د ۲۰۲۶ نړیوال جام د ۱/۱۶ نهایی پړاو (د ۳۲ ټیمونو پړاو) لا نه دی ختم شوی، خو تر اوسه د ۱/۸ نهایی (د غوره ۱۶ پړاو) له اتو لوبو څخه درې لوبې معلومې شوې دي. نورې پنځه لوبې به وروسته د پاتې سیالیو په کېدو سره روښانه شي.
د فرانسې د زرغون ګوند غړو خبر ورکړی چې د جون میاشتې د سختې ګرمۍ څپې د نه مدیریت له امله به د حکومت پر ضد د بېباورۍ یا عدم اعتماد طرح وړاندې کړي. فرانسه راتلونکې اونۍ د سختې ګرمۍ د درېیمې احتمالي څپې لپاره چمتووالی نیسي.
د طالبانو د هرات والي اسلامجار د ددې ډلې د دولتي ادارو له مسوولانو غوښتي چې تشریفاتي او بېپایلې کارونه ودروي او خپل ټول تمرکز د خلکو لپاره د کاري فرصتونو پر رامنځته کولو وکړي. هغه ویلي، خلک تر هر څه ډېر کار او عاید ته اړتیا لري.
د افغانستان کرېکټ بورډ ویلي، چې په خوست کې د شپږیزې کرېکټ لیګ په اډانه کې د مس عینک او سپین غر لوبډلو ترمنځ دویمه لوبه د سخت باران او توپان له امله ځنډېدلې ده.
د طالبانو تر واک لاندې باختر اژانس راپور ورکړی چې د دې ډلې استخباراتو د غور ولایت په شهرک ولسوالۍ کې ۱۶ قلمه تاریخي او لرغوني اثار نیولي او د دغه ولایت موزیم ته یې سپارلي دي.
اسلام اباد او نوي ډیلي له یو بل سره د خپلو بندیانو لېستونه تبادله کړي دي. پاکستان هند ته د ۲۵۰ هندي بندیانو نوملړ سپارلی او هند پاکستان ته د ۴۳۹ پاکستاني بندیانو نوملړ سپارلی دی.
په کندهار کې د موبایلونو یو شمېر پلورونکي او د دغه ولایت اوسېدونکي وايي چې په دولتي ادارو کې پر ځیرکو موبایلونو د طالبانو وروستي بندیز نه یوازې د هغوی کاروبارونه له مالي زیان سره مخ کړي، بلکې د عامو خلکو ورځنۍ چارې یې هم ټکنۍ کړې دي.
د افغانستان بانک د ملګرو ملتونو د پرمختیايي پروګرام (UNDP) له استازي سټیفن روډریګز سره د هغه د دندې د پای ته رسېدو په مناسبت مخه ښه وکړه. په دې ناسته کې دواړو لوریو د وړو مالي تمویلونو، د مالي خدمتونو د پراختیا او د اقتصادي همکاریو د دوام پر اهمیت ټینګار کړی.
دوو لوړ پوړو ایراني سرچینو ویلي چې تهران هوډ لري پر هرمز تنګي خپل کنټرول په نړیواله کچه رسمي کړي او غواړي پر هغو بېړیو چې خلیج ته داخلېږي یا ترې وځي، د تګ راتګ فیسونه وضع کړي.
په افغانستان کې د ایران سفیر، عليرضا بیکدلي ویلي چې تهران غواړي له کابل سره خپلې سوداګریزې او اقتصادي اړیکې پراخې او پیاوړې کړي.
د طالبانو د ریاستالوزرا اداري مرستیال عبدالسلام حنفي وايي، چې ګاونډيان دې خپل پرمختګ د افغانستان په تخریب کې نه لټوي. هغه زیاته کړه :«هغه هېوادونه چې مخکې یې دلته په جګړه کې پانګونه کوله اوس دې د کانونو، انرژۍ او نورو برخو کې پانګونه وکړي، چې دواړه خواوو ته یې ګټه ورسېږي».
د طالبانو عدلیې وزارت خبر ورکړی، چې د ځمکو د غصب مخنیوي او د غصب شویو ځمکو د بېرته راګرځولو کمېسیون لهخوا په سرپل ولایت کې د څړځایونو تر ارزونې وروسته درې مېلیونه، ۹۴۴زره او ۵۶۵ جریبه عامه څړځایونه تثبیت او د ځمکو په بانک کې ثبت شوي دي.
د ناروې د کډوالو شورا وايي، د هغو ټولو مرستو له بودجې څخه چې افغانستان ته د بشري مرستو لپاره اړينه ده؛ يوازې شپږمه برخه تمويل شوې ده.
د طالبانو د اطلاعاتو او کلتور وزیر شیخ شېراحمد حقاني ویلي، چې افغانان د جګړو او بمباریو له سختیو سره عادت شوي او پاکستان نهشي کولای د فشار له لارې افغانستان تسلیم کړي.
یو افغان سندرغاړی چې د طالبانو له بیا واکمنېدو وروسته له محدودیتونو، وېرې او پټ ژوند سره مخ شوی وایي، موسیقي یوازې هنر نه بلکې د خلکو د یووالي، هیلې او د ټولنې د ټپونو رغېدو وسیله ده.
د ملګرو ملتونو د ښځو برخې راپور ښيي، افغانستان لاهم د هغه هېوادونو په ډله کې دی چې د سیاسي جوړښتونو دننه د ښځو د حضور په اړه هېڅ د باور او د وړاندې کېدو وړ احصایه نهلري.
د طالبانو د کورنیو چارو وزارت خبر ورکړی، چې د بامیان ولایت پنجاب ولسوالۍ ته یې د کوچیانو او د ځایي اوسېدونکو ترمنځ د څړځای پر سر د رامنځته شوې شخړې د هواري لپاره ځانګړی پلاوی استولی دی.
د افغانستان کرېکټ بورډ لهخوا د شپږیزې کرېکټ لیګ ۱۱م پړاو سیالۍ د چهارشنبې په ورځ (د چنګاښ ۱۰مه) په خوست کې پیل شوې. د کرېکټ بورډ د معلوماتو له مخې؛ دا لومړی ځل دی چې د شپږیزه کرېکټ لیګ سیالۍ له پلازمېنې کابل نه بهر په یوه ولایت کې ترسره کېږي.
د خیبر پښتونخوا د باجوړ ولسوالۍ د پهاټک څلورلارې سیمه کې ځايي اوسېدونکو د ناامنۍ او د ډرون بریدونو پرضد احتجاج کړی او د باجوړ ـ پېښور لویه لاره یې د هر ډول تګراتګ لپاره تړلې ده.
د بلخ د سوداګرۍ او پانګونې خونې د دارلاانشاء مشر اسدالله اسدي وايي، په ترکیه کې یې د دغه هېواد له سوداګرو سره د ۱۰۰ مېلیون ډالرو په ارزښت سوداګریز تړونونه لاسلیک کړي. هغه زیاته کړې، چې د دغه سفر موخه د کرنې، صنعت، پانګونې او اقتصادي پياوړتیا په برخو کې د بهرنۍ پانګونې جلبول وو.
د طالبانو د ترانسپورت او هوايي چلند وزارت خبر ورکړی، له سعودي عربستان نه د افغان حاجیانو د بېرته ستنېدو بهیر د چهارشنبې په ورځ (د چنګاښ ۱۰مه) د وروستۍ الوتکې له ستنېدو سره چې ۲۵۲ حاجیان پهکې سپاره وو؛ بشپړ شو.