبې په ورځ (د لړم ۲۲مه) راپور ورکړی، چې برېتانیا غواړي په «شمالي ویلز» کې خپل لومړی وړوکی اټومي بټۍ جوړه کړي. دغه پرېکړې د امریکا غوسه پارولې، ځکه واشنګتن غوښتل دغه ځای کې د امریکایي شرکتونو په مشرۍ لویه اټومي بټۍ جوړه شي.